मत्ती 22

शादी दी रोटी खांदै औटाउणै रौ औनैणौ

(लुका 14:15-24)

1यीशु औज़ौ तिउंकै औनैणै दी बोलदै लागौ, 2“सौरगा रौ राज़ तेस राज़ै ज़िणौ आ, ज़ुणिऐ आपणै छ़ोहरु री शादी की। 3और तिणीऐ आपणै नुकुर भेज़ै कि ज़ासलै नीऊंदौ आ दैऔ औन्दौ तिऊं लोगु शादी री धामा खांदै औटाऊ। पर सै नाईं आशै। 4तैबै तिणीऐ औज़ौ आपणै नुकुर इणै बोलीयौ भेज़ै कि, ‘ज़ासलै नीऊंदौ आ दैऔ औन्दौ तिऊं लोगु लै बोलौ शुणौ, मुंइऐ बौड़ी और स्वादली धाम तैयार की गोई आ, और सब कुछ़ तैयार आ। शादी री धामा दी आशौ।’ 5पर सै नाईं कौरीयौ तिदरु डेई गौऐ कोई डेवै आपणै डोखरै लै, कोई डेवै आपणै कामा खौटदै। 6दुजै लोग ज़ो बौच़दै थै लागै औन्दै तेसरै नुकुर पाकड़ै और तिउंरी बेइज़्ज़ती की और पोरु झ़ांगै 7तैबै राज़ै रै रोश आशै, और तिणीऐ आपणै सिपाई भेज़ीयौ सै लोऊ कौरणै वाल़ै पोरु झ़ांगै, और तिंउरै इलाकै दी आग लाई और सारौ पोरु ज़ाल़ौ। 8तैबै तिणीऐ आपणै नुकरु लै बोलौ, ‘शादी री धाम ता तैयार आ पर निऊंदै वाल़ै लोग तिऐ आशणै रै लायक नाईं थै। 9एथीलै सौड़की दी डैऔ और ज़ेती लोग तुमुकै मिला ई, सौभी लोगु शादी री धामा खान्दै औटाऔ।’ 10तैबै तिऊं नुकरुऐ सौड़की दी डेइयौ का भौलै का बुरै, ज़ेती मिलै, सारै लोग कौठै कियै। और शादी रौ घौर पाउणै कौरी भौरुई गौ। 11‘ज़ेबी राज़ौ पाउणै देखदै भितै आशौ, ता तिणीऐ तिऐ एक आदमी देखौ, ज़ुणिऐ शादी रै जुड़कै भिड़ै औन्दै नाईं थै।’ 12तिणीऐ तेसकु पुछ़ौ, ‘ओ गोश्टण। तू शादी रै जुड़कै भिड़ीयौ कैलै नाईं आशौ?’ तेस आदमी रौ मूंह बन्द हुई गौ। 13तैबै राज़ै आपणै नुकरा लै बोलौ, ‘एसरै हाथ और बांगणै बानियौ बाइरै न्यारै दी पाऔ, तिऐ लेरणौ और दांद पिशणौ हुआ।’ 14कैलैकि औटाऐ औन्दै ता भौरी ई और छ़ांटै औन्दै थोड़ै ई।”

कैसरा लै मामलौ दैणै

(मरकुस 12:13-17; लुका 20:20-26)

15तैबै फरीसी डेइयौ आपु मांझ़िऐ सुंच़दै लागै कि एस केज़ै ज़ौरिऐ बुशु दी फसाई। 16तैबै तिंउऐ आपणै च़ेलै हेरोदेसा आइलै यीशु काऐ इणौ बोलणा लै भेज़ै, “ओ गुरु, आमै ज़ाणी आ कि तू सौच़्च़ौ आ, और परमेश्‍वरा री बाट सौच़्च़ाई कौरी शिखावा आ, और कासी री परवाह नाईं कौरदौ, कैलैकि तू आदमी रौ मूंह देखीयौ बूश नाईं कौरदौ। 17एथीलै आमुलै बोल तू का सुंच़ाई? कैसरा लै मामलौ दैणौ च़ांई कि नाईं।” 18यीशुऐ तिउंरी च़ालाकी ज़ाणीऔ तिउंलै बोलौ, “ओ कौपटी लोगुऔ, मुं कैलै पौरखा ई? 19मामलै रौ सिक्कौ मुकै देखाल़ौ।” तैबै तिंउऐ यीशु काऐ एक सिक्कौ निऔं ज़ेथरी किम्मत एक दिना री दिहाड़ी रै बराबर थी 20यीशुऐ तिऊंकु पुछ़ौ, “एऊ छ़ाप और नाऊं कासरौ आ?” 21तिंउऐ तेसलै बोलौ, “कैसरा रौ।” तैबै यीशुऐ तिउंलै बोलौ, “ज़ो कैसरा रौ आ तेस कैसरा कै दैऔ। और ज़ो परमेश्‍वरा रौ आ तेस परमेश्‍वरा लै दैऔ।” 22इणौ शुणियौ सै लोग हैरान हुऐ, और तिदरु कु डेई गौऐ।

दुजी बारै पैदौ हुणौ और शादी

(मरकुस 12:18-27; लुका 20:27-40)

23सेज़ै दिनै सदुकी लोगु ज़ो इणौ मानाईं कि ज़ुण मौरा ई सै दुजी बारै ज़िउंदै नाईं हुंदै, यीशु काऐ आशै और तेसलै बोलौ, 24“ओ गुरु, मुसै बोलौ थौ कि अगर केज़ौ आदमी बिण औलादीऐ मौरा लौ, ता तेसरौ भाई तेसरी विधवा छ़ेउड़ी आइलै शादी कौरीयौ आपणै भाई कालै वंश पैदौ कौरा। 25आबै आमारै घौरा दी सात भाई थै, पैहलौ भाई शादी कौरीयौ मौरी गौ, और दुजै भाईऐ तिऐं छ़ेउड़ी आइलै शादी कौरी ताकी तेस भाई री औलाद बौणी रौआ। 26इणी कौरै चीज़ै और च़ौथेउऐ भी इणौ कियौ, और साथी भाईउऐ तिऐं आइलै शादी की और बिणा औलादीऐ मौरी गौऐ। 27तेत बासिऐ सै छ़ेउड़ी भी मौरी गोई। 28ज़ैबै सै छ़ेउड़ी ज़िउंदी हुआ ली ता तिऊं साता मांझ़िऊ कु कासरी छ़ेउड़ी हुआ? कैलैकि सै सारेऊ री छ़ेउड़ी थी।” 29यीशुऐ तिउंलै ज़वाब दैऔ, “तुमै पवित्रशास्त्र और परमेश्‍वरा री शक्ति नाईं ज़ाणदै। एज़ै कारणै तुमै गौलती दी पौड़ै औन्दै आ। 30कैलैकि ज़िउंदै हुणा दी सै ना ता शादी कौरदै और ना शादी लै दैंदै पर सौरगा दी सौरगदूतै ज़िणै हुणै ई। 31पर मौरणै बासिऐ ज़िउंदै हुणा रै बारै दी का तुमुऐ एज़ौ वचन नाईं पौढ़ौ ज़ो परमेश्‍वरै तुमु आइलै बोलौ आ: 32‘हाऊं अब्राहमा रौ परमेश्‍वर, और इसहाका रौ परमेश्‍वर, और याकुबा रौ परमेश्‍वर आ?’ सेऊ मौरै औन्दै रौ नाईं, पर ज़िउंदै रौ परमेश्‍वर आ।” 33इणौ शुणियौ लोग तेसरी शिक्षा कु हैरान हुऐ।

सौभी कु बौड़ौ हुकम

(मरकुस 12:28-34; लुका 10:25-28)

34ज़ैबै फरीसीउऐ शुणौ कि यीशुऐ सदुकिऊ रौ मूंह बन्द कौरी गौ, ता सै कौठै हुऐ। 35तिऊं मांझ़िऊ कु एकी शास्त्रिऐ यीशु पौरखणा लै तेसकु पुछ़ौ, 36“ओ गुरु, नियमा दी केज़ौ हुकम सौभी कु बौड़ौ आ?” 37यीशुऐ तेसलै बोलौ, “तू परमेश्‍वर आपणै प्रभु कु आपणै पुरै मन और आपणै पुरै प्राणा और आपणी सारी औकली आइलै प्यार छ़ाड़ै। 38बौड़ौ और ज़ुरुरी हुकम ता एऊ ई आ। 39और दुजी ज़ुरुरी हुकम भी तिणी आ कि ज़िणौ प्यार तू आपु आइलै कौरा ई तिणौ प्यार तू आपणै आस-पड़ोसा रै लोगु आइलै भी कौरै। 40एज़ै ई दुई हुकम सौभी नियम और पुराणै ज़मानै रै भविष्यवक्ता री बुनियाद आ।”

मसीह कासरौ छ़ोहरु आ?

(मरकुस 12:35-37; लुका 20:41-44)

41ज़ेबी फरीसी कौठै थै, ता यीशुऐ तिऊंकु पुछ़ौ, 42“मसीह रै बारै दी तुमै का सुंच़ाई? सेऊ कासरौ छ़ोहरु आ?” तिंउऐ यीशु लै बोलौ, “दाऊदा रौ।” 43यीशुऐ तिउंकै पुछ़ौ, “ता दाऊद आत्मा दी हुइयौ तेसलै प्रभु कैलै बोला सा? 44‘प्रभुऐ, मैरै प्रभु लै बोलौ, मेरी सुल़टी भिलै बोश, ज़ेबी झ़ांऊ हाऊं तैरै दुश्मनु तेरी लाता थालै ना कौरु।’ 45तैबै, ज़ैबै दाऊद तेसलै प्रभु बोला सा, ता सेऊ तेसरौ छ़ोहरु किणौ ठहरौ? 46एस ज़वाबा दी कोइऐ भी एक बूश ना बोली बौल़ै। सेज़ै दिना कु कासी रै भी तेसकु कुछ़ पुछ़णा री हिम्मत नाईं हुई।”

Currently Selected:

मत्ती 22: BFZ-NT

Highlight

Copy