Kuma 25

Nthembo ya kwaka Ĩeema Ĩtheu

(Kuma 35.4-9)

1Mwĩai Ngai nĩwaneenie na Mwose amwĩa atĩĩ, 2“Tavya andũ ma Ĩsilaeli mambumĩsye nthembo. Osa nthembo o na yĩva ĩla mũndũ waumya kwa ngenda yake. 3Ii nĩsyo syĩndũ ila wĩosa ta nthembo kuma kwoo: Thaavu, silĩva, na kyũma kĩtawa mbulonzi; 4ngũa sya mbuluu, sya langi wa nzambalaũ, ingĩ ndune mũno, na ingĩ itumĩtwe na ndii nzeo ndũmu mbokothe; ngũa sya w'ĩa wa mbũi, 5ithuma sya ndũũme ikundĩtw'e langi mũtune, ithuma nzeo mbololo; mbwaũ sya mũtĩ wa mũea; 6mauta ma taa; syĩndũ sya kũnyungya nesa mauta ma kwĩtĩkĩsya andũ, na ma ũvani wĩ mũuke mũseo; 7mavia ma thooa mũnene metawa onekisi na angĩ ma kwendeesya ma kũtumĩĩwa ngũanĩ ya ĩũlũ ya Mũthembi ũla Mũnene na ngusunĩ yake ya kwoveea kĩthũi. 8Tavya andũ mambakĩe Ĩeema ĩtheu nĩ kana nĩkalanasye namo. 9Seũvya Ĩeema yĩu na kũyĩkĩa syĩndũ kwĩanana na ũelesyo ũla ngũũnenga.

Ĩsandũkũ ya Ũtianĩo

(Kuma 37.1-9)

10“Seũvya ĩsandũkũ ya mbwaũ sya mũtĩ wa mũea, yĩna ũasa wa mita ũmwe na sendimita ĩkũmi, ũthanthau wa sendimita mĩongo thanthatũ na thanthatũ, na ũtũlu wĩanene na ũthanthau. 11Yũmbĩĩe thaavu mũthei nthĩnĩ na nza, na ũiyĩkĩa ndeenĩ syayo thaavu ũyĩlingĩlĩte. 12Seũvya ngome inya sya thaavu na ũisyĩkĩa maũũnĩ ana mayo; ngome ilĩ ngalĩko ĩmwe na isu ingĩ ilĩ ngalĩko ĩla ĩngĩ. 13Seũvya mĩtĩ kuma mũtĩnĩ wa mũea na ũimyũmbĩĩa thaavu. 14Ĩkĩa mĩtĩ ĩsu ila ngomenĩ syĩ ndeenĩ wa ĩsandũkũ kwondũ wa kũyĩkua. 15Mĩtĩ ĩsu ĩkekalaa ngomenĩ sya ĩsandũkũ yĩu; ndĩkaaumw'e vo. 16Ĩkĩa ĩsandũkũnĩ yĩu masengea elĩ ma mavia, ala maandĩkĩtwe ĩla mĩao.

17 # Aevl 9.5 “Seũvya ngunĩko#25.17 ngunĩko: kana wĩkalo wa tei ya thaavu ĩla nĩ vandũ va Ngai va kũekeaa naĩ, yĩna ũasa wa sendimita ĩana na ĩkũmi na ũthanthau wa sendimita mĩongo thanthatũ na thanthatũ. 18Seũvya mavisa elĩ ma syũmbe syĩ nthwau syĩtawa akelũvi sya thaavu mũtumbatumbe, syĩthĩwe mĩthyanĩ ya ngunĩko ĩsu. 19Seũvya ĩvisa ya kyũmbe kĩmwe mũthyanĩ ũmwe, na ĩvisa ya kyũmbe kĩla kĩngĩ mũthyanĩ ũla ũngĩ. Syũmbe isu syĩthĩwe ikwatanĩte na ĩla ngunĩko mĩthyanĩ ĩsu ĩlĩ. 20Syũmbe isu nĩsyĩthĩwe itambũũkĩtye nthwau, ikavw'ĩka ngunĩko ĩsu. Syĩthĩwe isianĩtye na syelekelye ũthyũ ngunĩkonĩ ĩsu. 21Ĩkĩa ala masengea elĩ ma mavia ĩsandũkũnĩ yĩu, na ũyilĩĩla ĩla ngunĩko ĩũlũ wayo. 22Vau ngunĩkonĩ ĩũlũ, katĩ wa syũmbe isu ilĩ syĩ nthwau, ila syĩ ĩũlũ wa Ĩsandũkũ ya Ũtianĩo, ngakomanĩaa naku vo, na ngĩũnenga mĩao yakwa yonthe kwondũ wa andũ ma Ĩsilaeli.

Mesa ya Kwilĩĩla Mĩkate Ĩthembeetwe Ngai

(Kuma 37.10-16)

23“Seũvya mesa ya mbwaũ sya mũtĩ wa mũea yĩna ũasa wa sendimita mĩongo nyanya na nyanya, ũthanthau wa sendimita mĩongo ĩna na inya, na ũtũlu wa sendimita mĩongo thanthatũ na thanthatũ. 24Myũmbĩĩe thaavu mũthei na ũimĩkĩa ndeenĩ syayo thaavu ũmĩlingĩlĩte. 25Athĩĩa ũtiivonĩ wayo ũvwaũ wĩ na ũthanthau wa sendimita nyanya na kũmbĩĩa thaavu wĩlingĩlĩte ũvwaũ ũsu. 26Seũvya ngome inya sya thaavu na kũsyĩkĩa ndeenĩ sya maũũ ana ma mesa ĩsu. 27Ngome isu syaĩlĩte kwĩthĩwa vakuvĩ na ũtiivo nĩ kana ikwatae mĩtĩ ya kũkua mesa ĩsu. 28Seũvya mĩtĩ ĩsu kuma mũtĩnĩ wa mũea na kũmyũmbĩĩa thaavu, na ĩkatũmĩkaa kwa kũkua mesa ĩsu. 29Seũvya masaani, mbakũli sya kwĩkĩa ũvani, ngilasi sya kwĩkĩa ndivai, na mbakũli itũmĩawe kwa kũthemba ndivai. Syĩndũ isu syonthe iseũvw'e na thaavu mũthei.

30 # Ali 24.5-8 “Mesa ĩsu yiwe mbee wa Ĩsandũkũ ya Ũtianĩo, na kĩla ĩvinda vayĩthĩawa ĩũlũ wayo mĩkate ĩthembetwe kwondũ wakwa.

Kĩndũ kya Kwilĩĩla Taa

(Kuma 37.17-24)

31“Seũvya kĩndũ kya kwilĩĩla taa kya thaavu mũthei. Ĩtina yakyo, na kĩla kĩũngamĩtye kĩndũ kĩu iseũvw'e na thaavu mũtumbatumbe. Ikombe, mĩthya na malaa makyo syĩthĩwe ikwatene nakyo. 32Kĩthĩwe na mbonge thanthatũ; itatũ kuma ngalĩko ĩmwe, na ila ingĩ itatũ kuma ngalĩko ĩla ĩngĩ. 33Ikombe itatũ iseũvĩtw'e ta malaa ma mũtĩ wĩtawa mũlosi me na tũmatũ twamo, nĩsyĩthĩwe ũvongenĩ ũmwe, na ikombe itatũ ũvongenĩ ũla ũngĩ. Ũu wĩthĩwe kwa mbonge syonthe thanthatũ ila syumĩte kĩndũnĩ kĩu kya kwilĩĩla taa. 34Kĩla kĩũngamĩtye kĩndũ kĩu kya kwilĩĩla taa nĩkĩthĩwe na malaa ana ma kũkyanakavya mailyĩ ta malaa ma mũtĩ wa mũlosi me na tũmatũ twamo. 35Ĩtũ yĩmwe ya ĩlaa yĩthĩwe ungu wa mbonge ilĩ sya mbee ila syumĩte kĩndũnĩ kĩu, ĩtũ ya kelĩ ungu wa mbonge ila ingĩ ilĩ, na ĩtũ ya katatũ yĩyĩthĩwa ungu wa mbonge ila ingĩ ilĩ; syonthe vamwe nĩ mbonge thanthatũ. 36Matũ, mbonge, na kĩndũ kĩu kya kwilĩĩla taa syĩthĩwe ikwatene na iseũvĩtw'e na thaavu mũthei mũtumbatumbe. 37Seũvya taa mũonza sya kĩndũ kĩu kya kwilĩĩla taa na ũisilĩĩla ĩũlũ wakyo nĩ kana imulĩkae mbee wakyo. 38Syĩndũ sya kũvosya taa na masaani ma kwĩkĩa mũu wa ndambi, syĩthĩwe iseũvĩtw'e na thaavu mũthei. 39Tũmĩa kĩlo mĩongo ĩtatũ na itano sya thaavu mũthei kũseũvya kĩndũ kĩu kya kwilĩĩla taa na syĩndũ isu ingĩ syonthe. 40#Meko 7.44; Aevl 8.5 Sisya wiseũvye kwĩanana na mũseũvĩlye ũla ũkwonw'a wĩ kĩĩmanĩ.”

Currently Selected:

Kuma 25: KAMBA

Highlight

Compare

Copy