Kîam 41

Josefu nîwataûrire iroto cia Faraû

1Vuva wa mîaka îîrî, mûthamaki wa Misiri nîwarotire akîona arûngamîte rûtere rwa rûnjî rwa Nailo. 2Nîwonire ng'ombe mûgwanja ciumîte rûnjîrî rwa Nailo. Nacio ciarî mbaro na noru, na nîciambîrîrie kûrîa mûthanje. 3Nîgwacokire gûkiumîra ng'ombe ciîngî mûgwanja itaarî mbaro na ng'înju ciumîte rûnjîrî rwa Nailo. Nacio nîciarûngamire varî icio ciîngî rûtererî rwa rûnjî. 4Ng'ombe icio ciarî ng'înju nîciarîre irîa ciarî noru na mbaro. Mûthamaki nîwacokire akîramûka. 5Nîwamamire rîngî na akîrota rîngî. Nîwonire igira mûgwanja cia ngano mbaro na ngûrû irî kamûtîrî kamwe ka ngano. 6Nacio igira ciîngî mûgwanja njeke na nyûmagaru nîûndû wa rûkûngi rwa werûrî nîciamerire. 7Nacio igira icio mûgwanja ng'înju nîciameririe igira irîa ciarî mbaro na ciecûrîtie ngano. Mûthamaki nîwaramûkire na akîmenya atî nîkwa aarotaga. 8#Dan 2.2 Kîraûko, mûthamaki aarî mûtangîku mûno ngororî yake. Kwoguo nîwatûmanîre aringi ciama onthe na andû onthe aûgî a vûrûri wa Misiri. Mûthamaki nîwamerire iroto irîa aarotete, nwatî gûtirî mûndû wavotire gûitaûra.

9Mûnene wa amenyereri ndivei nîwerire mûthamaki atîrî, “Ûmûnthî nînaririkana mavîtia makwa. 10Rîrîa warakarire nînie vamwe na mûnene wa arîa makûrugagîra mîgate, nîwatûvirithirie njeera nyomba kwa mûnene wa arangîri. 11Ûtukû ûmwe wa tuoîrî nîtwarotire, na wa kîroto Kîam mûndû Kîamrî na gîtûmi ngûrani. 12Kwarî na mwanake Mûhibirania kûu twarî, na aarî ndungata ya mûnene wa arangîri. Rîrîa twamwîrire iroto cietû nîwatûtaûrîre ûrîa ciaugaga, wa mûndû kûringana na kîroto gîake. 13Na wa ûrîa aatûtaûrîre, nwa guo gwatuîkaga. Nînaacokirue wîrarî wakwa, nake mûrugi wa mîgate agîcurua.”

14Mûthamaki nîwacokire agîtûmanîra Josefu, na Josefu nîwarutirwe njeera na îvenya mûno. Josefu arîkia kwenja nderu na gwîkîra nguo ciîngî, nîwathiîre mbere ya mûthamaki. 15Nake mûthamaki nîwerire Josefu atîrî, “Nînîrarotire kîroto na gûtirî mûndû ûngîvota gûgîtaûra. Nîmbîguîte ûvoro waku atî ûkerwa kîroto nwa ûgîtaûre.”

16Nake Josefu nîwacokerie mûthamaki wa Misiri atîrî, “Nie ndingîvota gûtaûra, nwatî Ngai nîagûkûva ûtaûri mwagîrîru.”

17Mûthamaki nîwacokire akîra Josefu atîrî, “Nie nîrarotire ngîona nûngamîte rûtere rwa rûnjî rwa Nailo. 18Ng'ombe mûgwanja noru na mbaro nîiraumîrire rûnjîrî rwa Nailo na ciambîrîria kûrîa mûthanje. 19Vuva wa ûguo ng'ombe ciîngî mûgwanja ng'înju mûno nginya ikaumîra mavîndî nîiracokire ciaumîra. Ndianona ng'ombe ta icio Misiri kuonthe. 20Ng'ombe icio ng'înju nî iraarîre irîa irarî noru. 21Nwatî wana ciairîa gûtirî mûndû ûngîamenyire atî ciarî ndîu kîndû, nîûndû ciagînjîte wata mbere. Nînacokire ngîramûka. 22Ngîcoka ngîrota rîngî ngîona igira mûgwanja cia ngano irî ngûrû na irî mbîcûru. Ngano icio ciarî mûtîrî ûmwe wa ngano. 23Nînacokire ngîona igira ciîngî mûgwanja cia ngano ikiuma vuva wa icio. Nacio ciarî njeke na irî njûku nîûndû wa kûvîvua nî rûkûngi rwa werû. 24Igira icio mûgwanja ciarî njeke nîciameririe icio mûgwanja ciarî mbaro. Nînîrerire aringi ciama ûvoro ûcio, nwatî gûtirî ûravotire kûndaûrîra iroto icio.”

25Josefu nîwerire mûthamaki atîrî, “Iroto icio cioîrî irauga ûndû ûmwe. Ngai nîakûguûrîrîtie ûrîa agerie gwîka. 26Ng'ombe mûgwanja icio mbaro nî mîaka mûgwanja, na igira icio mûgwanja cia ngano mbaro, wana yo nî mîaka mûgwanja. Kwoguo iroto icio irauga ûndû ûmwe. 27Ng'ombe icio mûgwanja ng'înju na njûku irîa iraumîte rûnjîrî irûmîrîrîte icio ciîngî, na igira icio mûgwanja njeke na mvîvie nî rûkûngi rwa werû, nî mîaka mûgwanja ya yûra. 28Ûguo nwa ta ûrîa ngwîrire atî Ngai nîakûguûrîrîtie ûrîa agerie gwîka. 29Gûkethîrwa kûrî na mîaka mûgwanja ya maketha meengî vûrûrirî wonthe wa Misiri. 30Nwatî vuva wa ûguo nîgûkethîrwa na mîaka îngî mûgwanja ya yûra. Narîo yûra rîu nîrîkaaneneva mûno vûrûrirî wonthe wa Misiri na andû mariganîrwe nî maketha marîa methîrîtwe namo. 31Yûra nî rîkethîrwa rîrî îcûku mûno nginya andû mariganîrwe nî mîaka îrîa yarî ya maketha vûrûrirî ûcio. 32Ûvoro ûcio wa gûcokera kîroto maita maîrî nî wa kwonania atî Ngai nîke ûtuîte gwîkare ûguo na agerie kûvingia ûndû ûcio.

33“Kwoguo nwanginya ûthuure mûndû wî na ûûgî na ûmenyo, atuîke mûmenyereri wa vûrûri wa Misiri. 34Nwanginya ûthuure atongoria engî vûrûrirî wonthe matuîke a kûngania gîcunjî Kîam ithano Kîam maketha ma îvinda rîu rîa mîaka mûgwanja. 35Kwoguo maathe maûnganie irio icio cionthe mîaka îo ya maketha yûkîte na maciige matûûrarî na mairangîre. 36Irio icio ikethîrwa irî mûthithû nîguo ikaavûthîrwa vûrûrirî Misiri mîaka îrîa mûgwanja îgaaûka ya yûra. Weka ûguo andû a vûrûri wa Misiri matikaagîa na yûra.”

Josefu nîwatuîkire mûnene wa vûrûri wa Misiri

37Mûthamaki wa Misiri na ndungata ciake nîmoonire ûndû ûcio ûrî mwaro, 38na akîra ndungata icio atîrî, “Nwatwone mûndû wîngî mwaro ta ûyû ûrî na Roho wa Ngai ndaarî yake?” 39Kwoguo mûthamaki nîwerire Josefu atîrî, “Nîûndû Ngai nîakwonetie maûndû mama monthe, gûtirî mûndû wîngî ûngîthîrwa arî na ûmenyo na ûûgî tawe. 40#Ciîko 7.10 We nîwe ngûtua mûrûngamîrîri wa vûrûri wakwa. Andû onthe akwa magekaga ûrîa wathana. Gûtirî mûndû wîngî ûkethagîrwa arî mûnene gûgûkîra tiga nie. 41Nînagûtua mûnene wa vûrûri wa Misiri wonthe.” 42#Dan 5.29 Mûthamaki nîwarutire mbete îrîa yarî Kîamrarî gîake na yarî na mûvûri wake, akîmîkîra Kîamrarî Kîam Josefu. Nîwacokire akîmwîkîra nguo mbaro mûno na akîmwîkîra mûkathî wa thaavu ngingo. 43Nîwacokire akîmûva ngari ya mbarathi ya kûmûkuua îrîa yarî ya kaîrî. Nîwamûvere andû a kûmûrangagîra nîguo mathiîcage nake makîanagîrîra atîrî, “Thengutani njîrarî! Thengutani njîrarî!” Kwoguo Josefu nîwatuirwe mûrûngamîrîri wa vûrûri wonthe wa Misiri. 44Mûthamaki nîwamwîrire atîrî, “Nie nînie mûthamaki wa Misiri, na gûtirî mûndû wana ûrîkû wagîrîrwe nî gwîka ûndû gûkû Misiri kuonthe atarî na rûtha rwaku.” 45Mûthamaki nîwatuîrîre Josefu rîîtwa akîmwîta Zafenathi-panea. Nîwacokire akîmûva Asenathi, mwarî wa Potifera, mûthînjîri-Ngai wa Oni (Heliopoli) atuîke mûka.

46Josefu aambîrîrie wîra kwa mûthamaki wa Misiri arî na ûkûrû wa mîaka mîrongo îthatû (30). Nîwaumire kûu kwa mûthamaki na akîthiî akîthiûrûrûka vûrûri wonthe wa Misiri. 47Mîakarî îo mûgwanja ya maketha, vûrûri wa Misiri nîwagîre na irio nyîngî. 48Nake Josefu nîwaûnganagia irio icio agaciga matûûrarî marîa manene. Wa îtûûrarî nîwaigaga irio cia kuuma mîgûndarî îrîa îrî vakuvî narîo. 49Josefu nîwaûnganirie irio nyîngî mûno nginya agîtiga kûithima nîûndû itingîathimîkire, ciengîvîte ta mûthanga ûrîa ûrî rûtere rwa îria.

50Mbere ya îvinda rîa yûra rîkinya, Josefu aarî na tûvîcî twîrî tûrîa mûka Asenathi mwarî wa Potifera mûthînjîri-ngai aaciarîte. 51Kaana ka mbere gaciarwa, Josefu nîwaugire atîrî, “Ngai nîatûmîte ndiganîrwe nî mathîna makwa na ndiganîrwe nî andû etû.” Kwoguo nîwatuîrîre kana kau rîîtwa Manase.#41.51 Manase: Kiugo gîkî na Kîhibirania kiugaga, “Kûriganîrwa”. 52Nîwacokire akiuga atîrî, “Ngai nîamvete ciana nîrî vûrûrirî ûyû wa mathîna.” Kwoguo nîwetire kaana ga kaîrî Efiraimu.#41.52 Efiraimu: Kiugo gîkî na Kîhibirania kiugaga “Kûgîa na maciaro”.

53Mîaka mûgwanja ya maketha vûrûrirî wa Misiri nîyathirire. 54#Ciîko 7.11 Nayo mîaka mûgwanja ya yûra nîyambîrîrie wata ûrîa Josefu aaugîte. Nîkwagîre na yûra mavûrûrirî monthe, nwatî Misiri kuonthe kwarî na irio. 55#Joh 2.5 Rîrîa andû a Misiri maambîrîrie kûvûta, nîmaakaîre mûthamaki amave irio. Mûthamaki nîwerire andû onthe a Misiri mathiî kûrî Josefu na meke wa ûrîa angîmeera. 56Yûra nîrîanenevire na rîgîtamba vûrûrirî wonthe, kwoguo Josefu nîwavingûrire makûmbî monthe na akîenderia andû a Misiri irio. 57Andû kuuma nthî yonthe nîmaathiîcaga Misiri kûrî Josefu kûgûra irio nîûndû kwarî na yûra înene nthî yonthe.

Currently Selected:

Kîam 41: KKB

Highlight

Copy