Luke 14

Jisu'n Mi Kana Mindamna

1Jisu'n Sabbath nikhuo khatni Pharisee chuon karoon ka-eii inkhat inna Jisu'n bukabak aleisi, halli inmani'n Jisu kha inleiensui. 2Enru, akei akut inthing pasal inkhat Jisu koolla aheiwa. 3Halli Jisu'n dan karu khat-um Pharisee ngaidiang aleirakel, “Sabbath nikhuoni kana mindamnsik hi eini sinadan in zootbe zootmakbe?””

4Takkha inmani'n inleiomchian, halli Jisu'n pasal pakha akatook ah amindamma aleiminsijei. 5Khawasuoa Jisu'n inmani diang aleiti, “Ningkarra atu ka-ang in asapa emakli asaraat kha Sabbath nikhuoni tuikhurra ata inle innottheiya keisuomak tunnabe?””Matt 12:11

6Halli inmani'n hiwajarra leimasang matormu.

Nunchan inchuolli Mi kadonthei

7Jisu'n in-ongnamun kathakhet kakadang khuolmi lekkhat alei intongpui, halli ama'n inmani diang hiwa minkhinahi aleirilpi, 8“Nangkha miring inkhat in moiruoina bubaknasik anakoi phakhan ongnamun hoina khetkhan in ongmaru, ajarchu nangneek ah kalok miring inkhat leikoicha. Chongil 25:6,7

9Khale inruoiya nang kanakoi sinpu khan heiwata nangdiang najuotite, “‘amahi hiwa munhin minongro.’’ Khawa phakhan nang in nuoi innungkhet munna inongnasik ah injaknate, 10khawa neek achu, nang innakoi phakhan, si inlang nuoi innungkhet munkhan in-ongro, kha e-inchu asinpu khan heiwata najuotite, “‘Heiwaro suopui mun hoinadet tiang sirui,’’ khawa phakhan khuolmi ngai rakip in nangkha khoya thona innaneisik eii. 11Halli atu ka-ang atheinuo ah inrilsaang amakha ajuominniamsik, khat-um atu ka-ang atheinuo ah inniam mikha aminsaangsik eii.””Matt 23:12; Luk 18:14

12Khale inruoiya Jisu'n sinpu padiang aheiti, “Nang in ziingbu emakli kholeibu naminsuuk phakhan, nasappui ngai, na-u nanai ngai, naphung ngai, emakli inchongkaraang ngai, na-indiang inwaipui ngai kha koimaro, ajarchu inmani'n woikhat nang itho angnga nakoinook inta innamaleii nooksik eii. 13Takkha nang in bubaknasik naminsuuk phakhan sara, ke inkhooi, siing insatheimak khat-um mit kacho ngaikha koiro, 14kha e-inchu nang in rawaan namusik eii, ajarchu inmani'n nangdiang napekir matornunu, Pathian in nangkha kangamna ngai inhongring nikhuoni khan anape kirnooksik eii.””

Phamwai kahoi kalok minkhina

(Matt 22:1-10)

15Khamtuolla in-ong puisuom khuolmi inkhat in hiwahi aleijet ah Jisu diang aleiti, “Pathian Rengramma bu kalabaksik inmani kha rawaan katha in-eii!””

16Takkha Jisu'n amadiang aheiti, “Miring inkhat in phamwaina kahoi kalok amasouk ah mipui kha aleikoi. 17Bubak nasik phakha aheitung phakhan, “‘Angrakip insuuk suojei heiwataru tia, ikoi mi ngaidiang juotinasik-ah ama'n asuok inkhat atirjei!’’ 18Takkha inmani'n rakip in inruolrip ah inkeiduuk nasik inleirilwiak, mansakhet pa'n suokpa diang ati, “‘Kei'n ram inkhat karacho khawakha juoendirong, nangaidamro.’’ 19Miring inkhat innum aheitinook, “‘Kei um saraatchal bop ra-nga karacho khawajarra kei'n juo encheen dirong, ngaidam napero.’’ 20Miring inkhat innum aheitinook, “‘Kei um inn kalaneilim khawajarra heiwa matornuning.’’ 21Suok khan aheikirra ang rakipkha karu diang ajuotipi, karu khan araangnga ama suokpa diang atipi, “‘Innottheiya khuopui lampui ngaikhan si-inlang, sara, kasitheimak, mitkacho khat-um inkhooi inmani ngaikha heiruoiro.’’ 22Suokpa khan aheiti, “‘Karu, nang nachongpeii dungjuiya kathosikjei, halli tuunnum mun angjet alaruok.’’ 23Halli karu khan asuokpa diang aheiti, si-inlang lampui li khuo ngaikhan “‘Mipui kha ka-inn sipnasik heiruoiro. 24Kei'n nangdiang kinatihi eii, kei'n kikoimak inmani tuteii innum kei iminsuuk bu kha mintem theinunu!’’ ””

Siamruoi Etheinasik

(Matt 10:37-38)

25Mipui katamtak Jisule inleisisuom phakhan, ama'n anuk malet ah inmani diang aleiti. 26“Kei kadiang kaheiwa ngai'n anu apa, anumei, asa, a-u anai ngai khat-um apumtak intirmak inchu kei kasiamruoi etheinuni. Matt 10:37

27Atu ka-ang in ama cross raput leiya kei kanuk kajui mikha kasiamruoi atheinuni. Matt 10:38; 16:24; Mk 8:34; Luk 9:23

28Nangni karra mi inkhat in insaangtak inn inkhat saksik tia ngaidon inchu, ama'n in-ongta hiwa minheknasik, angjetme kaluutsik tia mansakhet ah minsuukmak niabe? 29Inn insaangtak kasak aphutli aminhek matormak inchu akamu mi rakip in ama kha innuipuisik eii. 30Inmani'n ti-inte, “‘Hiwa mipa hi inn insaangtak kasak aphutli saksuo matormakjei.’’ 31Kha emakli reng inkhat in reng inkhat diang raal katho asi inchu, ama'n mi lisingsoom aruoiya inhalpui rengpa raalmi lising soomni ama chungnga raal katho kaheiwa ngaikha mator ningbo tia mansakhet ah ama'n in-ongta ngaidonmak niabe? 32Ama'n amator maksik e-inchu, kalaak ah inomlai khan asuok inkhat tirta inhalpui rengpa diang inngei nasik chong ajuominrilsik eii. 33Hiwa angnga”” “Atu ka-ang in inei rakip amathaan matormak inchu amakha kei kasiamruoi ematornuni.

Ka-almak Machi

(Matt 5:13; Mk 9:50)

34“Machi hi ka-al eii, takkha i-al kha amang inchu, angtikteii min-al matornuminjei. 35Khawakha neipilthai sik-ah emakli neipil sik a-um nemna kaboi eii; khawa jarra indeengjuon. Kuor indou rakip in jetru!””

Currently Selected:

Luke 14: KHMNT

Highlight

Copy