MWAMBĨLĨLYO 46
46
Yakovo na ana make makĩthi Misili
1Na Isilaeli aenda kyalo na syonthe ila waĩ nasyo, na avika Mbeeli‐sieva, na athembea Ngai wa ĩthe wake Isaka nthembo. #Mwa 26.23–25. 2Na Ngai aneena na Isilaeli mawoninĩ ma ũtukũ, na amwĩa, Yakovo, Yakovo. Nake asũngĩa, Nĩ vaa. #Mwa 15.1; Yovu 33.14,15. 3Na amwĩa, Ninyie Ngai, Ngai wa ĩthe waku: ndũkakĩe kũtheea Misili; nĩkwĩthĩwa nyie ngakũtw’ĩkĩthĩsya mbaĩ nene kũu: #Mwa 12.2; 28.13; Kũt 26.5. 4nyie ngatheea vamwe naku kũvika Misili; nakwa vate ndĩi ngakwambatya ĩngĩ: na Yosevu akailĩĩla kw’oko kwake methonĩ maku. #Mwa 28.15; 50.24; Kuma 3.8. 5Na Yakovo ookĩla auma Mbeeli‐sieva: na ana ma Isilaeli makua Yakovo ĩthe woo na makasya ala Valao waetie mamũkue, e na syana syoo nini, na aka moo. #Mwa 45.27. 6Na moosa indo syoo, na ũthwii woo, ũla moosie nthĩ ya Kanaani, na mavika Misili, Yakovo, na ũsyao wake w’onthe vamwe nake: #Yos 24.4; Sav 105.23; Isa 52.4; Meko 7.15. 7ana make, na esũkũũe, vamwe nake, na eĩtu make, na esũkũũe make eĩtu, na ũsyao wake w’onthe athi vamwe naw’o kũvika Misili.
8Na aa nĩo masyĩtwa ma ana ma Isilaeli, ala mookie Misili, Yakovo na ana make: Leuveni, ĩkithathi ya Yakovo. #Kuma 1.1–5; 6.14–16. #Mot 26.5,6; 1 Mav 5.1–3. 9Na ana ma Leuveni: Anoki, na Valu, na Esiloni, na Kalimi. 10Na ana ma Simeoni: Yemueli, na Yamini, na Oati, na Yakini, na Nzooali, na Sauli mwana wa mũndũ mũka Mũkanaani. #Mot 26.12,13; 1 Mav 4.24. 11Na ana ma Livai: Ngelisoni, na Koathi, na Melali. #Mot 26.57; 1 Mav 6.1. 12Na ana ma Yuta: Eeli, na Onani, na Siela, na Velesi, na Nzela; ĩndĩ Eeli na Onani nĩmakw’ĩĩe nthĩ ya Kanaani. Na ana ma Velesi maĩ Esiloni na Amuli. #Mwa 38.7,10; 1 Mav 2.3–5. 13Na ana ma Isakali: Tola, na Vuva, na Yovu, na Similoni. #1 Mav 7.1. 14Na ana ma Nzevuluni: Seletu, na Eloni, na Yaleeli. #Mot 26.26. 15Aa nĩo ana ma Lea, ala wamũsyaĩe Yakovo Vatani‐alamu, vamwe na mwĩĩtu wake Ndina: syuu syonthe sya ana make na eĩtu make syaĩ mĩongo ĩtatũ na itatũ. #Mwa 29.32–35; 30.17–21. 16Na ana ma Ngati: Nzivioni, na Aki, na Suni, na Esevoni, na Eeli, na Aloti, na Aleli. #Mot 26.15–17. 17Na ana ma Aseli: Imina, na Isiva, na Isivi, na Mbelia, na Selaa mwĩĩtu‐wa‐inyia woo; na ana ma Mbelia: Eeveli, na Malikieli. #Mot 26.44–46; 1 Mav 7.30,31. 18Aa nĩo ana ma Ngiliva, ũla Lavani wamũnengie Lea mwĩĩtu wake; na amũsyaĩa Yakovo asu, syuu ikũmi na thanthatũ. #Mwa 29.24; 30.10–13. 19Ana ma Lakeli mũka wa Yakovo: Yosevu na Mbenyamini. 20Na nthĩ ya Misili Yosevu asyaĩwe Manase na Evalaimu, ala Asenathi, mwĩĩtu wa Voti‐vela mũthembi wa Oni, wamũsyaĩe. #Mwa 41.50–52. 21Na ana ma Mbenyamini: Mbela, na Mbekeli, na Asiveli, na Ngela, na Naamani, na Ei, na Losi, na Muvimu, na Uvimu, na Aliti. #Mot 26.38–40; 1 Mav 6.7,12. 22Aa nĩo ana ma Lakeli, ala masyaĩwe Yakovo: syuu syonthe syaĩ ĩkũmi na inya. 23Na ana ma Ndani: Usimu. #Mot 26.42. 24Na ana ma Navitali: Yaseeli, na Nguni, na Yeseli, na Silemu. #Mot 26.48–49; 1 Mav 7.13. 25Aa nĩo ana ma Mbila, ũla Lavani wamũnengie Lakeli mwĩĩtu wake, na aa nĩo wamũsyaĩe Yakovo: syuu syonthe syaĩ mũonza. #Mwa 29.29; 30.5–8. 26Syuu syonthe ila syookie Misili vamwe na Yakovo, ila syaumie kĩnyunyuni kyake, eka aka ma ana ma Yakovo, syuu syonthe syaĩ mĩongo thanthatũ na thanthatũ; 27na ana ma Yosevu, ala wasyaĩwe Misili, syaĩ syuu ilĩ: syuu syonthe sya nyũmba ya Yakovo, ala malikile Misili, syaĩ mĩongo mũonza. #Kuma 1.5; Kũt 10.22; Meko 7.14.
Yakovo na ana make me nthĩ ya Misili
28Na atũma Yuta mbee wake kwa Yosevu, amũtongoesye kũvika Ngoseni; na mavika nthĩ ya Ngoseni. 29Na Yosevu aseũvya ĩkasya yake ya kĩũsumbĩ, na ambata amũthaũe Isilaeli ĩthe wake, kũvika Ngoseni; na eeyonan’ya kwake, na amũvalũkĩla ngingo, na aĩĩa ngingonĩ yake ĩvinda ĩasa. 30Na Isilaeli amwĩa Yosevu, Yu ĩndĩ nĩkw’e, nĩkwĩthĩwa nĩnakwona ũthyũ waku, kana wĩ o thayũ. #Lk 2.29,30. 31Na Yosevu amea ana‐a‐ĩthe, na andũ ma nyũmba ya ĩthe, Nyie nĩngwambata, nĩmũtavye Valao, nĩmwĩe, Ana‐a‐asa makwa, na andũ ma nyũmba ya asa, ala maĩ nthĩ ya Kanaani, nĩmambũkĩe; 32na andũ asu nĩ aĩthi, nĩkwĩthĩwa wĩa woo waĩ kũĩthya; na nĩmaetie ndĩthya syoo sya mbũi na malondu na ndĩthya syoo sya ng’ombe, na syonthe ila me nasyo. 33Na kũkeethĩwa, yĩla Valao wĩmwĩta, na kũkũlya, Wĩa wenyu nĩ mwaũ? 34Inyw’ĩ mwĩasya, Athũkũmi maku nĩ aĩthi kuma wana witũ kũvika o na yu, ithyĩ, o na aasa maitũ: nĩ kana mwĩkale nthĩ ya Ngoseni; nũndũ kĩla mũĩthi nĩ ũthatyo kwa Amisili. #Mwa 37.12; 43.32; Kuma 8.26.
Currently Selected:
MWAMBĨLĨLYO 46: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
