John 8

Zool-inthai Numeisa inkhat Surna

[ 1Takkha Jisu chu Olive chingbung khan aleisi. 2Halli ziingtiang ma-ah ama'n Biak-inn khan aheiwanook; mipui ngai'n amadiang inheiwa, halli ama'n alei in-ongnga inmani ngaikha aleiminchu. 3Dan Ocha ngai khat-um Pharisee ngai'n zool-inthai numeisa inkhat insurra inheiruoi, halli mipui karra inlei min-ngirra 4inmani'n Jisu diang inleiti, “Karu, hiwa numeisanu hi zool-inthai chuon inleitho laitak inhongsur eii.

5Dan dungjuiya Moses in chongpeii aleida khachu hiwa ka-ang numeisa khachu lungnga deengthat ru. Nangleii hiwa jarra ang natime?”” Levi 20:10; Innidan 22:22-24

6Inmani'n hiwahi Jisu surna sik-ah inleiti eii, tichu inmani'n amadiang noonkung penasik eii. Takkha Jisu'n aleikuunna neipilla akut challa aleimajia. 7Halli Inmani'n amadiang inlet-ah inleirakel jarra, ama'n alu hongtangnga inmanidiang aleiti, “Nangni karra manu kalathomak miring khan numeisanu diang mansakhet-ah lungnga deengrase.”” 8Halli ama'n woikhat akuun rit-ah neipilla aleimajiarit. 9Takkha inmani'n inlei rangai phakhan, upakhet makheiya inphut-ah, inmani rakip in inkhat inkhat-ah insiwiakjei, halli numeisanu khabit Jisu maikuungnga a-ngirra aleiom. 10Jisu'n ahong-enna numeisanu diang aleiti, “Numeisa, inmani ngai huntiang insiwiak mejei? tuteii inkhat innum nangkha naminse mubejei?””

11Numeisanu'n aleiti, “Tuteii um ommujei, Pumi.””

Halli Jisu'n aleiti, “Kei innum nang naminse mongjei; sitro, woikhat inlet-ah manu thoritkhai maro.””]#8:11. Manuscript katamtak khat-um tiallaiya inleimalet khan hiwa mun hi inchenmak (8:1-11); lekkhat in Jn. 12:24 nuk-ah inchen; lekkhat in Luk 21:38 nuk-ah inchen; manuscript inkhat in Jn. 7:36 nuk-ah inchen.

Jisu Manmasituolla War kha eii

12Jisu'n Pharisee ngaidiang inlet-ah aleirilrit-ah aleiti, “Kei manmasituol war kha ka-eii; kei kanajui miring khan akaziing khan sikhai nunijei, takkha ringna war kha amusik eii.”” Matt 5:14; Jn 9:5

13Pharisee ngai'n amadiang inleiti, “Nang napumtak jarra sakhi napeii; nang sakhi kha dikmak.”” Jn 5:31

14Jisu'n aleimasang, “Kei'n kapumtak jarra sakhi kape innum, kei sakhi hichu adik, ajarchu kei humakheiya kijuome halli kei'n hunme kisi kei'n kajet. Takkha nangni inchu kei humakheiya kijuome emakli hunme kisi jetmakchu. 15Nangnichu taksa lamma chong ningtan; keichu tuteii diang-um chong tanmong. 16Kei'n chong katan ngai suok-innum, kei chongtanchu adik, ajarchu kei katheinuo ah emong, takkha kei kanajuotir Kapa le kin eii. 17Nangni Sinadan khan injiajei khachu miring inni sakhi kha adik.

18Kei kapumtak jarra sakhi kapeii, halli kei kanajuotir Kapa'n kei jarra sakhi eii.”” Innidan 19:15

19Inmani'n amadiang inleiti “Nang napa hun omme?””

Jisu'n aleimasang, “Nangni'n kei khat-um kei Kapa jetmakchu; nangni'n kei ningnaleijet inchu, nangni'n kei Kapa um ningleijetsik eii.””

20Hiwa chong ngaihi Biak-inn suungnga sialsum mintiingna munkhan Jisu'n aminchu pumma aleiril; takkha tuteii inkhat innum ama kha leisurmu, ajarchu ama phakha laheitungmak.

Kei Kasinasik khan nangni Sitheinutun

21Jisu'n inlet-ah inmani diang aleiti, “Kei kalasisik eii; nangni'n kei ningna-entoksik eii, halli ningmanu roonkhan nangni ningthisik eii; kei kasinasik khan nangni'n sitheinutun.””

22Khawa jarra Jihudi ngai'n inleiti, “Kei kasinasik khan nangni'n sitheinutun itihi Ma atheinuo-ah thisik itibe?””

23Jisu'n inmani diang aleimasang, “Nangnichu nuoi makheiya ning eii, Keichu chungtiang makheiya ka eii; nangnichu hiwa manmasituol makheiya ning eii, takkha keichu hiwa manmasituol makheiya emong. 24Kei'n nangnidiang katijei, khachu nangni ningmanu roonkhan ningthisik eii, nangni'n “‘KEIHI KEI KA-EII’’ tia ningna-ngamnamak laiseng nangni ningmanu roonkhan ningthisik eii.””

25Inmani'n amadiang inleiti, “Nang tu na-eme?””

Jisu'n aleimasang, “Kei'n inphutna makheiya kileiti kha ejei. #8:25. Kei'n inphutna makheiya kileiti kha ejei; emakli Ang jarra kei in nangni diang karil sik me? 26Kei'n nangni jarra tamthei karilsik khat-um tamthei chong katansik om; takkha Kei kanajuotir ama kha akadik kha eii, halli kei'n amadiang makheiya kijet kha kei'n manmasituol diang karilsouk.””

27Jisu'n Apa jarra inmani diang iril eii tikha inmani ngai'n leijetmu. 28Khawa jarra Jisu'n aleiti, “Nangni'n Miring Sapa kha ningkadomsaang phakhan, nangni'n KEIHI KEI KA-EII tikha nangni'n jetningte, khachu kei kapumtak kamatorna ranak-ah iteii thomong takkha Kapa'n keidiang rilro iti ngaikhabit karil. 29Halli kei kanajuotir ama kha keile omsuom; ama'n katheinuo ah nadamak, ajarchu ama lungdou kha kei'n amun rakip-ah katho.””

30Jisu'n arilla ompumma mikatam tak-in amadiang inlei-ngamna.

Akadik khan Nangni Anamasuosik eii

31Jisu'n amadiang inngamnajei Jihudi ngaidiang aleiti, “Kei kachong ngaikha ningjuichei inchu, nangni inthiangnga kei siamruoi ning eii, 32halli nangni'n akadik kha jetningte, halli akadik khan nangni anamasuosik eii.””

33Inmani'n amadiang inleimasang, “Keini Abraham tu-suonngai kin eii, halli keini'n tuteii diang-um suok lahong inchangmung. Angjarra nang in, “‘Nangni anamasuosik eii’’ nitime?”” Matt 3:9; Luk 3:8

34Jisu'n inmani diang aleimasang, “Kei'n inthiangnga nangnidiang kati, manu katho mi rakip manu suok in-eii. 35Suok khan kumsoot-ah insuungkhur mi emak; asapa kha kumsoot-ah insuungkhur mi eii. 36Asapa khan nangni anamasuojei inchu, nangni inthiangnga inamasuo kha esijei. 37Kei'n kajet nangni Abraham tu-suonngai ning eii; takkha nangni'n kei nathatnasik ningjong, ajarchu ningmalungnga kei kachong reiinasik ommak. 38Kapa in naminmu kha kei'n karil, halli nangnichu ningpa ngai naleiti kha nangni'n ningtho.””

39Inmani'n amadiang inleimasang, “Abraham keini kinpa eii.””

Jisu'n inmani diang aleimasang, “Nangni Abraham sangai ning-e inchu, Abraham ileitho ngaikha nangni'n ningthosik eii,#8:39. Nangni Abraham sangai ning-e inchu, Abraham ileitho ngaikha nangni'n ningthosik eii; manuscript lekkhat in hin tia injia nangni ning eii inchu ... thoru. 40Pathian diangnga akadik kajet-ah akaril keihi nangni'n thatsik ningjong. Takkha Abraham chu hiwa ka-ang iteii leithomak! 41Ningpa ngaitak ileitho ngaikha nangni'n ningtho eii.””

Inmani'n amadiang inleiti, “Keini bojai sa emung; keini kinpa inkhat om, khachu Pathian eii.””

42Jisu'n inmani diang aleiti, “Pathian kha inthiangnga ningpa e-inchu, nangni'n kei ningnaminriang sik eii, ajarchu kei Pathian diang makheiya kijuo eii khat-um tuunhin kaom. Kei kalungdouwa kijuo emak; takkha ama'n innajuotir kha eii. 43Angtia nangni'n kei itihi ningjetmak me? ajarchu nangni'n kei kachong ning ra-ngaimak jarra eii. 44Nangnichu ningpa Seitan makheiya ning eii, khat-um ningpa imanuom kha nangni-um ningthozoot. Inphutna makheiya ama chu mi kathat eii khat-um akadik khan supngir ngirmak, ajarchu amadiang akadik kha ommak. Ma'n maleisei aril kaalkhan, a-ngaiya ama diangnga kaomkha iril eii, ajarchu maleiseipa eii khat-um maleisei rakipngai pa eii. 45Takkha, Kei'n akadik karil jarra, nangni'n keidiang na-ngamna makchu. 46Tume nangni karra keihi manu karoon eii kanati mator? Kei'n kadik kha karil-inle, angjarra nangni'n keidiang ngamna ningneimakme? 47Pathian diang makheiya kajuo ama'n Pathian chongkha arangai; nangni'n ningra-ngai makna ajarchu nangni Pathian diang makheiya emak chuwa eii.””

Jisu khat-um Abraham

48Jihudi ngai'n amadiang inleimasang, “Nangchu Samaritan na-eii khat-um nang raikhuo kachoi na-eii kintihi dikmungbe?””

49Jisu'n aleimasang, “Kei kapumma raikhuo ommak; kei'n Kapa khoya katho, takkha nangni'n kei khoya nathomakchu. 50Kei kapumtak lurna lianna sik-ah entokmong; takkha aka-entok inkhat aom halli ama'n chongkatanpa esik eii. 51Kei'n inthiangnga nangnidiang kanati, tu miring inkhat in Kei kachong ajui inchu, ama kha angtikseng akathi mununi.””

52Jihudi ngai'n amadiang inleiti, “Tuunchu keini'n inthiangnga kinjetjei khachu nang napumma raikhuo om! Abraham um Pathian chongkachoi ngai-um inthijei; halli nang in tu miring inkhat in Kei kachong ajui-inchu, akathi supmu mununi nati. 53Akathijei kinpa Abraham neek-ah nang nalokwiai abe? halli Pathian chongkachoi ngai-um inthijei! Nangleii tu ka-eii na-intime?””

54Jisu'n aleimasang, “Kei kapumtak kaminlur kaminlian inchu, kei lurna kha iteii emak; ning Pathian inchang Kapa tak-in naminlur naminlian eii. 55Takkha Nangni'n ama kha lajetmakchu; keichu ama kha kajet. Kei'n ama kha jetmong kati-inchu, kei-um nangni angnga maleisei karil kha ka eii; takkha kei'n ama kha kajet khat-um ama chongkha kei'n kajui. 56Ningpa Abraham khan kei juonasik aphakha kamusik eii tia aleirok; halli ama'n aleimuwa aleirokjei.””

57Jihudi ngai'n amadiang inleiti, “Nang kumsoom ra-nga latungleiya nang in Abraham namuwabejei?””#8:57: nang in Abraham namuwabejei? manuscript lekkhat in hin tia injia Abraham hi nang namu bejei?

58Jisu'n inmani diang aleiti, “Kei'n inthiangnga nangnidiang kati, Abraham matiang Kei kalei-omjei.””

59Khawa jarra inmani'n amadiang deengna sik-ah lung inleiruut; takkha Jisu'n inthup-ah Biak-inn kha aleimathaan.

Currently Selected:

John 8: KHMNT

Highlight

Copy