Ali 13
13
Mĩao ĩũlũ wa Ũwau wa Kĩkonde
1Mwĩai Ngai nĩwaneenie na Mwose na Alũni amea atĩĩ, 2“Ethĩwa mũndũ o na wĩva e na katalu kĩkondenĩ kyake, kana e na mũimũ kana ĩkũndũ ila itonya kũendeea ikatw'ĩka ũwau mũthũku mũno wa kĩkonde,#13.2 Ũwau ũũ wĩsĩkĩe kwa ĩsyĩtwa ‘Mangũ’ ĩsyĩtwa yaw'o kwa kĩthyomo kya Kĩevelania yĩthĩawa yĩiweta ĩũlũ wa mowau me kĩvathũkany'o ma kĩkonde. nĩaetwe kũla kwĩ Alũni kana kwa ũmwe wa nzyawa syake ala nĩ athembi. 3Mũthembi nĩasisye vala vawau kĩkondenĩ kya mũndũ ũsu, na ethĩwa w'ĩa ũla wĩ vo nĩmũalyũku ũkeũva, na katalu kau keoneka ke kaliku kĩkondenĩ, ũsu nĩ ũwau mũthũku wa kĩkonde. Mũthembi amina kũmũsisya akatavanasya akasya kana mũndũ ũsu nĩ mũvuku. 4Ĩndĩ ethĩwa katalu kau nĩ keũ, na kaikwoneka ke kaliku mũno kĩkondenĩ, na w'ĩa ũla wĩ vandũnĩ vau ti mũvĩndũku ũkeũva, mũthembi nĩavathe mũndũ ũsu kuma andũnĩ ala angĩ vandũ va mĩthenya mũonza.
5“Mũthenyanĩ wa mũonza mũthembi nĩamũsisye ĩngĩ, na ethĩwa kwa woni wake mwene eona katalu kau kate na ũalyũku na ti kaendeeu, nĩavathe mũndũ ũsu kuma andũnĩ ala angĩ vandũ va mĩthenya ĩngĩ mũonza. 6Mũthenyanĩ wa mũonza mũthembi nĩasisye mũndũ ũsu ĩngĩ, na ethĩwa katalu kau nĩkambĩĩe kũvoa, na ti kaendeeu, nĩatavany'e asye kana mũndũ ũsu nĩ mũtheu; na kau keĩ o katalu. Mũndũ ũsu nĩavũe ngũa syake na eĩthĩwa e mũtheu. 7Ĩndĩ ethĩwa katalu kau nĩkaendeea kũnyaĩĩkĩa mwĩĩnĩ, ĩtina wa mũthembi kũsisya mũndũ ũsu na kũtavany'a kana nĩ mũtheu, mũndũ ũsu no nginya aende vala ve mũthembi ĩngĩ. 8Mũthembi nĩasisye mũndũ ũsu ĩngĩ, na ethĩwa katalu kau nĩkanyaĩĩkĩe mwĩĩnĩ, nĩatavany'e asye kana mũndũ ũsu nĩ mũvuku; ũsu nĩ ũwau wa mangũ.
9“Ethĩwa mũndũ o na wĩva e na ũwau wa mangũ, nĩaetwe vala ve mũthembi, 10nake mũthembi aimũsisya. Ethĩwa ve katalu keũ katumĩte w'ĩa ũla wĩ vandũnĩ vau ũalyũka ũkeũva na kena mavia, 11ũsu nĩ ũwau wa mangũ ũtavoa. Mũthembi nĩatavany'e asye kana mũndũ ũsu nĩ mũvuku; vai vata wa kũmũvatha nũndũ vate nzika mũndũ ũsu nĩ mũvuku. 12Ethĩwa ũwau ũsu nĩwanyaĩĩkĩa mwĩĩnĩ wa mũndũ ũsu kuma mũtwe nginya maũũnĩ, 13Mũthembi nĩamũsisye ĩngĩ. Eethĩa kana ũwau ũsu nũminĩte kũnyaĩĩkĩa mwĩĩnĩ w'onthe, nĩatavany'e asye kana mũndũ ũsu nĩ mũtheu. Ethĩwa kĩkonde kyake nĩkyaalyũka kyeeũva, mũndũ ũsu nĩ mũtheu. 14Ĩndĩ katalu kau kamina kũtw'ĩka kĩtau kyenekee oou, mũndũ ũsu ethĩawa e mũvuku. 15Mũthembi nĩamũsisye ĩngĩ na amina kwĩthĩa kana kĩtau kĩu nĩkyenekee, nĩatavany'e asye kana mũndũ ũsu nĩ mũvuku. Kĩtau kyenekee nĩ wonany'o wa ũwau wa mangũ, na mũndũ ũla wĩ naw'o nĩ mũvuku. 16Ĩndĩ kĩtau kĩu kyavoa na kĩialyũka kyeũve, mũndũ ũsu nĩathi vala ve mũthembi, 17nake mũthembi aimũsisya ĩngĩ. Ethĩwa kĩtau kĩu nĩkĩalyũkĩte kĩkeũva, mũndũ ũsu nĩ mũtheu, na mũthembi nĩatavany'e asye kana nĩ mũtheu.
18“Ethĩwa mũndũ e na mũimũ mũvou mwĩĩnĩ wake, 19na ĩtina vala vanaĩ mũimũ ũsu vayĩthĩwa na ĩkũndũ yeũ, kana vayĩkala ta vekwenda kũtunĩva vanini, mũndũ ũsu nĩathi akony'e mũthembi vandũ vau. 20Mũthembi nĩamũsisye, na eethĩwa vandũ vau veoneka ve valiku mbee wa kĩkonde kĩla kĩngĩ, na w'ĩa ũla wĩvo ũyĩthĩwa ũalyũkĩte ũkeũva, mũthembi nĩatavany'e asye kana mũndũ ũsu nĩ mũvuku. Ũsu nĩ ũwau wa mangũ ũla wambĩĩe kuma vala mũimũ ũnaĩ. 21Ĩndĩ ethĩwa mũthembi nĩwasisya vandũ vau na eethĩa nzw'ĩĩ ila syĩ vandũnĩ vau ti mbĩndũku ikeũva, na ti valiku mbee wa kĩkonde kĩla kĩngĩ, ĩndĩ nĩvambĩlĩĩlye kũvoa, mũthembi nĩavathe mũndũ ũsu kuma andũnĩ ala angĩ vandũ va mĩthenya mũonza. 22Ethĩwa kĩtau nĩkyaendeea, mũthembi nĩatavany'e asye kana mũndũ ũsu nĩ mũvuku; mũndũ ũsu nĩ mũwau. 23Ĩndĩ kĩtau kĩu kyalea kũalyũka, yĩu no ĩlanga yĩla yĩtiĩtwe mũimũ wamina kũvoa, na kwoou mũthembi nĩatavany'e asye kana mũndũ ũsu nĩ mũtheu.
24“Ethĩwa mũndũ nĩwavya, na kĩtau kyake kyeeũva kana kyekala ta kĩũtunĩva, 25mũthembi nĩamũsisye. Ethĩwa w'ĩa ũla wĩ vandũnĩ vau nũalyũkĩte ũkeũva, na veoneka ve valiku mbee wa kĩkonde kĩla kĩngĩ, ũsu nĩ ũwau wa mangũ ũla wambĩĩe kuma vandũnĩ vau vavye, na mũthembi nĩatavany'e asye kana mũndũ ũsu nĩ mũvuku. 26Ĩndĩ ethĩwa w'ĩa ũla wĩ vandũnĩ vau ti mũalyũku ũkeũva, na veoneka vate valiku mbee wa kĩkonde kĩla kĩngĩ, na nĩvambĩlĩĩlye kũvoa, mũthembi nĩavathe mũndũ ũsu kuma andũnĩ ala angĩ vandũ va mĩthenya mũonza. 27Mũthenyanĩ wa mũonza mũthembi nĩasisye mũndũ ũsu ĩngĩ, na eethĩa kana kĩtau kĩu nĩkĩendee kũnyaĩĩkĩa mwĩĩnĩ, ũsu nĩ ũwau wa mangũ na kwoou mũthembi nĩatavany'e asye kana mũndũ ũsu nĩ mũvuku. 28Ĩndĩ ethĩwa vandũ vau vavye vakaendeea kwĩkala vate kũalyũka, na kĩtau kĩu kĩilea kũendeea na kũnyaĩĩkĩa mwĩĩnĩ, na kĩiendeea na kũvoa, ũsu ti ũwau wa mangũ. Mũthembi nĩatavany'e asye kana mũndũ ũsu nĩ mũtheu, nũndũ yĩu no ĩlanga yĩtiĩtwe ĩtina wa ĩvya yake yamina kũvoa.
29“Ethĩwa mũndũ-ũme kana mũndũ mũka e na kĩtau mũtwe kana ngolu, 30mũthembi nĩasisye kĩtau kĩu. Ethĩwa kĩtau kĩu kĩoneka kĩ kĩliku mbee wa kĩkonde kĩla kĩngĩ, na nzw'ĩĩ ila syĩ vo syĩ na langi wa yelo na nĩ ntheke, kĩu nĩ kĩea na nĩ ũwau mũthũku wa kĩkonde. Mũthembi nĩatavany'e asye kana mũndũ ũsu nĩ mũvuku. 31Ethĩwa mũthembi nĩwasisya kĩea kĩu na oona kĩte kĩliku mbee wa kĩkonde kĩla kĩngĩ, na vandũ vau vainamba kwĩthĩwa na nzw'ĩĩ nziũ, nĩavathe mũndũ ũsu kuma andũnĩ ala angĩ vandũ va mĩthenya mũonza. 32Mũthembi nĩasisye mũndũ ũsu ĩngĩ mũthenyanĩ wa mũonza na eethĩa kana kĩea kĩu ti kĩendeeu na vai nzw'ĩĩ sya langi wa yelo na ti kĩliku mbee wa kĩkonde kĩla kĩngĩ, 33mũndũ ũsu nĩenze nzw'ĩĩ syonthe ate o ila syĩ vau kĩeanĩ. Nĩvo ĩndĩ mũthembi wĩvatha mũndũ ũsu kuma andũnĩ vandũ va mĩthenya ĩngĩ mũonza. 34Mũthenyanĩ wa mũonza mũthembi nĩasisye ĩngĩ kĩea kya mũndũ ũsu na eethĩa kĩte kĩendeeu kana kĩte kĩliku mbee wa kĩkonde kĩla kĩngĩ, nĩatavany'e asye kana mũndũ ũsu nĩ mũtheu. Mũndũ ũsu nĩavũe ngũa syake nake eĩthĩwa e mũtheu. 35Ethĩwa kĩea kĩu kĩkaendeea ĩtina wa mũthembi amina kũtavany'a kana mũndũ ũsu nĩ mũtheu, 36mũthembi nĩasisye kĩea kĩu ĩngĩ. Ethĩwa nĩkĩendee kũnyaĩĩkĩa mwĩĩnĩ ũla ũngĩ, mũthembi nde na vata wa kũsisya nzw'ĩĩ ĩla yĩna langi wa yelo. Vate nzika mũndũ ũsu nĩ mũvuku. 37Ĩndĩ ethĩwa kwa woni wa mũthembi ũsu kĩea kĩu ti kĩnyaĩĩkĩu mwĩĩnĩ, na nzw'ĩĩ nziũ nĩendee kwĩana vau vanaĩ kĩea, kĩea kĩu nĩ kĩvou na kwoou mũthembi atavany'e asye kana mũndũ ũsu nĩ mũtheu.
38“Yĩla mũndũ-ũme kana mũndũ mũka weethĩa e na makũndũ meũ kĩkondenĩ kyake, 39mũthembi nĩasisye mũndũ ũsu. Ethĩwa makũndũ asu ti meũ mũno, ũsu no ũwau ũte mũnene na kwoou ũ mũndũ nĩ mũtheu.
40“Ethĩwa mũndũ-ũme nĩwaunyũkanga nzw'ĩĩ mũtwe na eethĩwa na ũvaa, nĩ mũtheu. 41Ethĩwa nzw'ĩĩ syake syaunyũkanga kuma ngalĩkonĩ ya ũthyũ na eethĩwa na ũvaa kuma kĩtulyanĩ, mũndũ-ũme ũsu nĩ mũtheu. 42Ĩndĩ ethĩwa ũvaanĩ ũsu nĩkweethĩwa na kũndũ kũkwenda kweũva, ũsu nĩ ũwau wa mangũ wumĩlĩte ũvaanĩ ũsu. 43Mũthembi nĩasisye ũvaanĩ wa mũndũ ũsu na ethĩwa ve vandũ vailyĩ ta ve kweũva, 44nĩatavany'e asye kana mũndũ ũsu nĩ mũvuku nũndũ wa ũwau mũthũku wa kĩkonde ũla wĩ mũtwe kwake.
45“Mũndũ ũla wĩ na ũwau mũthũku wa kĩkonde no nginya ekĩe matani, alee kũsanũa nzw'ĩĩ, avw'ĩke kanyw'a wake na aineena na wasya mũnene asye, ‘Nyie nĩ mũvuku, nyie nĩ mũvuku!’ 46Mũndũ ũsu akaendeea kwĩthĩwa e mũvuku ĩvindanĩ yonthe yĩla ũkwĩkala na ũwau ũsu, na no nginya ekalae vandũ e weka, ũtee wa vala maeema mambĩtwe.
Mĩao ĩũlũ wa Ngũa syakwatwa nĩ Mbuka
47“Yĩla ngũa yakwatwa nĩ mbuka,#13.47 Mbuka: Ndeto ĩla ĩtũmĩawa kĩthyomonĩ kya Kĩevelania ya Ũwau mũthũku wa kĩkondena Mbuka no ũndũ ũmwe yĩthĩwe nĩya w'ĩa wa ĩlondu, kana ĩtumĩtwe na ndii nzeo ndũmu, 48ĩtumĩtwe ta kĩtambaa kana ta vulana ya ndii nzeo ndũmu kana w'ĩa wa ĩlondu kana kĩthuma, kana kĩndũ o na kĩva kĩseũvĩtw'e na kĩthuma. 49Ethĩwa ngũa ĩsu ĩkeethĩwa na langi ũilyĩ ta wa ĩtũ yĩũ kana mũtune, ĩsu nĩ mbuka ĩendee kũnyaĩĩka na no nginya yonanw'e kũla kwĩ mũthembi. 50Mũthembi nĩasisye mbuka ĩsu, na aivetanga ngũa ĩla yĩna mbuka amie ũtee vandũ va mĩthenya mũonza. 51Mũthenyanĩ wa mũonza mũthembi nĩasisye mbuka ĩsu ĩngĩ, na ethĩwa nĩnyaĩĩkĩe ngũanĩ ĩsu kana ngũanĩ ĩla ĩtumĩtwe ta kĩtambaa kana ta vulana kana ĩtumĩtwe na kĩthuma, o na ethĩwa ĩtũmĩawa kwa nzĩa o na yĩva, ĩsu nĩ mbuka ĩla yanangaa, na ngũa ĩla yĩna mbuka ĩsu nĩ mbuku. 52Mũthembi nĩavĩvye ngũa ĩsu, nũndũ ĩsu nĩ mbuka iendee na kũnyaĩĩka, na yaĩlĩte kwanangwa kwa kũvĩvw'a na mwaki.
53“Ĩndĩ ethĩwa mũthembi nĩwasisya ngũa ĩsu na eethĩa kana mbuka ĩsu ti nyaĩĩku ĩ ngũanĩ, 54nĩeĩyĩaa asye ngũa ĩsu ĩvũwe na aimĩvetanga amie ũtee vandũ va mĩthenya ĩngĩ mũonza. 55Mũthembi nĩasisye ngũa ĩsu ĩngĩ ĩtina wa yamina kũvũwa, na eethĩa mbuka ĩla ĩnaĩ vo ĩtavĩndũĩte langi, o na vala ti nyaĩĩku, ngũa ĩsu no mbuku. Ngũa ĩsu no nginya ĩvĩvw'e, o na ethĩwa mbuka ĩsu yĩ ngalĩkonĩ ya nza kana ya nthĩnĩ. 56Ĩndĩ ethĩwa mũthembi nĩwasisya ngũa ĩsu na eethĩa mbuka ĩsu ĩendee na kũthela, nĩatile kĩsio kĩu kĩ mbuka kuma ngũanĩ ĩsu kana kĩthumanĩ. 57Ĩndĩ ethĩwa mbuka ĩkaumĩla ĩngĩ ngũanĩ ĩsu, kana kĩndũnĩ kĩtumĩtwe ta kĩtambaa kana ta vulana kana kĩseũvĩtw'e na kĩthuma na kwambĩĩa kũnyaĩĩka, mwene wa kĩndũ kĩu kĩna mbuka nĩekĩvĩvya. 58Ethĩwa nĩwavũa kĩndũ kĩu na kĩsio kĩla kĩĩ na mbuka kĩithea, nĩakĩvũe ĩvinda ya kelĩ, nakyo nĩkĩkwĩthĩwa kĩte kĩvuku.”
59Ĩsu nĩyo mĩao ĩũlũ wa mbuka ĩkwatĩte ngũa ya w'ĩa wa ĩlondu kana ĩtumĩtwe na ndii nzeo ndũmu, kana ĩtumĩtwe ta kĩtambaa kana ta vulana kana kĩndũ o na kĩva kĩseũvĩtw'e na kĩthuma. Mĩao ĩsu nĩyo ĩtũmĩawa nĩ kana kĩndũ kĩmanyĩke nĩ kĩtheu kana nĩ kĩvuku.
Currently Selected:
Ali 13: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011