MATHAYO 25
25
Ngelekan’yo ya eĩtu ĩkũmi
1 #
Lk 12.35,36; Ũvu 19.7. Na ĩndĩ ũsumbĩ wa ĩtu ũkethĩwa ũilyĩ ta eĩtu ĩkũmi, ala moosie mataa moo, na maumaala mathi kũmũthaũa mũtwaani. 2Na atano moo maĩ atumanu, na atano maĩ oĩ. 3Nũndũ ala atumanu, yĩla moosie mataa moo, matyaakua mauta vamwe nao: 4ĩndĩ ala oĩ nĩmakuie mauta mĩionĩ yoo vamwe na mataa moo. 5Ĩndĩ mũtwaani ekalanga, onthe mombosya na makoma. 6Ĩndĩ ũtukũ katĩ kwaĩ wasya mũnene, Sisyai, mũtwaani nĩwũkĩte! Umaalai mũmũthaũe. 7Na ĩndĩ eĩtu asu onthe mookĩla, maseũvya mataa moo. 8Na ala atumanu mamea ala oĩ, Tũnengei mauta amwe menyu; nũndũ mataa maitũ nĩmeũvoa. 9Ĩndĩ ala oĩ masũngĩa, makyasya, Aiee, no kwĩthĩwa matetwĩanĩa ithyĩ nenyu: kavaa mũthi kwa ala mathooasya, mũkethooee ene. 10Nao maendete kũthooa, mũtwaani ooka; na ala meyũmbanĩtye mavota vamwe nake mbokanĩ ya mũtwaano: na mũomo wavingwa. 11#Lk 13.25,27.Ĩtina eĩtu ala angĩ mooka, makyasya, Mwĩaĩi, Mwĩaĩi, tũvingũĩe. 12#Mt 7.23.Ĩndĩ asũngĩa, asya, Nĩ w’o nĩngũmwĩa, ndimwĩsĩ inyw’ĩ. 13#Mt 24.42.Syaĩĩsyai ĩndĩ, nũndũ mũtyĩsĩ mũthenya kana saa.
Ngelekan’yo ya talendi
(Luka 19.11–27)
14 #
Mt 21.33. Nũndũ nĩ ta mũndũ akĩthi kyalo nthĩ ĩngĩ, ũla wetie ngombo syake mwene, na ainenga ũthwii wake. 15#Alo 12.6.Anenga ĩmwe mbesa sya talendi itano, na ĩngĩ sya talendi ilĩ, na ĩngĩ sya talendi ĩmwe; kĩla ĩmwe kwĩanana na ũtonyi wayo; na athi kyalo. 16Oyu ĩla yosie talendi itano yathi yatethya wĩa nasyo, na yatandĩthya talendi ingĩ itano. 17No ta ũu ĩla yosie ilĩ nayo yatandĩthya ingĩ ilĩ. 18Ĩndĩ ĩla yosie ĩmwe yathi yenza nthĩ, yavitha mbesa sya vwana wayo. 19Na ĩndĩ ĩtina wa ĩvinda ĩasa vwana wa ngombo isu ooka, na atalana nasyo. 20Na ĩla yosie talendi itano yooka na yaetanĩsye na talendi ingĩ itano, ĩkyasya, Vwana, nĩwanengie talendi itano: sisya, nĩnĩtandĩthĩtye talendi ingĩ itano 21#Mt 25.23; Mt 24.45–47; Lk 16.10.Vwana wayo amĩtavya, Nĩwĩkĩte nesa, ngombo nzeo na ĩla yĩ na kĩthito: waĩ na kĩthito ĩũlũ wa syĩndũ mbũthũ, ngakwia ĩũlũ wa syĩndũ nyingĩ; lika ũtanunĩ wa vwana waku. 22Na ĩla yosie talendi ilĩ yooka na yasya, Vwana, nĩwanengie talendi ilĩ: sisya, nĩnĩtandĩthĩtye talendi ingĩ ilĩ. 23#Mt 25.21.Vwana wayo amĩtavya, Nĩwĩkĩte nesa ngombo nzeo na ĩla yĩ na kĩthito: waĩ na kĩthito ĩũlũ wa syĩndũ mbũthũ, ngakwia ĩũlũ wa syĩndũ mbingĩ; lika ũtanunĩ wa vwana waku. 24Na ĩla yosie talendi ĩmwe yooka na yasya, Vwana, nĩnakũmanyie kana wĩ mũndũ mũmũ, ũkethaa vala ũtaavuĩa, na wũmbanasya vala ũtaanyaĩĩkya; 25nakwa nakĩa, nathi navitha talendi yaku nthĩ; sisya, wĩ na kĩla kyaku. 26Ĩndĩ vwana wayo asũngĩa na amĩtavya, We ngombo nthũku na ndulu, nĩweesĩ kana nĩkethaa vala ndaavuĩa, na kũmban’ya vala ndaanyaĩĩkya; 27nĩwaĩlwe ĩndĩ nĩ kũmatwaĩa ala ma vengi mbesa syakwa, na nooka ngyosa ila syakwa vamwe na ũtandĩthyo wasyo. 28Osai ĩndĩ talendi yayo, mũmĩnenge ĩla yĩ na talendi ĩkũmi. 29#Mt 13.12.Nũndũ o ũla wĩ na kĩndũ akanengwa, na akaingĩvĩw’a: ĩndĩ ũla ũte na kĩndũ, akoosewa o na kĩla wĩ nakyo. 30#Mt 8.12.Na ngombo ĩno ĩtaĩle mĩkyei kĩvindunĩ nza: vo vakethĩwa kĩĩo na kũvevetan’ya maeo.
Mũthenya wa Ũsilĩlo
31 #
Mt 16.27; Nzek 14.5; Ũvu 20.11–13. Ĩndĩ yĩla Mwana wa mũndũ ũkoka ũtheunĩ wake mũtisu, na alaĩka onthe vamwe nake, nĩvo ũkekalĩla kĩvĩla kya ũsumbĩ kya ũtheu wake mũtisu: 32#Alo 14.10.na mbee wake nikomban’wa mbaĩ syonthe: nake nũkamavathan’ya aa na aya, tondũ mũĩthi ũvathanasya malondu na mbũi; 33#Esek 34.17.na nũkaia malondu ngalĩ ya kw’oko kwake kwa aũme, ĩndĩ mbũi ngalĩ ya kw’oko kwake kwa aka. 34Na ĩndĩ Mũsumbĩ nũkamea ala me ngalĩ ya kw’oko kwake kwa aũme, Ũkai inyw’ĩ mũathimĩtwe nĩ Asa wakwa, osai ũsumbĩ ũla mwaseũvĩw’e kuma mwambĩlĩlyo wa nthĩ: 35#Isa 58.7.nũndũ naĩ na nzaa, na mwanenga kya ũya; naĩ na waũni, na mwanenga kya ũnyw’a; naĩ mũeni, na mwanthokya; 36naĩ mũthei, na mwambw’ĩka; naĩ mũwau, na mwooka ũnzisya; naĩ kolokolonĩ, na mwooka vala naĩ. 37#Mt 6.3.Nĩvo ala alũngalu makamũsũngĩa, makyasya, Mwĩaĩi, nĩ ĩndĩĩ twakwonie wĩ na nzaa, twaũnenga kya ũya? Kana wĩ na waũni, na twaũnenga kya ũnyw’a? 38Na nĩ ĩndĩĩ twakwonie wĩ mũeni, na twakũthokya? Kana wĩ mũthei, na twakũvw’ĩka? 39Na nĩ ĩndĩĩ twakwonie wĩ mũwau, kana wĩ kolokolonĩ, na twooka vala waĩ? 40#Nth 19.17; Aevl 2.11.Na Mũsumbĩ akasũngĩa na kũmea, Nĩ w’o nĩngũmwĩa, O ũndũ mwamwĩkie ũmwe wa ana‐a‐asa aa makwa, o na ala anini, mwambĩkie nyie. 41#Mt 7.23.Nĩvo ũkamea asu nao ala me ngalĩ ya kw’oko kwake kwa aka, Umai vaa nĩĩ, inyw’ĩ mwaumanĩwe, mũthi mwakinĩ wa tene na tene ũla waseũvĩw’e Satani na alaĩka make: 42nũndũ naĩ na nzaa, na mũtyaanenga kya ũya; naĩ na waũni, na mũtyaanenga kya ũnyw’a; 43naĩ mũeni, na mũtyaanthokya; naĩ mũthei, na mũtyaambw’ĩka; naĩ mũwau, na naĩ kolokolonĩ, na mũtyaaũka kũnzisya. 44Na ĩndĩ asu nao makasũngĩa, makyasya, Mwĩaĩi, nĩ ĩndĩĩ twakwonie wĩ na nzaa, kana wĩ na waũni, kana wĩ mũeni, kana wĩ mũthei, kana wĩ mũwau, kana wĩ kolokolonĩ, na twalea ũkũtethya? 45Nĩvo ũkamasũngĩa, akyasya, Nĩ w’o nĩngũmwĩa, O ũndũ mũtaamwĩka ũmwe wa aa anini, mũtyaambĩka nyie. 46#Yoa 5.29; Nda 12.2.Na asu makathi makalika thĩnanĩ wa tene wa tene; ĩndĩ ala alũngalu makalika thayũnĩ ũtathela.
Currently Selected:
MATHAYO 25: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
