Mot 5
5
Andũ Avuku Makĩvetangwa Maeemanĩ
1Mwĩai Ngai nĩwaneenie na Mwose amwĩa atĩĩ, 2“Ĩaĩe andũ ma Ĩsilaeli mavetange kuma maeemanĩ mũndũ o na wĩva ũla ũwaĩte mangũ#5.2 Mangũ: Ũũ nĩ ũwau mũthũku mũno. Mũndũ e na w'o, syaa sya moko na maũũ nitonya kũtilĩkanga na kuma; o na manyiũũ na ũĩmĩ kwanangĩka na nzw'ĩĩ kũunyũka. kana ũkumwa nĩ mavia mwĩĩnĩ, kana ũvukĩtw'e nĩ kũkiita mũndũ mũkw'ũ. 3Vetangai andũ ma mũthemba ũsu maeemanĩ, o na ethĩwa nĩ aũme kana aka, nĩ kana maikavukye maeema vala nĩkalaa katĩ wa andũ makwa.” 4Andũ ma Ĩsilaeli nĩmeekie ũu; nĩmavetangie andũ asu mamatwaa nza wa maeema kwĩanana na ũndũ Mwĩai Ngai wamwĩaĩĩte Mwose.
Mwĩao wa Kũĩvĩthya Mũndũ ũla Wĩkĩte Naĩ
5 #
Ali 6.1-7
Mwĩai Ngai nĩwaneenie na Mwose amwĩa atĩĩ, 6“Neena na andũ ma Ĩsilaeli ũmee kana ethĩwa mũndũ-ũme kana mũndũ mũka nĩwavĩtĩsya ũngĩ kwa nzĩa o na yĩva, na nũndũ wa ĩvĩtyo yĩu ayĩthĩwa ate mũĩkĩĩku kwa Mwĩai Ngai, mũndũ ũsu nũvĩtĩtye. 7No nginya ĩndĩ mũndũ ũsu aumbũle naĩ ĩsu wĩkĩte na ayĩĩva ndĩvi yĩanĩe ĩvĩtyo yake, na kũmyongeleela kĩlungu kĩmwe kya itano kyayo. Nĩvo ĩndĩ wĩnengane ndĩvi ĩsu kwa mũndũ ũla ũvĩtĩsye. 8Ĩndĩ ethĩwa mũndũ ũla ũvĩtĩw'e nĩwakw'a na vai mũndũ wa mũsyĩ wake wĩ vakuvĩ ũla ũtonya kũnengwa ndĩvi ĩsu, ndĩvi ĩsu nĩnengwe Mwĩai Ngai yĩthĩwe ya mũthembi, vamwe na ndũũme ĩla yaĩlĩte kũthembwa nĩ kana mũndũ ũsu wĩkĩte naĩ ĩsu athew'e. 9Nthembo ya syĩndũ syonthe ila ntheu andũ ma Ĩsilaeli meumĩasya mũthembi ĩkeethĩawa yĩ yake. 10Syĩndũ syonthe ntheu ila mũndũ wĩ nasyo ikeethĩawa syĩ sya mũthembi. Mũthembi akaiaa syĩndũ ila wanengwa na iitw'ĩka syake.”
Mũndũ-ũme wĩ na Nzika ĩũlũ wa Mũka wake
11Mwĩai Ngai nĩwaneenie na Mwose amwĩa atĩĩ, 12“Neena na andũ ma Ĩsilaeli ũmee kana ethĩwa kĩveti kya mũndũ nĩkyatia mwĩkalo ũla waĩlĩte na kyeethĩwa kĩte kĩĩkĩĩku kwa mũũme wakyo, 13kwa kũmanyana kĩ-mwĩĩ na mũndũ-ũme ũngĩ, na mũũme wakyo kana mũndũ ũngĩ ailea kũmanya, kĩveti kĩu nĩkĩvukĩtye, o na kau vai mũndũ waakũsĩĩa ũndũ ũsu, nũndũ kyeekie ũu kĩvithĩte. 14Mũũme wakyo akwatwa nĩ nzika ngoonĩ na ayĩliwa kana mũka wake nĩwĩvukĩtye, o na ethĩwa nũtonya kwĩthĩwa atevukĩtye, 15nĩatwae mũka wake kũla kwĩ mũthembi. Nĩathi akuĩte nthembo ĩla yathĩĩwe ya kĩlo kĩmwe kya mũtu wa nganũ ĩla yĩtawa mbaale. Ĩndĩ ndakavulany'e mũtu ũsu na mauta kana ũvani, nũndũ ĩsu nĩ nthembo kuma kwa mũndũ wĩ na nzika nũndũ wa mũka wake, na yumĩtw'e nĩ kana ũw'o ũtonye kũmanyĩka.
16“Mũthembi akaete mũndũ mũka ũsu na kũmũũngamya mbee wa kĩthembeo. 17Nĩvo ĩndĩ wĩosa kĩw'ũ kĩtheu akĩkĩe mbakũlinĩ ya yũmba, na aikĩkĩa mũthanga ũutĩte Ĩeemanĩ ĩtheu ya kũkomanĩa na Mwĩai Ngai nthĩnĩ, nĩ kana kĩw'ũ kĩu kĩmesye wũũ. 18Mũthembi nĩathasye nzw'ĩĩ sya mũndũ mũka ũsu, na aimwilĩĩla mokonĩ make ĩla nthembo ya mũtu. Mũthembi nĩakwate ĩla mbakũli yĩ kĩw'ũ kĩ wũũ kĩla kĩetae kĩumo. 19Nĩvo ĩndĩ mũthembi wĩĩa mũndũ mũka ũsu nĩevĩte kwa kwĩtĩkĩlana na ndeto ii: ‘Ethĩwa ndwaamanyana kĩ-mwĩĩ na mũndũ-ũme ũngĩ, na ndwaatia mwĩkalo ũla waĩlĩte na kwĩvukya wĩ mũtwae, kĩw'ũ kĩĩ kĩ wũũ kĩetae kĩumo kĩikwĩka ũndũ mũthũku. 20Ĩndĩ ethĩwa nũtiĩte mwĩkalo ũla waĩlĩte wĩ mũtwae na ũkevukya kwa kũmanyana kĩ-mwĩĩ na mũndũ-ũme ũngĩ ũte mũũme waku, 21Mwĩai Ngai nĩakũkany'e na ũyĩumanĩwa na kũlewa nĩ andũ maku, wĩthĩwe ngũngũ na ĩvu yaku yĩ yimba. 22Kĩw'ũ kĩĩ kĩetae kĩumo kĩlike ĩvunĩ yaku na kĩikũtw'ĩkĩthya ngũngũ na ĩvu yaku yĩ yimba.’
“Mũndũ mũka ũsu nĩasũngĩe asye, ‘Nĩkwĩthĩwe ũu, Ameni.’
23“Nĩvo ĩndĩ mũthembi ũsu wĩandĩka ndeto isu sya kũumanĩa ĩvukunĩ na ayĩivuta kwa kũithambĩsya kĩla kĩw'ũnĩ kĩ wũũ. 24Nĩanenge mũndũ mũka ũsu kĩw'ũ kĩu kĩ wũũ na kĩetae kĩumo anyw'e. Amina kũnyw'a kĩw'ũ kĩu, nĩkĩũlika ĩvunĩ yake na kĩituma akwatwa nĩ kyalya kingĩ mũno. 25Mũthembi nĩose ĩla nthembo ya mũtu kuma mokonĩ ma mũndũ mũka ũsu, na aimyũkĩlĩlya Mwĩai Ngai, na kũmilĩĩla kĩthembeonĩ. 26Ĩtina wa ũu nĩaute ngundi yusĩe ya mũtu ũsu na aiũvĩvĩsya kĩthembeonĩ ta nthembo ya ũlilikany'o, na ĩndĩ ainenge mũndũ mũka ũsu kĩw'ũ kĩu anyw'e. 27Ethĩwa mũndũ mũka ũsu nĩwĩthĩĩtwe ate mũĩkĩĩku kwa mũũme wake na kwĩvukya kwa kũmanyana kĩ-mwĩĩ na mũndũ ũngĩ, anyw'a kĩw'ũ kĩu kya kũete kĩumo, nĩkĩũlika ĩvunĩ kwake na kĩituma ethĩwa na kyalya kingĩ mũno; nũkũtw'ĩka ngũngũ na ĩvu yake yĩyimba. Mũndũ mũka ũsu akatalawa ta mũndũ mũumanĩe e andũnĩ make. 28Ĩndĩ ethĩwa mũndũ mũka ũsu ndekĩte naĩ na kwĩvukya, ndekwatwa nĩ ũndũ mũthũku na akeethĩwa atonya kũsyaa.
29“Ũsu ĩndĩ nĩw'o mwĩao wa mũndũ-ũme kwĩthĩwa na nzika kana mũka wake nũtonya kwĩthĩwa atiĩte mwĩkalo ũla waĩlĩte, na kwĩvukya e mũka wake, 30kana yĩla mũndũ-ũme wakwatwa nĩ nzika nũndũ nũkwĩliwa kana mũka wake ti mũĩkĩĩku. Mũthembi akamũetae na kũmũũngamya mbee wa kĩthembeo na ayĩka ũndũ mwĩao ũsu ũkwasya. 31Mũndũ-ũme ũsu ndakethĩawa na ĩvĩtyo wĩkĩte, ĩndĩ ethĩwa mũndũ mũka ũsu nũvĩtĩtye no nginya akanw'e.”
Currently Selected:
Mot 5: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011