Olianyanpi kin 10
10
1Unkan Kesareya en wicaśta wan Kornelioe eciyapi, akicita opawinge obe wanjidan, Italike eciyapi, kin he en itancan kin hee;
2Wicaśta wakinihan, qa Wakantanka kokipeyahan un, tiyohnaka kici; qa oyate kin nina cantewicakiya, qa ohinniyan Wakantanka cekiya un ece.
3He qe anpetu wan en, napeinwanka apa hehantu, wowanyake wan en, Wakantanka taohnihde wan en hi, qa, Kornelios, eciye cin he taninyan wanyaka.
4Unkan he opaḣta yanke c̣a inihan qa; Itancan taku he, eya. Unkan iś ito heciya; Wocekiye nitawa qa wacantkiya oyaḣande cin he Wakantanka itokam kiksuyapi.
5Heon nakaha Joppa ekta wicaśta ye wicaśi, qa Simon Inyan eciyapi kin he kico wo.
6Wicaśta wakpanyan wan Simon eciyapi ti kin miniwanca kahda han, he kici yanka. He token ecanon kte cin oniciyake kta ce.
7Unkan maḣpiya ohnihde Kornelios okiye cin he wanna kihda, hehan tiawanyag wicakiye cin nom, qa akicita waśte ohinniyan tankiyadan wicahduhe cin wanjidan, hena wicakico;
8Qa hena taku kin owasin owicakiyake c̣ehan, Joppa ekta ye wicaśi.
9Unkan icimanipi, qa ihanḣanna wanna otonwe kin ikiyadan, hehan Inyan tipi kin akan wocekiye eya iyaya, wanna wiyotanhe cin hehantu.
10Nina wotektehda, qa wote kta cin, tuka taku yutapi wiyeya ehnakapi kin he icunhan wokiksuye śni wan ahinḣpaya.
11Unkan maḣpiya kin yuzamnipi e wanyaka, qa heciyatanhan taku wan miniḣuha ska tanka iyececa, oise topa kin iciyakaśkapi he kutkiya u, qa maka kin ahe kiyapi.
12He ohna taku maka akan waḣutopa ocaje owasiri, qa woteca, qa watutka, qa maḣpiya okinyanpi kin.
13Unkan wicaho wan tanin qa; Inyan, najin, qa kte, qa yuta wo, eciya.
14Tuka iś; Itancan, hecetu śni, tohinni taku ikceka qa aśape cin wate śni ce, eya.
15Unkan ake icinonpa wicaho kin tanin qa; Taku Wakantanka pakinte cin he ikceka eciye śni wo, eya.
16Yamni akihde hecen econpi, qa hehan taku kin he maḣpiya kin ekta akiyahdapi.
17Unkan Inyan wowanyake wanyake cin he taku kin iyukcan śni un, he icunhan, ito wicaśta Kornelios u wicaśi qon hena Simon ti kin akitapi, qa wanna tiyopa kin itokam en hinajinpi;
18Qa panpi qa; Simon Inyan eciyapi den yanka he, eya iwicawangapi.
19Wowanyake kin he Inyan awakicin un kin he icunhan, Woniya Wakan kin heciya; Wanyaka wo, wicaśta yamni onidepi.
20Heon najin qa kun hde c̣a, takudan ceṭunhda śni om ya wo, hena u wicawaśi ce, eya.
21Hehan Inyan wicaśta Kornelios u wicaśi qon hena ekta kun wicai, qa; Tuwe ayakitapi kin he miye ce; taku on yahipi he, ewicakiya.
22Unkan iś heyapi; Kornelios akicita opawinge wicayuhe cin, wicaśta owotanna, qa Wakantanka kokipeyahan un he Juda oyate kin iyuḣpa oyakapi, hee maḣpiya ohnihde wakan wan okiye c̣a, tuwe nihuwe u wicaśi, qa iye ti kin ohna nioie kin naḣon kta, keya ce, eyapi.
23Hehan tin u wicaśi qa won wicaya. Unkan ihanḣanna Inyan hena om hda, unkan Joppa etanhan hunkawanjinkiciyapi kin wanjikji opapi.
24Unkan ihanḣanna qehan Kesareya iyohipi. Unkan Kornelios tona takuwicaye c̣a koda wicaye cin hena wicakico, qa om ape yanka.
25Unkan Inyan en u, hehan Kornelios itkokim ye c̣a, siha kin en makata eḣpeiciye c̣a cekiya.
26Tuka Inyan iś najin kiye c̣a; Najin wo, miś eya wimacaśta ce, eya.
27Qa kici wohdaka ecen tipi kin timahen i, qa wicota mniciyapi kin wanwicayaka.
28Hehan hewicakiya; Tuwe Juda wicaśta kin heca e oyate tokeca etanhan wan kici un, qa en hi kin he hecetu śni e sdonyayapi, tuka tuwedan wicaśta ikceka qa aśape cin ewakiye kte śni he Wakantanka sdonye makiya.
29Heon etanhan mahuwe ipi kin ecen waceṭunhda śni hibu, heon taku on miyecopi hecinhan he iciwangapi, eya.
30Unkan Kornelios heya; Wanna ehantanhan anpetu topa he ehan, qa nakaha oape kin dehantu, wote śni waun, qa napcinwanka ape cin hehan wati kin en cekiya waun; unkan wicaśta wan wokoyake wiyatpa koyake cin he en mahinajin;
31Qa, Kornelios wocekiye nitawa kin he naḣonpi, qa taku wacantkiya ecanon kin he Wakantanka itokam kiksuyapi ce.
32Heon Joppa ekta tuwe ye śi, qa Simon Inyan eciyapi kin he kico wo; he wicaśta wakpanyan wan, Simon eciyapi, ti kin miniwanca kahda he cin he ohna yanka. He hi kinhan taku eniciye kta ce, eya.
33Heon kohanna wahociya; qa yahi kin he tanyan ecanon. Heon nakaha unkiyepi kin owasin Wakantanka itokam unkanpi, taku Wakantanka eye niśi kin owasin naunḣonpi; kta ce
34Hehan Inyan i hdukawa qa heya; Awicakehan Wakantanka wicaśta itohnake kin iwanyake śni e imdukcan.
35Tuka oyate otoiyohi en, tuwe kokipeyahan un, qa owotanna oḣanye cin he waśtedaka ece.
36Jesus Messiya kin, owasin en Itancan kin hee, he eciyatanhan wicoie Israel cinca kin wookiye iwahowicayapi qon.
37Wicoie kin he sdonyayapi, Juda makoce kin owancaya oyakapi, Galile etanhan, Johannes baptem oyake cin hehan tanhan.
38Jesus Nazareth etanhan kin he Wakantanka sdakiya, Woniya Wakan wowaśake ko on; qa he qe taku waśte econ iyaya ece, qa tona taku wakan śica wicayuhnaśkinyan kin hena okiziwicaya ece, Wakantanka kici un kin heon.
39Qa taku Juda oyate tamakoce, qa Jerusalem ekta econ qon owasin unyaotaninpi ece. He iye kin ktepi, qa can wan akan otkeyapi qon.
40Tuka anpetu iciyamni qehan Wakantanka piya icaḣkiye c̣a, taninyan wicakipazo.
41Oyate kin iyuḣpa śni, tuka tona otokaheya ekta Wakantanka wicakaḣnige ciqon hena en, waayataninpi kin unkiyepi, wiconṭe etanhan piya ikicage cin iyotiakam kici wauntapi qa waunyatkanpi ece.
42Unkan oyate kin wahokonwicakiye unśipi qa nipi ṭapi ko en wayaco Wakantanka kage cin he iye ce, eya oyake unśipi.
43He wicaśta wokcan kin owasin oyakapi; iye caje kin eciyatanhan tuwe wicada kinhan woaḣtani wokajuju kin yuhe kta ce.
44Wicoie kin dena Inyan ecen eye cin he icunhan, tona oie kin naḣonpi owasin Woniya Wakan kin awicahinḣpaya.
45Unkan bakiḣdayapi kin etanhanpi tona wicadapi qon, tona Inyan kici hipi kin hena yuśinyayapi, Woniya Wakan wicaqupi ece kin he Ikcewicaśta iyepi kaeś awicakaśtanpi kin heon etanhan.
46Wicaceji tokeca on iapi, qa Wakantanka yatanpi kin he naḣonpi. Hehan Inyan waayupte c̣a;
47Tuwe mini teḣinda okihi, qa hena baptem wicaqupi kte śni he; hena eqe unkiyepi kin iyecen Woniya Wakan kin icupi ce, eya.
48Hehan Itancan caje kin on baptem wicaqu wicaśi. Hehan anpetu ota en yanke kta e icekiyapi.
Currently Selected:
Olianyanpi kin 10: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
