Kuma 37
37
Kũseũvw'a Kwa Ĩsandũkũ ya Ũtianĩo
(Kuma 25.10-22)
1Mbesaleli nĩwaseũvisye Ĩsandũkũ ya Ũtianĩo na mbwaũ sya mũtĩ wa mũea yĩna ũasa wa mita ĩmwe na sendimita ĩkũmi, ũthanthau wa sendimita mĩongo thanthatũ na thanthatũ na ũtũlu wĩanene na ũthanthau wayo. 2Nĩwayũmbĩĩie thaavu mũthei nthĩnĩ na nza na eekĩa ndeenĩ syayo thaavu ũyĩlingĩlĩte. 3Nĩwooveeie ngome inya sya thaavu ndeenĩ inya syayo; ngome ilĩ ngalĩko ĩmwe na isu ingĩ ilĩ ngalĩko ĩla ĩngĩ. 4Nĩwaseũvisye mĩtĩ ya kũkua Ĩsandũkũ yĩu kuma mũtĩnĩ wa mũea na amyũmbĩĩa thaavu. 5Nĩweekĩie mĩtĩ ĩsu ngomenĩ ila syĩ ndeenĩ syelĩ sya Ĩsandũkũ ya kũyĩkuaa. 6O ta ũu, nĩwaseũvisye ngunĩko na thaavu mũthei ĩla nĩ vandũ va Ngai va kũekeaa naĩ. Ngunĩko ĩsu yaĩ na ũasa wa mita ĩmwe na sendimita ĩkũmi na ũthanthau wa sendimita mĩongo thanthatũ na thanthatũ. 7Nĩwaseũvisye mavisa ma syũmbe ilĩ syĩ nthwau syĩtawa akelũvi kuma thaavunĩ mũtumbatumbe; 8ĩvisa yĩmwe ngalĩko ĩmwe na yĩla yĩngĩ ngalĩkonĩ ĩla ĩngĩ. Syũmbe isu syakwatanĩte na ĩla ngunĩko. 9Syũmbe isu nĩsyatambũũkĩtye nthwau ikavw'ĩka ngunĩko ĩsu. Nĩsyasyaanĩtye na ikelekelya ũthyũ ngunĩkonĩ ĩsu.
Kũseũvya Mesa ya Kwilĩĩla Mũkate wa Kũthembea Ngai
(Kuma 25.23-30)
10Mbesaleli nĩwaseũvisye mesa ya mbwaũ sya mũtĩ wa mũea yĩna ũasa wa sendimita mĩongo nyanya na nyanya, ũthanthau wa sendimita mĩongo ĩna na inya, na ũtũlu wa sendimita mĩongo thanthatũ na thanthatũ. 11Nĩwamyũmbĩĩie thaavu mũthei na amĩkĩa ndeenĩ syayo thaavu ũmĩlingĩlĩte. 12Nĩwaathĩĩie ũtiivonĩ wayo ũvwaũ wĩ na ũthanthau wĩana kĩtaa kya kw'oko na amyũmbĩĩa thaavu wĩlingĩlĩte ũvwaũnĩ ũsu. 13Nĩwaseũvisye ngome inya sya thaavu na asyoveea konanĩ syayo vala vaĩ maũũ ma mesa ĩsu. 14Ngome isu syaĩ ũtiivonĩ wa mesa nĩ kana ikwatae mĩtĩ ya kũkua mesa ĩsu. 15Nĩwaseũvisye mĩtĩ ĩsu kuma mũtĩnĩ wa mũea na amyũmbĩĩa thaavu. 16Nĩwaseũvisye masaani na mbakũli sya kwĩkĩa ũvani; ngilasi na mbakũli itũmĩawe kwa kwĩkĩa ndivai. Syĩndũ ii syonthe nĩwaiseũvisye na thaavu mũthei.
Kũseũvya Kĩndũ kya Kwilĩĩla Taa
(Kuma 25.31-40)
17Mbesaleli nĩwaseũvisye kĩndũ kya kwilĩĩla taa kya thaavu mũthei. Nĩwaseũvisye ĩtina yakyo na kĩla kĩũngamĩtye kĩndũ kĩu na thaavu mũtumbatumbe; ikombe, mĩthya, na malaa makyo nĩmakwatene nakyo.
18Kĩndũ kĩu kya kwilĩĩla taa kyaĩ na mbonge thanthatũ; itatũ kuma ngalĩko ĩmwe na ila ingĩ itatũ kuma ngalĩko ĩla ĩngĩ. 19Ikombe itatũ syaseũvĩtw'e ta malaa ma mũtĩ wa mũlosi me na tũmatũ twamo na ĩlaa mbene syĩ ũvongenĩ ũmwe, na ikombe itatũ ũvongenĩ ũla ũngĩ. Mbonge syonthe thanthatũ ila syaumĩte kĩndũnĩ kĩu kya kwilĩĩla taa syaseũvĩtw'e ũu. 20Kĩla kyaũngamĩtye kĩndũ kĩu kya kwilĩĩla taa kyaĩ na malaa ana ma kũkyanakavya mailyĩ ta malaa ma mũtĩ wa mũlosi me na tũmatũ twamo, na ĩlaa mbene. 21Ĩtũ yĩmwe ya ĩlaa yaĩ ungu wa mbonge ilĩ sya mbee ila syumĩte kĩndũnĩ kĩu. Ĩtũ ya kelĩ yaĩ ungu wa mbonge ila ingĩ sya kelĩ, na ya katatũ ungu wa mbonge ila ingĩ sya katatũ. Syonthe vamwe syaĩ mbonge thanthatũ. 22Matũ, mbonge, na kĩndũ kĩu kya kwilĩĩla taa nĩsyakwatene na syaseũvĩtw'e kuma thaavunĩ mũthei mũtumbatumbe. 23Nĩwaseũvisye taa mũonza sya kwilĩĩla kĩndũnĩ kĩu, syĩndũ sya kũvosya taa, na masaani ma kwĩkĩa mũu wa ndambi. Syonthe syaseũvĩtw'e na thaavu mũthei. 24Mbesaleli atũmĩie thaavu mũthei wa kĩlo mĩongo ĩtatũ na itano kũseũvya kĩndũ kĩu kya kwilĩĩla taa na syĩndũ isu ingĩ syonthe.
Kũseũvya Kĩthembeo Kya Kũvĩvĩsya Ũvani
(Kuma 30.1-5)
25Mbesaleli nĩwaseũvisye kĩthembeo kya mũtĩ wa mũea kya kũvĩvĩsya ũvani. Ngalĩko syakyo inya nĩsyeanene. Kyaĩ na ũasa wa sendimita mĩongo ĩna na itano, na ũthanthau wĩanene na ũasa, na ũtũlu wa sendimita mĩongo kenda. Mĩthya yakyo nĩyakwatene nakyo. 26Nĩwoombĩĩie kĩthembeo kĩu thaavu mũthei ĩũlũ wakyo na ngalĩkonĩ syakyo inya vamwe na mĩthya yakyo, na eekĩa ndeenĩ syakyo thaavu ũkĩlingĩlĩte. 27Nĩwaseũvĩisye kĩthembeo kĩu ngome ilĩ sya thaavu sya ũkĩkua na asyoveea ĩtheo wa ũla thaavu ũkĩlingĩlĩte ngalĩko syelĩ. Ngome isu syaĩ sya kũkwatĩĩa mĩtĩ ya kũkĩkua. 28Nĩwaseũvisye mĩtĩ ĩsu ya kũkĩkua na mũtĩ wa mũea na amyũmbĩĩa thaavu mũthei.
Kũseũvya Mauta Matheu ma Kwĩtĩkĩsya na Ũvani
(Kuma 30.22-38)
29 #
Kuma 30.22-38
Mbesaleli nĩwaseũvisye mauta matheu ma kwĩtĩkĩsya na ũvani ũla mũseo wĩ mũuke mũseo ũvulanĩtw'e na mauta me mũuke mũseo.
Currently Selected:
Kuma 37: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
