मत्ती 14
14
यहुन्ना बप्तिसमा देणै वाल़ै रौ लोऊ
(मरकुस 6:14-29; लुका 9:7-9)
1सेज़ै बौगता दी राज़ै हेरोदेसै यीशु रै हैरानी वाल़ै कामा रै बारै दी शुणौ, 2और आपणै नुकुरा लै बोलौ, “यीशु यहुन्ना बपतिस्मौ दैणै वाल़ौ आ, ज़ो मुर्दे मांझ़िआ कु ज़िउंदौ हुई गौ आ। एज़ै कारण यीशु कै शक्ति वाल़ै काम ई लागै औन्दै हुंदै। 3-4हेरोदेसै इणौ एथीलै सुंच़ौ थौ, कैलैकि हेरोदेसै आपणै भाई फिलिप्पुसा री छ़ेउड़ी हेरोदियासा आइलै शादी की थी और यहुन्नै हेरोदेसा लै बोलौ थौ कि ताऐं गलत कियौ आ, आपणै भाई री छ़ेउड़ी आपुलै छ़ाड़णी, ताउंलै ठीक नाईं आ। एथीरी वज़ाह कु यहुन्ना, पाकड़ियौ बानौ और ज़ेला दी पाई गौ थौ। 5एथीलै सेऊ तेस झ़ांगणौ च़ाहा थौ, पर लोगु कु डौरा थौ कैलैकि सै तेस गुरु माना थै। 6पर ज़ेबी हेरोदेसा रौ ज़नम दीन आशौ, ता हेरोदियासा री छ़ोटीऐ पार्टी दी नाच़ियौ हेरोदेस खुश कियौ। 7एथ माथै तिणीऐ कसम खाइयौ वचन दैऔ, ‘ज़ो कुछ़ तू मांगा ली, हाऊं ताउंलै दिआऊ।’ ” 8सै आपणी मां रै उकसाणै माथै बोली, “यहुन्ना बपतिस्मौ दैणै वाल़ै रौ मूंड थाल़ी दी इऐ मुं काऐ आणौ! 9राज़ौ दुखी हुऔ, पर आपणी कसमा का, और साथा दी बोशणै वाल़ै री वज़ाह कु, हुकम दैणै कि पोरु दैऔ। 10और तिणीऐ ज़ेला दी लोग भेज़ीयौ यहुन्ना रौ मूंड काटौ। 11और तेसरौ मूंड थाल़ी दी आणौ और छ़ोटी कै दैणै, और तिऐं सेऊ मूंड आपणी मां काऐ नियौं। 12तैबै यहुन्ना रै च़ेलै आशै और तेसरौ मौड़ौ नीईंयौ दाबी गौ, और डेइयौ यीशु कै खौबर देई।”
पांज़ हज़ार पूरषा लै रोटी खिलाउणी
(मरकुस 6:30-44; लुका 9:10-17; यहुन्ना 6:1-14)
13ज़ेबी यीशुऐ इणौ शुणौ, ता सेऊ किश्ती माथै च़ौड़ियौ तिदरा कु केज़ी एखुली ज़ागाह दी, एखुलै दी डेई गौ। लोग इणौ शुणियौ इलाकै-इलाकै कु पैदल ई तेस पिछ़ु हुई गौऐ। 14तिणीऐ निकल़ियौ एक बौड़ी भीड़ देखी और तिऊं माथै दया की, और यीशुऐ तिंउरै बिमार लोग ठीक किऐ। 15ज़ेबी ब्याल़ हुई ता यीशु रै च़ेलेउऐ तेस काऐ आशीयौ बोलौ, “एज़ी ज़ागाह शुनशान आ और बेर औन्दी लागी गोई। इऊं लोगु नीज़ुका रै बस्ती और गांव दी छ़ाड़ौ ताकी इऐ लोग आपकालै रौइणै रौ और रोटी (खाणै) रौ इन्तज़ाम कौरा।” 16पर यीशुऐ तिउंलै बोलौ, “तिऊंरौ डेउणौ ज़ुरुरी नाईं! तुमै ई इऊं लै खाणा लै दैऔ।” 17तिंउऐ यीशु लै बोलौ, “इऐ आमुकै पांज़ रोटी और दुई माच़्छ़ी छ़ाड़ियौ कुछ़ा ना आसतौ।” 18यीशुऐ बोलौ, “तिऊं इदै मुं काऐ आणौ।” 19तैबै यीशुऐ लोगु लै घासा माथै बोशणै लै बोलौ, और तैबै यीशुऐ सै पांज़ रोटी और दुई माच़्छ़ी आपणै हाथा दी की और सौरगा भिलै देखीयौ परमेश्वरा रौ धन्यबाद देइयौ आशीष मांगी और रोटी च़ेलेऊ कै देई और च़ेलै लागै लोगु कै बांटदै। 20तैबै सारै लोगुऐ पेटा भौरीऔ रोटी खाई। तेती माथै भी च़ेलेउऐ बौच़ै औन्दै रोटी और माच़्छ़ी रै बारह छ़ाबड़ै भौरै। 21और खाणा वाल़ै छ़ेउड़ीऊ और लोल़डेऊ छ़ाड़ियौ, पांज़ हज़ार ता मौरद थै।
यीशु रौ पाणी माथी आण्डणौ
(मरकुस 6:45-52; यहुन्ना 6:15-21)
22तैबै यीशुऐ खरकच़ार आपणै च़ेलै किश्ती दी डेउणा लै मज़बूर कियै कि सै तेसकु पैहलै पारै डिआलै, ज़ेबी झ़ांऊ सेऊ लोगु छ़ाड़ा लौ। 23यीशु लोगु छ़ाड़ियौ, प्राथना कौरना लै अलग पाहाड़ा दी डेई गौ। और ब्याल़ी यीशु तिऐ एखुली थौ। 24सेज़ै बौगतै किश्ती झ़िला रै बिच़ा दी बागुरा कौरी हिलदै-ढ़ुलदै थी लागी औन्दी, कैलैकि बागुर सामनै ओउलै थौ लागौ औन्दौ। 25और यीशु राचकै च़ार बाज़ै झ़िला माथै हाण्डदी बारै तिऊं काऐ आशौ। 26च़ेलै यीशु झ़िला दी पाणी माथै आण्डदी बारै रै देखीयौ घबराई गौऐ। और बोलदै लागै, “एऊ भूत आ!” और डौरा रै मारै सै हाकै मारदै लागै। 27तैबै यीशुऐ खरकच़ार तिऊं आइलै बुशै लाई और बोलौ, “हिम्मत कौरौ! हाऊं आ, नाईं डौरौ!” 28पतरसै यीशु लै ज़वाब दैऔ, “ओ प्रभु, अगर तू आ, ता मुं आपु काऐ पाणी माथै हाण्डीयौ आशणा रौ हुकम दैऔ।” 29यीशुऐ बोलौ, “आश!” तैबै पतरस किश्ती कु उतरियौ यीशु काऐ डेउणा लै पाणी माथै हाण्डदै लागौ। 30पर बागुर च़ौगरुइयौ डौरी गौ, और ज़ेबी डुबदै लागौ ता हाकै मारीयौ बोलौ, “ओ प्रभु, मुं बौच़ाऊ!” 31यीशुऐ खरकच़ार हाथ बड़ाइयौ सेऊ पाकड़ी गौ और तेसलै बोलौ, “ओ अविश्वासी, ताइंऐ कैलै शक कियौ?” 32ज़ेबी सै किश्ती दी डेई गौऐ, ता बागुर रुकी गौ। 33एथ माथै तिंउऐ ज़ो किश्ती दी थै, यीशु लै ढाला कौरीऐ बोलौ, “सौच़्च़ी ई, तू परमेश्वरा रौ छ़ोहरु आ।”
गन्नेसरता गांवा दी रोगी ठीक कौरणै
(मरकुस 6:53-56)
34तेत बासिऐ सै गन्नेसरत गांवा दी पौउंच़ै। 35तिदलै लोगुऐ यीशु रवाई गौ और तिदलै लोगुऐ सारै परदेशा दी खुशी री खौबर पउंच़ाई और सारै बिमार लोगु यीशु काऐ आणै, 36और सै यीशु कु औरज़ कौरदै लागै कि सै तिऊं आपणै जुड़कै ई छ़ुंइणै दै। और ज़ेती लोगुऐ भी यीशु छ़ुंऔं, सै ठीक हुई गौऐ।
Currently Selected:
मत्ती 14: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
