MALIKO 7
7
Yesũ aisũngĩa ũnyungunyĩsyo wa ũlea kũatĩĩa mokũũ ma atumĩa
(MATHAYO 15.1–20)
1Na Avalisi na amwe ma aandĩki ala maumĩte Yelusaleme mamũmbanĩa, 2#Lk 11.38.na moona amwe ma amanyĩw’a make makĩya lĩu woo na nzaa mbuku, nasyo nĩ ila ite nthambye. 3(Nũndũ Avalisi na Ayuti onthe, makĩkwata mokũũ ma atumĩa, matiĩsaa matathambĩte nzaa mũno; 4na mauma kĩng’ang’anĩ, matathambĩte matiya; na ve maũndũ angĩ maingĩ ala makothaa kũkwata, ta kũthambya ikombe, na mbisũ, na mĩio ya ũthũku.) 5Na ĩndĩ ala Avalisi na aandĩki mamũkũlya, Nĩkĩ amanyĩw’a maku matikinyaa kwĩanana na mokũũ ma atumĩa, ĩndĩ nĩmaĩsaa lĩu woo na nzaa mbuku? 6#Isa 29.13.Na amea, Isaia nĩwathanie nesa ũndũ wenyu angangan’ya, o ũndũ kũandĩkĩtwe,
Andũ aa nĩmandaĩaa na ilomo syoo,
Ĩndĩ ngoo syoo syĩ kũasa nakwa.
Ĩndĩ manthaithaa ũthaithi wa mana,
7Makĩmanyĩsya momanyĩsyo, nao nĩ mawĩaĩo ma andũ.
8Nĩmũtiaa mĩao ya Ngai, na kũkwataa mũno mokũũ ma andũ, ta kũthambya mbisũ na ikombe: na maũndũ maingĩ ta asu nĩmwĩkaa. 9Na amea, Nĩmũleaa vyũ ĩla mĩao ya Ngai nĩ kana mwĩkalae na mokũũ menyu, 10#Kuma 20.12; 21.17; Kũt 5.16.Nũndũ Mose aisye, Taĩa au na mwenyu; na, Ũla ũnũkũuma ĩthe kana nyinyia, nakw’e: 11ĩndĩ inyw’ĩ mwĩasya, Ethĩwa mũndũ akamwĩa ĩthe kana nyinyia, Kĩndũ o na kĩva kĩla naĩ ndonya ũkũnenga nĩ Kolivani, naw’o nĩ kwasya, Nĩkĩnengetwe Ngai; 12inyw’ĩ mũtiĩtĩkĩla ĩngĩ akamũtethya ĩthe kana nyinyia na ũndũ; 13nĩmũkwananga ndeto ya Ngai kwondũ wa mokũũ menyu, ala mũtianĩaa: na maũndũ maingĩ ta asũ nĩmwĩkaa. 14Na ayĩta ĩkomano yũke vala ũi ĩngĩ, na ayĩa, Mbĩthukĩĩsyai inyw’onthe, mũmanye: 15#Meko 10.14,15.vai kĩndũ kĩ ũtee wa mũndũ kĩla kĩkĩlika nthĩni wake kĩtonya kũmũvukya; ĩndĩ maũndũ ala maumaa nthĩnĩ wake, nĩmo mamũvukasya ũla mũndũ. 16(Ethĩwa mũndũ e na matũ ma kwĩw’a, nĩew’e.) 17Na atia ĩkomano, alika nyũmba, amanyĩw’a make mamũkũlya ũndũ wa ĩla ngelekan’yo. 18Na amea, Inyw’ĩ nenyu mũti na ũmanyi? Mũtiũmanya kana o kĩla kĩ ũtee wa mũndũ kyamũlika mũndũ, kĩitonya kũmũvukya; 19nũndũ kĩivotaa ngoonĩ, ĩndĩ ĩvunĩ yake, na nĩkĩũmĩwa? Asya ũu, atheisye sya ũya syonthe. 20Na asya, Ũndũ ũla wumaa nthĩnĩ wa mũndũ, nĩw’o ũvukasya mũndũ. 21Nũndũ kuma nthĩnĩ, ngoonĩ sya andũ, nĩkw’o kumaa malilikano mathũku, mawathavu, mong’ei, maũaani, molaalaĩ, 22mawendi, mothũku, mokengani, mĩmeo mĩthũku, itho ĩthũku, kũumana, wĩyĩan’yo, ũtumanu: 23maũndũ asu onthe mathũku maumaa nthĩnĩ, na nĩmo mavũkasya mũndũ.
Kũvow’a kwa mwĩĩtu wa Andũ‐ma‐mbaĩ‐ingĩ
(MATHAYO 15.21–28)
24Na auma vo, athi mĩvakanĩ ya Tile na Sitoni. Na avota nyũmba na ndendaa ũmanyĩke nĩ mũndũ; na ndaatonya kwĩvitha. 25Ĩndĩ oyu mũndũ mũka, ũla kelĩtu kake kaĩ na veva mũvuku, eew’a ũvoo wake, ooka na amũvalũkĩla maũũnĩ make. 26Na ũla mũndũ mũka aĩ Mũkiliki ũko wa Silovonike. Na amwĩsũva amumĩsye mwĩĩtu wake ĩla ndaimoni. 27Na amwĩa, Ieke syana syambe ũvũna: nũndũ ti ũseo kwosa lĩu wa syana na kũwĩkĩsya ngitĩ. 28Ĩndĩ we asũngĩa, amwĩa, Ĩĩ, Mwĩaĩi; ĩndĩ o na ngitĩ syĩ ungu wa mesa niĩsaa tũlungu tũla tũũvalũkangw’a nĩ syana. 29Na amwĩa, Kwondũ wa ndeto ii enda; ndaimoni nĩyumie mwĩĩtunĩ waku. 30Na enũka, na amwĩthĩa mwana akomete ũkomonĩ, na ĩla ndaimoni nĩyumie.
Kũvow’a kwa mũndũ mwau matũ, na wavũvũtaa
(MATHAYO 15.29–31)
31Na ĩngĩ auma mĩvakanĩ ya Tile, avĩtĩla Sitoni, athi kũvika ũkanga wa Kalilii, avĩtĩle katĩ wa mĩvaka ya Ndekavoli. 32#Mko 5.23.Na mamũetee ũmwe mwau matũ, na wavũvũtaa; na mamwĩsuva amwilĩĩle kw’oko kwake. 33#Mko 8.23.Na amwosa e weka amũvanthan’ya na ĩkomano, na amwĩkĩa syaa syake matũnĩ make, na atw’ĩla mata, na akiita ũĩmĩ wake; 34#Mko 6.41; Yoa 11.41.na ang’elela ĩtunĩ avevũũka, na amwĩa, Evavatha, ũalyũlo nĩ, Vingũka. 35Na matũ make mavingũka, na kĩla kyoovete ũĩmĩ wake kyathaw’a, na aneena nesa. 36#Mko 1.43–45.Na ameaĩa maikatavye mũndũ: ĩndĩ o ũndũ wongeleele kũmeaĩa, now’o mongeleele mũno kũtavan’ya. 37#Isa 35.5.Na maseng’a ũndũ ũtathimĩka, makyasya, Nĩwĩkĩte maũndũ onthe nesa; nũtumaa o na ala au matũ mew’a, na ala mataaneena maneena.
Currently Selected:
MALIKO 7: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
