Ali 8
8
Alũni na Ana Make Maitw'ĩkĩthw'a Athembi
(Kuma 29.1-37)
1Mwĩai Ngai nĩwaneenie na Mwose amwĩa atĩĩ, 2“Osa Alũni na ana make ũmaete mũvĩanĩ wa Ĩeemanĩ ĩtheu ya kũkomanĩa na Ngai na ũiete ngũa sya kĩ-ũthembi, mauta ma kwĩtĩkĩsya, kasalũ ka nthembo kwondũ wa ũekeo wa naĩ, ndũũme ilĩ, na kĩkavũ kĩkĩĩtwe mĩkate ĩte mbota. 3Ĩtina wa ũu ũmbanĩsya andũ onthe ma Ĩsilaeli vau.”
4Mwose nĩweekie ũndũ Mwĩai Ngai wamwĩaĩĩte, na andũ onthe ma Ĩsilaeli moombanĩa mũvĩanĩ wa Ĩeema. 5Nĩwaneenie namo amea atĩĩ, “Ũũ nĩw'o ũndũ ũla Mwĩai Ngai wĩaĩte wĩkwe.”
6Mwose nĩweetie Alũni na ana make moke mbee na amea mathambe nĩ kana methesye. 7Nĩweekĩie Alũni kanzũ, na amwova mũsivi kĩnyunyunĩ, na amwĩkĩa ĩla ngũa ndaasa yĩkĩawa ungu wa ĩla ngũa ya ĩũlũ yĩtawa evoti. Nĩwamwĩkĩie ngũa ĩsu ya ĩũlũ, na amĩlũlũmĩĩlya kwa kũmwova kĩnyunyunĩ kyake na mũsivi ũtumĩtwe kwa nzĩa ya mwanya. 8Nĩwamwoveeie ĩla ngusu ya kĩthũi na eekĩa Ulimu na Thumimu#8.8 Ulimu na Thumimu: Sisya Kuma 28.30 ngusunĩ ĩsu. 9Nĩwamwĩkĩie ngovia, na eekĩa ngalĩkonĩ ya mbee ya ngovia ĩsu kĩla kĩlaũnĩ kĩtheu kyaseũvĩtw'e na thaavu o tondũ Mwĩai Ngai wamwĩaĩĩte.
10Ĩtina wa ũu Mwose nĩwoosie ala mauta ma kwĩtĩkĩsya, na etĩkĩsya Ĩeema ĩtheu ya kũkomanĩa na Mwĩai Ngai vamwe na syĩndũ syonthe ila syaĩ nthĩnĩ wayo. Kwa nzĩa ĩsu Mwose nĩwavathie syĩndũ isu syonthe syĩthĩwe sya Mwĩai Ngai. 11Nĩwoosie amwe ma mauta asu na amaminzangĩsya mavinda mũonza kĩthembeonĩ na syĩndũnĩ syakyo syonthe, kalaĩnĩ ka kũthambĩa na ĩtina yako nĩ kana aivathe syĩthĩwe sya Mwĩai Ngai. 12Nĩwavathie Alũni amũtw'ĩkĩthya mũthembi kwa kũmwĩtĩkĩsya amwe ma mauta asu mũtwenĩ wake. 13Nĩvo ĩndĩ Mwose weetie ana ma Alũni moke mbee na amekĩa kanzũ, amova mĩsivi inyunyunĩ syoo, na amekĩa ngovia kwĩanana na ũndũ Mwĩai Ngai wamwĩaĩĩte.
14Amina kwĩka ũu, Mwose nĩwaetie kala kasalũ ka nthembo kwondũ wa ũekeo wa naĩ, na Alũni e na ana make mailĩĩla moko moo mũtwenĩ wako. 15Mwose nĩwakoaie na oosa nthakame ĩmwe yako amĩvaka na kyaa kyake mĩthyanĩ ya kĩthembeo kĩla kyaumĩaw'a nthembo sya kũvĩvw'a nĩ kana akĩvathe kĩthĩwe kĩ kĩtheu. Nthakame ĩla yatialĩte nĩwatulũile ĩtinanĩ ya kĩthembeo kĩu. Kwa nzĩa ĩsu nĩwakĩvathie na akĩthesya. 16O ta ũu Mwose nĩwoosie mathunya onthe ala maĩ ĩũlũ wa nyama sya nda, kĩlungu kĩla kĩseo kya ĩtema, na mbio syelĩ vamwe na mathunya ala maĩ ĩũlũ wasyo. Nĩwavĩvĩisye mathunya asu onthe kĩthembeonĩ. 17Ĩndĩ nĩwoosie nyama sya kasalũ kau, kĩthuma kyako, na mũyoo wako, na athi kũivĩvĩsya ũtee wa vala maeema mambĩtwe o tondũ Mwĩai Ngai wamwĩaĩĩte.
18Ĩtina wa ũu Mwose nĩwaetie ĩla ndũũme ya nthembo ya kũvĩvw'a na Alũni na ana make mailĩĩla moko moo mũtwenĩ wayo. 19Mwose nĩwamyũaie na aminzangĩsya nthakame ya yo ngalĩkonĩ inya sya kĩthembeo kĩu. 20Nĩwatilangile nyama sya ndũũme ĩsu, na avĩvya mũtwe wayo, ilungu sya nyama isu na mathunya. 21Amina kwĩka ũu, nĩwathambisye nyama sya nda na maũũ ma ndũũme ĩsu na kĩw'ũ. Mwose nĩwavĩvĩisye ndũũme ĩsu yonthe kĩthembeonĩ ĩũlũ yeethĩwa nthembo ya kũvĩvw'a o tondũ Mwĩai Ngai wamwĩaĩĩte. Nthembo ĩsu ya kũvĩvw'a yaĩ na mũuke mũseo ũla ũmwendeeasya Mwĩai Ngai.
22Mwose nĩwaetie ndũũme ĩla ya kelĩ, kwondũ wa nthembo ĩla yumaw'a yĩla mũndũ ũkũtw'ĩkĩthw'a mũthembi. Alũni na ana make nĩmailĩĩile moko moo mũtwenĩ wayo. 23Mwose nĩwamyũaie na oosa nthakame ĩmwe ya yo amĩvaka mũthyanĩ wa kũtũ kwa ngalĩko ya kw'oko kwa aũme kwa Alũni, kyaanĩ kĩla kĩnene kya kw'oko kwake kwa aũme, na kyaanĩ kyake kĩla kĩnene kya kũũ kwake kwa ngalĩko ya kw'oko kwa aũme. 24Nĩweetie ana ma Alũni moke mbee na oosa nthakame ĩmwe amavaka mĩthyanĩ ya matũ moo ma ngalĩko ya kw'oko kwa aũme, syaanĩ syoo ila nene sya kw'oko kwa aũme, na syaanĩ syoo ila nene sya maũũ moo ma ngalĩko ya kw'oko kwa aũme. Amina kwĩka ũu Mwose nĩwaminzangĩisye nthakame ĩla yatialĩte ngalĩkonĩ inya sya kĩthembeo. 25Nĩwoosie mathunya onthe: Mathunya ma mwĩthe, mathunya ala maĩ ĩũlũ wa nyama sya nda, kĩlungu kĩla kĩseo kya ĩtema, mbio syelĩ na mathunya ala me ĩũlũ wasyo, na nyama ya kũũ kwa ngalĩko ya kw'oko kwa aũme. 26Kuma kĩkavũnĩ kĩla kyeekĩĩtwe mĩkate ĩte mbota na yavathĩtwe kwondũ wa Mwĩai Ngai, Mwose nĩwoosie mũkate ũmwe ũuĩtwe na mauta, mũkate ũngĩ mũvake mauta, na kamũkate kamwe kavũthũ kavake mauta. Nĩwailĩĩile mĩkate ĩsu ĩũlũ wa ala mathunya na ĩla nyama ya kũũ kwa ngalĩko ya kw'oko kwa aũme kwa ĩla ndũũme. 27Nĩwailĩĩile mĩkate ĩsu, mathunya asu, na ĩla nyama ya kũũ kwa ngalĩko ya kw'oko kwa aũme mokonĩ ma Alũni na ana make, namo masyũkĩlya nĩ kana syĩthĩwe nthembo ya kũkĩlw'a kwondũ wa Mwĩai Ngai. 28Mwose nĩwoosie syĩndũ isu syonthe kuma mokonĩ moo aivĩvĩsya kĩthembeonĩ syĩ vamwe na ĩla nthembo ya kũvĩvw'a nĩ kana syĩthĩwe nthembo ĩla yumaw'a yĩla mũndũ ũkũtw'ĩkĩthw'a mũthembi. Ĩsu yaĩ nthembo ya kũvĩvw'a ĩla yaĩ na mũuke mũseo ũla ũmwendeeasya Mwĩai Ngai. 29Amina kwĩka ũu, Mwose nĩwoosie nyama ya kĩng'eng'eeto na amyũkĩlya yĩthĩwe nthembo ya kũkĩlw'a kwondũ wa Mwĩai Ngai. Nyama ĩsu nĩyo yaĩ kĩlungu kya Mwose kuma nthembonĩ ĩla yaumiw'e ya ndũũme Alũni na ana make maitw'ĩkĩthw'a athembi. Mwose eekie maũndũ onthe kwĩanana na ũndũ Mwĩai Ngai wamwĩaĩĩte.
30Nĩvo ĩndĩ Mwose woosie mauta amwe ma kwĩtĩkĩsya na nthakame ĩmwe ĩla yaĩ kĩthembeonĩ na aiminzangĩsya Alũni na ana make o vamwe na ngũa syoo. Kwa nzĩa ĩsu nĩwamavathie vamwe na ngũa syoo nĩ kana mamũthũkũmae Mwĩai Ngai.
31Mwose nĩwaneenie na Alũni na ana make na amea atĩĩ, “Twaai nyama ĩsu mũvĩanĩ wa Ĩeema ĩtheu ya kũkomanĩa na Mwĩai Ngai na mũimĩtheũkĩsya vau. Yai nyama ĩsu vamwe na mĩkate ĩla yĩkĩĩtwe kĩkavũnĩ kĩla kĩ nthembo ĩla yumaw'a mũndũ aitw'ĩka mũthembi o tondũ Mwĩai Ngai wĩaĩte. 32Nyama na mĩkate ĩla ĩkũtiala, ivĩvw'e vyũ. 33Vandũ va ĩvinda ya mĩthenya mũonza mũikaume mũvĩanĩ wa Ĩeema ĩtheu ya kũkomanĩa na Ngai nginya ĩvinda ya kũvathwa kwenyu yĩthele. 34Mwĩai Ngai nĩwatwĩaĩie twĩke maũndũ ala tweeka ũmũnthĩ nĩ kana athesye naĩ syenyu. 35No nginya mwĩkale mũvĩanĩ wa Ĩeema ĩtheu ya kũkomanĩa na Ngai vandũ va ĩvinda ya mĩthenya mũonza, ũtukũ na mũthenya, na mũyĩka maũndũ onthe ala Mwĩai Ngai ũmwĩaĩĩte. Mwalea kwĩka ũu nĩmũũkw'a. Maũndũ asu nĩmo Mwĩai Ngai ũmbĩaĩĩte.” 36Kwoou Alũni na ana make nĩmeekie maũndũ onthe ala Mwĩai Ngai wameaĩĩte kwĩsĩla vala ve Mwose.
Currently Selected:
Ali 8: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011