Kîam 47
47
1Kwoguo Josefu nîwocire avîcî ake atano, akîthiî kûrî mûthamaki wa Misiri na akîmwîra atîrî, “Vava na aa mûrwaiya nîmauma Kanaani maûka marî na ndîthia ciao, na indo ciao cionthe. Rîu marî vûrûrirî wa Gosheni.” 2Josefu nîwacokire akîvira aa mûrwang'ina atano kûrî mûthamaki wa Misiri. 3Mûthamaki wa Misiri nîwaûririe anake acio atîrî, “Mûrutaga wîra ûrîkû?”
Nao nîmaacokerie mûthamaki wa Misiri atîrî, “Mwathi wetû, tue twîthagîrwa tûrî arîthi, wata ûrîa methe metû ma tene maarî. 4Tûthamîrîte vûrûrirî ûyû nîûndû vûrûrirî wetû wa Kanaani kûrî na yûra înene mûno, na gûtirî na gîa kûrîthia ndîthia cietû. Kwoguo tue ndungata ciaku, twakûthaitha ûtwîtîkîrie tûtûûre vûrûrirî wa Gosheni.” 5Mûthamaki wa Misiri nîwerire Josefu atîrî, “Rîu nîûndû aguo na aa mûrwanyûkwe nîmaûkire kûrî we, 6vûrûri wonthe wa Misiri nî wao. Kwoguo tiga mekare vûrûrirî wa Gosheni. Na ethîrwa nîwicî andû arîa maicî kûruta wîra mûno gatagatîrî kao, ûmatue amenyereri a ng'ombe ciakwa.” 7Josefu nîwacokire akîvira îthe Jakovu kûrî mûthamaki wa Misiri, na Jakovu akîrathima mûthamaki wa Misiri. 8Mûthamaki wa Misiri nîwaûririe Jakovu atîrî, “Ûrî na ûkûrû wa mîaka îîgana?”
9Nake Jakovu nîwacokerie mûthamaki wa Misiri atîrî, “Kavinda ka mîaka îgana rîa mîrongo îthatû ndûûrîte mbûrûraga. Mîakarî îo mbîthîrîtwe nîrî na thîna na mînyamaaro. Mîaka yakwa ya kûrûra îthîrîtwe îrî mînini gûkîra mîaka îrîa methe makwa ma tene maatûûrîte makîûrûraga.” 10Jakovu nîwarathimire mûthamaki wa Misiri agîcoka akîthiî. 11Josefu nîwacokire akîva îthe na aa mûrwang'ina kûndû kwa gûtûûra. Nîwamavere vûrûri wa Misiri kûndû kûrîa kwarî kwaro mûno vakuvî na îtûûra rîa Ramesesi, wata ûrîa mûthamaki wa Misiri aaugîte. 12Josefu nîwavere îthe irio, aa mûrwang'ina na andû onthe a nyomba ya îthe kûringana na mwîgana wao.
Yûra
13Narîo yûra nîrîanenevire, na kûndû kuonthe gûgîtura irio. Andû a vûrûri wa Misiri na wa Kanaani nîwanyamarîkire nîûndû wa yûra rîu. 14Kwoguo Josefu nîwaûnganirie mbeca cionthe cia vûrûri wa Misiri na Kanaani na njîra ya kwenderia andû irio akîviraga mbeca kûrî mûthamaki wa Misiri mûciî. 15Rîrîa mbeca cionthe cia vûrûri wa Misiri na vûrûri wa Kanaani ciathirire, andû onthe a Misiri nîmaathiîre kûrî Josefu na makîmwîra atîrî, “Mbeca cietû nî nthiru. Tûve irio! Tûngîkuîra gûkû atîa ûtûroretie?” 16Josefu nîwamerire atîrî, “Ethîrwa mbeca cienyu nî nthiru, reteni ng'ombe cienyu nîmûkûrananîrie na irio.” 17Nao nîmaaretere Josefu ndîthia yao. Nîmaakûrananirie irio na mbarathi, ng'ondu, mbûri, ng'ombe na mvunda. Mwaka ûcio wonthe Josefu nîwamakûrananîrie irio na ndîthia ciao cionthe.
18Mwaka ûcio warûmîrîrîte nîmaathiîre kûrî Josefu na makîmwîra atîrî, “Mwathi wetû; tue gûtirî ûndû tûgûkûthitha. Mbeca cietû nî nthiru, na indo cietû cionthe nî ciaku. Gûtirî kîndû tûtigarîtie tiga mîîrî yetû na mîgûnda yetû. 19Tue wana mîgûnda yetû tûngîkua atîa ûroretie? Tûgûre vamwe na mîgûnda yetû nawe ûtûvecage irio. Nîtûgûtuîka ngombo cia mûthamaki wana mîgûnda yetû îtuîke yake. Tûve irio cia kûrîa na ûtûve mbeû ya kûvanda mîgûndarî yetû nîguo tûtigakue vûrûri ûtigwa ûrî mûtheri.”
20Kwoguo Josefu nîwagûrîre mûthamaki wa Misiri mîgûnda yonthe ya andû a Misiri, nîûndû yûra nîrîanenevire mûno, rîgîtûma mamîendie. Vûrûri wonthe nîwatuîkire wa mûthamaki. 21Nao andû onthe arîa maarî vûrûrirî wa Misiri kuuma mwena ûmwe nginya ûcio wîngî nîmaatuîkire ngombo cia mûthamaki wa Misiri. 22Mîgûnda îrîa mûthamaki ataagûra nwa ya athînjîri-Ngai onga, nîûndû o nîmaavecagwa mûcara nî mûthamaki na nîguo maarîcaga. Kwoguo matingîendirie mîgûnda yao. 23Josefu nîwerire andû atîrî, “Rîu nînîmûgûrîte vamwe na mîgûnda yenyu mûgatuîka a mûthamaki. Kwoguo ocani mbeû îno mûkavande mîgûndarî yenyu. 24Vîndî ya maketha, mûkaarutaga gîcunjî Kîam ithano Kîam maketha menyu mûkava mûthamaki. Nacio icunjî icio ciîngî inya, nîvo mûkaarutaga mbeû ya kûvanda na irio cia kûrîwa mîciîrî yenyu.”
25Andû acio nîmaaugire atîrî, “Mwathi wetû, we nîwatûvonokia; nîwatûîka maûndû maro na nîtûgûtuîka ngombo cia mûthamaki wa Misiri.” 26Kwoguo Josefu nîwavîtûkirie watho atî irio cionthe ciakethwa, gîcunjî kîmwe Kîam ithano gîkethagîrwa kîrî Kîam mûthamaki wa Misiri. Watho ûcio ûtûûraga kuo nginya ûmûnthî. Nwatî mîgûnda ya athînjîri-Ngai ndîatuîka ya mûthamaki wa Misiri.
Jakovu nîwaugire kûrîa akathikwa
27Andû a Isiraeli nîmaatûûrire Gosheni vûrûrirî wa Misiri. Nîmaagîrire indo nyîngî kuo na nîmaaciaranire na makîngîva mûno. 28Jakovu aatûûrire vûrûri wa Misiri mîaka îkûmi na mûgwanja. Kwoguo Jakovu aatûûrire mwoyo mîaka îgana rîmwe rîa mîrongo îna na mûgwanja (147). 29#Kîam 49.29-32; 50.6 Kavinda ka Jakovu gûkua gakûvîvîria, nîwetire mûvîcî Josefu na akîmwîra atîrî, “Ethîrwa nie nîmbîtîkîrîkîte nîwe, tonyia njara ciaku gatagatî ga ciaû ciakwa na wîranîre nama atî ndûkanthika Misiri. 30Nîrenda ngaathikwa kûrîa aa vava marî. Ûkaanguua ûndute gûkû Misiri, ûkanthike kûrîa maathikirwe.”
Nake Josefu nîwacokirie atîrî, “Nîngeka wata ûrîa wambûria.”
31Jakovu nîwerire Josefu atîrî, “Îîvîte.” Josefu nîwevîtire, nake Jakovu agîcokia ngatho arî wa vau ûrîrîrî wake.
Currently Selected:
Kîam 47: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
