Ntha 6

1Nwatî Ngai-Mûnene nîwerire Musa atîrî, “Rîu nîûkwona ûrîa ngwîka mûthamaki wa Misiri. Nîûndû wa ûvoti wakwa nîakûrekereria andû akwa mathiî. Nîngûtûma amarutûrûre vûrûrirî wake na vinya.”

Ngai nîwetire Musa

2 # Kîam 17.1; 28.3; 35.11; Ntha 3.13-15 Nake Ngai nîwerire Musa atîrî, “Nie nî nie Ngai-Mûnene. 3Nînaumîrîre Iburahimu, Isaka na ngiumîrîra Jakovu ta Ngai Mwene Vinya Wonthe, nwatî ndiemenyithania kûrî o na njîra ya rîîtwa rîakwa rîrîa rîtheru, Ngai-Mûnene. 4Wana nînarûthire kîrîkanîro nao ngiuga nîngaamava vûrûri wa Kanaani, vûrûri ûrîa maatûûraga ta ageni. 5Rîu nîmbîguîte mûcayo wa andû a Isiraeli arîa matuîtwe ngombo nî andû a Misiri. Nîndirikanîte kîrîkanîro gîakwa. 6Kwoguo îra andû a Isiraeli nie nîramera atî, ‘Nie nî Nie Ngai-Mûnene. Nie nîngûmûvonokia na nîmûrekererie muume ûkomborî wa andû a Misiri. Nîngeka ûndû mûnene na vinya wakwa nîguo ndetere andû a Misiri îvera, na nîngaamûvonokia. 7Nîngaamûtua andû akwa, nanie nduîke Ngai wenyu. Mue nîmûkaamenya atî nie nî nie Ngai-Mûnene, Ngai wenyu vîndî îrîa ngaamûruta ûkomborî vûrûrirî wa Misiri. 8Nanie nîngaamûvira vûrûrirî ûrîa nerîîre Iburahimu, Isaka na Jakovu atî nîngaamava na nîngaamûva guo ûtuîke wenyu. Nie nî Nie Ngai-Mûnene.’ ” 9Nake Musa nîwerire andû a Isiraeli maûndû mau monthe, nwatî matiamûthikîrîria, nîûndû nîmaathirîtue vinya nî ûkombo mûcûku ûrîa maarî naguo.

10Nake Ngai-Mûnene nîwacokire akîra Musa atîrî,

11“Thiî wîre mûthamaki wa Misiri atî nwanginya arekererie andû a Isiraeli mathiî maume vûrûrirî wake.”

12Nwatî Musa nîwacokirie atîrî, “Ethîrwa andû a Isiraeli tîmanthikîrîria, nake mûthamaki angînthikîrîria atîa? Nie ndiîcî kwaria waro.”

13Nwatî Ngai-Mûnene nîwathire Musa na Aroni akîmera atîrî, “Îrani andû a Isiraeli na mûthamaki wa Misiri atî nie nînîmwathîte mûtongorie andû a Isiraeli maume Misiri.”

Mûtaratara wa andû a nyomba ya Musa na Aroni

14Mama nîmo marîîtwa ma atongoria a nyomba cia Aisiraeli.

Reubeni nîke warî îrikithathi rîa Jakovu. Reubeni aarî na anake ana. Nao nî: Hanoku, Palu, Hezoroni, na Karîmi. Acio nîo marî methe ma tene ma mîvîrîga îrîa îtanîtue na marîîtwa mao. 15Simeoni aarî na anake atandatû. Nao nî: Jemueli, Jamini, Ohadi, Jakini, Zohari na Shauli. Shauli aarî mwanake wa mûndûmûka ûrîa warî Mûkanaani, nao nîo maarî methe ma tene ma mîvîrîga îrîa îtanîtue na marîîtwa mao. 16#Nda 3.17-20; 26.57-58; 1Maû 6.16-19 Lawi aarî na anake athatû. Nao maarî: Gerishoni, Kohathu, na Merari. Acio nîo maarî methe ma tene ma mîvîrîga îrîa îtanîtue na marîîtwa mao. Lawi atûûrire mwoyo mîaka îgana rîmwe rîa mîrongo îthatû na mûgwanja (137). 17Gerishoni aarî na anake aîrî. Nao nî: Libuni, na Shimei, kûringana na mîvîrîga yao. 18Kohathu aarî na anake ana. Nao nî: Amuramu, Iziharu, Heburoni, na Uzieli. Kohathu atûûrire mwoyo mîaka îgana rîmwe rîa mîrongo îthatû na îthatû (133). 19Merari aarî na anake aîrî. Nao maarî Mahili na Mushi. Îno nîyo mîvîrîga ya Lawi kûringana na njiarwa ciao.

20Amuramu nîwavikirie Jokibedi mwarwang'ina na îthe, na nîwaciarire Aroni na Musa. Amuramu atûûrire mwoyo mîaka îgana rîmwe rîa mîrongo îthatû na mûgwanja (137). 21Iziharu aarî na anake athatû. Nao maarî: Kora, Nefegi, na Zikiri. 22Uzieli nake aarî na anake athatû. Nao nî: Mishaeli, Elizafani, na Sithiri.

23Aroni nîwavikirie Elisheba, mwarî wa Aminadabu na aarî mwarwang'ina na Nahashoni. Nake nîwaciarire Nadabu, Abihu, Eliazaru, na Ithamaru. 24Kora aarî na anake athatû. Nao maarî: Asiru, Elikana, na Abiasafu. Aya nîo methe ma tene ma mwîrîga wa Kora. 25Eliazaru, ûmwe wa anake a Aroni nîwavikirie mwîrîtu ûmwe wa erîtu a Putieli. Mwîrîtu ûcio nîwaciarire Finehasi. Aya nîo maarî atongoria a nyomba na mîvîrîga ya mbarî ya Lawi.

26Aroni na Musa nîo Ngai-Mûnene eerire atîrî, “Tongoriani andû a Isiraeli maume vûrûri wa Misiri.”

27Nwa o meerire mûthamaki wa Misiri arekererie andû a Isiraeli.

Ngai-Mûnene nîwathire Musa na Aroni

28Rîrîa Ngai-Mûnene aarîrie Musa arî vûrûrirî wa Misiri, 29nîwamwîrire atîrî, “Nie nî Nie Ngai-Mûnene. Îra mûthamaki wa Misiri maûndû monthe marîa ngûkwîra.”

30Nwatî Musa nîwacokerie Ngai-Mûnene atîrî, “We nîwicî atî nie ndicî kwaria waro na mûthamaki tîanthikîrîria.”

Currently Selected:

Ntha 6: KKB

Highlight

Copy