Mot 31
31
Andũ ma Ĩsilaeli Mayũkita andũ ma Mitiani
1Mwĩai Ngai nĩwaneenie na Mwose amwĩa atĩĩ, 2“Ĩvanĩsya andũ ma Ĩsilaeli kũla kwĩ andũ ma Mitiani nũndũ wa maũndũ ala meekie andũ ma Ĩsilaeli. Wamina kwĩka ũu, nũũkw'a.”
3Kwoou Mwose nĩwaneenie na andũ ma Ĩsilaeli amea atĩĩ, “Ĩyũmbany'ei kũthi kaũnĩ, nĩ kana mũthi mũkokite na andũ ma Mitiani na mũyĩanĩsya ũĩvanĩsyo wa Mwĩai Ngai ĩũlũ woo. 4Kĩla mbaĩ ya andũ ma Ĩsilaeli ĩtũme aũme ngili ĩmwe mathi kaũnĩ.”
5Aũme ngili ĩmwe nĩmanyũviwe kuma kĩla mbaĩnĩ. Kwoou ũtalo wa aũme ala manyuviwe na meeyũmbany'a kũthi kaũnĩ waĩ ngili ĩkũmi na ilĩ. 6Mwose nĩwamatũmie mathi kaũnĩ me vamwe na Vineasi mwana wa mũthembi Eleasali. Vineasi nĩwe wakuĩte mĩio ya vala Vandũ Vatheu na masoo ma kũtongoesya asikalĩ me kaũnĩ. 7Nĩmavithũkĩie andũ ma Mitiani o tondũ Mwĩai Ngai wamwĩaĩĩte Mwose na mooaa aũme onthe, 8vamwe na asumbĩ atano ma Mitiani: Evi, Lekemu, Nzuli, Uulu na Leva. O ta ũu nĩmooaie Mbalaamu mwana wa Mbeoli.
9Andũ ma Ĩsilaeli nĩmakwatie aka na syana sya Mitiani ũkombo. Nĩmatavie indo, mbũi na malondu, o vamwe na ũthwii wa andũ ma Mitiani. 10Nĩmavĩvisye ndũa syonthe na maeema kũla Amitiani mekalaa. 11Nĩmakuie syĩndũ syonthe ila matavĩte, andũ na indo. 12Nĩmatwaie andũ ala makwatĩtwe ũkombo na indo ila matavĩte mbee wa Mwose na Eleasali na andũ onthe ma Ĩsilaeli ala maĩ maeemanĩ ala mambĩtwe ũiĩnĩ wa Moavi, mũingo wa Ũsĩ wa Yolotani vakuvĩ na Yeliko.
13Mwose, Eleasali na atongoi ala angĩ ma andũ ma Ĩsilaeli nĩmaumie maeemanĩ na mathi kũthaũa ala asikalĩ ma kaũ. 14Mwose nĩwathatiw'e mũno nĩ atongoi ala maũngamĩe ikundi sya asikalĩ ala masyokete kuma kaũnĩ; ala maũngamĩe asikalĩ ngili na ala maũngamĩe asikalĩ ĩana. 15Nĩwamakũlilye atĩĩ, “Mũleile kũaa aka onthe ma Mitiani nĩkĩ? 16#Mot 25.1-9 Lilikanai kana aka aa nĩmo maatĩĩie ũtao ũla Mbalaamu wamanengie me Veoli, na matuma andũ onthe ma Ĩsilaeli methĩwa mate aĩkĩĩku kũla kwĩ Mwĩai Ngai, na kwoou ũwau mũthũku wakwata andũ ma Ĩsilaeli. 17Kwoou yu ĩndĩ, ũaai syana syonthe sya tũvĩsĩ na o ta ũu ũaai aka onthe ala maamanyana kĩ-mwĩĩ na aũme. 18Ĩndĩ mũikoae syana sya eĩtu ila itanamba kũmanyana kĩ-mwĩĩ na aũme; iekei syĩkale thayũ nĩ kana syĩthĩwe syenyu. 19Mũndũ o na wĩva ũla wũaĩte mũndũ kana akakwata mwĩĩ wa mũndũ mũkw'ũ, no nginya ekale ũtee wa vala maeema mambĩtwe vandũ va mĩthenya mũonza. Mũthenyanĩ wa katatũ na wa mũonza no nginya ethesye e vamwe na ũla ũkwatĩtwe ũkombo. 20Thesyai ngũa syenyu o vamwe na syĩndũ syonthe ila iseũvĩtw'e na kĩthuma, w'ĩa wa mbũi kana mbwaũ.”
21Mũthembi Eleasali nĩweeie aũme ala maumĩte kaũnĩ atĩĩ, “Mwĩao ũla Mwĩai Ngai ũnengete Mwose nĩ ũũ: 22Thaavu, silĩva, mbulonzi, kyũma, ĩvulũ na kyũma kĩũmu, 23na kĩndũ kyonthe kĩla kĩtanangawa nĩ mwaki kĩsĩlw'e mwakinĩ nĩ kana kĩthew'e. Ĩndĩ ũu wĩ o vo, no nginya ithew'e na kĩw'ũ kĩla kĩtheasya syĩndũ ila syavukw'a. Syĩndũ ila itatonya kwĩsĩlw'a mwakinĩ ithew'e na kĩw'ũ kĩu. 24Mũthenyanĩ wa mũonza, vũai ngũa syenyu na nĩmũkwĩthĩwa mwĩ atheu. Ĩtina wa ũu no mũsyoke vala andũ ma Ĩsilaeli mambĩte maeema moo.”
Andũ ma Ĩsilaeli Mayĩaana Syĩndũ ila Matavie Mitiani
25Mwĩai Ngai nĩwaneenie na Mwose amwĩa atĩĩ, 26“We wĩ na mũthembi Eleasali na atongoi ma andũ ma Ĩsilaeli, talai syĩndũ syonthe ila syataviwe, andũ na nyamũ. 27Aany'ai syĩndũ isu kũndũ kwĩlĩ; imwe inengwe asikalĩ ala maendie kaũnĩ, na ila ingĩ iinengwa andũ onthe ma Ĩsilaeli. 28Kuma syĩndũnĩ ila syanengwa asikalĩ, osai mũvothi wa kũmbumĩsya nyie Mwĩai Ngai ta ũũ: Kuma kĩla andũnĩ maana atano akwate ũkombo umyai mũndũ ũmwe, na kuma kĩla ng'ombe maana atano, kana mang'oi, kana mbũi kana malondu mũyumya nyamũ ĩmwe. 29Andũ asu na nyamũ isu inengwe mũthembi Eleasali ta nthembo yumĩw'e Mwĩai Ngai. 30Kuma syĩndũnĩ ila inengetwe andũ ala angĩ ma Ĩsilaeli, osai koti wa kũmbumĩsya nyie Mwĩai Ngai ta ũũ: Kuma kĩla andũnĩ mĩongo ĩtano akwate ũkombo umyai mũndũ ũmwe, na kuma kĩla ng'ombe mĩongo ĩtano, kana mang'oi, kana mbũi, kana malondu mũyumya nyamũ ĩmwe. Andũ asu na nyamũ isu inengwe Alivai ala maũngamĩe Ĩeema yakwa ĩtheu nyie Mwĩai Ngai.” 31Kwoou Mwose na mũthembi Eleasali nĩmeekie ũndũ Mwĩai Ngai weeaĩĩte Mwose.
32Asikalĩ ala maendie kaũnĩ nĩmatavĩte mbũi na malondu ngili maana thanthatũ, na mĩongo mũonza na itano, 33ng'ombe ngili mĩongo mũonza na ilĩ, 34mang'oi ngili mĩongo thanthatũ na ĩmwe, 35na eĩtu ala matamanyĩte kĩ-mwĩĩ na mũndũ-ũme ngili mĩongo ĩtatũ na ilĩ. 36Ũtalo wa kĩlungu kĩla kyanengiwe asikalĩ waĩ: Mbũi na malondu ngili maana atatũ na mĩongo ĩtatũ na mũonza na maana atano. 37Kuma mbũinĩ isu na malondu Mwĩai Ngai nĩwaumĩiw'e mũvothi wa mbũi na malondu maana thanthatũ na mĩongo mũonza na itano; 38ng'ombe ngili mĩongo ĩtatũ na thanthatũ, na kuma ng'ombenĩ isu Mwĩai Ngai nĩwaumĩiw'e mũvothi wa ng'ombe mĩongo mũonza na ilĩ; 39mang'oi ngili mĩongo ĩtatũ na maana atano, na kuma mang'oinĩ asu Mwĩai Ngai nĩwaumĩiw'e mũvothi wa mang'oi mĩongo thanthatũ na yĩmwe; 40eĩtu mataamanyana kĩ-mwĩĩ na mũndũ-ũme ngili ĩkũmi na thanthatũ, na kuma eĩtunĩ asu Mwĩai Ngai aumĩw'a koti wa eĩtu mĩongo ĩtatũ na elĩ. 41Kwoou Mwose nĩwanengie mũthembi Eleasali mũvothi ũsu wa andũ na nyamũ ta nthembo kwĩanana na ũndũ Mwĩai Ngai wamwĩaĩĩte.
42Ũtalo wa nyusu ĩla Mwose waaĩie andũ ala angĩ ma Ĩsilaeli ĩtina wa kũnenga asikalĩ nyusu ĩla ĩngĩ waĩ: 43Mbũi na malondu ngili maana atatũ, mĩongo ĩtatũ na mũonza na maana atano, 44ng'ombe ngili mĩongo ĩtatũ na thanthatũ, 45mang'oi ngili mĩongo ĩtatũ na maana atano, 46na eĩtu mataamanyana kĩ-mwĩĩ na mũndũ-ũme ngili ĩkũmi na thanthatũ. 47Kuma kĩlungunĩ kĩu kyanengiwe andũ ma Ĩsilaeli Mwose nĩwoosie mwĩĩtu ũmwe kuma kĩla eĩtunĩ mĩongo ĩtano na nyamũ ĩmwe kuma kĩla nyamũnĩ mĩongo ĩtano sya ũko ũmwe aĩnengane kũla kwĩ Alivai ala maũngamĩĩte Ĩeema ĩtheu ya kũkomania na Mwĩai Ngai kwĩanana na ũndũ Mwĩai Ngai wamwĩaĩĩte.
48Nĩvo ĩndĩ anene ala matongoesye asikalĩ ngili na ala matongoesye asikalĩ ĩana maendie vala ve Mwose, 49na mamwĩa atĩĩ, “Mũnene nĩtũtalile asikalĩ ala tũũngamĩe na vai ũmwe ũtevo. 50Kwoou nĩtwooka kumĩsya Mwĩai Ngai nthembo ya syĩndũ sya wanake sya thaavu ila tũnakuie: Mbangili, itang'a sya kwĩkĩa moko, mbete sya kwĩkĩa mũulĩ, mĩnaĩ, na masoa ma kwĩkĩa ngingo. Syĩndũ isu twĩsyumya nĩ kana tũkwate ũekeo wa naĩ sitũ kuma kwa Mwĩai Ngai.” 51Mwose na mũthembi Eleasali nĩmoosie syĩndũ isu syonthe sya wanake syaseũvĩtw'e na thaavu. 52Ũito wa syĩndũ isu anene ma asikalĩ maumĩisye Mwĩai Ngai waĩ vakuvĩ kĩlo maana elĩ. 53Asikalĩ ala mataĩ atongoi mayaaete syĩndũ ila makuĩte kuma kaũnĩ. 54Kwoou Mwose na mũthembi Eleasali nĩmoosie syĩndũ isu syaseũvĩtw'e na thaavu kuma kwa anene ma asikalĩ asu na maitwaa Ĩeemanĩ ĩtheu ya kũkomanĩa na Ngai, syĩthĩwe ta ũlilikany'o kũla kwĩ Mwĩai Ngai kana andũ ma Ĩsilaeli nĩ make.
Currently Selected:
Mot 31: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011