Kuma 5

Mwose na Alũni me mbee wa Mũsumbĩ wa Misili

1Ĩtina wa ũu Mwose na Alũni nĩmaendie kwa mũsumbĩ wa Misili na mamwĩa, “Mwĩai Ngai, Ngai wa Ĩsilaeli easya atĩĩ, ‘Lekya andũ makwa mathi, nĩ kana makethĩwe na mboka weũnĩ kwondũ wa kũnenga ndaĩa.’ ”

2Ĩndĩ mũsumbĩ akũlya, “Mwĩai Ngai nũũ, atĩ nĩmwĩthukĩĩsye na kũlekya andũ ma Ĩsilaeli mathi? Nyie ndyĩsĩ Mwĩai Ngai na ndilekya andũ ma Ĩsilaeli mathi.”

3Mwose na Alũni mamwĩa atĩĩ, “Ngai wa Aevelania nĩwĩvuanĩtye kwitũ. Twĩkwĩsũva ũtũnenge mwanya tũthi kyalo kya matukũ atatũ kũu weũnĩ, tũkamũthembee Mwĩai Ngai ũla nĩ Ngai waitũ. Twalea kwĩka ũu, akatũkany'a na kũtũaa na ũwau mũthũku kana kaũ.”

4Ĩndĩ mũsumbĩ amea atĩĩ, “Mwose na Alũni, nĩ kyaũ kĩũtuma mumya andũ wĩanĩ woo? Syokai wĩanĩ wenyu! 5Andũ ma Ĩsilaeli nĩmaingĩvĩte mũno, nayu mwĩenda kũtuma maeka kũthũkũma!”

6Mũthenyanĩ o ũsu mũsumbĩ nĩwaumisye mwĩao kwa aũngamĩi na anene ala mathũkũmĩthasya andũ ma Ĩsilaeli amea atĩĩ, 7“Mũikambĩle kũnenga andũ aa mavuti ma kũvulany'a na ndaka ya kũmba mavali. Ekanaai namo makathi kwĩmanthĩa e mo ene. 8Ĩndĩ no nginya mombae mavali meana ala manoombaa mbeenĩ; mũikaole ũtalo wa mavali ala maĩlĩte kũmba. Nĩmatw'ĩkĩte andũ atulu na kĩu nĩkyo kĩũtuma matindĩa kwasya, ‘Tũeke tũthi tũkathembee Ngai waitũ!’ 9Manengei wĩa mũito na mũimathũkũmĩthya mũno kũvikĩa wĩthĩe mai na mwanya wa kwĩthukĩĩsya ndeto sya ũvũngũ.”

10Amisili ala maũngamĩaa andũ mathũkũme, na anene ma andũ ma Ĩsilaeli ala mamathũkũmĩthasya nĩmaendie na meea andũ ma Ĩsilaeli atĩĩ, “Mũsumbĩ asya ndemũnenga ĩngĩ mavuti ma kũvulany'a na ndaka ya kũmba mavali. 11Endai mũkemanthĩe mavuti o kũla mwĩmona, ĩndĩ ũu wĩ o vo no nginya mũmbe mavali ala mwaĩlĩte kũmba o ta mavinda ala angĩ.” 12Kwoou andũ ma Ĩsilaeli nĩmaendaa kĩla vandũ nthĩ yonthe ya Misili mamanthĩte mavuti ma kũvulany'a na ndaka ya kũmba mavali. 13Amisili ala maũngamĩaa andũ mathũkũme nĩmamakalaataa kwa kũmea, “Tethyai wĩa wenyu wa ũmũnthĩ mũmine vyũ, o tondũ mũnaminaa mĩthenya ĩla ĩngĩ mũnanengawe mavuti.” 14Amisili ala maũngamĩaa andũ mathũkũme nĩmavũie anene ma andũ ma Ĩsilaeli, ala mamanengete kũũngamĩa wĩa ũsu. Nĩmamakũlilye atĩĩ, “Nĩkĩ mũnaemiwe nĩ kũmba mũkamina mavali ma ĩoo na ũmũnthĩ o tondũ mũneekaa mavinda ala angĩ?”

15Nĩvo ĩndĩ anene ma andũ ma Ĩsilaeli matwaie kĩĩo kyoo kwa mũsumbĩ na mamwĩa, “Mũnene, wĩtwĩka ũu nĩkĩ ithyĩ athũkũmi maku? 16Tũiũnengwa mavuti, ĩndĩ twĩĩwa, ‘Ũmbai mavali!’ Yu ithyĩ athũkũmi maku nĩtũũvũwa, ĩndĩ ĩvĩtyo nĩya andũ maku.”

17Ĩndĩ mũsumbĩ amea atĩĩ, “Mwĩ mĩtengea inyw'ĩ, mwĩ atulu vyũ, na kĩu nĩkyo kĩũtuma mũtindĩa kũmbĩa, ‘Tũeke tũthi tũkathembee Mwĩai Ngai.’ 18Yu syokai wĩanĩ! Vai mavuti mwĩnengwa, ĩndĩ ũu wĩ o vo, no nginya mũmbe mwĩanĩsye ũtalo wa mavali ma mũthenya.” 19Anene ma andũ ma Ĩsilaeli ala mamathũkũmĩthasya nĩmamanyie kana me thĩnanĩ mũnene yĩla meeiwe kana makoombaa ũtalo wa mavali ala maĩlĩte kũmba kwa mũthenya, matekũola o na yĩmwe.

20Mauma kwa mũsumbĩ, nĩmeethĩie Mwose na Alũni mameteelete. 21Nĩmeeie Mwose na Alũni atĩĩ, “Mwĩai Ngai nĩone maũndũ ala mwĩkĩte na aimũkany'a nũndũ wa kũtuma mũsumbĩ na anini make makwata mwanya wa kũtũaa.”

Mwose Ainyungunyĩsya vala ve Mwĩai Ngai

22Mwose nĩwaumie vau na athi kũmũvoya Mwĩai Ngai ayasya atĩĩ, “Ame Mwĩai Ngai, wĩthĩnĩsya andũ maku kĩ? Wandũmie kũũ nĩkĩ? 23Kuma ĩvinda yĩla nyie nookie kwa mũsumbĩ kũneena nake vandũ vaku, mũsumbĩ nũthĩnĩtye andũ aa, naku we ndwaavonokya andũ aa maku o na vanini!”

Currently Selected:

Kuma 5: KAMBA

Highlight

Compare

Copy