Luke 21

Wiwazic̄a Ki Wakicʹuƞ

1Kiyela etuƞwaƞ yuƞk̇aƞ wijic̄a ki Tipi-Wak̇aƞ el mazaska ognake mahel woṡnapi. 2Yuƞk̇aƞ wiwazic̄a uƞṡika waƞ mazaṡa num oiḣpekiya ċa waƞyaƞke. 3Ċa Jesus leye, “Le oċic̄iyakapi kte, wiƞyaƞ uƞṡike le ihaƞkeya wakicʹuƞ welo. 4Wijic̄a ki waota yuhapi ċa okablaya wakicʹuƞpi eyaṡ iye uƞṡike na wakicʹuƞ ki heċeglaḣc̄i yuha yelo.”

Jesus Tipi-Wak̇aƞ ki Okajujupi Kte ki Iwoglake

5Oyate eya iḣʹe waṡteṡte eya uƞ Tipi-Wak̇aƞ ki kaġapi ki iwaƞyaƞkapi na huƞḣ iƞṡ takuku owaƞyaƞgwaṡte hena iṫuƞṗapi. Eyaṡ Jesus heye, 6“Aƞpetu waƞji el, taku lel waƞlakapi ki hena ṫoka ki taƞyela okajujupi ktelo.”

Oteḣikiƞ Kte Na Nakuƞ Teḣiya Kiċiċuwapi Kte

7Ċa hehaƞl iyuƞġapi, “Wauƞspekiya, le tohaƞtu kte ki tokeṡke sloluƞyapi kta hwo?” eyapi.

8Ċa Jesus leċel awiċayupte, “Waktapo, huƞḣ nignayaƞ waċiƞpi ktelo. Takuwe leṗe ki le, ṫokata enagnakiya oyate eya miye keyapi kte. ‘Messiah ki miye,’ eya upi ktelo. Naiƞṡ leyapi kte, ‘Wiċouƞ waƞ sloluƞyapi ki he wanic̄iƞ kte ki wana kiyela,’ eyapi. Eyaṡ, wic̄ak̇e wic̄alapi ṡni yo. Nignayaƞ waċiƞpi ktelo. 9Oyate ki kiċizapi nayaḣʹuƞpi ktelo. K̇o iye enagna kiċizapi nayaḣʹuƞpi ktelo. Eyaṡ wiċouƞ wanic̄e ki uƞkihuƞnipi keċiƞpi ṡni yo. Okiċize lena yuk̇iƞ kte eyaṡ hena wiċouƞ wanic̄e ki nahaƞḣc̄i uƞkihuƞnipi ṡni yelo.”

10Na isam Jesus heye, “Ċa oyate ki enagna kiċizapi ktelo. 11Mak̇aṡkaƞṡkaƞ kte na okṡaƞ oyate ki oteḣi waƞyaƞkapi ktelo. Wiċohaƞ wiċokuje ṡikṡic̄a ṡʹagya iyayiƞ kte na akiḣʹaƞtʹapi ktelo. Na maḣpiyata takuku wok̇okṗeka waƞyaƞkapi ktelo. 12Eyaṡ le iṫokabya, miṫaƞtaƞhaƞ nic̄aṡkapi na niyuċeyapi ktelo. Omnic̄iye-tipi itimahel oiṫaċaƞ wiċiṫokab niyasupi ktelo. 13Ho walehaƞl wic̄amayalapi ki he oyaglakapi ki waṡte ktelo. 14Lehiƞtagna ikaġiicʹiyapi ṡni yo, tokeṡke nanicʹijiƞpi kte ki. 15Taku ehapi kte ki he iyeċetuya woksape ki ċicʹupi kte. Aniḣniyaƞpi waƞ hena waƞjini ananipta okihipi kte ṡni yelo. 16Nitiwahe ki e kʹeyaṡ huƞḣ igluhomnipi na niyaṡic̄api kte. Aniḣniyaƞpi ki hena oniyuspapi na huƞḣ niktepi ktelo. 17Miṫaƞtaƞhaƞ uƞ oyate ki waḣtenilapi kte ṡni. 18Eyaṡ iċaƞteṡic̄api ṡni yo. 19Wic̄amayalapi ki ogna oihaƞke wanilya niyauƞpi ktelo.

Jesus Jerusalem Oṫuƞwahe Ihaƞgyapi Ki Oyake

20Akiċita ki Jerusalem oṫuƞwahe ki paokiyuṫapi waƞlakapi haƞtaƞṡ eċani oyate ki wiċakasotapi kte na oṫuƞwahe ki ihaƞgyapi kte ki kiyela yelo. 21Judah mak̇oċe el yauƞpi haƞtaƞṡ, manitakiya naṗapo. Oṫuƞwahe itimahel yauƞpi haƞtaƞṡ, ḣeyab iyayapo na ehaƞtaƞ manil yauƞpi haƞtaƞṡ, oṫuƞwahe iḣeyab eċuƞpo. 22Ċiƞ oteḣi waƞ Wowapi-Wak̇aƞ el owa yaƞke ki eċa waƞlakapi ktelo. 23Wiƞyaƞ igluṡʹake ki na hokṡi-aziƞkiyapi hena e kʹeyaṡ lila oteḣi slolyapi kte. Tuktetu kʹeyaṡ, oyate ki tohaƞyaƞ okihika kakijapi ktelo. 24Ṫoka oyate ki hena Jew oyate ota wiċaktepi na ota iƞṡ mak̇a ṫehaƞ wayaka awiċakiyaglapi ktelo. Oyate eya Jerusalem oṫuƞwahe na Israel Mak̇oċe el uƞpi ki, lila ṫehaƞ teḣiya uƞwiċakiyapi ktelo, tohaƞyaƞ Wak̇aƞṫaƞka Jew oyatepi ṡni ki iyowiƞwiċakiya haƞtaƞṡ.

Wiċaṡa-Ċiƞkṡitku ki Ake Ṫaƞiƞicʹiye

25Jesus ake heye, “Taku lila oteḣika ċa wi na haƞwi na wiċaḣpi ekta oṫaƞiƞ ktelo. Mak̇asitomniya, oyate ki k̇oṗeglapi na ikaġipi kte na oicʹuƞnic̄api kte. Mniowaƞc̄a ki takuni naḣʹuƞ pic̄aṡniya ḣmuya hiƞ ktelo. 26Mak̇a akaƞ takuku ṡikṡic̄a u ċa hena Oyate ki iṫaƞsagtʹapi heuƞ huƞḣ sniyela-tʹapi ktelo. Wak̇aƞṫaƞka maḣpiya ki e kʹeyaṡ nahuƞhuƞskiyiƞ ktelo. 27Na hehaƞl, Wiċaṡa-Ċiƞkṡitku ki miyeċa maḣpiya ohaƞ iyojaƞjaƞya wau ktelo. Na wowaṡʹake miṫawa ki waƞlakapi ktelo. 28Taku ki lena waƞlakapi haƞtaƞṡ blihelicʹiyapi na taku waṡte u kte ki hena awaċiƞpo, Wak̇aƞṫaƞka wiċoni yuhaniċiyapi kte ki he,” Jesus leye.

Ṫamnioḣpi Ċaƞ Ṫaƞtaƞhaƞ Wiċoyake

29Na Jesus ṫawauƞspewiċakiye ki waableswiċakiya ċiƞ na leċel owiċakiyake, “Ṫamnioḣpi ċaƞ na taku ċaƞ keyaṡ leċetu ċa slolyayapi. 30Tohaƞl waḣpe leċala hinaṗa haƞtaƞṡ, eċani bloketu kte ki tuwe ki iyuha slolye. 31Iyeċeḣc̄i, taku ṡic̄a waƞlakapi haƞtaƞṡ, iyeċani Wak̇aƞṫaƞka oyate ki kiċaƞwiċayiƞ kte ki u welo.

32“Le oċic̄iyakapi kte: Oyate ki lena leċetu kte ki heċena huƞḣ niuƞpi ktelo. 33Waeṗe ki lena tohaƞtaƞ ki wowic̄ak̇e heċa ktelo,” eye.

Wakta Uƞpi Kte

34Na Jesus ṫawauƞspewiċakiyapi ki nakuƞ leċel owiċakiyake, “Wak̇aƞṫaƞka etkiya taƞyaƞ wiyukc̄aƞpo na taku wilukc̄aƞpi ki niyuṡic̄api kte ki waktapo. Itomniicʹiyapi na ṡic̄aya waeċuƞpi ṡni yo. Na waluhapi kte ki ec̄ela ikaġiicʹiyapi ṡni yo. Heċanupi ki aƞpetu waƞji el waku ki wamayaktapi kte ṡni yelo. 35Takuwe leṗe ki he waku ki, tuwe ki iyuha iwaṡte kte naiƞṡ iṡic̄iƞ kte. 36Ċa ohiƞniyaƞ wakta uƞpo. Wak̇aƞṫaƞka ċekiyapo, heċel oteḣi waƞ u ki taƞyaƞ yakpaptapi ktelo. Ċa Wak̇aƞṫaƞka ċekiyapo, miṫokab yahinajiƞpi ki takuni iyakiṡtec̄api kte ṡni yelo.”

37Aƞpetu iyohila, Jesus Tipi-Wak̇aƞ el wauƞspewiċakiye na haƞhepi ċaƞ Wigli K̇aƞta Paha eyapi ċa ekta iyuƞke. 38Ho na aƞpo eċuƞhaƞ oyate eya Jesus anaġoptaƞhaƞpi waƞ hena Tipi-Wak̇aƞ ekta ake naḣʹuƞpi kta ċa ihuƞnipelo.

Currently Selected:

Luke 21: LKTNT20

Highlight

Copy