Kuma 29

Kũvathwa Kwa Alũni na Ana make Methĩwe Athembi

(Ali 8.1-36)

1Mwĩai Ngai nĩwaneenie na Mwose amwĩa atĩĩ, “Ũũ nĩw'o ũkwĩkana na Alũni na ana make nĩ kana manthũkũmae ta athembi. Osa kasalũ kamwe na ndũũme ilĩ ite kĩema, 2mĩkate ĩte mbĩkĩe mbota, maandasi mate mekĩe mbota na mekĩĩtwe mauta, na tũmĩkate tũngĩ tũvũthũ tũvakĩtwe mauta. Syĩndũ isu iseũvw'e na mũtu mũvinyu wa nganũ. 3Syĩkĩe kĩkavunĩ kĩmwe na kũnthembea syĩ kĩkavũnĩ kĩu, na ũyithembanĩsya vamwe na kala kasalũ na ila ndũũme ilĩ. 4Ũkamaete Alũni na ana make mũomonĩ wa Ĩeema ĩtheu ya kũkomanĩa na Ngai na ũimathambya na kĩw'ũ. 5Osa ila ngũa sya kĩ-ũthembi na ũimwĩkĩa Alũni ĩla kanzũ, ngũa ndaasa ĩla yĩkĩawa ungu wa evoti na evoti mbene ĩla nĩ ngũa ya ĩũlũ na ngusu ya kwoveea kĩthũinĩ. Mwove evoti na ũla mũsivi ũtumĩtwe kwa nzĩa ya mwanya. 6Mwĩkĩe ĩla ngovia na ũyĩkĩa kĩla kĩlaũnĩ kĩtheu ngovianĩ ĩsu. 7Osa ala mauta ma kwĩtĩkĩsya ũmwĩtĩkĩsye kwa kũmũtulũĩla mũtwe.

8“Ete ana make na ũimekĩa kanzũ, 9na ũimova ĩla mĩsivi inyunyunĩ na ũimekĩa ngovia. Ũu nĩw'o ũkavatha Alũni na ana make matw'ĩke athembi. Makanthũkũmaa ta athembi vamwe na nzyawa syoo tene na tene.

10“Nĩvo ĩndĩ wĩete kala kasalũ mbee wa Ĩeema ĩtheu ya kũkomanĩa na Ngai. Alũni na ana make makailĩĩla moko moo mũtwenĩ wako. 11Ũaĩa kasalũ kau mbee wakwa nyie Mwĩai Ngai, mũomonĩ wa Ĩeema ĩtheu ya kũkomanĩa na Ngai. 12Osa ĩmwe ya nthakame yako na kũmĩvaka na kyaa mĩthyanĩ ya kĩthembeo. Ĩta nthakame ĩla ĩkũtiala ĩtinanĩ ya kĩthembeo. 13Ĩtina wa ũu osa mathunya onthe ala me ĩũlũ wa nyama sya nda, na kĩlungu kĩla kĩseo kya ĩtema, mbio na mathunya masyo na ũyĩivĩvĩsya kĩthembeonĩ ta nthembo kwakwa. 14Vĩvĩsya nyama sya kasalũ kau, kĩthuma, na mũyoo wako nza wa maeema. Ĩno nĩ nthembo ya kũvetea athembi asu naĩ syoo.

15“Osa ĩmwe ya ila ndũũme na Alũni na ana make mayilĩĩla moko moo mũtwenĩ wayo. 16Ũaa ndũũme ĩsu na kwosa nthakame ya yo ũmĩminzangĩsye ngalĩkonĩ inya sya kĩthembeo. 17Tilanga nyama sya ndũũme ĩsu, na ũithambya nyama syayo sya nda na maũũ na kũsilĩĩla ĩũlũ wa mũtwe na ilungu ila ingĩ sya nyama syayo. 18#Aev 5.2; Avi 4.18 Vĩvĩsya ndũũme ĩsu yonthe ĩũlũ wa kĩthembeo. Nĩ nthembo ya kũvĩvw'a numĩw'e nyie Mwĩai Ngai, yĩ mũuke mũseo ũla ũmbendeeasya, nthembo ya kũvĩvw'a ĩla nĩthembeetwe nyie Mwĩai Ngai.

19“Osa ĩla ndũũme ĩngĩ na Alũni vamwe na ana make nayilĩĩla moko moo mũtwenĩ wayo. 20Ũaa ndũũme ĩsu na kwosa nthakame ĩmwe ya yo ũmĩvake mũthyanĩ wa kũtũ kwa ngalĩko ya kw'oko kwa aũme kwa Alũni na kwa ana make, na kyaanĩ kyoo kĩla kĩnene kya kw'oko kwa aũme, na kyaanĩ kyoo kĩla kĩnene kya kũũ kwa aũme. Minzangĩsya nthakame ĩla ĩngĩ ngalĩkonĩ inya sya kĩthembeo. 21Osa ĩmwe ya nthakame ĩla yĩ ĩũlũ wa kĩthembeo na mauta ma kwĩtĩkĩsya na kũiminzangĩsya Alũni na ngũa syake, na ana make, na ngũa syoo. Alũni, ana make, na ngũa syoo makeethĩwa mavathwa kwondũ wakwa.

22“Umya mathunya ma ndũũme ĩsu, mwĩthe wayo na mathunya ala me nyamanĩ sya nda syayo, kĩlungu kĩla kĩseo kya ĩtema ya yo, mbio syelĩ na mathunya masyo, na kũũ kwayo kwa aũme (ĩno nĩ ndũũme ya kũvathwa kwa athembi methĩwe me atheu). 23Kuma kĩla kĩkavũnĩ kĩ mĩkate ĩte mbota kĩ mbee wa Mwĩai Ngai. Osa mũkate ũmwe, kakeki kamwe kauĩtwe na mauta, na kamũkate kamwe kavũthũ. 24Ilĩĩla mĩkate ĩsu na nyama sya ĩla ndũũme mokonĩ ma Alũni na ma ana make na maisyũkĩlya syĩthĩwe nthembo ya kũkĩlw'a mbee wa Mwĩai Ngai. 25Syose kuma mokonĩ moo na kũivĩvĩsya kĩthembeonĩ vamwe na ĩla nthembo ĩngĩ ya kũvĩvw'a, yĩ mũuke mũseo mbee wakwa nyie Mwĩai Ngai; nĩ nthembo ya kũmbĩvĩsya nyie Mwĩai Ngai.

26“Na ũyosa kĩng'eng'eeto kya ndũũme ĩsu ya kũvathwa kwa Alũni na kũkyũkĩlya kĩthĩwe nthembo ya kũkĩlw'a mbee wa Mwĩai Ngai. Kĩng'eng'eeto kĩu kĩkeethĩwa kyaku.

27“Thesya ila ilungu sya ndũũme ya kũvathwa sya Alũni na ana make nasyo nĩ kĩla kĩng'eng'eeto kya nthembo ya kũkĩlw'a na kũla kũũ kwa nthembo ya kũkĩlw'a. 28Ũsu nĩ ũtw'ĩo wakwa ũtaalyũka kana yĩla andũ makwa maumya nthembo sya ngwatanĩo, kĩng'eng'eeto na kũũ kwa nyamũ ya nthembo nĩ sya athembi. Ũsu nĩ mũthĩnzĩo wakwa nyie Mwĩai Ngai kuma kwa andũ.

29“Alũni akw'a, ngũa syake sya ũthembi inengwe ana make. Makeekĩa ngũa isu yĩla meĩthĩwa maivathwa matw'ĩke athembi. 30Mwana wa Alũni ũla wĩtw'ĩka mũthembi ĩtina wake akeekĩaa ngũa isu mĩthenya mũonza yĩla ũkũlika Ĩeemanĩ ĩtheu ya kũkomanĩa na Ngai, nĩ kana akathũkũme vala Vandũnĩ Vatheu.

31“Osa nyama sya ĩla ndũũme ya kũvathwa kwa Alũni na ana make na ũyĩitheũkĩsya vandũnĩ vatheu. 32Alũni na ana make nĩmaye ila nyama sya ndũũme na ĩla mĩkate yĩ kĩkavũnĩ me mũomonĩ wa Ĩeema ĩtheu ya kũkomanĩa na Ngai. 33Maye syĩndũ isu syaumiw'e ĩvinda ya ũekeo wa naĩ yĩla mavathiwe, na mathew'a. No athembi meya syĩndũ isu nũndũ nĩ ntheu. 34Ethĩwa vakatiala nyama kana mĩkate kũvika kĩoko, matialyo asu ũkamavĩvya; iikaĩwe nĩkwĩthĩwa nĩ ntheu.

35“Ĩka Alũni na ana make maũndũ onthe ala nakwĩaĩa. Ũkakua ĩvinda ya mĩthenya mũonza kũmavatha matw'ĩke athembi. 36Themba kasalũ kamwe kĩla mũthenya kethĩwe nthembo ya ũekeo wa naĩ. Weeka ũu wĩĩthĩwa wathesya kĩthembeo, na ĩndĩ ũikĩtĩkĩsya mauta ũkĩvathe. 37Ũkekaa ũu kĩla mũthenya vandũ va mĩthenya mũonza. Kwa nzĩa ĩsu kĩthembeo kĩkeethĩwa kyathew'a vyũ, na kĩndũ o na kĩva kĩla kĩkĩkiita kĩkaanangwa nĩ ũtonyi wa ũtheu wakyo.

Nthembo sya kĩla Mũthenya

(Mot 28.1-8)

38“Syĩndũ ii nĩsyo wĩthembaa kĩthembeonĩ kĩla mũthenya ĩvinda yonthe: Tũtena twĩlĩ twa ĩlondu twĩ na ũkũũ wa mwaka ũmwe. 39Katena kamwe ũkakathembaa kwakya na kala kangĩ ũikathemba wĩoo. 40Katena ka mbee kathembanĩsye na mũtu wa nganũ mũvinyu wa kĩlo kĩmwe ũvulanĩtw'e na lita ũmwe wa mauta ma mĩthata mate mavulany'e na kĩndũ. Tulũĩla lita ũmwe wa ndivai yĩthĩwe ta nthembo. 41Themba katena kala ka kelĩ wĩoo na ũikathembanĩsya na nthembo ya mbaa mbeke, mauta na ndivai o tondũ wĩkanie na ĩla nthembo ya kĩoko. Ĩsu nĩ nthembo ya kũvĩvw'a numĩw'e nyie Mwĩai Ngai na mũuke wayo mũseo nũmbendeeasya. 42Ĩvinda yonthe yĩla yũkĩte nthembo ĩsu ya kũvĩvw'a ĩkathembeawa mbee wakwa mũomonĩ wa Ĩeema ĩtheu ya kũkomanĩa na Ngai. Vau nĩvo nĩkomanĩa na andũ makwa na ngĩneena naku. 43Nĩvo nĩkomanĩaa na andũ ma Ĩsilaeli na vakathew'a nĩ ũkumyo wakwa. 44Ngathesya Ĩeema na kĩthembeo, na ngĩmavatha Alũni na ana make manthũkũme ta athembi. 45Ngekalany'a na andũ ma Ĩsilaeli na kwĩthĩwa Ngai woo. 46Makamanya kana ninyie Mwĩai Ngai, Ngai woo ũla wamaumisye nthĩ ya Misili nĩ kana nĩkalanasye namo. Ninyie Mwĩai Ngai, Ngai woo.”

Currently Selected:

Kuma 29: KAMBA

Highlight

Compare

Copy