लुका 20
20
ईसु ना हक नो सवाल
(मत्ती 21:23-27; मरकुस 11:27-33)
1अने एक दाड़े ईसु मंदीर मे माणहु ने ह़ीकाड़तो जाय्न खुस-खबर ह़मळावतो हतो, ता भगवान ना डायला पुंजारा अने युहदी-धरम ह़ीकाड़न्या, डाहा-डाहा भेळता ईसुन्तां आवीन उबा हय ज्या। 2अने ईसु ने केवा बाज ज्या, “आमने देखाड़ के तु काना हके आहयु आखु करवा बाज र्यो? अने तने आहयो हक कोय आप्यो?”
3ईसु तीमने जपाप आप्यो, “मे बी तमने एक सवाल पुछु। तीनो जपाप मने आपो। 4बपतीस्मा आपण्या युहन्ना ने बपतीस्मा आपवा नो हक, ह़रग वाळो भगवान आपलो के माणहु आपला?”
5ता तीहया आह़फात वीच्यार काड्या, “आमु ह़ु कीया? भगवान आपलो केहु, ता हीय्यो केहे ‘तमु बपतीस्मा आपण्या युहन्ना पोर काहा नी भरहो कर्या?’ 6अने कदीम माणेह आपलो केहु, ता आहयो माणहु नो टोळो आपणु ने दगड़ाटहे, काहाके आखा बपतीस्मा आपण्या युहन्ना ने भगवान वगे गेथी वात केण्यो माणेह माने।” 7एतरे तीहया जपाप आप्या, “कंय जाणु आमने मालम नी हय के आहयो हक युहन्ना ने कोय आप्यो।”
8एतरे ईसु तीमने केदो, “मे बी नी देखाड़तो, के मे आहयु आखु काम, कोयना हके करवा बाज र्यो।”
वेरी कीरसाण्या नो दाखलो
(मत्ती 21:33-46; मरकुस 12:1-12)
9ता ईसु माणहु ने आहयो दाखलो ह़मळाव्वा बाज ज्यो, “एक काव एक कीरसाण अंगुर नी वाड़ी लगाड़्यो। अने तीहयी वाड़ी बीजा कीरसाण्या माणहु ने साजा पोर आपीन, घण दाड़ा लग बीजा देस मे जत र्यो। 10जत्यार अंगुर भेळा करवा नी टेम आयी, ता तीहयो आह़फा ना एक पावर्या ने अंगुर नो वाटो लेवा करीन मोकल्यो। पण साजेदार्या कीरसाण तीहया पावर्या ने ठोकीन ठारलोत पासो मोकल देदा। 11अने अळतेण तीहयो बीजा पावर्या ने मोकल्यो। पण तीहया कीरसाण्या तीने बी ठोक्या, अने नामबद्दी करीन ठारलोत मोकल देदा। 12अने अळतेण तीहयो तीसरा पावर्या ने मोकल्यो, बाखीन साजेदार्या तीने बी ठोकीन, अंगुर नी वाड़ी मे गेथो नीकाळ देदा।” 13ता तीहयो अंगुर नी वाड़ी नो मालीक आह़फा ना मन मे केदो “हाव मे ह़ु करु? मे मारा मोंगाळ्ळा सोरा ने मोकलही, कदीम तीहया ह़ाचलीन तीनी ईज्जत करहे।” 14पण साजेदार्या कीरसाण तीने आवत्लो देखीन आह़फात वीच्यारीन केदा “आहयो ते अंगुर नी वाड़ी ना मालीक नो सोरो से। हीने आपणु मार नाखता, ता आहयी आखी वाड़ी आपणी हय जहे।” 15अने तीहया साजेदार्या कीरसाण्या तीने अंगुर नी वाड़ी मे गेथो बारो काड देदा, अने ठोकी-ठोकीन मार नाख्या। हाव देखो, वाड़ी नो मालीक तीहया साजेदार्या कीरसाण्या नु ह़ु करहे? 16तीहयो आवीन तीहया साजेदार्या कीरसाण्या ने मार नाखहे अने अंगुर नी वाड़ी ने बीजा साजेदार्या कीरसाण्या ने आप देहे। तीहया आहयु ह़मळीन ईसु ने केदा, “भगवान ईसम नी करे।”
17बाखीन ईसु तीमनी भणी भाळीन केदो, “ता आहयु ह़ु लीखलु से? के घोर बांदण्या राजा ना मीस्तर्या जे दगड़ा ने रीकामो जाणीन बाहर नीकाळ देदा, तीहयो दगड़ो खुणा नो दगड़ो बण ज्यो। 18जे कोय आहया दगड़ा पोर पड़हे, तीहयो टुकड़ा-टुकड़ा हय जहे। अने कदीम आहयो दगड़ो कोय पोर पड़हे, ता तीने बी दळ देहे।”
केसर ने फाळो आपवा
(मत्ती 22:15-22; मरकुस 12:13-17)
19युहदी-धरम ह़ीकाड़न्या मास्तर्या अने भगवान ना डायला पुंजारा तेतरी घड़ी धरवा हींडता हता, बाखीन तीहया माणहु ने देखीन बीहता हता। तीहया ह़मजी जेला हता, के ईसु आहयो दाखलो अमारात बारा मे की र्यो। 20अने तीहया ईसु पोर चेतीन रीन नींगा नाख र्या हता, अने ईसु नी चोकसी लेवा करीन माणहु ने मोकल्या। अने तीहया ईसु ने जपाप मे फसाड़ सके अने रोमी नीयाव करन्या ना हात मे अने हक मे ह़ोप सके। 21तीहया आवीन ईसु ने केदा, “ए मास्तर आमने मालम से के, तु जे केय तीहयु ह़ाचलीन केय अने वारु ह़ीकाड़े बी। अने आमु जाणया के तु मोडु देखीन वात नी करे; पण माणेह ने भगवान नी मरजी नी सच्चाय नी वात ह़ीकाड़े। 22आमने जपाप आप, केसर ने फाळो आपवा, अमारी जुगु वारु हय के नी हय?”
23ईसु तीमनी कदर जाणीन तीमने केदो, 24“मने एक चांदी नो रुप्यो देखाड़ो। आञे ह़ारीक कोयनो सीको अने कोय नु नाम छापलु से?” तीहया केदा, “केसर नु।”
25ईसु तीमने केदो, “ता, जे केसर नु से, तीहयु केसर ने आपो, अने जे भगवान नु से, तीहयु भगवान ने आपो।”
26तीहया ईसु ने माणहु नी अगळ जपाप मे फसाड़ नी सक्या, अने जपाप ह़मळीन वहराय ज्या।
मरला पासा जीवता हये अने वेवा
(मत्ती 22:23-33; मरकुस 12:18-27)
27 #
नेवताळा ना काम 23:8
अळतेण थोड़ाक सदुकी पंथवाळा ईसुन्तां आया। तीमनो आसम वीच्यार से, के मरला मे गेथु पासु जीव उठणु हयेत नी। तीहया ईसु अगळ आसवो सवाल पुछ्या, 28“ए मास्तर! मुसो अमारी करते आहयो कायदा लीखलो से, कदीम कोयनो भाय आह़फा नी घोरवाळी हय्न बी वगर अवल्यात नो मर जाय, ता तीनो भाय आह़फा ना भाय नी रंडायली बयर ह़ाते वेवा कर लेवा जोवे अने आह़फा ना भाय जुगु अवल्यात पयदा करवा जोवे। 29ह़ात भाय हता, पेल्नो भाय वेवा कर्यो अने वगर अवल्यात नो मर ज्यो। 30अळतेण बीजो भाय तीहयी रंडायली बयर ह़ाते वेवा कर्यो। 31अने तीसरो भाय बी वेवा कर्यो, ईसम करीन एक-एक करीन ह़ात भाय रंडायली बयर ह़ाते वेवा कर्या, अने वगर अवल्यात ना मर ज्या। 32अने अळतेण तीहयी बयर बी मर जी। 33ता हाव तीहया पासा जीवता हयहे, ता तीहयी बयर कोयनी लाडी केवायहे काहाके तीनी ह़ाते ह़ातोव भाय वेवा करला हता? काहाके तीहयी ते ह़ातोव जणा नी घोरवाळी बणली हती।”
34तत्यार ईसु तीमने केदो, “आहयी कळी मे माणहु ना वेवा हयता रेय; 35पण जे माणहु जीवता हय्न नवली कळी ना हकदार्या बणहे, तीहया माणहु मे वेवा नी हये। 36तीहया जीव उठीन कदी नी मरे काहाके तीहया ह़रगदुत ने तेम अमर रेहे। अने पासा जीवता हय्न जीव उठवा नी अवल्यात बणीन नवली जीवाय्न हकदार्या हय्न भगवान नी अवल्यात बी बण जहे। 37पण मर्या-ह़र्या माणहु ने पासा जीवता हयवानुत से। मुसो बी जीव उठवा नी वात ने धपत्ला कटाळा झाटवा मे उजन्ती कर्यो। काहाके मुसो बी भगवान ने अब्राहम नो भगवान, अने ईसाक नो भगवान, अने याकुब नो भगवान केय। 38भगवान ते मरला माणहु नो भगवान नी हय, पण जीवत्ला माणहु नो भगवान से: काहाके तीनी अगळ आखात जीवत्ला से।”
39आहयी वात ह़मळीन तीमनी माय्न थोड़ाक युहदी-धरम ना मास्तर्या तीने केदा, “ए मास्तर! तु घणो वारु केदो।” 40अळतेण तीमने ईसु ने अळी कानी बी वात पुछवा नी हीम्मत नी हयी।
मसी कोयनो सोरो से
(मत्ती 22:41-46; मरकुस 12:35-37)
41ईसु तीमने पुछ्यो, “मसी ने, दावुद नो सोरो काहा केवो? 42काहाके दावुद राजा ते भजन नी कीताप मे आह़फा ना जीवे करीन केय: मालीक मारा मालीक ने केदो तु मारा जमणी धेड़े बह, 43जत्यार लग मे तारा वेरी ने, तारा पोग तळे नी कर देम। 44दावुद राजा तीने मसी मालीक केदो, ता तीहयो तीनो सोरो केम केवायहे?”
युहदी-धरम ह़ीकाड़न्या सी चेतीन रेवो
(मत्ती 23:1-36; मरकुस 12:38-40)
45तां आखा माणहु ईसु नी वात ह़मळवा बाज र्या हता, तत्यार ईसु आह़फा ना चेला ने केदो, 46“युहदी-धरम ना मास्तर्या सी चेतीन रेवो। काहाके तीमने नाम्बलु डगलु पेरवा वारु गमे, अने हाट मे बीजा माणहु ना मोडे ‘वारु से के?’ पुसे ता तीमने वारु गमे। अने भगवान ना भक्ती ना घोर मे पेल्नी कुड़ची पोर बहवा, अने पंगात मे पेल्नो जागो हात करवा, तीमने घणु वारु गमे। 47आहया रंडायला बयरा ना घोरु ने लुट लेय, अने बीजा माणहु ने देखाड़वा करीन नाम्बी वीन्ती करे। हीमने भगवान वगे गेथो नीयाव नो डंड जादा जड़हे।”
Currently Selected:
लुका 20: PPt2025
Highlight
Share
Copy
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
