Olianyanpi kin 28
28
1Unkan ekta tanyan iyohipi hehan wita kin he Melite eciynpi e sdonyapi.
2Unkan Ikcewicaśta kin nina taku waśte ecaunkiconpi, cetipi qa otoiyohi en unkicopi, nina magaju qa osni kin heon etanhan.
3Unkan Palos can cikcistina ota pahi, qa peta en aonpa hehan, wamduśkadan wan iyokatapi kin etanhan hiyu, qa Palos nape kin en ikoyag iciya.
4Unkan nape kinen taku ocinśice cin de ikoyake cin he Ikcewicaśta kin wanyakapi qehan, iyakitedan hekiciyapi; Awicakehan wicaśta kin do tin wicakto kin heca, miniwanca kin etanhan ni hiyu eśta, taku owotanna kin he ni ktae iyowinkiye śni ce.
5Tuka wamduśkadan qon nape kin etanhan peta kin en hdatata eḣpeye c̣a tuktedan kiunniye śni.
6Tuka kapo kta, qa iś ihnuhanna na iyaye kta kecinpi. Qa tehan ekta etonwan yukanpi qa tuktedan kiunniye śni un kin wanyakapi, hehan tawacin kin tokeca hinhdapi qa, De taku wakan kin hee ce, eyapi.
7Unkan hen ikiyedan, wita kin ohna wicaśta tokapa, Publios eciyapi kin he makoce onśpa yuha; unkan he tin hiyu unśipi, qa anpetu yamni hehanyan tanyan wo unqupi.
8Unkan Publios atkuku kin wayazanka, tancan kate c̣a we cee iheya. Palos he en i, qa cekiye c̣a, nape on aputake c̣a asniyan.
9Hecen econ, unkan hehan wita kin en tona wowayazan yuhapi kin hena en hipi, qa asni wicayapi.
10Heon etanhan nina unkinihanpi, qa hetanhan unyanpi kte cin, hehan taku uncinpi kin owasin unqupi.
11Unkan wi yamni, hehan wita wata wan Aleksandrea etanhan, he wita kin hen waniyetu wanke cin, he wiyokiyedan yuke cin, Jupiter cekpapi tawa kin hee, unkan he en unkopapi.
12Qa Surakusa ekta unkihunnipi, qa anpetu yamni unyakonpi.
13Unkan hetanhan ohomni unyanpi, qa Regium ekta unhipi. Qa anpetu wanjidan iyohakam, tate itokaga tanhan uya, qa anpetu inonpa hehan Puteoli en unkipi.
14Hen hunkawanjin kiciyapi kin wanjikji iyewicunyanpi, qa anpetu śakowin om unyakonpi kta e cinpi. Hehan Roma ektakiya unyanpi.
15Unkan heciyatanhan hunkawanjin kiciyapi kin unkiyepi eciya anhan naḣonpi, qa itkounkipapi au, Appiiphorum qa Owote tipi yamni kin henanyan. Hena Palos wanwicayaka, unkan Wakantanka wopida eciye c̣a wakiśag iciya.
16Unkan Roma ekta unkipi, hehan akicita tancan qon wicakaśke cin hena wicaśtayatapi taakicita tancan kin qu, tuka Palos akicita wanjidan awanyag un kin he kiciśnana yanke kta e iyowinkiyapi.
17Unkan anpetu yamni iyohakam, Palos Juda wicaśta tokapapi kin wicakico. Qa en mniciyapi hehan hewicakiyo, Wicaśta hunkawanjinciyapi, atewicunyanpi oyate qa wicoḣan kin en taku śica takudan ecamon śni eśta, Jerusalem ekta makaśkapi ecen Roma oyate napepi kin en iyemayanpi.
18Hena iś wimawangapi qehan makiyuśkapi kta, miye en taku on maṭe kte cin takudan iyeyapi śni.
19Tuka Juda wicaśta kin nina teḣindapi kin heon, Kesar caje mdate kta iyececa wadaka, mitaoyate kin taku iyawicawaonpe kte cin takudan mduhe śni tuka qon.
20Heon etanhan nakaka cicopi, wanciyakapi qa wociciyakapi kta, Israel oyate awacinpi kin he on maza icicaḣiḣa kin de on makaśkapi ce, eya.
21Hehan iś eya heciyapi, Juda makoce kin etanhan niye on wowapi unkahipi śni, qa hunkawanjin kiciyapi heciyatanhan hipi kin tuwedan taku śica iyanionpe c̣a oyake śni.
22Tuka niś token nitawacin kin naunniḣonpi kta uncinpi, yuomdecapi kin de owancaya yaśicapi e sdonunyanpi ce.
23Unkan anpetu wan cajeyatapi kin he en wicota Palos yanke cin en hipi; unkan iś Wakantanka tokiconze kin yaotanin, qa onspewicakiye c̣a, Moses teope kin wicaśta wokcan ko, etanhan Jesus on wahokonwicakiya, anpao kin etanhan otpaze cin hehanyan.
24Unkan hunḣ taku oyakapi kin wicadapi, qa hunḣ iś wicadapi śni.
25Unkan okonwanjidan awakicinpi śni kin, hehan kihdapi, Palos wicoie wanjidan oyake cin iyohakam; Woniya Wakan kin Isaya wicaśta wokcan kin en, hunkake wicunyanpi kin tanyan wowicakiyaka;
26Qa heya, Oyate kin de ekta wicai, qa heya wo; Wanaḣonpi kin on nayaḣonpi kta tuka oyakaḣnigapi kte śni, qa wawanyakapi kin on wandakapi kta tuka widukcanpi kte śni:
27Oyate kin de cantepi kin cepa aye c̣a nogepi kin on kitan se wanaḣonpi, qa iśtapi kin ohmus icupi; iśta kin on wawanyakapi kte śni, qa noge kin on wanaḣonpi kte śni, qa cante kin on okaḣnigapi kte śni, qa ihduecetupi kte śni, qa miś okizi wicawaye kte śni heon etanhan.
28Hecen on he sdonya po, Wakantanka wiconi tawa kin Ikcewicaśta kin wicaqupi, unkan hena iś naḣonpi kta ce.
29Hena hecen eya, unkan Juda wicaśta kin kihdapi, qa nina hdokinicapi.
30Unkan Palos waniyetu nom tipi iyunwin ton odote cin he ohna yanke c̣a, tona en hipi kin owasin tin u wicaśi.
31Wakantanka tokiconze kin yaotanin, qa Jesus Messiya Itancan taku tawa kin wuditagya oyaka ece, tuwedan teḣinda śni.
Currently Selected:
Olianyanpi kin 28: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
