लुका 23
23
पिलातुस ने ओंगाण यीशु
(मत्ती 27:1,2-11-14; मरकुस 15:1-5; योहान 18:28-38)
1तेवी आखा पोंचान माणहे उठना एने यीशुह पिलातुस फाय ली गीया। 2ताहरो ता इहकेरीन केयीन यीशु पोर गुनो लागाड़ने बाज गीया: “ज्यो आमरा यहुदि माणहाह बोड़कावणे बाजरिनोह, एने रोमन राजाह फालो आपणेन विरोद किरेह, एने आपणे आपाह मसी एक राजा किथे।”
3पिलातुस यीशुह फुशो, “तु यहुदिन राजा हे काय?” यीशु जापाप आप्यो, “तुसते किथे मी तोस हे।”
4तेवी पिलातुस मुखी चाकऱ्याह एने गेरदीह केयो, “माहु ज्या एदम्याम काय गुनो नाह देखात।”
5पुण ता उंजु बी जुलूम जोरेस केणे बाज गीया, “ज्यो गेलील रेन ते न्या वोर, आखा यहुदिया देसान माणहाह हिकाड़ी हिकाड़ीन बोड़काव दियेल हे।”
हेरोद राजान सामने यीशु
6ज्य होमलीन पिलातुस फुशो, “ज्यु एदमी गेलील वालो हे काय?” 7एने ज्य जाणीन काय यीशु हेरोदेसान आदिकार वालो हे, ते ताह हेरोदेस फाय मोकली दिनो, काहाकाय ता दिह्या माय हेरोद बी यरूशलेम माय ईतो। 8हेरोदेस यीशुह देखीन जुलूम खुस एय गीयो, काहाकाय तो जुलूम दिह्यान ताह देखणे होदतालो; तो तान बाराम होमलेल ईतो, एने ता फाय रेन चोमेत्कार देखणेन आसा केरतालो। 9हेरोद यीशुह जुलूम सावाल फुसते रिनो, पुण यीशु ताह कायच जापाप नाह आप्यो। 10मुखी चाकऱ्या एने देरेमगुरू यीशु पोर जुलूम वातीन गुनो लागाड़ते रेना। 11तेवी हेरोदेस तान सिपाया हिऱ्यो यीशुन ईजुत लेन तान चिहटा केऱ्यो, उवतो जुलूम जामण्या फाड़का पेरावीन पोशो पिलातुस फाय मोकली दिनो। 12ते दिह रेन पिलातुस एने हेरोदेस राजान दोस्ती एय गियी; तान पेल ता एका दिहरान दुसमोन एता।
पिलातुस यीशुह मोरनेन डेंड आपेह
(मत्ती 27:15-26; मरकुस 15:6-15; योहान 18:39–19:16)
13पिलातुस मुखी चाकऱ्याह एने आदिकारीह एने माणहाह हाद्यो, 14एने तो ताह केयो, “तुमू ज्या माणहाह बोड़कावणार केयीन मार फाय लावाह, एने हुमलो, मी तुमरी ओंगाणुच ज्याह पारेख लियेल हे, पुण जी वातीन तुमू गुनो लागाड़ने बाजरेनाह ती वातीन बाराम माहु ज्या फाय कायच गुनो नाह सापड़नो; 15हेरोदेस राजाह ज्या माय काय गुनो नाह सापड़नो, केरीन तो ज्याह आमरी फाय पुशो मोकली दियेल हे एने हुमलो, ज्याह मारने डेंड आपणे हारको काय गुनो नाह सापड़ेल सोतो। 16तानकेरता मी ज्याह चापका देवाड़ीन सोड़ देह।” 17#23:17 थोड़ाक लेख माय ज्यो वचन जुड़ेल हे (देखी मरकुस 15:5।)पिलातुस तिवारान टेम माय यहुदि माणहान केरता एक आरापीह सोड़ देतालो।
18पुण ता आखा माणहे आयड़ीन केया, “ज्याह मार टाक एने आमरी केरता बरअब्बाह सोड़ दे!” 19रोमी सारकारान विरोद माय हेयराम देंगो एने खुन किरेल ईतो, केरीन बरअब्बा जेली माय कोंडायेल ईतो।
20पिलातुस यीशुह सोड़ने होदतालो, केरीन माणहाह उंजु सोमजाड्यो, 21पुण माणहे पोशा आयड़ीन केया, “ओयाह खुरूसखाम पोर चेड़ाव, खुरूसखाम पोर!”
22पिलातुस तिसरी वार ताह फुशो, “काहा, ज्यो काय गुनो किरेल हे? माहु ते ज्या माय मोतीन डेंड आपणेन कायच गेलती नाह देखात। तानकेरता मी ज्याह चापका देवाड़ीन सोड़ दिथो।”
23पुण ता आयड़ी आयड़ीन पासाण पोड़ गीया काय यीशु खुरूसखाम पोर चेड़ावाय जाय, एने सेवली बुखेत माणहान आयेड़नो सफल एनो। 24जीहे माणहे मांग केऱ्या तिहेच पिलातुस यीशुह खुरूसखाम पोर चेड़ावणेन उकुम आप्यो। 25बरअब्बा देंगो किरेल एने खुन किरेल तानकेरता जेली माय कोंडायेल ईतो, एने जाह ता मांगताला, ताह सोड़ दिनो; पुण यीशुह तान मोरजीन गेत तान आथाम होप दिनो काय ताह जो केरनु हे ता हेऱ्या केरी।
यीशुह खुरूसखाम पोर चेड़ावणो
(मत्ती 27:32-44; मरकुस 15:21-32; योहान 19:17-27)
26जेवी सिपायड़ा यीशुह ली जाणे बाजरियेल एता, तुलेचबूखे कुरेन गावाम रेणार शिमोन नावान एक माणुह हेयराम रेन आवणे बाजरियेल ईतो, तेवी सिपायड़ा ताह देरीन यीशुन खुरूसखाम उखलाड्या एने यीशुन पासाण पासाण चालने लागाड्या।
27जुलूम माणहे यीशुन पासाण पासाण चाल पोड़ना ता माय जुलूम बायकु बी एत्यु त्यु यीशुन केरता साती ठोकी ठोकीन रेड़ने बाजरियेल एत्यु। 28यीशु त्युन उगे फिरीन केयो, “एय यरूशलेमान बेट्युख, मार केरता मा रिड़ो; पुण तुमरे एने तुमरा सोरान केरता रिड़ो। 29काहाकाय ओहला दिह आवती, ते माणहे केती, ‘ज्यु वांज हेत्यु त्यु बोरकेतवाल्यु हेत्यु ज्यु सोराह पायदा नाह किऱ्यो एने दुद नाह पिवाड्यु, त्यु बोरकेतवाल्यु हेत्यु।’ 30#प्रकाशितवाक्य 6:16ती टेम माय त्यु बोयड़ाह केती काय आमरी पोर ओदरी पोड़ी, एने बोयड्युह केती आमुह डाप लिवो। 31काहाकाय ता निल्ला जाड़ा हेऱ्या ओहला केरतेह, ते हुकेल जाड़ा हेऱ्या काय काय नाय केरती?”
32ता दिहरा दुय आरापीह, यीशु हेऱ्या खुरूसखाम पोर मारने ली गीया। 33ता खोपड़ी नावान जागे पोचना, ता यीशुह खुरूसखाम पोर चेड़ाया, एक डाकुह तान जीवड़े उगे एने दिहराह डाखरे उगे चेड़ाया। 34तेवी यीशु केयो, “एय आबा, न्याह माफ केर, काहाकाय ज्या जो केरने बाजरेनाह तो नाह जाणते।”#23:34 थोड़ाक लेख माय यीशु केयो, “एय आबा, न्याह माफ केर, काहाकाय ज्या जो केरने बाजरेनाह तो नाह जाणते!” नाह लिखेल सोतो। ओवता ता चिटठ्यु टाकीन यीशुन फाड़का वाट लेदा। 35माणहे उबरीन देखणे बाजरियेल एता, एने यहुदिन मुखी बी यीशुन मोजाक केरीन केतालो: “ज्यो दिहराह वोचाड्यो, तु खेरीच बोगवानान निवाड़ेल मसी एय ते, आपणे आपाह वोचाड़ ले।”
36सिपायड़ा बी आहने आवीन एने माणलो अंगुरान रोह चुहाड़ीन यीशुन मोजाक केरीन केताला, 37“तु खेरीच यहुदिन राजा एय, ते आपणे आपाह वोचाड़ ले!”
38एने तान खुरूसखाम ने उपेर गुनान चिट्ठी लेखीन लागाड़ मीलेल एती: “ज्यो यहुदिन राजा हे।”
39यीशु हेऱ्या दुय आरापी बी खुरूसखाम पोर चेड़ायेल एता, ताम रेन एक आरापी यीशुन चिहटा केरीन केयो, “तु मसी नाह सुतो काय? खेरीच तु मसी एय ते आपणे आपाह एने आमुह बी वोचाड़।”
40पुण दिहरो आरापी ताह दोपकावीन केयो, “तु बोगवानाह बी नाह बित काय? तु बी ते तोच डेंड बोगेतणे बाजरिनोह, 41आपु ते आपणा नियाव ने गेत डेंड बोगेतणे बाजरेनाह, काहाकाय आपु आपणा कामान गेत तोहलो फोल सापड़ाव रेनाह; पुण ज्यो ते काल्लो गेलेत काम नाह किरेल सुतो।” 42ओवतो तो यीशुह केयो, “एय यीशु, जेवी तु तारा राज हिऱ्यो आवहे ताहार तु माहु बी एर किरजे।”
43यीशु ताह केयो, “मी तुवाह खेरीच केथु काय आजुच तु मार हिऱ्यो हेरगा माय रिहे।”
यीशुन जीव सोड़नो
(मत्ती 27:45-56; मरकुस 15:33-41; योहान 19:28-30)
44ती टेम माय हिराणेन बारा वाचता रेन तीन वाचता वोर आखा देसा माय आदारो एय गीयो; 45तेवी दिह्यान उजालो बोंद एय गीयो एने मोंदिरान पुड़दो फाटीन दुय टुकड़ा एय गीया। 46एने यीशु जोरेस आयड़ीन केयो, “एय आबा, मी मारो जीव तारा आथाम होपथु।” इहकेरीन केयीन तो मोर गीयो।
47ज्य आखो देखीन सिपायड़ान मुखी, बोगवानान बोड़ाय केरीन केयो, “खेरीच ज्यो माणुह देरमी ईतो।”
48जा माणहे ज्यी गेटनाह देखणे बाजरियेल एता, ता साती ठोकते जाईन पोशा जात रेना। 49#लुका 8:2,3पुण यीशु हेऱ्यो गेलील रेन ज्यु बायकु पासाण पासाण आयेल एत्यु, त्यु एने तान ओलखातीन आखा माणहे, सेटाच उबरीन देखणे बाजरियेल एता।
यीशुन बुजणो
(मत्ती 27:57-61; मरकुस 15:42-47; योहान 19:38-42)
50ता युसूफ नावान एक हाजो एदमी ईतो, तो यहुदिन मोटला पोंचान एक माणुह ईतो, 51तो यहुदिन फेसला माय एने यहुदिन कामा माय बेचकायेल नाह ईतो। तो यहुदिन हेयरान अरीमतीया गावाम रेतालो एने तो बोगवानान राज आवी इहकेरीन वाट जोवतालो। 52एने तो पिलातुस फाय जाईन यीशुन देड़ मांग्यो; 53तेवी देड़ाह खुरूसखाम पोर रेन उतारीन हुवाल्ली डाठी माय गुंडालीन एक माहणाम मिल्यो, तो माहेण सापराट्याम खुदेल एतो; एने ता माय उंजु कुणीह नाह मीलेल एता। 54तो दिह तियारीन दिह ईतो, एने विहेवणेन दिह आवण्यो ईतो।
55गेलील रेन आयेल बायकु युसूफान पासाण पासाण जाईन ता माहणाह देख्यु, एने यीशुन देड़ाह किहीक मेल्या तो सोब देख्यु। 56ओवत्यु त्यु पोशु गेर गीयु एने यीशुन देड़ा पोर लागाड़नेन केरता मोग मोग गेंदाणार तेल एने सोमान तियार किऱ्यो; एने यहुदि नेम ने गेत विहेवणेन दिह त्यु आराम केऱ्यु।
Currently Selected:
लुका 23: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
