Yoa 19

1Nĩvo ĩndĩ Vilato wamwosie Yesũ amũnengane akũnwe ivoko. 2Asikalĩ nĩmavĩlanganisye tũũvonge twĩ mĩw'a, maseũvya ngovia mamwĩkĩa Yesũ mũtwe, na mamwĩkĩa ngũa ndune. 3Nĩvo ĩndĩ mambĩĩie kũthi mbee wake na kũmwĩa atĩĩ, “Ũvoo waku Mũsumbĩ wa Ayuti!” O ta ũu nĩmamũmandũlangaa.

4Vilato nĩwaumaalile nza ĩngĩ na eea andũ atĩĩ, “Kwa sisyai, nĩngũete mũndũ ũsu vaa mũĩ nĩ kana mũmanye kana ndikwona ĩvĩtyo yĩtuma asilĩlwa.” 5Kwoou Yesũ aumaalw'a nza ekĩĩtwe ngovia ya mĩw'a na ĩla ngũa ndune. Vilato nĩweeie andũ atĩĩ, “Sisyai, mũndũ nĩwe ũũ.”

6Yĩla athembi anene na asikalĩ ma Ĩkalũ mamwonie Yesũ, nĩmaneenie na wasya mũnene mayasya atĩĩ, “Mwambe, Mwambe!”

Vilato amea atĩĩ, “Mwosei inyw'ĩ mũkamwambe nũndũ nyie ndinona e na ĩvĩtyo.”

7Andũ asu mamũsũngĩa Vilato mamwĩa atĩĩ, “Ithyĩ twĩ na mwĩao, na kwĩanana na mwĩao ũsu, mũndũ ũũ nĩwaĩlĩte kũawa, nũndũ anaasya nĩ Mwana wa Ngai.”

8Yĩla Vilato weewie ũu, nĩwakwatiwe nĩ w'ĩa mwingĩ mũno. 9Nĩwasyokie nyũmba na amũkũlya Yesũ atĩĩ, “Wumĩte va we?”

Ĩndĩ Yesũ ndaamũsũngĩa. 10Vilato amũkũlya atĩĩ, “Wĩlea kũneena nakwa nĩkĩ? Ndwĩsĩ kana nĩ na ũkũmũ wa ũkũthasya na nĩ na ũkũmũ wa kwasya wambwe?”

11Yesũ amũsũngĩa amwĩa atĩĩ, “Ndwĩthĩwa na ũkũmũ ĩũlũ wakwa ũtanengetwe nĩ Ngai. Kwoou mũndũ ũla wĩkĩte naĩ ĩla nene nĩ ũla ũnenganĩte kwaku.”

12Vilato eew'a ndeto isu, nĩwambĩĩie kũmantha nzĩa ya kũmũthasya Yesũ, ĩndĩ andũ ala maĩ vau malonzany'a mũno mayasya atĩĩ, “Ethĩwa nũũthasya mũndũ ũsu, ndwĩ mũnyanyae wa Mũsumbĩ wa Loma! Mũndũ ũla wendaa kwĩtw'ĩkĩthya mũsumbĩ ethĩawa ailea Mũsumbĩ wa Loma!”

13Yĩla Vilato weewie ndeto isu, nĩwaumaalilye Yesũ nza na ekala nthĩ kĩvĩlanĩ kya sila vandũ veetawa, “Mavia Malany'e;” kwa Kĩevelania vetawa, “Ngavatha.” 14Kwaĩ ta saa sita sya mũthenya, mũthenyanĩ wa kwĩyũmbanĩsya Vasaka. Nĩvo ĩndĩ Vilato weeie Ayuti atĩĩ, “Sisyai mũsumbĩ wenyu!”

15Namo malonzany'a mayasya, “Mũae! Mũae! Mwambe!”

Vilato amakũlya, “Mwĩenda nĩmwambe mũsumbĩ wenyu?”

Athembi anene masũngĩa, “Ithyĩ tũi na mũsumbĩ ũngĩ eka mũsumbĩ wa Loma.”

16Nĩvo ĩndĩ Vilato wamũnenganie Yesũ kwoo makamwambe.

Yesũ Ayambwa Ngelany'onĩ

(Mat 27.32-44; Mk 15.21-32; Lk 23.26-43)

Kwoou ĩndĩ Asikalĩ nĩmamwosie Yesũ na mamũtongoesya. 17Nĩwaumaalile ekuĩe ngelany'o yake athi kũvika vandũ vetawa, “Vandũ va Kĩng'ala,” na kwa Kĩevelania vetawa, “Ngolongotha.” 18Vau nĩmamwambie Yesũ vamwe na aũme angĩ elĩ: Ũmwe ngalĩko ĩmwe, na ũla ũngĩ ngalĩko ĩla ĩngĩ, na Yesũ vau katĩ. 19Vilato nĩwaandĩkĩte kĩvwaũ kĩkaathĩĩwa ĩũlũ wa ngelany'o kyaĩtye, “Yesũ kuma Nasaleti, Mũsumbĩ wa Ayuti.” 20Andũ aingĩ nĩmasomie kĩvwaũ kĩu nũndũ vala Yesũ wambĩtwe vaĩ vakuvĩ na mũsyĩ wa Yelũsalemu. Nakyo kyaandĩkĩtwe na kĩthyomo kya Kĩevelania, Kĩlatinĩ, na Kĩkiliki. 21Athembi anene nĩmamwĩie Vilato atĩĩ, “Eka kũandĩka, ‘Mũsumbĩ wa Ayuti,’ ĩndĩ andĩka, ‘Mũndũ ũũ anaisye: Nyie nĩ Mũsumbĩ wa Ayuti.’ ”

22Vilato amasũngĩa, “Kĩla naandĩka, nĩnaandĩka.”

23Asikalĩ mamina kũmwamba Yesũ, nĩmoosie ngũa syake maiaany'a ianda inya, kĩla mũsikalĩ akwate kĩanda kĩmwe. O ta ũu nĩmoosie ngũa yake ndaasa; ngũa ĩsu yaĩ ya kĩtambaa kĩmwe na ndyaĩ ndumany'e kuma ĩũlũ kũvika nthĩ. 24#Sav 22.18 Kwoou asikalĩ asu meeana, “Tũikamĩtembũe, ĩndĩ tũkũne kula tũmanye ũla ĩkũtw'ĩka yake.” Ũũ weekĩkie wĩanĩsye Maandĩko Matheu ala maĩtye,

“Nĩmaanie ngũa syakwa,

nayo ngũa yakwa ndaasa mamĩkũnĩa kula.”

Ũu nĩw'o asikalĩ meekie.

25Vau vakuvĩ na ngelany'o ya Yesũ vaũngyĩ inyia wake, na mwĩĩtu-a-inyia wa inyia wake, ũla nĩ Meli mũka wa Kĩliovasi, na Meli Makitalene. 26Yĩla Yesũ woonie inyia wake na mũmanyĩw'a ũla wendete maũngyĩ vau, nĩwamwĩie nyinyia, “Mwaitũ, ũsu nĩwe mwana waku.”

27Nĩwamwĩie ũla mũmanyĩw'a nake, “Sisya, ũsu nĩwe inyia waku.” Kuma saanĩ ũsu mũmanyĩw'a ũsu nĩwamwosie inyia wa Yesũ athi kwĩkala mũsyĩ kwake.

Kũkw'a Kwa Yesũ

(Mat 27.45-56; Mk 15.33-41; Lk 23.44-49)

28 # Sav 22.15; 69.21 Yesũ nĩwamanyie kana yu nĩwamina wĩa wake, na nĩ kana o ta ũu eanĩsye Maandĩko Matheu asya atĩĩ, “Nĩĩw'a waũni.”

29Vau vaĩ nzele yausũĩte ndivai ngaatu na kwoou kasivonzi kaindwa ndivainĩ ĩsu na katonyeew'a mũanginĩ, katinĩĩw'a ilomonĩ sya Yesũ. 30Yesũ amina kũviviita ndivai ĩsu ngaatu asya atĩĩ, “Nĩwathela.” Nĩvo ĩndĩ wakunamisye mũtwe na akw'a.

Yesũ Aitonywa Mbaunĩ na Ĩtumo

31Nũndũ wa kwĩthĩwa mũthenya ũsu waĩ wa kwĩyũmbanĩsya Savato, na Savato ĩsu yaĩ ya mwanya kwa Ayuti, mayaaenda mĩĩ ya andũ ala mambĩtwe yĩkale ngelany'onĩ mũthenya ũsu. Kwoou nĩmaendie makũlya Vilato mwanya maũũ ma andũ asu makatũlwe, nĩ kana mĩĩ yoo ĩvetwe ngelany'onĩ. 32Asikalĩ nĩmaendie matũla maũũ ma mũndũ wa mbee wa ala mambĩtwe na Yesũ na ma ũla ũngĩ. 33Ĩndĩ yĩla mavikie vala ve Yesũ, na meethĩa nũkwie mayaamũtũla maũũ. 34Vandũ va ũu, ũmwe wa asikalĩ nĩwamũtonyie Yesũ mbaunĩ na ĩtumo, na vau kwa vau vauma nthakame na kĩw'ũ. 35Mũndũ ũla woonie ũu ũyĩkĩka nĩwumĩtye ũkũsĩ nĩ kana o nenyu mũtonye kũĩkĩĩa. Ũkũsĩ wake nĩ wa w'o na nĩwĩsĩ kana eneena ũla w'o. 36#Kuma 12.48; Mot 9.12; Sav 34.20 Maũndũ asu meekĩkie nĩ kana Maandĩko Matheu meanĩe ala maĩtye atĩĩ, “Vai ĩvĩndĩ o na yĩmwe yake yĩkatũlwa.” 37#Nzek 12.10; Ũvu 1.7 O na ve o vandũ vangĩ Maandĩkonĩ Matheu vaĩtye atĩĩ, “Andũ makamũsisya we ũla mamũtonyie.”

Kũthikwa kwa Yesũ

(Mat 27.57-61; Mk 15.42-47; Lk 23.50-56)

38Ĩtina wa ũu, Yosevu kuma ndũanĩ ya Alimathea, nĩwamũkũlilye Vilato amwĩtĩkĩlye kũthi kũveta mwĩĩ wa Yesũ. Yosevu aĩ mũmanyĩw'a wa Yesũ, ĩndĩ kwa kĩmbithĩ nũndũ wa kũkĩa atongoi ma Ayuti. Vilato nĩwamwĩtĩkĩlilye na kwoou athi atheesya mwĩĩ wa Yesũ kuma ngelany'onĩ. 39#Yoa 3.1-2 Nikotemo, ũla navu mbeenĩ waendete kwa Yesũ ũtukũ nĩwaendanisye na Yosevu. Nikotemo akuĩte mũvulany'o wa mauta metawa manemane na ũvani syĩ na ũito wa kĩlo mĩongo ĩtatũ. 40Aũme asu me elĩ nĩmoosie mwĩĩ wa Yesũ, na maũlinga na suka nene vamwe na ala mauta me mũuke mũseo kwĩanana na kĩthĩo kya Ayuti kya kũthika andũ. 41Vau vakuvĩ na vala Yesũ wambĩtwe vaĩ mũũnda, na mũũndanĩ ũsu vaĩ mbũa yenzĩtwe o mĩtũkĩ ĩtaĩ yaathikwa mũndũ. 42Kwoou nũndũ ũsu waĩ mũthenya wa kwĩyũmbanĩsya Savato na mbũa ndyaĩ vaasa, nĩmamũthikie Yesũ vau.

Currently Selected:

Yoa 19: KAMBA

Highlight

Copy