Olianyanpi kin 19
19
1Unkan Apolos Korinth en un kin icunhan, Palos iḣeyata makoce kin opta ye c̣a, Ephesos ekta iyohi, qa hen waonspewicakiyapi wanjikji iyewicaya:
2Qa hewicakiya, Wicayadapi ehantanhan Woniya Wakan kin iyacupi he. Unkan iś, Woniya Wakan yukan e nahaḣin naunḣonpi; śni ce, eyapi.
3Unkan, Taku on baptem nic̣upi he, ewicakiya. Unkan, Johannes baptem tawa kin hee ce, eyapi.
4Unkan Palos, Johannes ihduecetupi kte cin on baptem wicaqu, qa oyate kin tuwe u kte cin he wicadapi kta, kewicakiya, he Jesus Messiya kin ee ce, eya.
5He naḣonpi, unkan Jesus Itancan caje kin on baptem wicaqupi.
6Hehan Palos nape on awicaputake c̣a, Woniya Wakan en wicahi, unkan ceji tokeca on iapi qa wokcanpi.
7Hena owasin wica ece wikcemna ake nonpa.
8Unkan omniciye tipi kin tin iyaye c̣a, wi yamni waditagya ie c̣a wohdaka, qa Wakantanka tokiconze taku tawa kin onspewicakiya.
9Tuka wanjikji suta ic̣icagapi qa wicadapi śni kin hena, wicota kin en, canku kin de on śicaya eyapi qehan, hena awicayuśtan, qa waonspewicakiyapi kin aiyog iyewicaye c̣a, anpetu otoiyohi, tuwe Turannos eciyapi, he oyawa tipi yuhe cin ohna woyaka ece.
10Waniyetu nonpa hehanyan hecen econ, unkan tona Asia en yakonpi kin hena owasin Jesus Itancan oie kin naḣonpi, Juda Helenes wicaśta ko.
11Unkan Palos nape kin on Wakantanka wowapetokeca wakan kin econ ece.
12Hecen iye tancan kin etanhan, napipakinte qa mskuakaḣpe kin wayazanpi kin en akipi; unkan wowayazan kin ayuśtan iyaye c̣a, taku wakan śicapi kin tankan inanpapi.
13Unkan wanjikji, Juda wicaśta wapiyapi kin heca, tona taku wakan śica yuhapi kin hena en. Jesus Itancan kin cajeyata utapi, qa, Jesus Palos oyake cin he cajeyan naunḣon po, eyapi.
14Qa Juda wicaśta wośna kagapi wanji, Skewa eciyapi, he cinhintku śakowin kin hena heconpi.
15Tuka woniya śice cin he waayupte c̣a, Jesus sdonwaye c̣a, Palos nakun sdonwaya, tuka niś nituwepi he, eya.
16Unkan wicaśta taku wakan śica yuhe cin he iyawicaḣpaye c̣a, ohiwicaya, hecen tancodan kiunniyanpi ecen tipi kin etanhan tankan najicapi.
17Unkan tona Ephesos en yukanpi kin, Juda qa Helenes oyate kin owasin he sdonyapi; qa wokokipe owasin awicahinḣpaya, unkan Jesus Itancan caje kin yatanpi.
18Unkan tona wicadapi kin etanhan wicota en ahi, qa wohdakapi, wicoḣan qon ohdakapi;
19Qa tona wapiyapi econpi kin hena wicota wowapi tawapi kin en ahipi, qa owasin wicitokam ḣuḣnaḣyapi; hena iyopeyapi kin hdawapi, qa mazaska kektopawinge wikcemna zaptan iyawapi.
20Hecen Itancan oie kin nina icage c̣a ohiya.
21Unkan hena taku kin wanna enakiyapi, hehan Palos woniya eciyatanhan konza, Makedonia qa Akeya opta ye cinhan, hehan Jerusalem ekta ye kta, qa, Heciya wai kinhan hehan Roma wanmdake kta ce, eya.
22Qa ookiye wicayuhe cin nom, Timotheos qa Erastos, hena Makedonia ekta ye wicaśi, tuka iye anpetu tonana Asia en owanjidan yanka.
23Unkan he icunhan canku kin de on nina owodutaton.
24Tuwe Demetrios eciyapi, mazaska kage cin heca, he mazaska kokadan Diana kicaga ece, qa tona woecon kin he econpi kin hena taku ota wicakicamna.
25Hena cepi, qa tona opeya ḣtanipi kin hena ko wicakico qa hewicakiya, Wicaśta kin, wicoḣtani kin de on woyuha untonpi e sdonyakiyapi.
26Qa nakun Ephesos ecedan śni, tuka Asia owancaya, Palos kin de oyate ota wahokonwicakiye c̣a, wicayuhomni qa, Taku wakan nape on kagapi kin hena wakan śni ce, eya owicakiyaka e sdonyayapi qa nayaḣonpi.
27Qa hecen taku on waunkamnanpi ece kin he waḣtedapi kte śni seca, qa hecedan śni, nakun Diana taku wakan tanka tipi wakan tawa kin takudapi kte śni, qa wowitan hduhe cin yutakuni kte śni, he qe Asia owancaya, qa oyate kin iyuḣpa ohodapi tuka ce, eya.
28Unkan hena naḣonpi qehan, nina canteptanyanpi qa, Diana Ephesos oyate tawapi kin he tanka ce, eyaya hotaninpi.
29Unkan otonwe kin owancaya nina owodutaton; qa Gayos qa Aristarkos kici, Makedonia wicaśta kin, Palos kici hipi qon hena iwicacupi, qa tawacin wanjidan owanyake tipi kin en inyang yapi.
30Unkan Palos oyate kin en wicai kta, tuka waonspewicakiyapi kin iyokipi śni:
31Qa Asia en wicaśta tokapapi wanjikji, iye takodawicaye cin hena wahoyapi, qa owanyake tipi kin timanea iyoḣpaye kte śni e icekiyapi.
32Heon hunḣ taku eya hotaninpi, qa hunḣ iś togye eyapi; omniciye kin nina oqoyapi; qa tokeca e on mniciyapi kin ota sdonyapi śni.
33Hehan Aleksander wicota kin etanhan ahiyupi, qa Juda wicaśta kin he cokata iyaye yapi. Unkan Aleksander namwicakicawin, qa oyate kin wowicakiyake kta.
34Tuka he Juda wicaśta kin heca e sdonyapi, unkan wihiyayedan oape nonpa hehanyan, owasin ho wanjidan hotankakiya hotaninpi, Diana Ephesos oyate tawapi kin he tanka ce, eyaya yukanpi.
35Unkan wowapi kage cin he oyate kin wicayuinina qehan, hecen eya, Ephesos wicaśta kin, Ephesos otonwe kin de Diana taku wakan tanka he tipi wakan tawa kin awanyag un, qa wakagapi Jupiter etanhan hinḣpaye ciqon he nakun, he tuwe wicaśta kin he sdonye śni he.
36Dena taku kin ceṭunhdapica śni, heon inina dukanpi, qa takudan inaḣniyan ecanonpi kte śni tuka.
37Wicaśta kin dena tipi wakan kin etanhan takudan manonpi śni, qa taku wakan nitawapi kin yaśicapi śni, tuka den awicayahipi.
38Demetrios qa tona om ḣtani kin hena tuwe en taku aupi cinpi kinhan, woyaco anpetu yukan, qa nakun wicaśta wayacopi kin; otoiyohi wiyakicionpapi kta.
39Qa niś taku tokeca on winungapi hecinhan, omniciye wicoope kin eciyatanhan un kin he en yacopi kta.
40Anpetu kin de owodutaton kin on wiunwangapi kta naceca; omniciye kin de on etanhan taka unkeyapi kte cin takudan unhapi śni ce, eya.
41Unkan hena hecen eye c̣ehan, hehan omniciye kin hde wicaśi.
Currently Selected:
Olianyanpi kin 19: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
