Kuma 10
10
Ngai Aikany'a Andũ ma Misili kwa Kũmaetee Ngie
1Mwĩai Ngai nĩweeie Mwose atĩĩ, “Enda kwa mũsumbĩ nũndũ nĩnĩtumĩte we, na anini make methĩwa na ngoo mbũmũ nĩ kana nonany'e maũndũ ma kũseng'ya katĩ woo, 2na o ta ũu nĩ kana ũtavasye syana na nzũkũlũ syaku ũndũ nĩkĩte andũ ma Misili maũndũ ma kũtelemya, na kwonany'a maũndũ ma kũseng'ya katĩ woo, nĩ kana o nenyu mũkamanyaa kana ninyie Mwĩai Ngai.” 3Kwoou Mwose na Alũni nĩmaendie kwa mũsumbĩ na mamwĩa atĩĩ, “Mwĩai Ngai wa Aevelania eũkũlya, ‘Wĩĩkala ĩvinda yĩana ata ũleete kwĩnyivya vala nĩĩ? Lekya andũ makwa mathi makanthaithe. 4Nĩkwĩthĩwa walea kũlekya andũ makwa mathi, ũnĩ ngaete ngie ĩũlũ wa nthĩ yaku. 5Ngie isu ikeethĩwa syĩ mbingĩ wĩthĩe vai vandũ mũndũ wona mũthanga. Ikaya kyonthe kĩla kĩtaneeanangwa nĩ ĩla mbua ya mavia, na kũya mĩtĩ yonthe ĩla yĩ kĩthekanĩ kyaku. 6Ikalika nyũmbanĩ syaku syonthe, sya anini maku, na sya andũ ma Misili syusũe ki. Ũsu ũkeethĩwa nĩ ũndũ ũtaaoneka nĩ asyai kana aaũmae maku kuma kũsyawa kwoo kũvika ũmũnthĩ.’ ” Nĩvo ĩndĩ Mwose waumie vala ve mũsumbĩ.
7Anini ma mũsumbĩ nĩmamwĩie atĩĩ, “Mũndũ ũũ eendeea kũtũnenga thĩna kũvika ĩndĩĩ? Ekana na andũ ma Ĩsilaeli mathi makathaithe Mwĩai Ngai woo. Kũvika o nayu ndũnamanya kana nthĩ ya Misili nĩ mbanangĩku?”
8Kwoou Mwose na Alũni nĩmeetiwe masyoka vala ve mũsumbĩ nake amea atĩĩ, “Endai mũkathaithe Mwĩai Ngai ũsu wenyu, ĩndĩ naaũ katĩ wenyu ala mekũthi?”
9Mwose nĩwasũngĩie mũsumbĩ amwĩa atĩĩ, “No nginya tũthi ithyonthe; syana na andũ ala akũũ, anake na eĩtu maitũ, mbũi na malondu, na ng'ombe sitũ nĩkwĩthĩwa nĩtwaĩlĩte kũseũvya mboka tũmũnenge Mwĩai Ngai ndaĩa.”
10Mũsumbĩ nĩwameie atĩĩ, “Nĩngũmanya kana Mwĩai Ngai e vamwe nenyu, ethĩwa nĩngũmũeka mũthi vamwe na iveti na syana syenyu! Kwa w'o inyw'ĩ mwĩ na mosũanĩo ma kwĩka maũndũ mathũku. 11Vaitonyeka! Endai aũme mwĩ inyw'oka mũkathaithe Mwĩai Ngai, nũndũ ũu nĩw'o mũkwenda.” Mwose na Alũni nĩmalũngilw'e mauma vala ve mũsumbĩ.
12Mwĩai Ngai nĩweeie Mwose atĩĩ, “Tambũũkya kw'oko kwaku ĩũlũ wa nthĩ ya Misili nĩ kana ngie syũke na kũya tũmĩtĩ tw'onthe tũla twĩ nthĩ ya Misili na kyonthe kĩla kĩtaanangwa nĩ ĩla mbua ya mavia.” 13Kwoou Mwose nĩwookĩlilye ndata yake ĩũlũ wa nthĩ ya Misili, na Mwĩai Ngai aete ĩũlũ wa nthĩ ĩsu kĩseve kya kwananga kyumĩte wumĩlonĩ wa syũa. Kĩseve kĩu kyauutanie mũthenya na ũtukũ ũsu, na kũikya kyeethĩwa kĩetie ngie. 14#Ũvu 9.2-3 Ngie isu nĩsyookie nthĩ ya Misili syausũa kĩla vandũ. Ngie singĩvĩte ũu iyaaoneka na iikoneka ĩngĩ. 15Syausũĩte kĩla vandũ ũkethĩa nthĩ ĩsu yoonekaa yĩ nziũ. Nĩsyaĩe tũmĩtĩ tw'onthe twa nthĩ ĩsu vamwe na matunda ma mĩtĩ ĩla ĩtaa anangwa nĩ ĩla mbua ya mavia. Vai kĩndũ kĩũ o na kĩmwe kyaatiala; mũtĩ kana kamũtĩ o na keva nthĩ yonthe ya Misili.
16Nĩvo ĩndĩ Mũsumbĩ watũmanie Mwose na Alũni mĩtũkĩ na amea atĩĩ, “Nĩnĩvĩtĩtye mbee wa Mwĩai Ngai, Ngai wenyu na o ta ũu ngamũvĩtĩsya inyw'ĩ o nenyu. 17Kwoou ndekeai naĩ ĩsu ĩvinda o yĩĩ yĩmwe tũ na mũivoya Mwĩai Ngai, Ngai wenyu ambetangĩe ũkany'o ũũ ũtonya kũete kĩkw'ũ.” 18Mwose nĩwaumie vala ve mũsumbĩ na avoya Mwĩai Ngai. 19Nĩvo ĩndĩ Mwĩai Ngai waetie kĩseve kingĩ kuma ũthũĩlonĩ wa syũa kyakua ngie isu syonthe na kũsyĩkya ũkanganĩ wĩtawa Ũkanga Mũtune. Vai ngie o na ĩmwe yaatiala nthĩ ya Misili. 20Ĩndĩ Mwĩai Ngai nĩwaekie mũsumbĩ aendee kwĩthĩwa e na ngoo mbũmũ, na alea kũlekya andũ ma Ĩsilaeli mathi.
Ngai Aikany'a Andũ ma Misili kwa Kũmaetee Kĩvindu kya Ngokomi
21Mwĩai Ngai nĩwaneenie na Mwose amwĩa atĩĩ, “Tambũũkya kw'oko kwaku ũkwelekelye matunĩ nĩ kana kĩvindu kĩkamu ki kĩthĩwe nthĩ ya Misili.” 22#Sav 105.28; Ũvu 16.10 Kwoou Mwose nĩwatambũũkisye kw'oko kwake akwelekelye matunĩ na kweethĩwa kĩvindu kĩkamu ki nthĩ ĩsu ya Misili vandũ va mĩthenya ĩtatũ. 23Vai Mũmisili waĩ atonya kwona ũla ũngĩ kana kuma vala waĩ akathi vandũ vangĩ vandũ va mĩthenya ĩsu ĩtatũ. Ĩndĩ vala andũ ma Ĩsilaeli mekalaa vaĩ kyeni.
24Mũsumbĩ nĩwatũmanie Mwose na amwĩa, “Endai mũkathaithe Mwĩai Ngai wenyu. O ta ũu nĩmũtonya kũendany'a na iveti na syana syenyu, ĩndĩ tiai mbũi na malondu, na indo syenyu.”
25Ĩndĩ Mwose nĩweeie mũsumbĩ atĩĩ, “No nginya wĩtĩkĩle tũthi na indo sitũ, nĩ kana tũkamumĩsye Mwĩai Ngai, Ngai waitũ nthembo, na nthembo sya kũvĩvw'a. 26Twaĩlĩte kũthi vamwe na ng'ombe sitũ, tũtekũtia o na ĩmwe. Twĩthi nasyo nĩ kana tũkamũthaithe Mwĩai Ngai, Ngai waitũ kwa kũnyuva imwe syasyo tũmũthembee, nũndũ tũyĩsĩ nĩ nyamũ yĩva tũũthi kũmũthembea nginya tũvike kw'o.” 27Ĩndĩ Mwĩai Ngai nĩwaekie mũsumbĩ aendee kwĩthĩwa na ngoo mbũmũ, na alea kũlekya andũ ma Ĩsilaeli mathi. 28Nĩvo ĩndĩ mũsumbĩ weeie Mwose atĩĩ, “Uma vaa nĩĩ ũthi vyũ, o na ndũkaaĩtĩkĩle twonany'e metho ĩngĩ nĩ naku, nĩkwĩthĩwa mũthenya ũla twĩonana, ngakũaa.”
29Mwose amwĩa, “Ũu waneena nĩw'o, tũikonana nĩ naku ĩngĩ.”
Currently Selected:
Kuma 10: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
