MALIKO 6
6
Yesũ ailewa Nasaleti
(MATHAYO 13.53–58; Luka 4.16–30)
1Na auma vo; na athi nthĩ ĩla ya kwoo; na amanyĩw’a make mamũvikĩla. 2#Yoa 7.15.Na mũthenya wa savato wavĩka, ambĩlĩlya kũmanyĩsya ĩsinakokenĩ: na aingĩ makĩmwĩw’a maseng’a, makyasya, Mũndũ ũũ aumĩtye maũndũ aa va? Na, Ũĩ ũũ nĩ mwaũ ũla ũnengetwe mũndũ ũũ, o na mavinya aa mekwĩkwa na moko make? 3Ũũ ti ũla mũseũvya wa mbwaũ, mwana wa Meli, na mwana‐a‐inyia wa Yakovo, na Yose, na Yutasi, na Simoni? Na eĩtu‐a‐inyia mati kũũ kwitũ? Na malulutĩkw’a nĩwe. 4Na Yesũ amea, Mwathani ndalea kwĩthĩwa na ndaĩa, ate o nthĩ yake mwene, na mbaĩnĩ yake, na nyũmbanĩ yake. 5#Mko 6.13.Na ndaatonya kwĩka wĩko wĩ vinya vo, ate o kũmailĩĩla moko make andũ awau avũthũ, na kũmavosya. 6Na aseng’a nũndũ wa kũlea kwĩtĩkĩla kwoo.
Na anganga mĩsyĩ akĩmanyĩsya.
Ũtũme wa amanyĩw’a ikũmi na elĩ
(MATHAYO 10.5–15; Luka 9.1–6)
7 #
Lk 10.1. Na ameta kwake ala ĩkũmi na elĩ, na ambĩlĩlya kũmatũma elĩ na elĩ; na amanenga ũkũmũ ĩũlũ wa maveva mavuku; 8na ameaĩa maikakue kĩndũ kya nzĩanĩ, ate o ndata yoka; vate kĩmũtũ, kana mũvuko, kana mbesa ngusunĩ syoo; 9ĩndĩ mekĩe iatũ: na asya, Mũikekĩe itonyeo ilĩ. 10Na amea, O vala mwĩvota nyũmba, mwĩĩkala vo kũvika o yĩla mwĩvauma. 11Na o ũla ũteũmũthokya na kũmwĩw’a, mũkyũma vo, tuangai kĩtoo kĩla kĩ maũũnĩ menyũ wĩthĩwe ũkũsĩ kwoo. 12Na maumaala mathi, na matavan’ya kana andũ maalyũle ngoo. 13#Yak 5.14,15.Na maumya ndaimoni nyingĩ, na makiitya andũ aingĩ mauta ala maĩ awau, na mamavosya.
Kĩkw’ũ kya Yoana Mũvatisi
(MATHAYO 14.1–12; Luka 9.7–9)
14 #
Lk 3.19,20. Na mũsumbĩ Elote eew’a ũvoo ũsu; nũndũ syĩtwa ya Yesũ nĩyeesĩkĩwe: na asya, Yoana ũla Mũvatisi nũthayũũkĩte kuma akw’ũnĩ, na kwondũ wa ũu mavinya aa metethya wĩa nthĩnĩ wake. 15Ĩndĩ angĩ masya, Nĩ Eliya. Na angĩ masya, Nĩ mwathanĩ, o ta ũmwe wa athani. 16Ĩndĩ Elote eew’a asya, Yoana ũla namũtilile mũtwe, nĩwe ũthayũũkĩte. 17Nũndũ Elote mwene aĩ anatũma andũ na akamũkwata Yoana, akamwova kolokolonĩ kwondũ wa Elotia, mũka wa mwana‐a‐inyia wake Vilivu; nũndũ nĩwamũtwaĩte. 18#Ali 18.16.Nũndũ Yoana amũtavisye Elote, Kũtyosana na mĩao we kwĩthĩwa na mũka wa mwana‐a‐mwenyu. 19Na ĩndĩ Elotia aĩ na ũthũ nake, na nĩwendaa kũmũaa; na ndaatonya; 20nũndũ Elote nĩwamũkĩaa Yoana, nĩkwĩthĩwa nĩwesĩ kana nĩ mũndũ mũlũngalũ na mũtheu, na nĩwamũsũvĩaa. Na amwĩw’a nĩwasaanĩaw’a nĩ maũndũ maingĩ; ĩndĩ amwĩthukĩĩasya na mũyo. 21Na mũthenya waĩle wavika, Elote amavokea mboka ya mũthenya wa kũsyawa kwake, na ameta eaĩi ma kwake, na maovisa ma asikalĩ, na andũ me nguma ma Kalilii; 22na mwĩĩtu wa Elotia ũsu alika na asũnga, amwendeesya Elote na ala mailyĩ lĩunĩ vamwe nake; na mũsumbĩ amwĩa ũla mwĩĩtu, Mbĩtya o kĩla ũkwenda na nĩngũũnenga. 23#Est 5.3,6.Nake eevĩta, amwĩa, O kĩla wĩmbĩtya ngakũnenga, kũvika nyunzu ya ũsumbĩ wakwa. 24Na aumaala, amũkũlya inyia wake, Nĩmwĩtya kyaũ? Na asya, Mũtwe wa Yoana ũla Mũvatisi. 25Na oyu alika na mĩtũkĩ vala ve mũsumbĩ, amwĩtya, akyasya, Nĩngwenda ũnenge oyu mũtwe wa Yoana ũla Mũvatisi, wĩ ĩsaaninĩ. 26Na mũsumbĩ eew’a woo mũno; ĩndĩ kwondũ wa mawĩvĩto make, na kwondũ wa ala mailyĩ lĩunĩ, ndaaĩtĩkĩla kũmũvata. 27Na oyu mũsũmbĩ atũma mũsikalĩ ũmwe wa asũvĩi make, na eeaa mũtwe wake ũetwe: na athi amũtila mũtwe, e kolokolonĩ, 28na aete mũtwe wake wĩ ĩsaaninĩ, oonenga ũla mwĩĩtu; na mwĩĩtu anenga inyia wake. 29Na amanyĩw’a ma Yoana meew’a ũvoo, mooka moosa kimba kyake, mathika mbũanĩ.
Kũsyoka kwa amanyĩw’a
(MATHAYO 14.13–14; Luka 9.10)
30 #
Lk 9.10; 10.17. Na atũmwa mamũmbanĩa Yesũ; na mamũtavya maũndũ onthe, o ala meekie, na ala mamanyĩisye. 31Na amea, Ũkai inyw’ĩ mwĩ inyw’oka vandũ vate andũ, mũthũmũe vanini. Nũndũ kwaĩ aingĩ mokĩte na maendete, na matyaĩ na ũthei o na wa kũya. 32Na mathi ngalawanĩ me oka vandũ vate andũ, 33Na andũ mamona maendete, na aingĩ mamamanya, na masemba vo na nyaĩĩ maũmĩte ndũanĩ syonthe, na mamba ũvika. 34#Mot 27.17; Esek 34.5; Mt 9.36.Na Yesũ aũma ngalawanĩ oona ĩkomano ĩnene, na amew’ĩa andũ tei, nĩkwĩthĩwa mailyi ta malondũ mate na mũĩthi: na ambĩlĩlya kũmamanyĩsya maũndũ maingĩ.
Kũvũnĩthw’a kwa andũ ngili itano
(MATHAYO 14.15–21; Luka 9.11–17; YOANA 6.1–13)
35 #
Mko 8.1–9. Na yĩla kwatwie kũtuka, amanyĩw’a make mooka vala ũĩ, mamwĩa, Vaa tũĩ nĩ weũnĩ, na nĩkũtwie kũtuka; 36ũmbũũkya aa, nĩ kana mathi ndee na mĩsyĩ kũũ na kũũ makethooee liu. 37Indĩ asũngĩa, amea, Manengei lĩu e inyw’ĩ. Na mamũkũlya, Tũende tũkathooe imũtũ sya silingi maana elĩ, tũkamanenge maye? 38Na amasũngĩa, Mwĩ na imũtũ syĩana? Endai mũsisye. Na mamanya masya, Nĩ itano, na makũyũ elĩ. 39Na ameaĩa mekalye onthe nthĩ nyekinĩ nziũ, ngũthũ na nguthu. 40Na mekala nthĩ mĩkw’ĩlĩ, kũmwe ĩana na kũngĩ mĩongo ĩtano. 41#Mko 7.34.Na oosa ila imũtũ itano na ala makũyũ elĩ, na ang’elela ĩtunĩ aithima na aitilanga ila imũtũ; na anenga amanyĩw’a mamaaĩe; na ala makũyũ elĩ amaaĩa onthe. 42Na onthe maya mavũna. 43#Kũt 28.5.Na moosa ilungu ila ndile, ikavũ ĩkũmi an ilĩ syausũa, na sya makũyũ namo. 44Na ala maĩe ila imũtũ maĩ aũme ngili itano.
Yesũ akinyĩle ũkanganĩ ĩũlũ
(MATHAYO 14.22–33; YOANA 6.16–21)
45Na oyu amathing’ĩĩsya amanyĩw’a make malike ngalawanĩ, mambe kũinganĩsya mũingo ũla ũngĩ, kũvika Vethisaita, ĩvinda yĩla we mwene ũnũkũmbũũkya makomano. 46Na amatiĩa ũvoo athi kĩĩmanĩ kũvoya. 47Na kwavika wĩoo ĩla ngalawa yaĩ ũkanganĩ katĩ, nake aĩ weka ku mwaĩo. 48Na amona makĩthĩna nĩ ũtwaa ngalawa, nũndũ kĩseve nĩkyamathaũĩtye, ta ũsyaĩĩsyo wa kana wa ũtũkũ athi vala maĩ, akinyĩle ũkanganĩ ĩũlũ; na enda kũmavĩta: 49ĩndĩ mo mamwona akinyĩle ũkanganĩ ĩũlũ, matalĩthya kana nĩ ĩimũ, na makaya; 50nũndũ onthe nĩmamwonie, na maũũya. Ĩndĩ oyu aneena nao, na amea, Ĩthĩwai na ũnyiau: ninyie; mũikakĩe. 51#Mko 4.39.Na ambata vala maĩ ngalawanĩ; na kĩseve kyakilya: na maseng’a mũno nthĩnĩ woo; 52nũndũ maiaamanya ũndũ wa ila imũtũ, ĩndĩ ngoo syoo syaĩ nyũmũ.
Yesũ aivosya ala awau Kenesaleti
(MATHAYO 14.34–36)
53Na mainga mavika nthĩ ya Kenesaleti, na moova ngalawa ũtee wa ũkanga. 54Na mauma ngalawanĩ, oyu andũ mamũmanya, 55na masemba makoman’ya nthĩ ĩsu yonthe, na mambĩlĩlya kũkua na mokomo moo ala maĩ awau, mamaete vala meewie ũĩ. 56#Mko 5.27,28; Meko 5.15; 19.11,12.Na kw’onthe kũla wavotie, mĩsyĩ, kana ndũanĩ kana ndee, mamaia ala awau ing’ang’anĩ, na mamwĩsũva makiite o na ethĩwa no ũtiivo wa ngũa yaye; nao onthe ala mamũkiitie mavow’a vyũ.
Currently Selected:
MALIKO 6: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
