लुका 11

च़ेलेऊ कै प्राथना कौरणी शिखाउणी

(मत्ती 6:9-13)

1एकी ज़ागाह दी यीशु प्राथना कौरदै थौ लागौ औन्दौ, ज़ैबै यीशु प्राथना कौरीयौ उठौ, तैबै यीशु रै च़ेलेऊ मांझ़िया कु एकी च़ेलै यीशु लै बोलौ, “ओ प्रभु ज़िणौ यहुन्नै आपणै च़ेलेऊ कै प्राथना कौरणी शिखाई आ, तिणी तुमै भी आमुकै प्राथना कौरणी शिखाऔ।” 2यीशुऐ आपणै च़ेलेउलै बोलौ, “ज़ेबी तुमै प्राथना कौरा, लै ता इणी कौरणी, ‘ओ आमारै बाब, तैरौ नाऊं पवित्र मानणौ च़ांई। तैरौ राज़ च़ांई आशौ। 3आमुलै हर दिना री रोटी रोज़ दै। 4और आमारै पाप माफ कर। कैलैकि आमै भी आपणै दुश्मन माफ कौरी ई। और आमु पौरखै नाईं।’ ”

प्राथना रै बारै दी यीशु री शिक्षा

(मत्ती 7:7-11)

5तैबै यीशुऐ आपणै च़ेलेउलै बोलौ, “तुमु मांझ़िऐ इणौ कुण आ ज़ासरौ एक गोश्टण आधी राचीऐ तेस काऐ आशीयौ तेसलै बौल़ा लौ, ‘ओ गोश्टण मुकै चीन रोटी दै एरी। 6कैलैकि मैरै काऐ एक गोश्टण दुरा कु आशौ औन्दौ और मुकै तेसलै दैणा लै कुछ़ा ना आसतौ।’ 7और तेसरौ गोश्टण भितरा कु बोलालौ इणौ कि, मुं आधी राचीऐ तंग ना कर कैलैकि आबै दार बंद हुई गौऐ और मैरै लोल़डै ई मुकाऐ सुतै औन्दै हाऊं तांउकै उठीयौ रोटी नाईं देई बौल़दौ?” 8तैबै यीशुऐ बोलौ, “हाऊं तुमुलै बोलाऊ अगर तेसरौ गोश्टण हुइयौ भी तेसकै रोटी नाईं दिआ लौ, तैबै भी तेसरै लाज़ शरम छ़ाड़ियौ मांगणै री वज़ाह कु, तेसकै ज़ेती ज़ुरत आ तेती तेसकै उठीयौ दिआ आ।” 9और हाऊं तुमुकै बोलाऊ, “ज़ो तुमारी ज़ुरत आ परमेश्‍वरा कु मांगौ, ता सेऊ तुमुकै दिआ आ, लोड़ा लै ता तुमुकै मिला। खटखटावा लै, ता तुमुलै खुला सा। 10कैलैकि ज़ुण मांगा तेसलै मिला, और ज़ुण लोड़ा लौ तेसकै मिला, और ज़ुण खटखटावा लौ तेसलै दार खुला सा। 11तुमु मांझ़िऐ इणौ बाब कुण हुआ आ, कि ज़ेबी तेसरौ छ़ोहरु रोटी मांगा लौ, ता तेसलै पात्थर दिआ लौ, या माच़्छ़ी मांगा लौ, ता तेसलै माच़्छ़ी रै बौदल़ै साप दिआ? 12या हांडौ मांगा लौ ता तेसलै बिच़्छु दिआ? 13ज़ैबै तुमै बुरै हुइयौ आपणै लोल़डेऊ कै आच़्छ़ी च़िज़ै दैणौ ज़ाणाई, तैबै सौरगा दी रौइणै वाल़ौ सारेऊ रौ बाब आपणै मांगणै वाल़ै लोल़डेऊ कै पवित्र आत्मा कैलै ना दैंदौ।”

यीशु और बालज़बूल

(मत्ती 12:22-30; मरकुस 3:20-27)

14तैबै यीशुऐ एकी आदमी कु लाटी, बुरी आत्मा गाड़ी। ज़ैबै बुरी आत्मा तेस आदमी कु निकल़ी, तैबै सेऊ आदमी बुशै लाइंदै लागौ। इणै देखीयौ लोग हैरान हुऐ। 15तिऊं लोगु मांझ़िया कु कुछ़ लोगुऐ बोलौ, “एऊ यीशु ता शैताना रै ज़ौरिऐ बुरी आत्माऐं गाड़ा सा।” 16और कुछ़ लोगुऐ यीशु परखुणा लै यीशु कु सौरगा रौ एक निशाण मांगौ। 17पर यीशुऐ तिंउरै मौना री बूश ज़ाणियौ तिउंलै बोलौ, “ज़ेज़ै राज़्य दी आपु मांझ़िऐ फूट पौड़ा ली सेऊ राज़्य पोरु उझ़ड़ा सा। और ज़ेज़ै टौबरा दी फूट औली सेऊ घौर नाश हुआ सा। 18अगर शैतान आपणौ विरोधी या दुश्मना औलौ ता तेसरौ राज़ किणै कौरीऐ बौणी रौआ सा? कैलैकि तुमै मैरै बारै दी ता बोलाई इणौ कि एऊ शैताना रै ज़ौरिऐ बुरी आत्मा गाड़ा सा। 19अगर हाऊं शैताना रै ज़ौरिऐ बुरी आत्मा गाड़ाऊ ता, तुमारी सन्तान कासरै ज़ौरिऐ बुरी आत्मा गाड़ाई? आबै सै ई तुमारौ फैसलौ कौरा ई। 20अगर हाऊं परमेश्‍वरा री शक्ति कौरीऐ बुरी आत्मा गाड़ाऊ ता परमेश्‍वरा रौ राज़ तुमारै बिच़ा दी आशी गौ आ। 21अगर एक शक्ति वाल़ौ आदमी आपुकै हथियार छ़ाड़ियौ आपणै घौरा री च़ोउकीदारी कौरालौ ता तेसरी धन-ज़यदाद कोई ना नीं बौल़दौ। 22पर ज़ैबै तेसकु भी ज़ादौ शक्ति वाल़ौ आदमी तेस हराइयौ ज़िता सा, तैबै सेऊ तेसरै तिऊं हथियार ज़ेथरै ज़ौरिऐ सेऊ भरोसौ कौरा थौ तिऊं छ़ुड़ावा सा और तेसरी धन-ज़यदाद नींऔ बांटा सा।” 23यीशुऐ तौंइऐ बोलौ, “ज़ुण मैरै साथा दी नाईं, सै मैरै विरोधा ई और ज़ुण मुं आइलै कौठै नाईं कौरदै सै ढाल़ा ई।”

आधै सुधारा कु मुश्कल़

(मत्ती 12:43-45)

24“ज़ैबै आदमी कु बुरी आत्मा निकल़ा सा तैबै सै बुरी आत्मा आपु कालै खाली ज़ागाह दी आराम वाल़ी ज़ागाह लोड़ा आ, और ज़ैबै बुरी आत्मा कै किए भी ज़ागाह नाईं मिलदी, तैबै सै बोला सा हाऊं आबै आपणै सेज़ै घौरा दी डिआऊ ज़िदरु हाऊं निकल़ी ऊ। 25ज़ैबै सै बुरी आत्मा वापिस तिऐ आशा ज़िदरु सै निकल़ी थी तिऐ तिआंकै सै ज़ागाह साफ-सुथरी और सज़ी औन्दी मिला सा। 26और सै बुरी आत्मा डेइयौ आपु आइलै औज़ौ सात बुरी आत्माऐं आणा सा, ज़ो तियांकु भी बुरी हुआई। इणै कौरीऐ सै सारी बुरी आत्माऐं तेस शरीरा दी डेइयौ वास कौरा ई तेस आदमी री हालत ज़ासदी सै बुरी आत्माऐं हुआई पैहलै कु भी ज़ादी बुरी बौणा सा।”

भौलौ कुण आ?

27ज़ेबी यीशु बुशै लाइंदै थौ लागौ औन्दौ तेबी ई भीड़ा मांझ़िऐ कु एकी छ़ेउड़ीऐ ज़ोरै हाक देइयौ बोलौ, “भौली आ सै छ़ेउड़ी ज़ुणिऐ ताउंलै ज़नम दैऔ आ, और तू धाचौ-पाल़ौ ई।” 28यीशुऐ बोलौ, “ओ बा पर भौलै ता सै ई, ज़ुण परमेश्‍वरा रै वच़न शुणा और माना ई।”

सौरगा रै निशाणा री मांग

(मत्ती 12:38-42)

29ज़ैबै भौरी भीड़ कौठै हुंदै लागी तैबै यीशु बोलदै लागौ, “एज़ै पोस्तै रै लोग बुरै ई, ज़ुण निशाणी मांगा ई, पर योना भविष्यवक्ता री निशाणी छ़ाड़ियौ हाऊं केज़ी भी निशाणी नाईं देखाल़दौ। 30ज़िणौ योना भविष्यवक्ता निनवे इलाकै रै लोगु लै निशाण बौणौ आ, तिणी आदमी रौ छ़ोहरु भी एज़ै पोस्तै रै लोगु लै निशाण बौणा आ। 31दक्षिण तौरफा री राणी परमेश्‍वरा रै फैसलै रै दिना दी एज़ै पोस्तै रै लोगु आइलै उठीयौ तिऊं माथै इलज़ाम ला सा, कैलैकि इऐ राणी सुलेमान ज्ञानी रै ज्ञान शुणना लै धौतरी रै धुरै कु आशी थी, सुलेमान राज़ै काऐ। और देखौ इदै ता सुलेमान ज्ञानी कु भी बौड़ौ ज्ञानी आ। 32और निनवे देशा रै लोग भी एज़ै पोसतै रै लोगु आइलै उठीयौ परमेश्‍वरा रै फैसलै रै दिना दी तिऊं माथै इलज़ाम ला ई, कैलैकि तिंउऐ योना भविष्यवक्ता रौ परचार शुणियौ आपणौ मन पापा कु बौदल़ौ आ और इदै ता योना भविष्यवक्ता रौ भी भविष्यवक्ता आ।”

शरीर और प्याशौ

(मत्ती 5:15; 6:22-23)

33यीशुऐ तौंइऐ बोलौ, “कोई भी आदमी लम्प ज़ाल़ियौ निउठी ज़ागाह दी नाईं छ़ाड़दौ, पर लम्प उंच़ी ज़ागाह दी छ़ाड़ाई ताकी भितरै आशणै वाल़ेऊ कै प्याशौ लागा। 34तुमारै शरीरा रौ आखी दिवै ज़िणी ई, एथीलै अगर तेरी आखी नीम्बल़ी ई, ता तैरौ सारौ शरीर भी प्याशै दी आ। अगर तेरी आख शेड़ी आ ता तैरौ पुरौ शरीर भी न्यारै दी आ। 35आबै च़ोकसिऐ रौएऊ ताकी ज़ो प्याशौ तुमु दी आ सेऊ इशौ ना च़ांईं। 36अगर तैरौ सारौ शरीर प्याशलौ आ और कोई भी शरीरा रौ आंग न्यारै दी नाईं आ तैबै सब कुछ़ प्याशलौ रौआ आ, ज़िणौ कि लम्पा ज़ाल़ियौ प्याशौ हुआ सा।”

शास्त्रिउ और फरीसीउ री बुराई रै बारै दी रोशिणौ

(मत्ती 23:1-36; मरकुस 12:38-40)

37ज़ेबी यीशु बुशै लाइंदै थौ लागौ औन्दौ, तैबै एकी फरीसीऐ सेऊ आपणै घौरै रोटी खान्दै औटाऔ। तैबै यीशु तेसरै काऐ भितरै डैऔ और रोटी खान्दै बोशौ। 38तेस फरीसी कै इणै देखीयौ हैरानी हुई कि यीशु बिणा धोउइयौ रोटी खान्दै बोशी गौ आ। 39प्रभुऐ तेसलै बोलौ, “ओ फरीसी तुमै ज़ौंगटी, थाल़ी बाइठी मांज़णा लै बौड़ौ ख्याल छ़ाड़ाई, पर तुमु भितै ता इबी भी मौल़ आ, तुमु दी ता इबी भी लाल़च़ और बुराई भौरुई ऐन्दी।” 40ओ मुर्ख लोगुओ, “का परमेश्‍वरै भितरी और बाइरी दुई भिलै ना चाणै? 41ज़ो कुछ़ तुमारै कौमाऔ औन्दौ आ, तेस तुमै गरीबु मांझ़िऐ बांटौ, तैबै तुमै आच़्छ़ा कौरीऐ शुद्ध हुआई।” 42“पर ओ फरीसीउओ, तुमुलै ता इऐ केती बुरी बूश आ। तुमै ता आपणी छ़ोटी कु छ़ोटी कौमाई रौ और पदीनै, सुदाब और सारी साल-फसली रौ दसवौ हिस्सौ दिआई, पर फैसलै और परमेश्‍वरा रौ प्यार टाल़ा ई पोरु। तुमु च़ांई थौ इणौ कौरणौ, दश्वांस भी च़ांई थौ दैणौ और परमेश्‍वरा री बुशै भी थै माना। 43ओ फरीसीउओ तुमुलै ता इऐ केती बुरी बूश आ, कि तुमै ता आराधनालय दी भी उंच़ी ज़ागाह लोड़ाई बोशणा लै, और इणौ भी च़ाहा ई कि बज़ारा दी और बाटा-घाटा दी आशणै वाल़ै आदमी आमुकै ढाल कौरा। 44तुमुलै एज़ी भी केती बुरी बूश आ, कि तुमै तिऊं च़ोरुई ऐन्दी कब्रा बाशीऐ ई ज़ेथ माथै लोग हांडा ई और तिउंकै इणौ पौतौ ना लागदौ कि इऊं भितै केती शौड़ी ऐन्दी च़िज़े ई।” 45तैबै नियमा रै एकी शास्त्रिउऐ यीशु लै बोलौ, ओ गुरु ज़ो कुछ़ बुशै तुमुऐ इबी झ़ांऊ बोली ई तिऊं बुशु कौरी तुमुऐ आमारी बेइज़्ज़ती की आ। 46यीशुऐ बोलौ, “ओ नियमा रै शास्त्रिउओ तुमुलै एज़ी भी केती बुरी बूश आ। ज़ो च़ीज़ च़ुंगणा लै गौरकी आ तिऐं च़ीज़ तुमै ओरी कु च़ुंगावा ई पर आपु नाईं तुमै तिऐं च़ीज़ औंउठी कौरीऐ भी छ़ुईंदै। 47तुमुलै एज़ी केती बुरी बूश आ, कैलैकि तुमै पुराणै गुरु (नबीऊ) कालै कब्र चाणा ई ज़ुण तुमारै नाना-बुड़ुऐ झ़ांगै ई। 48और तुमै गवाही आ, आपणै नाना बुड़ु रै काम ज़ाणाई कैलैकि तिंउऐ सै पुराणै ज़मानै रै भविष्यवक्ता झ़ांगेई, तुमै तिउंरी कब्रै चाणा ई। 49परमेश्‍वरै री बुद्धी इऐ तुमुलै इणौ बोलौ आ, हाऊं तिऊं काऐ भविष्यवक्ता और प्रेरित भेज़ाऊ और सै तिऊं मांझ़िऐ कु कास झ़ांगाई और कास आइलै कौरा ई बुरौ। 50धौतरी दी ज़ेती भी पैहलै ओउलै भविष्यवक्ता झ़ांगै ई, तिऊं रै ज़िमैबार एज़ै ज़ुगा रै लोग हुणेई। 51हाबिल नावां रै धौर्मी आदमी कु, जकरयाह नावां रै पुराणै याजका झ़ांऊ, ज़ुण परमेश्‍वरा रै घौरा दी बेदी और पवित्र ज़ागाह रै बिच़ा दी झ़ांगौ थौ: तेथरै ज़िमबार एज़ै जुगा रै लोग हुणेई। 52नियमा रै शास्त्रिउ लै इऐ केती बुरी बूश हुणी आ कैलैकि तुमुऐ ज्ञाना री ताल़टी आपुकै नीं गोई आ, ना ता तुमै आपु परमेश्‍वरा रै राज़ा दी डेउंदै और ना दुजेऊ दैंदै डेउणै 53यीशुऐ ज़ैबै आपणी बुशै बोली एरी, तैबै शास्त्री और फरीसी तेस आइलै दुश्मनी छ़ाड़दै लागै। और सै यीशु कु भौरी सवाल-ज़वाब कौरदै लागै। 54और एज़ी कोशिषा दी थाकै लागी कि यीशु रै मुआं कु कोई इणी बूश निकल़ा ज़ेज़ी बुशेऊ कौरी यीशु गलत साबित हुआ।”

Currently Selected:

लुका 11: BFZ-NT

Highlight

Copy