Ali 6
6
1 #
Mot 5.5-8
Mwĩai Ngai nĩwaneenie na Mwose amwĩa atĩĩ, 2“No nginya mũndũ o na wĩva aumĩsye Mwĩai Ngai nthembo ethĩwa nĩwavĩtya kwa kũlea kũtũnga kĩndũ kĩla mũndũ ũla ũngĩ wa mbaĩ ya Ĩsilaeli ũmũtiĩe ekalae nakyo, kana kũmũyĩa kĩndũ, kana kũmũkenga, 3kana kũkengana ĩũlũ wa kĩndũ kyau na kwĩvĩta ayasya kana we ndaakyona, kana akeka naĩ o na yĩva ĩla andũ mekaa. 4Mũndũ eeka naĩ ta ĩsu ethĩawa e na ĩvĩtyo, na no nginya atũnge kĩla wũyĩte kana wosete kwa kũvenana, kana kĩla watiĩwe ekalae nakyo, kana kĩndũ kĩla kyaĩte na akakyona, 5kana kĩndũ o na kĩva kĩla wĩvĩtĩte akakengana kana ndaakyona. No nginya aĩve kĩndũ kĩu kyonthe na ayongeleela kĩlungu kĩmwe kya itano kya kĩndũ kĩu na kũtũngĩa mwene wakyo mũthenyanĩ ũla ũkumya nthembo yake kwondũ wa ĩvĩtyo yake. 6Mũndũ ũsu nĩaetee mũthembi nthembo yumĩw'e Mwĩai Ngai kwondũ wa ĩvĩtyo. Nthembo ĩsu yĩthĩwe yĩ ya ndũũme ĩte kĩema kuma ndĩthyanĩ yake. Thooa wa nyamũ ĩsu ũkamanyĩkaa kwĩanana na mbesa ila itũmĩawa kwondũ wa nthembo ya ũekeo wa ĩvĩtyo. 7Mũthembi nĩathembe nyamũ ĩsu kwondũ wa naĩ ya mũndũ ũsu, nake ũ mũndũ nũkũekewa maũndũ ala wĩkĩte akakwatwa nĩ ĩvĩtyo.”
Nthembo sya Kũvĩvw'a
8Mwĩai Ngai nĩwaneenie na Mwose amwĩa atĩĩ, 9“Neena na Alũni na ana make ũmee nĩmaatĩĩe motw'ĩo aa yĩla mekumya nthembo sya kũvĩvw'a. Nthembo ya kũvĩvw'a ĩkatiawa kĩthembeonĩ ĩũlũ ũtukũ w'onthe nginya kwakya, na mwaki ũla wĩ kĩthembeonĩ ndwaĩlĩte kũvoa. 10Mũthembi ekĩĩte ngũa yake ndaasa ya ndii nzeo ndũmu na akekĩa ngũa ya nthĩnĩ, nĩaumye mũu ũla ũtiĩtwe kĩthembeonĩ nthembo ĩsu yamina kũvĩvw'a, na aiwia ũtee wakyo. 11Ĩtina wa ũu nĩaumye ngũa isu ekĩe ingĩ na aikua mũu ũsu aũtwae vandũ vatheu ũtee wa vala maeema mambĩtwe. 12Mwaki ũla wĩ kĩthembeonĩ no nginya ũkekala wakanĩte na ndwaĩlĩte kwĩsa kũekwa ũvoe. Kĩla mũthenya kwakya mũthembi nĩongele ngũ mwakinĩ ũsu, na ayilĩĩla nthembo ya kũvĩvw'a kĩthembeonĩ kĩu, na aivĩvya mathunya ala maumaw'a methĩwe nthembo ya ngwatanĩo. 13Mwaki ũsu wĩ kĩthembeonĩ waĩlĩte kũendeea kwakana na ndwaĩlĩte kwĩsa kũekwa ũvoe.
Nthembo Sya Ngetha ya Mbaa Mbeke
14“Aa nĩmo motw'ĩo ala maĩlĩte kũatĩĩawa yĩla nthembo ya ngetha ya mbaa mbeke ĩkumw'a: Ana ma Alũni ala nĩ athembi nĩmambumĩasye nyie Mwĩai Ngai nthembo ya ngetha ya mbaa mbeke kĩthembeonĩ. 15Ũmwe woo nĩaute ngundi ĩmwe ya mũtu ũla wumaw'a wĩthĩwe nthembo ya ngetha ya mbaa mbeke ũvulanĩtw'e na mauta, na ũvani w'onthe ũla wĩkĩĩtwe vo. Nĩavĩvĩsye mũtu ũsu kĩthembeonĩ wĩthĩwe kĩlungu kya ũlilikany'o. Mũuke wa nthembo ĩsu ya kũvĩvw'a nũmbendeeasya nyie Mwĩai Ngai. 16Alũni na ana make nĩmaye mũtu ũla ũkũtiala. Ĩndĩ mũtu ũsu ũkaĩsawa ũte mbota na ũiĩĩwa vandũnĩ vatheu nza wa Ĩeema ĩtheu ya kũkomanĩa na Mwĩai Ngai. 17Mĩkate ĩla ĩkũuwa na mũtu ũsu ndĩkekĩwe mbota. Nyie Mwĩai Ngai nĩmanenga mũtu ũsu ta kĩlungu kyoo kuma nthembonĩ ĩla yumaw'a kwa kũvĩvw'a na mwaki. Nthembo ya ngetha ya mbaa mbeke nĩ ntheu mũno o ta nthembo kwondũ wa ũekeo wa naĩ, na nthembo kwondũ wa mavĩtyo. 18Mũndũ-ũme o na wĩva wa nzyawa sya Alũni nũtonya kũya nthembo ĩsu ta kĩlungu kyoo kĩla makanengawe ĩvinda yonthe yĩla nyie Mwĩai Ngai naumĩw'a nthembo ya kũvĩvw'a. Makeekaa ũu ĩvindanĩ yonthe yĩla yũkĩte. Mũndũ ũngĩ o na wĩva ũla wĩkiita nthembo isu akaũmĩw'a nĩ vinya wa ũtheu wasyo.”
19Mwĩai Ngai nĩwaneenie na Mwose amwĩa atĩĩ, 20“Ĩno nĩyo nthembo ĩla Alũni na ana make membumĩasya nyie Mwĩai Ngai mũthenyanĩ ũla ũmwe woo ũkũtw'ĩkĩthw'a mũthembi: Akambumĩasya kĩlo kĩmwe kya mũtu mũvinyu, wĩana ta nthembo ya ngetha ya mbaa mbeke ĩla yumaw'a kĩla mũthenya. Nĩaumye nyusu kĩlo kwakya, na nyusu ĩla ĩngĩ ĩa mawĩoo. 21Mũtu ũsu ũvulanw'e na mauta na kũuĩwa kalaĩnĩ ka mĩkate, na kũtilangwa tũlungu tũnini nĩ kana wumw'e ta nthembo ya ngetha ya mbaa mbeke. Mũuke wa nthembo ĩsu nũmbendeeasya nyie Mwĩai Ngai. 22Ĩvindanĩ yonthe yĩla yũkĩte, nthembo ĩsu no nginya yumaw'e nĩ ũmwe wa ana ma Alũni ũla ũkethĩawa aithũkũma ta Mũthembi ũla Mũnene. Nthembo ĩsu ya kũvĩvw'a yumĩw'e Mwĩai Ngai ĩkavĩvaw'a ĩkathela vyũ. 23Vai kĩlungu kya nthembo ya ngetha ya mbaa mbeke ĩla mũthembi wumasya kyaĩlĩte kũĩwa. Nthembo ĩsu yonthe no nginya ĩvĩvw'e vyũ.”
Nthembo Kwondũ wa Ũekeo wa Naĩ
24Mwĩai Ngai nĩwaneenie na Mwose amwĩa atĩĩ, 25“Nenga Alũni na ana make motw'ĩo aa maatĩĩae yĩla mekumya nthembo kwondũ wa ũekeo wa naĩ: Nyamũ ĩla ĩkumw'a yĩthĩwe nthembo kwondũ wa ũekeo wa naĩ no nginya yũaĩwe vala nyamũ ila syumaw'a syĩthĩwe nthembo sya kũvĩvw'a syũaĩawa. Ĩsu nĩ nthembo ntheu mũno. 26Mũthembi ũla ũkathembaa nyamũ ĩsu kwondũ wa naĩ nĩwe ũkamĩĩsaa. Nĩaĩsae nyamũ ĩsu e vandũnĩ vatheu kĩwanzanĩ kya Ĩeema ĩtheu ya kũkomanĩa na Mwĩai Ngai. 27Mũndũ kana kĩndũ o na kĩva kĩla kĩkakiita nyama sya nyamũ ĩsu ĩthembetwe kwondũ wa ũekeo wa naĩ kĩkaũmĩaw'a nĩ vinya wa ũtheu wasyo. Ethĩwa nthakame ya nyamũ ĩsu nĩyatalĩkĩla ngũa, ngũa ĩsu no nginya ĩvũĩwe vandũnĩ vatheu. 28Mbisũ ya yũmba ĩla nyama isu syauĩawa, no nginya yũawe, na ethĩwa syauwa na ĩsilia, no nginya ĩsilia yĩu yĩkutwe na yĩithambũkw'a na kĩw'ũ. 29Mũndũ-ũme o na wĩva kuma mũsyĩnĩ wa athembi nũtonya kũya nthembo ĩsu; nthembo ĩsu nĩ ntheu mũno. 30Ĩndĩ ethĩwa ĩmwe ya nthakame ya nyamũ ĩsu yumĩtw'e kwondũ wa ũekeo wa naĩ nĩyatwawa nthĩnĩ wa Ĩeema ĩtheu ya kũkomanĩa na Ngai Vandũnĩ vala Vatheu, nĩ kana ĩtũmĩwe kwa kũveta naĩ, nyamũ ĩsu ndyaĩlĩte kũĩwa; no nginya ĩvĩvw'e vyũ.
Currently Selected:
Ali 6: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011