Yoa 16
16
1“Namũtavya maũndũ aa nĩ kana mũikaluluutĩke maũndũnĩ ma mũĩkĩĩo. 2Mũkalũngw'a mume nyũmbanĩ sya Ayuti sya kũthaithĩa na kũmbanĩa; kwa w'o ĩvinda nĩyũkĩte yĩla andũ ala makamũaa meonaa o ta meũmũthũkũma Ngai. 3Makeeka maũndũ asu nũndũ maimwĩsĩ Asa, na o ta ũu o nakwa maimbĩsĩ. 4Namũtavya maũndũ asu nĩ kana ĩvinda ya ũndũ ũsu yavika, mwĩlilikana kana nĩnamũtavisye.
Wĩa wa Veva Mũtheu
“Ndyaamũtavya maũndũ aa kuma mwambĩlĩĩlyonĩ nũndũ neethĩawa vamwe nenyu, 5ĩndĩ yu nĩnĩendete kwa ũla wandũmie, na vai ũmwe wenyu ũkũngũlya, ‘Wĩenda va?’ 6Ngoo syenyu nĩsyausũwa nĩ kyeva nũndũ namũtavya maũndũ asu. 7Ĩndĩ kwa w'o ekai nĩmũtavye, nĩ kwa ũseo wenyu nyie ngũthi, nũndũ nalea kũthi ũla Mũtetheesya nake nĩ Veva Mũtheu ndeũka kũla mũĩ. Ĩndĩ nathi ngamũtũma oke ethĩawe vamwe nenyu. 8Yĩla wĩũka, akamanyĩsya andũ kĩla kĩtawa naĩ nĩ kyaũ, ũlũngalu nĩ mwaũ, na o ta ũu kĩla kĩtawa ũsilĩlo wa Ngai nĩ kyaũ. 9Akamamanyĩsya naĩ nĩ myaũ nĩkwĩthĩwa mayĩĩkĩĩaa ndeto ila nĩmatavasya, 10na kũmamanyĩsya ũlũngalu nĩ mwaũ, nũndũ nyie nĩngũthi kwa Ĩthe wakwa na mũikethĩwa mũtonya kũmbona ĩngĩ. 11O ta ũu akamamanyĩasya ũsilĩlo wa Ngai nĩ mwaũ, nĩkwĩthĩwa mũnene wa nthĩ ĩno nĩmũsilĩle nĩ Ngai.
12“Nĩna maũndũ angĩ maingĩ ma kũmũtavya, ĩndĩ kavindanĩ kaa mũitonya kũmomĩĩsya. 13Ĩndĩ yĩla Veva ũla ũvuanasya ũw'o wĩũka, akamũtongoeasya nthĩnĩ wa ũw'o w'onthe. Ndakethĩawa aineena ndeto syake mwene; akaneenaa kĩla wĩĩw'aa na kũmũtavya maũndũ ala makoka. 14Akandetee ũkumyo nũndũ akamũmanyĩasya kĩla wĩosaa kuma vala nĩĩ. 15Maũndũ onthe ala Asa wĩ namo nĩ makwa; kĩu nĩkyo kyatuma nasya kana Veva akamũmanyĩasya kĩla wĩosaa kuma vala nĩĩ.
Kĩmako Nĩkĩkatw'ĩka Ũtanu
16“No kavinda kanini katialĩte na mũyĩeka kũmbona, ĩndĩ ĩtina wa kavinda kangĩ kanini mũkambona ĩngĩ.”
17Amwe ma amanyĩw'a make nĩmakũlanilye ene kwa ene, “Ũu nĩ kwasya ata ĩndĩ, ‘No kavinda kanini katialĩte na mũyĩeka kũmbona, ĩndĩ ĩtina wa kavinda kangĩ kanini mũkambona ĩngĩ,’ na kwasya, ‘Nũndũ nĩnĩendete kwa Asa?’ ” 18Nĩmaendeeie na kwasya, “Yĩla ũkũneena akasya, ‘Kavinda kanini,’ ũu nĩ kwasya ata? Ithyĩ tũyĩsĩ eneena ĩũlũ wa kyaũ!”
19Yesũ nĩwamanyie kana me na ĩkũlyo na kwoou amakũlya atĩĩ, “Mwĩkũlany'a kĩla ngũwetaa yĩla nasya, ‘No kavinda kanini katialĩte na mũyĩeka kũmbona, ĩndĩ ĩtina wa kavinda kangĩ kanini mũkambona ĩngĩ?’ 20Nĩmũtavya w'o, inyw'ĩ mũkaĩa na mũimaka, ĩndĩ nthĩ ĩkatana. Mũkakwatwa nĩ kĩmako kingĩ, ĩndĩ kĩmako kyenyu kĩkaalyũka kĩtw'ĩke ũtanu. 21Yĩla mũndũ mũka wĩ vakuvĩ kũsyaa nĩwĩthĩawa na kĩmako nũndũ saa wake wa kwĩw'a woo wa kwaũnya nĩmũviku, ĩndĩ amina kũsyaa oou, nĩwũlawa nĩ mathĩna asu nũndũ ethĩawa na ũtanu nĩkwĩthĩwa mũndũ nĩwasyawa kũũ nthĩ.
22“Kwoou nenyu mwĩ na kĩmako yu, ĩndĩ ngamwona ĩngĩ na ngoo syenyu ikausũwa nĩ ũtanu, ũtanu ũla mũndũ o na wĩva ũtatonya kũmũvena.
23“Yĩla ĩvinda yĩu yĩvika, mũikambĩtya kĩndũ o na kĩmwe. Nĩmũtavya w'o, Asa akamũnenge kĩndũ o na kĩva kĩla mwĩmwĩtya ĩsyĩtwanĩ yakwa. 24Kũvika vau mũyaaĩtya kĩndũ ĩsyĩtwanĩ yakwa; ĩtasyai na mũkanengawe, na mũkeethĩawa na ũtanu mwingĩ.
Yesũ Nũkĩlĩtye Nthĩ Vinya
25“Namũtavya maũndũ asu na ngelekany'o. Ĩndĩ ĩvinda nĩyũkĩte yĩla ndakaneena nenyu na ngelekany'o; ngamũtavya ndeũmũvitha ĩũlũ wa Asa. 26Ĩvinda yĩu yavika mũkamũvoyaa ĩsyĩtwanĩ yakwa, ĩndĩ nyie ndiũmwĩa kana ngamũvoya Asa vandũ venyu. 27Asa we mwene nũmwendete nũndũ inyw'ĩ nĩmũmbendete, na nĩmũĩkĩĩaa kana naumie kwake. 28Naumie kwa Asa nooka kũũ nthĩ, na yu nĩnguma kũũ nthĩ nĩsyoke kwake.”
29Nĩvo ĩndĩ amanyĩw'a make mamwĩie atĩĩ, “Yu waneena naitũ ũtekũvithany'a kĩndũ, o na ndũnatũmĩa ngelekany'o. 30Nĩtwamanya kana nĩwĩsĩ maũndũ onthe, na ndwĩ na vata wa mũndũ akũkũlye makũlyo. Ũu nĩwatuma tũĩkĩĩa kana wookie kuma kwa Ngai.”
31Yesũ nĩwamasũngĩie amea atĩĩ, “Nĩmwaĩkĩĩa yu? 32Ĩvinda nĩyũkĩte na nĩ ĩviku, yĩla inyw'onthe mwĩnyaĩĩkw'a, kĩla ũmwe wenyu athi mũsyĩ kwake, na mũkandia nĩ nyioka. Ĩndĩ kwa w'o nyie ndi nyioka nĩkwĩthĩwa Asa e vamwe nakwa. 33Namũtavya maũndũ asu nĩ kana mwĩ nthĩnĩ wakwa mwĩthĩwe na mũuo. Mwĩ kũũ nthĩ mũkathĩnaw'a, ĩndĩ ĩthĩwai na ũkũmbaũ; nĩnĩkĩlĩtye nthĩ vinya!”
Currently Selected:
Yoa 16: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
