Luke 19

Jesus E Na Zacchaeus

1Jesus oṫuƞwahe waƞ Jericho eyapi ċa ohaƞ iyaye, 2hetu ċa wiċaṡa waƞ Zacchaeus ec̄iyapi ċa ti. Woyuha wokaiju pahi uƞ igluwijic̄a. 3-4Zacchaeus wiċaṡa ptec̄ela ċa wiċaṡa uƞma ki iwiċiwaƞkab waƞyaƞka okihi ṡni, Jesus yaƞke etkiya hiyaye ċa waƞyaƞka ċiƞ na wiċiṫokabya iƞyaƞg iyayiƞ na ċaƞ ṫaƞka waƞ oskab iyotake. 5Jesus el ihuƞni na waƞkal etuƞwe na hekiye, “Zacchaeus, inaḣni na hukuta glic̄u wo! Aƞpetu ki le yati el wauƞ ktelo,” eye.

6Zacchaeus inaḣniya hukul glic̄u na Jesus yuonihaƞ. 7Tuwe ki iyuha le waeċuƞ ki waƞyaƞkapi na iyokipipi ṡni, “Wiċaṡa waƞ Jesus kiċi wotiƞ kte ki le waḣtani sʹa heċa yelo,” eyapi.

8Iyohakab Zacchaeus inajiƞ na heye, “Iṫaċaƞ, taku bluha ki okise uƞṡike ki wiċawakʹu kte na taku ḣmiya oyate ki wiċawaki hena topakigleya hektakiya wiċaweċu ktelo,” eye.

9Jesus Zacchaeus hekiye, “Aƞpetu ki le tiwahe niṫawa ob wanikiya iyac̄upelo, eċiƞ Abraham wiċoiċaġe ki he niwaƞji. 10Wiċaṡa-Ċiƞkṡitku ki tuwe onuniyata uƞpi kʹuƞ hena niwiċakiyiƞ kta uƞ hi yelo,” eye.

Wowaṡi Wikc̄emnapi

11Yuƞk̇aƞ etaƞ Jesus waeye ki he naḣʹuƞpi hena wana Jerusalem ikiyela yapi na ota Wak̇aƞṫaƞka ṫawokiċuƞze ki he wana kiyela ihe keċiƞpi. 12Ċa Jesus wiyaċiƞpi ki le owiċakiyake, “Iṫaċaƞ waƞ mak̇a ṫehaƞtu ċa ekta iyaye, heċiya wiċaṡa-yataƞpi kaġapi kte na ake ku ktelo. 13Iyaye ṡnihaƞni, wowaṡi wikc̄emna wiċakiċo na iyohila mazaska eya wiċakʹu. Na leċel owiċakiyake, ‘Mazaska ki le ilagyapo. Heċetu kihaƞ tohaƞl wagli kihaƞ luotapi ktelo,’ eye. 14Eyaṡ ṫaoyate ki waḣtelapiṡni na wahoṡiya eya mak̇a ṫehaƞl heċiya iyayewiċayapi na wooyake ki le oyag wiċaṡi, ‘Wiċaṡa ki le wiċaṡa-yataƞpi uƞċiƞpi ṡni yelo.’

15“Iṫaċaƞ ki wiċaṡa-yataƞpi kaġapi ohakabya gli na wowaṡi waƞ hena wiċakiċo. Mazaska eya wiċakʹu waƞ hena tona akaġapi ki he iwiċayuƞġe. 16Wowaṡi ṫokahe ki he hi na yuonihaƞ hekiye, ‘Mazaska eya mayakʹu waƞ he wikc̄emnakigle bluota yelo,’ eye. 17Wiċaṡa-yataƞpi ki iyokipi na ṫawowaṡi ki hekiye, ‘Lila taƞyaƞ waeċanu welo,’ eye. ‘Woyuha awaƞyaƞgniċiyapi ki he c̄ikʹala eyaṡ taƞyaƞ awaƞyaƞlaka ċa oṫuƞwahe wikc̄emna oiniṫaċaƞ ktelo.’ 18Wowaṡi ic̄inupa he iƞṡ-eya hi na yuonihaƞya hekiye, ‘Mazaska eya mayakʹu waƞ hena zaptaƞkigle bluota yelo,’ eye. 19Wiċaṡa-yataƞpi ki hekiye, ‘Oṫuƞwahe zaptaƞ oiniṫaċaƞ ktelo,’ eye. 20Ake wowaṡi eċuƞ he waƞji hi na yuonihaƞ hekiye, ‘Mazaska eya mayakʹu waƞ hena wauƞbla waċiƞ ṡni na mazaska ki oṗaweḣtiƞ na naweḣme. 21Eċiƞ wiċaṡa ki sutaya owiċayakuwa ki he slolwaye. Taku oyaju ṡni na taku niṫawa ṡni hena iyac̄u na luha oyakihi ki he slolwayiƞ na k̇oċikiṗelo,’ eye. 22Wiċaṡa-yataƞpi ki wowaṡi ki hekiye, ‘Takuni iniwaṡte ṡni yelo!’ hekiye. ‘Taku ehe ki le uƞ wanigluṡic̄e yelo. Wiċaṡa tomaketu ki slolyaye, taku miṫawa ṡni na owaju ṡni kʹeyaṡ iwac̄u na ṫawamicʹiye. 23Lena iyuha slolyaye eyaṡ eċel eċanu ṡni, ec̄oḣc̄i mazaska ognake tipi el eyagnake ki igluota okihi tk̇a yelo,’ eye. 24Hehaƞl wowaṡi eya hel najiƞpi hena hewiċakiye, ‘Mazaska ki hena kipi na waƞji mazaska wikc̄emnakigle akaġa waƞ he kʹupo,’ eye. 25Eyaṡ yuonihaƞya leyapi, ‘Waƞ le wiċaṡa ki iyeṡ ehaƞtaƞ wikc̄emna yuha yelo!’ eyapi. 26Yuƞk̇aƞ wiċaṡa Iṫaċaƞ ki leċel awiċayupte, ‘Tuwe wowaṡi ṫawa ki he taƞyaƞ eċuƞ haƞtaƞṡ yuonihaƞpi kte na taku ota isamya waṡte ċa awaƞyaƞgkiyapi kte. Eyaṡ etaƞ wowaṡi taƞyaƞ eċuƞpi ṡni waƞ hena iƞṡ takuni yuhapi kte ṡni. 27Tuk̇a etaƞ ṫokamayapi na Iṫaċaƞ maċiƞpi ṡni waƞ hena miṫokabya wiċaktepi ktelo,’ eye.”

Jesus Jerusalem Timahel Hiyu

28Jesus leċel eyiƞ na wiċiṫokabya Jerusalem etkiya iyaye. 29Bethphage oṫuƞwahe na Bethany oṫuƞwahe ikiyela ihuƞnipi. Paha waƞ Wigli K̇aƞta eya iċajeyatapi el ihuƞni hehaƞ ihakab-uƞpi ki etaƞhaƞ num kaiṫokab iyayewiċaye. 30Jesus leye, “Wiċoti el iyahuƞnipi ki hel ṡuƞṡuƞla makic̄ima waƞ kaṡka najiƞ kte. Tuweni nahaƞḣc̄i akaƞyaƞke ṡni ċa, ho, he kiyuṡkapi na leċi aupo. 31Ho na tuwa winiyuƞġapi haƞtaƞṡ leċel aluptapi kte, ‘Iṫaċaƞ ki ilagyiƞ ktelo,’ eyapo.”

32Ċa ṡuƞṡuƞla ki iyeyapi, Jesus eye ki aiyeċel. 33Ho ċa ṡuƞṡuƞla ki wana kiyuṡkapi hehaƞ ṫawa ki heye, “He! Takuwe he yakiyuṡkab hwo?”

34Ċa leċel ayuptapi, “Iṫaċaƞ ki ilagyiƞ ktelo,” eyapi. 35Ho ċa ṡuƞṡuƞla ki Jesus kahipi. Ho na ṡina uƞ ṡuƞṡuƞla ki akaḣpapi nahaƞ akaƞ Jesus iyotagkiyapi. 36Ye ki kaiṫokabya ogle eya makikc̄eya iḣpekiyapelo.

37Wigli K̇aƞta Paha eyapi ċa kaiyoḣpeya iyaye hehaƞ wana Jerusalem oṫuƞwahe hel kiyela ihuƞni, yuƞk̇aƞ oyate eya ihakab-uƞpi ki Wak̇aƞṫaƞka yaonihaƞpi, takuku waṡte waeċuƞ ki hena waƞyaƞkapi heuƞ. 38Wiċaṡa-yataƞpi waƞ u ki le Wak̇aƞṫaƞka ṫawokiċuƞze akic̄iu ċa gluonihaƞ kte. Heuƞ ċa oyate ki Wak̇aƞṫaƞka ogna taƞyaƞ waḣwayela uƞpi kte. Wak̇aƞṫaƞka ihaƞkeya yuonihaƞpi.

39Eyaṡ owiċota etaƞhaƞ Pharisees eya Jesus hekiyapi, “Wauƞspekiya, nihakab-uƞpi ki waeyapi ki iyowiƞwiċakiye ṡni yo!” eyapi.

40Eyaṡ Jesus leċel awiċayupte, “Le oċic̄iyakapi kte, lena inila uƞpi haƞtaƞṡ iƞyaƞ ki e kʹeyaṡ ṡʹayahaƞpi ktelo.”

Jesus Jerusalem oṫuƞwahe Ṫaƞtaƞhaƞ Iṡtamniyaƞpi Kpapsuƞ

41Jesus Jerusalem Oṫuƞwahe ikiyela ihuƞni na waƞyaƞka hehaƞ iṡtamniyaƞpi kpapsuƞ 42na heye, “Le aƞpetu ki tokeṡke taƞyaƞ yauƞpi kte ki ayakiblezapi ṡni na wic̄amayalapi ṡni ċa onuniyata yauƞpelo. 43Ṫokata ṫoka waḣtenilapiṡni waƞ hena niohomni mak̇a na iƞyaƞ uƞ aċuƞkaṡkaniyuzapi ktelo. 44Oṫuƞwahe ki taƞyela nic̄ajujupi kte na niṫaoyate ki niċiƞc̄api ki oġeya nic̄asotapi ktelo. Wak̇aƞṫaƞka taƞyaƞ uƞniċiyapi ċiƞ eyaṡ Wanikiye ki wic̄ayalapi ṡni heuƞ oteḣike ki lena waƞlakapi ktelo.”

Jesus Tipi-Wak̇aƞ Ekta I

45Yuƞk̇aƞ, Jerusalem lel Jesus hi na Tipi-Wak̇aƞ ki timahel i. Hel huƞḣ wawiyoṗekiyapi waƞ hena kaṫaƞkal iyewiċaye 46na hewiċakiye, “Wak̇aƞṫaƞka ṫaoiye ki Wowapi-Wak̇aƞ el leċel owa yaƞke: Tipi-Wak̇aƞ ki lel waċeyakiyapi kta ṡk̇a wamanu-wiċaṡa oti yakaġapelo,” eye.

47Aƞpetu iyohila Jesus Tipi-Wak̇aƞ lel wauƞspewiċakiye. Yuƞk̇aƞ, waċekiye-wiċaṡa-oiṫaċaƞpi ki na Moses-ṫawooṗe-awaƞyaƞkapi ki hena Jesus ktepi kte ċiƞpi. 48Ho eyaṡ tuktognani okihipi ṡni, oyate ki lila Jesus oiye naḣʹuƞpi ċa.

Currently Selected:

Luke 19: LKTNT20

Highlight

Copy