MWAMBĨLĨLYO 45
45
Yosevu ayĩmanyĩthya kũla kwĩ ana‐a‐ĩthe
1Na ĩndĩ Yosevu ndaatonya kwĩyũmĩĩsya mbee wa onthe ala maũngamĩte nake; na aneena na wasya mũnene, Umaalyai kĩla mũndũ aume vaa nĩĩ. O na vaiaaũngama mũndũ vamwe nake, Yosevu akĩĩmanyĩthya kwa ana‐a‐ĩthe. 2Na aĩa na wasya mũnene: na Amisili meew’a, na ala ma nyũmba ya Valao meew’a. 3Na Yosevu amea ana‐a‐ĩthe make, Ninyie Yosevu; nau e o thayũ? Na ana‐a‐ĩthe maiaatonya kũmũsũngĩa; nũndũ maĩ na kĩũũyũ mbee wake. #Meko 7.13. 4Na Yosevu amea ana‐a‐ĩthe, Nĩngũmwĩsũva, thengeeaĩ vakuvĩ nakwa. Na mathengeea. Na asya, Ninyie Yosevu mwana‐a‐ĩthe wenyu, ũla mwathooisye Misili. #Mwa 37.28. 5Na yu ĩndĩ mũikew’e woo, o na mũikethatĩe ene, nũndũ mwanthooisye kũũ: nĩkwĩthĩwa Ngai nĩwandũmie mbee wenyu kũtangĩĩa thayũ. #Mwa 50.20; Sav 105.16,17. 6Nũndũ myaka ĩno ĩlĩ kũnaĩ yũa nthĩ: na vatiele myaka ĩtano, ĩla nthĩnĩ wayo kũtakethĩwa kwĩnza kana kũketha. #Mwa 41.30. 7Na Ngai nĩwandũmie mbee wenyu kũmwiĩa ũtialo kũũ nthĩ, na kũmwovosya na wovosyo mũnene mwĩthĩwe thayũ. #Mwa 41.43. 8Na yu ĩndĩ ti inyw’ĩ mwandũmie kũũ, ĩndĩ nĩ Ngai: na andwie ĩthe wa Valao, na mwĩaĩi wa onthe ma nyũmba yake, na mũsumbĩki ĩũlũ wa nthĩ yonthe ya Misili. 9Ĩkalaatei, mwambate kwa nau, mũmwĩe, Yosevu mwana waku asya ũũ, Ngai nĩwandwie mwĩaĩi wa Misili yonthe: theea kwakwa, ndũkekalange; 10na ũkatũa nthĩ ya Ngoseni, na ũkeethĩwa wĩ vakuvĩ nakwa, we, na ana maku, na esũkũũu, na ndĩthya syaku sya mbũi na malondu, na ndĩthya syaku sya ng’ombe, na syonthe ila wĩ nasyo: #Mwa 46.34. 11na vau ngakũĩthĩsya; ndũkese kwĩthĩwa na ũkya, we, na andũ ma nyũmba yaku, na syonthe ila wĩ nasyo; nũndũ vatiele myaka ĩtano ya yũa. #Mwa 47.12. 12Na, sisya, metho menyu nĩmekwona, na metho ma mwanaa‐mwaitũ Mbenyamini, kana nĩ kanyw’a wakwa ũũneena nenyu. #Mwa 42.23. 13Na mũkatavya nau ũvoo wa ndaĩa yakwa yonthe kũũ Misili, na ũvoo wa onthe ala mwonete: nenyu mũkekalaate kũmũtheesya nau kũũ. #Meko 7.14. 14Na amũvalũkĩla ngingo mwana‐a‐inyia Mbenyamini, na aĩa; na Mbenyamini amũĩĩa ngingonĩ. 15Na amamumunya ana‐a‐ĩthe make onthe, amaĩĩa: na ĩtina wa ũu ana‐a‐ĩthe make maneenan’ya nake.
16Na ũvoo ũsu nĩweew’ĩkie nyũmbanĩ ya Valao, kũineenwa, Ana‐a‐ĩthe ma Yosevu nĩmooka: na Valao endeew’a mũno, o na athũkũmi make. 17Na Valao amwĩa Yosevu, Tavya ana‐a‐au, Ĩkai ũũ: aĩkyai nyamũ syenyu mĩio, na endai, mũthi nthĩ ya Kanaani; 18na mũiosa ĩthe wenyu na andũ ma nyũmba syenyu, na mũimbũkĩa: nakwa ngamũnenga ũseo wa nthĩ ya Misili, na mũkaya ũnou wa nthĩ. #Mwa 47.6. 19Na ĩndĩ nĩweeaĩwa, ĩkai ũũ: mumye makasya nthĩ ya Misili, kwondũ wa syana syenyu nini, na kwondũ wa aka menyu, na mũkamũete au, na mũyũka. 20O na mũikaketeee syĩndũ syenyu; nũndũ ũseo wa nthĩ yonthe ya Misili nĩ wenyu.
21Na ana ma Isilaeli meeka o ta ũu: na Yosevu amanenga makasya, kwĩanana na mwĩao wa Valao, na amanenga lĩu wa nzĩanĩ. 22Nao onthe anenga kĩla mũndũ ngũa sya ũkũan’ya; ĩndĩ Mbenyamini amũnenga ilungu maana atatũ sya vetha, na ngũa sya ũkũan’ya katano. #2 Asu 5.22,23. 23Na atwaĩa ĩthe ta ũũ: mang’oi ĩkũmi makuĩthĩtw’e syĩndũ nzeo sya Misili, na mang’oi maka ĩkũmi makuĩthĩtw’e lĩu wa mbaa ngetha na imũtũ na kya ũya kya ithe kya nzĩanĩ. 24Na ĩndĩ amea ana‐a‐ĩthe mathi, na makũsya: na amea, Sisyai mũikatetan’ye mwĩ nzĩanĩ. 25Na mambata kuma Misili, na malika nthĩ ya Kanaani kwa Yakovo ĩthe woo. 26Na mamũtavya, makyasya, Yosevu e o thayũ, nake nĩ mũsumbĩki ĩũlũ wa nthĩ yonthe ya Misili. Na ngoo yake yakw’a, nũndũ ndaametĩkĩla. 27Na mamũtavya ndeto syonthe sya Yosevu, ila wamatavĩtye: na yĩla wonie makasya ala maetetwe nĩ Yosevu sya kũmũkua, veva wa Yakovo ĩthe woo wavuũka: #Mwa 45.19. 28na Isilaeli asya, Nũũ; Yosevu mwana wakwa e o thayũ: ngaenda ngamwone ndanakw’a.
Currently Selected:
MWAMBĨLĨLYO 45: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
