Olianyanpi kin 2
2
1Anpetu iwikcemna zaptan kin wanna iyehantu, unkan owasin tawacin wanjidan witaya yukanpi.
2Hehan ihnuhanna, tate wan waśagya uye cin he iyecen, oqo wan maḣpiya kin eciyatanhan hiyu, qa tipi ohna yukanpi kin ocowasin ojudan.
3Unkan wicaceji, peta se ececa, en wicatanin, qa otoiyohi kicipamnipi kin en awicahan.
4Unkan owasin Woniya Wakan kin on ojupidan qa wicaceji toktokeca on iapi, Woniya Wakan ie wicakiye cin he iyecen.
5He ehan wicaśta owotanna Juda wicaśta kin hecapi, maḣpiya ihukuya oyate hiyeye cin etanhan Jerusalem en tipi.
6Wicaho kin de otanin, unkan wicota en mniciyapi qa inihanpi, otoiyohi iye iapi tawapi kin on, hena ia yukanpi he nakiḣonpi kin heon.
7Owasin inihanpi qa yuśinyayapi qa otoiyohi hekiciyapi; Tona ia yukanpi kin hena owasin Galile wicaśta kin hecapi śni he.
8Token on otoiyohi iapi kin yuha untonpi kin hena ia nawicunḣonpi he.
9Parthe qa Mede qa Elamite, qa Mesopotamia en tipi qon, Juda makoce kin en, qa Kappadokia en, Pontos qa Asia en;
10Phrugia qa Pamphulia en, Egupta qa Libue makoce kin en, Kurene ihdukśan, Roma oyate kin etanhan, Juda wicaśta, qa en opewicakiyapi qon,
11Krete qa Arabe kin heuncapi, Wakantanka taku tanka econ kin, unkiye unkiapi kin eciyatanhan, hena ia oyakapi kin naunḣonpi ce, eyapi.
12Owasin inihanpi, qa yuśinyayapi, qa otoiyohi hekiciyapi; De taku kapi hwo.
13Qa wanjikśi iḣaḣapi qa; Dena miniśa skuya on imnanpi ce, eyapi.
14Tuka Inyan ake wanjipidan kin om najin, ho yuwankan icu, qa hewicakiya; Juda wicaśta, tona Jerusalem en dukanpi ko, owasin he de sdonyapi, qa mioie kin anagoptan po.
15Niye hecannipi kin hecetu śni, wanna anpetu kin en yamni ape cin hehantu, heon wicaśta kin dena witkopi śni.
16Tuka Joel wicaśta wokcan oyake ciqon he dee.
17Unkan anpetu ihankeya kin en, (Wakantanka eya,) mitaniya kin wicaceḣpi owasin awicawakaśtan kta; unkan nicinkśipi nicunkśipi ko wokcanpi kta, qa kośka nitawapi kin wowanyake kin wanyakapi kta, qa wicaḣinca nitawapi kin wowihamde ihamnanpi kta ce.
18Anpetu kin hena en wicaśta taokiye, qa winyan taokiye mitawa kin, hena en mitaniya awicawakaśtan kta, qa hena e wokcanpi kta.
19Unkan wankan maḣpiya kin ekta taku on yuśinyayapi wicawaqu kta, qa kuya maka kin akan wowapetokeca kin, we qa peta qa śotoju.
20Itancan taanpetu tanka wowinihan kin he hi śni itokam, anpetu wi kin otpaza icu kta, qa hanyetu wi kin iś we icage kta.
21Unkan hehan tuwe Itancan caje kin hoyekiye cinhan he nikiyapi kta ce.
22Israel wicaśta, wicoie kin de naḣon po; Jesus Nazareth etanhan qon, wicaśta wan niyepi kin ekta, Wakantanka hdutanin qon, wicowaśake, taku on inihanpi, qa wowapetokeca niyepi cokaya Wakantanka econ kiye ciqon hena e niye sdonyayapi.
23He qe Wakantanka atayedan wakiconze c̣a, iye osdonye kin eciyatanhan qupi qon, he iyacupi, qa nape śikśica on icipaweḣ oyakatanpi, qa yaktepi.
24Hee Wakantanka ekicetu ye c̣a, wiconṭe icaśke kin kiyuśka, en yuhapi kta okihipica śni nakaeś.
25Dawid he ke c̣a, kaken eya; Ohinniyan mitokam Jehowa wanmdaka, mietapa kin ekta yanke, heon pahoho śni waun kta.
26Heon micante kin iyuśkin, qa miceji kin ipsica; qa miceḣpi kin woape en wanke kta.
27Minagi kin he hades ekta eḣpemayakiye śni, qa Wanji Wakan nitawa kin he wicaḣwin wanyake kta e on yaqu kte śni.
28Wiconi canku kin sdonye mayaye kta; qa niite kin etanhan wowtyuśkin on imnamayaye kta.
29Wicaśta hunka wanjinciyapi, Dawid hunkakeyapi un kin he eciyatanhan taninyan ociciyakapi kta; he ṭe c̣a ḣapi, qa anpetu kin dehanyan ohna hnakapi kin unkicipi wanka.
30He wicaśta wokcan kin heca, qa Wakantanka wokonze on konza, wicaceḣpi eciyatanhan iye tancan aicage kte cin he etanhan Meesiya, iye oiyotanke kin akan iyotanke kta e icaḣye kta he sdonya.
31Hecen tokaheya tanhan he wanyake c̣a Messiya ekicetuyapi kin he cajeyata, nagi kin hades ekta eḣpekiyapi kte śni, qa ceḣpi kin wicaḣwin wanyake kte śni.
32Jesus iye qe Wakantanka ekicetuye cin he unkiyepi owasin unyaotaninpi ece.
33He Wakantanka etapa kin ekta yuwankan icupi, qa Atkuku kin Woniya Wakan iwahoye ciqon he icu, heon nakaha taku wandakapi qa nayaḣonpi kin he akaśtan.
34Dawid e qe maḣpiya ekta wankan iyaye śni, tuka kaken eya; Jehowa Itancan mitawa kin kaken eciya, Mietapa kin eciyatanhan iyotanka wo,
35Tona toka niye cin hena nisiha oahe kin ewahnake kte cin hehanyan.
36Heon etanhan, Israel tiyohnaka owasin, de tanyan sdonya wo, Jesus icipaweḣ oyakatanpi qon, hee Wakantanka Itancan qa Messiya kaga ce.
37He naḣonpi unkan cante kin ekta iyoyakapi, qa Inyan qa yewicaśipi unmapi kin om, Wicaśta hunknwanjin unniyanpi token econkupi kta he, ewicakiyapi.
38Hehan Inyan hewicakiya; Ihduecetu po, qa woaḣtani nicicajujupi kta e on Jesus Messiya caje kin on baptem nic̣upi kta; kinhan Woniya Wakan ituniciḣanpi kin he iyacupi kta.
39Wahoyapi kin de niye nitawapi, qa nicincapi, qa tona itehanyan yukanpi kin owasin, tona Itancan unkita Wakantankapi kin wicakico kte cin hena tawapi ce, eya.
40Qa wicoie tokeca ota on wicakiyatanin, qa wahokonwicakiye c̣a heya; Wicoicage śice cin de etanhan niic̣iya po.
41Unkan tona oie kin iyuśkinyan icupi kin hena baptem wicaqupi; hecen anpetu kin he en wicanagi kektopawinge yamni en opapi.
42Qa yewicaśipi kin taku onspewicakiyapi kin en katinyan opapi ece, qa om taku yuhapi, aguyapi kiyuśpapi qa wocekiye eyapi kin en ece unpi.
43Unkan wicaśta owasin nina yuśinyayapi; unkan yewicaśipi kin taku wakanyan econpi qa wowapetokeca ota econpi ece.
44Unkan tona wicadapi kin hena owasin witaya yukanpi, qa taku owasin ptaya yuhapi.
45Qa tona maga qa woyuha yuhapi kin hena e wiyopekiyapi, qa otoiyohi cinpi kin iyecen owasin wicakipamnipi.
46Qa anpetu otoiyohi, tawacin wanjidan, tipi wakan kin ohna yukanpi, qa tipi iyaza aguyapi kiyuśpapi, wowiyuśkin cante okonwanjidan ko yuha taku yutapi icupi.
47Wakantanka yatanpi, qa oyate kin owasin en wowaśte yuhapi. Unkan Itancan kin tona nipi kte cin heca, anpetu otoiyohi, okodakiciye kin en ope wicakiya.
Currently Selected:
Olianyanpi kin 2: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
