Mot 16
16
Ũng'endu wa Kola, Ndathani na Avilamu
1 #
Yuta 11
Kola mwana wa Isali kuma mũsyĩnĩ wa Koathi ũla waĩ wa mbaĩ ya Livai na andũ amwe maĩ nzyawa sya Lũveni ala nĩ Ndathani na Avilamu ana ma Eliavu, na Oni mwana wa Velethi nĩmeethĩiwe me ang'endu, 2na maleana na Mwose. Meekie ũu me ngwatanĩo na atongoi maana elĩ ma andũ ma Ĩsilaeli, ala maĩ nguma na manyuvĩtwe nĩ andũ. 3Nĩmaendie moombanĩa vala ve Mwose na Alũni na mamea atĩĩ, “Nĩkĩ mũkwona mwĩ aseo mũno mbee wa andũ ala angĩ onthe ma Ĩsilaeli? Ithyonthe twĩ andũ atheu ma Mwĩai Ngai, na e vamwe naitũ. Kwoou nĩ kyaũ kĩũtuma mwona no inyw'ĩ mwaĩlĩte kũtongosya?”
4Yĩla Mwose weewie ũu, nĩwakomie nthĩ na ĩvu. 5Nĩvo ĩndĩ weeie Kola na aatĩĩi make, “Ũnĩ kwakya Mwĩai Ngai akatwony'a ũla wake nũũ na nũũ ũla mũtheu; amina kũnyuva mũndũ ũsu, Mwĩai Ngai akamũũngamya mbee wa kĩthembeo kyake. 6We Kola na aatĩĩi maku ĩkai ũũ: Osai syĩndũ sya kũtooesya ũvani, 7na ũnĩ mũisyĩkĩa mwaki na ũvani mbee wa Mwĩai Ngai. Mũndũ ũla Mwĩai Ngai wĩnyuva nĩwe ũkethĩwa e mũtheu. Inyw'ĩ Alivai nĩmwĩtwaĩte mbee mũno!”
8Mwose nĩwaendeeie kũneena na Kola amwĩa atĩĩ, “Inyw'ĩ Alivai ĩthukĩĩsyei yu! 9Mwĩĩsilya nĩ ũndũ ũnini Ngai wa Ĩsilaeli kũmũvatha kuma andũnĩ ala angĩ, nĩ kana mwĩthĩawe mũtonya kũthi vakuvĩ nake, kũtethasya wĩa Ĩeemanĩ ĩtheu ya Mwĩai Ngai na kũthũkũma andũ onthe ma Ĩsilaeli? 10Nũmũnengete inyw'ĩ na Alivai ala angĩ onthe ndaĩa ya kwĩthĩwa mwĩ vakuvĩ nake. Yu mwĩenda kwĩyosea ũthembi o naw'o? 11Yĩla mũkũnyungunyĩsya nũndũ wa Alũni, we na aatĩĩi maku mwĩĩthĩwa mũing'endea Mwĩai Ngai.”
12Mwose nĩwatũmanie Ndathani na Avilamu ana ma Eliavu maketwe ĩndĩ masya, “Tũyĩũka! 13Ndwaaĩanĩwa nĩ kũtumya nthĩ ya Misili ĩla nthwii na nou wũke kũtũaĩa vaa weũnĩ, yu wĩenda kwĩtw'ĩkĩthya mũnene waitũ? 14Ũu wĩ o vo ndwaatũtwaa nthĩ nthwii na nou na kũtũnenga mĩũnda na mĩũnda ya mĩsavivũ syĩthĩwe ũtiĩwa witũ, na yu wĩenda kũtũkenga. Tũyĩũka!”
15Mwose nĩwathatie mũno na eea Mwĩai Ngai, “Ndũketĩkĩle nthembo o na ĩmwe yumĩtw'e nĩ andũ aa; ndyaavĩtĩsya ũmwe woo, na ndyaaosa o na ĩng'oi kuma kwoo.”
16Mwose nĩweeie Kola atĩĩ, “Ũnĩ we wĩ na ala aatĩĩi maku maana elĩ na mĩongo ĩtano no nginya mũke Ĩeemanĩ ĩtheu ya kũkomanĩa na Mwĩai Ngai; Alũni o nake akeethĩwa vo. 17Kĩla ũmwe wa andũ asu maana elĩ na mĩongo ĩtano akoosa kĩndũ kyake kya kũtoeesya ũvani, akĩkĩe ũvani, na aikĩtwaa mbee wa Mwĩai Ngai. O naku wĩ na Alũni mũkatwaa syĩndũ syenyu sya kwĩkĩa ũvani mbee wa Mwĩai Ngai.” 18Kwoou kĩla ũmwe woo nĩwoosie kĩndũ kyake kya kũtoeesya ũvani, akĩkĩa makaa me mwaki na akĩkĩa ũvani, na maũngama vamwe na Mwose na Alũni mũvĩanĩ wa Ĩeema ĩtheu ya kũkomanĩa na Ngai. 19Kola nĩwoombanisye andũ onthe ma Ĩsilaeli na moombanĩlĩĩla Mwose na Alũni mũvĩanĩ wa Ĩeema ĩtheu ya kũkomanĩa na Ngai. Me vau ũtheu mũtisu wa Mwĩai Ngai nĩwaumĩlĩĩle ĩkomano yonthe. 20Mwĩai Ngai nĩwaneenie na Mwose na Alũni amea atĩĩ, 21“Umai katĩ wa andũ aa, nakwa nĩngũmamina oyu kwa mĩtũkĩ.”
22Ĩndĩ Mwose na Alũni nĩmakumanie matina nthĩ na ũthyũ mamwĩsũve Ngai na masya atĩĩ, “Ame Mwai Ngai nue ũnengae andũ onthe thayũ. Yĩla mũndũ ũmwe wavĩtya, ũkathatĩa andũ onthe?”
23Nake Mwĩai Ngai eea Mwose atĩĩ, 24“Tavya andũ ma Ĩsilaeli maume vakuvĩ na maeema ma Kola, Ndathani na Avilamu.”
25Mwose nĩwaendie kũla kwĩ Ndathani na Avilamu aatĩĩwe nĩ atongoi ma Ĩsilaeli. 26Nĩweeie andũ atĩĩ, “Ũngamai vaasa na maeema ma andũ aa athũku na mũikakiite kĩndũ kyoo o na kĩmwe. Ethĩwa ti ũu nĩmũũminwa vamwe namo nũndũ wa naĩ syoo syonthe.” 27Kwoou andũ nĩmaendie vaasa na maeema ma Kola, Ndathani na Avilamu.
Ndathani na Avilamu nĩmaumaalile maũngama mĩomonĩ ya maeema moo me na iveti na syana syoo. 28Nĩvo ĩndĩ Mwose waisye atĩĩ, “Nĩmũũmanya kana Mwĩai Ngai nĩwe ũndũmĩte kwĩka maũndũ aa, na kana ndiũmeka kwĩanana na kwenda kwakwa mwene. 29Ethĩwa andũ aa nĩmeũkw'a o ũndũ andũ ala angĩ onthe makusaa, kana ethĩwa nĩmeũkwatwa nĩ maũndũ ala makwataa andũ ala angĩ, manyai kana Mwĩai Ngai ti we ũndũmĩte. 30Ĩndĩ ethĩwa Mwĩai Ngai nũkũmeka ũndũ ũtaaĩkwa ĩngĩ, na nthĩ ĩyatũka na kũmamelya vamwe na syĩndũ syoo syonthe, na maithi me thayũ vala maveva ma ala akw'ũ mekalaa, nĩvo ĩndĩ mũũmanya kana andũ aa mamũvũthisye Mwĩai Ngai.”
31Mwose amina kũneena oou, vala Ndathani na Avilamu maũngyĩ nĩvaatũkie 32na nthĩ yamamelya vamwe na andũ ma mĩsyĩ yoo na aatĩĩi ma Kola onthe, na syĩndũ syoo syonthe. 33Kwoou nĩmalikile na nthĩ me thayũ mathi vala maveva ma ala akw'ũ mekalaa vamwe na syĩndũ syoo syonthe. Nĩmavw'ĩkiwe nĩ nthĩ na onthe maa vyũ kuma andũnĩ ma Ĩsilaeli. 34Yĩla andũ ma Ĩsilaeli ala maĩ vakuvĩ meewie kĩĩo kya andũ asu, nĩmasembie makĩa mayasya atĩĩ, “Tũsembei, nthĩ ndĩkatũmelye o naitũ!”
35Nĩvo ĩndĩ Mwĩai Ngai waetie mwaki wavĩvya ala andũ maana elĩ na mĩongo ĩtano maumasya ũvani mbee wa Mwĩai Ngai.
Syĩndũ sya Kũtoeesya Ũvani
36Mwĩai Ngai nĩwaneenie na Mwose amwĩa atĩĩ, 37“Tavya Eleasali mwana wa mũthembi Alũni ũmwĩe nĩose syĩndũ sya kũtoeesya ũvani asyumye mwakinĩ na ayumya makaa ala me nthĩnĩ wasyo amanyaĩĩkĩsye vaasa, nũndũ syĩndũ isu sya kũtoeesya ũvani nĩ ntheu. 38Syĩndũ isu syathew'a yĩla syaetwe mbee wa Mwĩai Ngai. Kwoou osa syĩndũ isu sya kũtoeesya ũvani sya andũ asu mooawa nũndũ wa ĩvĩtyo yoo, ũitumbatumbe ivũthe na ũiseũvya kĩndũ kya kũvw'ĩka kĩthembeo. Ũsu wĩĩthĩwa ũkany'o kwa andũ onthe ma Ĩsilaeli.” 39Kwoou mũthembi Eleasali nĩwoosie syĩndũ isu sya kũtoeesya ũvani syaseũvĩtw'e na kyũma kĩtawa mbulonzi, ila syaumiw'e nĩ andũ asu mavĩviw'e na aitumbatumba syavũtha aseũvya kĩndũ kya kũvw'ĩka kĩthembeo. 40Ũsu waĩ ũkany'o kwa andũ onthe ma Ĩsilaeli kana mũndũ o na wĩva ũte nzyawa ya Alũni ndaĩlĩte kũthi Ĩeemanĩ ĩtheu avĩvĩsye Mwĩai Ngai ũvani. Mũndũ ũla wĩĩka ũu o nake akeekwa ta Kola na aatĩĩi make. Maũndũ asu onthe meekiwe kwĩanana na ũndũ Mwĩai Ngai weeaĩĩte Eleasali kwĩsĩla kũla kwĩ Mwose.
Alũni Aitangĩĩa Andũ
41Mũthenyanĩ ũla waatĩĩe andũ onthe ma Ĩsilaeli nĩmanyungunyĩisye ĩũlũ wa Mwose na Alũni mayasya atĩĩ, “Nĩmũnooaie andũ amwe ma Mwĩai Ngai.” 42Andũ asu mamina kũmbana nĩ kana makananĩsye Mwose na Alũni nĩmavĩndũkie masisya Ĩeema ĩtheu ya kũkomanĩa na Ngai na moona yĩvw'ĩkĩtwe nĩ yĩla ĩtu na ũtheu mũtisu wa Mwĩai Ngai wĩvo. 43Mwose na Alũni nĩmaendie maũngama mbee wa Ĩeema, 44na Mwĩai Ngai eea Mwose atĩĩ, 45“Umai katĩ wa andũ aa, nakwa nĩngũmamina oyu kwa mĩtũkĩ.”
Ĩndĩ Mwose na Alũni nĩmakumanie matina nthĩ na ũthyũ mamwĩsũve Mwĩai Ngai. 46Mwose nĩweeie Alũni atĩĩ, “Osa kĩndũ kyaku kya kũtoeesya ũvani na ũikĩkĩa makaa me mwaki kuma kĩthembeonĩ, na ũikĩkĩa ũvani. Enda wĩkalaatĩte kũla kwĩ andũ ma Ĩsilaeli ũkamathesye na kũmew'anĩthya na Ngai. Ũthatu wa Mwĩai Ngai nĩwaingĩva, na ũwau mũthũku nĩwamokĩa.” 47Kwoou Alũni nĩweekie ũndũ Mwose wamwĩie, na asemba athi kũla kwĩ andũ ma Ĩsilaeli. Ũwau ũsu mũthũku waĩ ũnambĩĩa kũkwata andũ, ĩndĩ Alũni nĩweekĩie ũvani makaanĩ me mwaki na athesya andũ na kũmew'anĩthya na Ngai. 48Alũni amina kwĩka ũu ũwau ũsu nĩwathelile, nake atiwa aũngamĩte katĩ wa andũ ala maĩ thayũ na mĩĩ ya ala maĩ akw'ũ. 49Andũ ala mooaiwe nĩ ũwau ũsu mũthũku maĩ ngili ĩkũmi na inya na maana mũonza, ala makwie ĩvinda ya ũng'endu wa Kola mate atale. 50Ũwau ũsu wathela, Alũni nĩwasyokie mũvĩanĩ wa Ĩeema ĩtheu ya kũkomanĩa na Ngai vala Mwose waĩ.
Currently Selected:
Mot 16: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011