MATHAYO 21
21
Kũlika kwa ndaĩa kwa Yesũ mũsyĩ wa Yelusaleme
(MALIKO 11.1–11; Luka 19.28–40; YOANA 12.12–19)
1Na yĩla mathengeeie Yelusaleme, na mavika Vethivake, kĩĩmanĩ kya Mĩthata, nĩvo Yesũ watũmie amanyĩw’a elĩ, 2aimea, Endai mũsyĩ ũla ũmwelekele, na kavinda o kau nĩmũkwona ĩng’oi yovetwe, na ndena nayo: thasyai, mũndetee. 3#Mt 26.18.Na ethĩwa mũndũ o na wĩva akamwĩa ũndũ, asyai, Mwĩaĩi e vata nayo; na oyu nũnũũmũnenga yo. 4Na ũu weethĩĩwe, nĩ kana kwĩanĩw’e ũla waneeniwe nĩ mwathani, akyasya,
5 #
Nzek 9.9; Isa 62.11. Mũtavyei mwĩĩtu wa Saioni,
Sisya Mũsumbĩ waku nĩwũkĩte kwaku,
Nĩ mũuu, atũlĩte ĩng’oi,
O ndena, ndena ya ĩng’oi.
6Na ala amanyĩw’a mathi, meeka o tondũ Yesũ ũmeaĩe, 7na maete ĩng’oi, na ndena, na mamailĩĩla ngũa syoo; na asyĩkalĩla. 8#2 Asu 9.13.Na ala aingĩ ma ĩkomano yĩu malan’ya ngũa syoo nzĩanĩ; na angĩ matema tũũvonge twa mĩtĩ, malan’ya nzĩanĩ. 9#Sav 118.25,26; 2 Sam 14.4.Na makomano ala maendie mbee wake, na ala mamũatĩĩe, mookĩlya wasya mũnene, makyasya, Hosana, mwana wa Ndaviti: nĩ mũathime ũla wũkĩte syĩtwanĩ ya Mwĩaĩi; Hosana, ku ĩũlũ mũno. 10Na alika Yelusaleme, ndũa yonthe yavũavũana, ĩkyasya, Ũũ nũũ? 11#Mt 21.46.Na ala makomano masya, Ũũ nĩwe Yesũ, ũla mwathani wa Nasaleti ya Kalilii.
Aithesya ĩkalũ
(MALIKO 11.15–19; Luka 19.45–48; YOANA 2.13–22)
12Na Yesũ avota ĩkalũnĩ ya Ngai, amakuthũa onthe ala mathooasya na kũthooa ĩkalũnĩ, na ang’uthũlanga mesa sya ala meũvunzya mbesa, na ivĩla sya ala meũthoosya mavũĩ; 13#Isa 56.7; Yel 7.11.na amea, Nĩkũandĩkĩtwe, Nyũmba yakwa ĩkeetwa nyũmba ya kũvoyea: ĩndĩ inyw’ĩ mwĩmĩtw’a ngunga ya avutani. 14Na ililinda na ala mathuaa mooka vala ũĩ ĩkalũnĩ; na amavosya. 15#Sav 118.25.Ĩndĩ athembi anene na aandĩki moona moseng’yo ala weka, na syana iineena na wasya mũnene ĩkalũnĩ, ikyasya, Hosana, mwana wa Ndaviti; mathata, 16#Sav 8.2.na mamwĩa, Nũkwĩw’a ũndũ aa mekwasya? Na Yesũ amea, Ĩĩ: mũtyaamba ũsoma, Kuma makanyw’anĩ ma syana na tũũkenge ndaĩa nĩyeanĩie? 17Na amatia, na auma ndũanĩ ĩsu athi Vethania, na akoma kw’o.
Mũkũyũ nthata
(MALIKO 11.12–14,20–26)
18Na kĩoko asyokete ĩla ndũanĩ, eew’a nzaa. 19#Lk 13.6.Na oona mũkũyũ ũtee wa nzĩa, athi vo, na eethĩa ndwĩ kĩndũ ate o matũ mathei; na awĩa, Kũikethĩwe ũsyao kwaku kuma yu o na tene na tene. Na oyu ũla mũkũyũ wooma. 20Na ala amanyĩw’a moona ũu, maseng’a, makyasya, Mũkũyũ ũũ wooma ata oyuyu? 21#Mt 17.20.Na Yesũ asũngĩa, amea, Nĩ w’o nĩngũmwĩa, Ethĩwa mwĩ na mũĩkĩĩo, na mũikethĩwa na nzika, mũikeka ũndũ ũũ wa mũkũyũ w’oka, ĩndĩ o na ethĩwa mũkatavya kĩĩma kĩĩ, Kuwa nokĩkw’a ũkanganĩ, ũkeekwa. 22Na maũndũ onthe, o ala mũketya mũkĩvoya, mũkĩtĩkĩla, mũkoosa.
Ũkũmũ wa Yesũ ũisukwa vala wumĩte
(MALIKO 11.27–33; Luka 20.1–8)
23 #
Yoa 2.18. Na avota ĩkalũnĩ, athembi anene na atumĩa ma andũ mooka vala ũĩ akĩmanyĩsya, na masya, Wĩkaa maũndũ aa na ũkũmũ wĩva? Na nũũ ũla ũkũnengete ũkũmũ ũũ? 24Na Yesũ asũngĩa na amea, Nakwa nĩngũmũkũlya ũkũlyo ũmwe, na mwandavya, nakwa nĩngũmũtavya ũkũmũ ũla ũtumaa nĩka maũndũ aa. 25Ũvatisi wa Yoana waumie va? Waumie ĩtunĩ kana waumie andũnĩ? Na masũanĩa ene kwa ene, makyasya, Ethĩwa nĩtũkwasya, Waumie ĩtunĩ; etwĩa, Nĩkĩ ĩndi mũtaamwĩtĩkĩla? 26#Mt 14.5.Ĩndĩ ethĩwa nĩtũkwasya, Waumie andũnĩ; nĩtũũkĩa ĩkomano; nũndũ andũ onthe nĩmeesĩ Yoana nĩ mwathani. 27Na mamũsũngĩa Yesũ, masya, Tũtyĩsĩ. Nake amea, O nakwa ndimũtavya ũkũmũ ũla ũtumaa nĩka maũndũ aa.
Ngelekan’yo ya ana elĩ
28Ĩndĩ mwĩona ata? Mũndũ ũmwe aĩ na ana elĩ; na athi vala ve ũla wa mbee, na asya, Mwana wakwa, thi ũmũnthĩ ũkatethye wĩa mũũndanĩ wa mĩsavivũ. 29#Mt 7.21.Na asũngĩa, asya, Ndithi: ĩndĩ ĩtina eelila, na athi. 30Na athi vala ve ũla wa kelĩ, na asya o ta ũu. Nake asũngĩa, asya, Nĩngũthi vwana: na ndaathi. 31#Lk 18.14.Nĩ wĩva wa asu elĩ ũla wekie kwenda kwa ĩthe wake? Masya, Nĩ ũla wa mbee. Yesũ amea, Nĩ w’o nĩngũmwĩa, kana aumya ma koti na malwaya nĩmavotaa ũsumbĩnĩ wa Ngai mbee wenyu. 32#Lk 7.29.Nũndũ Yoana nĩwokie kwenyu na nzĩa ya ũlũngalu, na mũtyaamwĩtĩkĩla; ĩndĩ aumya ma koti na malwaya nĩmamwĩtĩkĩlile: nenyu mwoona ũu, o na ĩtina mũtyaaĩlila, nĩ kana mũmwĩtĩkĩle.
Ngelekan’yo ya mũũnda wa mĩsavivũ
(MALIKO 12.1–12; Luka 20.9–19)
33 #
Mt 25.14. Ĩthukĩĩsyei ngelekan’yo ĩngĩ: Kwaĩ mũndũ mwene wa nyũmba, nake avandie mũũnda wa mĩsavivũ, na oothyũlũlũkya wiio, enza katĩ waw’o ĩima ya ũangĩa nzavivũ, na aaka mwako mũtũlu wa mũnyoolo, na oonenga aĩmi mamũĩmĩe, nake athi ũeni nthĩ ĩngĩ. 34Na ĩvinda ya ũsyao, yathengeea, atũma ngombo syake kwa ala aĩmi, inengwe mosyao maw’o. 35Na ala aĩmi makwata ngombo syake, na ĩmwe mamĩkũna, na ĩngĩ mamyũaa, na ĩngĩ mamĩkimanga na mavia. 36Na atũma ĩngĩ ngombo ingĩ mbingĩ kwĩ ila sya mbee; na masyĩka o ta ũu. 37Ĩndĩ ĩtina atũma mwana wake kwoo, akyasya, Makamũtaĩa mwana wakwa. 38#Mt 27.18.Ĩndĩ aĩmi moona ũla mwana, masya ene kwa ene, Ũũ nĩwe mũtiĩwa; ũkai tũmũae, twose ũtiĩwa wake. 39Na mamũkwata, mamwĩkya ũtee wa mũũnda wa mĩsavivũ, na mamũaa. 40Yĩla ĩndĩ mwene wa mũũnda wa mĩsavivũ ũkoka, akameka ata aĩmi asu? 41Mamwĩa, Akamananga naĩ andũ asu athũku, na akanenga aĩmi angĩ mũũnda ũsu wa mĩsavivũ, ala makamũnenga mosyao ĩvindanĩ yamo. 42#Sav 118.22,23; Meko 4.11; Alo 9.33; 1 Vet 2.6–8.Yesũ amea, Mũtyaamba ũsoma maandĩkonĩ,
Ĩvia yĩla yaleilwe nĩ aki, Yĩu yatw’ĩkie yĩla ĩnene ya kĩkotonĩ; Ũu nĩwaumie kwa Mwĩaĩi, Naw’o nĩ ũseng’yo methonĩ maitũ?
43Kwondũ wa ũu nĩngũmwĩa, Ũsumbĩ wa Ngai ũkaumw’a kwenyu, na ũkanengwa mbaĩ ĩsyaaa mosyao maw’o. 44#Nda 2.34,35,44,45.Na ũla wĩvalũka ĩũlũ wa ĩvia yĩĩ akavevenzeka: ĩndĩ o ũla yĩmũvalũkĩla, akatumbatumbĩka anyaĩĩke ta kĩtoo. 45Na athembi anene na Avalisi meew’a ngelekan’yo syake, mamanya kana nĩmo meũwetwa. 46Na makĩmantha kũmũkwata, makĩa makomano, nĩkwĩthĩwa mamwonaa e mwathani.
Currently Selected:
MATHAYO 21: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
