Ali 1
1
Nthembo sya Kũvĩvw'a ila Syathembawa syĩ Nima
1Mwĩai Ngai nĩweetie Mwose kuma Ĩeemanĩ ya kũkomanĩa na Mwĩai Ngai na amũnenga mĩao ĩno aimwĩa atĩĩ, 2“Neena na andũ ma Ĩsilaeli ũmee yĩla mũndũ o na wĩva ũkũthemba nyamũ yĩthĩwe ta nthembo kũla kwĩ Mwĩai Ngai, nĩamĩnyuve kuma ndĩthyanĩ yake ya ng'ombe, mbũi, kana malondu. 3Ethĩwa ethemba ĩmwe ya ng'ombe syake yĩthĩwe ya kũvĩvw'a no nginya yĩthĩwe yĩ nũme na ĩte kĩema. O ta ũu no nginya amyumĩsye mũvĩanĩ wa Ĩeema ĩtheu ya kũkomanĩa na Mwĩai Ngai nĩ kana nyie Mwĩai Ngai nĩmwĩtĩkĩle. 4Mũndũ ũsu nĩailĩĩle kw'oko kwake mũtwenĩ wa nyamũ ĩsu, nayo ĩkeetĩkĩlwa vandũ vake na ĩituma avetewa naĩ syake. 5Nĩvo wĩũaĩa kasalũ kau mbee wa Mwĩai Ngai, na ana ma Alũni ala nĩ athembi makĩthemba nthakame yako kwa kũmĩminzangĩsya ngalĩkonĩ inya sya kĩthembeo kĩla kĩ mũvĩanĩ wa Ĩeema ĩtheu ya kũkomanĩa na Ngai. 6Nĩaumye kĩthuma kya kasalũ kau ka nthembo ya kũvĩvw'a na aikatilanga ilungu. 7Ana ma mũthembi Alũni mavange ngũ kĩthembeonĩ na kũkwatya mwaki. 8Nĩmailĩile ilungu sya kasalũ kau syonthe vamwe na mũtwe na mathunya mako mwakinĩ ũla wĩ kĩthembeonĩ kĩu. 9Mũndũ ũsu nĩathambye nyama sya nda sya kasalũ kau, na maũũ mako, na mũthembi aikavĩvĩsya kĩthembeonĩ ke kaima. Mũuke wa nthembo ĩsu ya kũvĩvw'a nũmbendeeasya nyie Mwĩai Ngai.
10“Ethĩwa mũndũ ũsu nũkũthemba ĩmwe ya mbũi kana malondu make, no nginya yĩthĩwe yĩ nũme na ĩte kĩema. 11Nĩamĩthĩnzĩe ngalĩkonĩ ya ĩũlũ ya kĩthembeo mbee wakwa nyie Mwĩai Ngai. Ana ma Alũni ala nĩ athembi maminzangĩsye nthakame ya yo ngalĩkonĩ inya sya kĩthembeo. 12Mũndũ ũsu amina kũmĩtilanga, mũthembi nĩailĩĩle ilungu syayo syonthe mwakinĩ ũla wĩ kĩthembeonĩ, vamwe na mũtwe na mathunya mayo. 13Nĩathambye nyama sya nda sya nyamũ ĩsu na maũũ mayo, na mũthembi aimbumĩsya nyie Mwĩai Ngai nthembo ĩsu kwa kũmĩvĩvĩsya kĩthembeonĩ yĩ nima. Mũuke wa nthembo ĩsu ya kũvĩvw'a nũmbendeeasya nyie Mwĩai Ngai.
14“Ethĩwa mũndũ ũsu nũkũthemba nyũnyi yĩthĩwe nthembo ya kũvĩvw'a, no nginya yĩthĩwe yĩ ya ndumbũ kana maswii ma ĩvũĩ. 15Mũthembi nĩamyumĩsye kĩthembeonĩ, na aimila ngingo amĩtile, na kũvĩvĩsya mũtwe wayo kĩthembeonĩ. Nthakame ya yo ĩekwe yĩtĩke ngalĩkonĩ ĩmwe ya kĩthembeo. 16Mũthembi nĩaumye kĩmoeo kyayo vamwe na syĩndũ ila syĩ nthĩnĩ wakyo na aisyĩkya ngalĩko ya wumĩlonĩ wa syũa ya kĩthembeo vala mũu wĩtawa. 17Nĩvo ĩndĩ wĩkwatĩla nyũnyi ĩsu nthwaunĩ, na aimyatũany'a, ĩndĩ ndakamĩtilany'e vyũ ĩtw'ĩke ilungu ilĩ. Mũthembi nĩamĩvĩvĩsye yĩ nima ngũnĩ ila syĩ mwakinĩ kĩthembeonĩ. Mũuke wa nthembo ĩsu ya kũvĩvw'a nũmbendeeasya nyie Mwĩai Ngai.
Currently Selected:
Ali 1: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
