Mark 15

Jesus Pilate Iṫokab Inajiƞ

(Matthew 27.1, 2, 11-14; Luke 23.1-5; John 18.28-38)

1Hihaƞnaḣċi waċekiye-wiċaṡa-iṫaƞċaƞ ki, kʹaƞ ki epi, an wooṗe ogna wauƞspewiċakiye ki epi, na omniċiye ki ataya, ob inaḣni mniċiyapi, tokeṡke eċuƞpi kte ki he iwoglapkapi. Jesus maza ik̇aƞyaƞpi, na eyayapi na Pilate ekta aipi. 2Ho, hel Pilate ki Jesus wiyuƞġe, “Jew oyatepi ki el iniṫaƞċaƞ hwo?” ekiye.

Jesus ayupte, “Ċa, he leyelo.”

3Waċekiye wiċaṡa iṫaƞċaƞ ki Jesus lila ṡikṡikċaya wiyauƞpapi. 4Ho ċa, ake Pilate Jesus wiyuƞġe, “Lena aluptiƞ kta hwo? Winiyauƞpapi ki hena nakiḣʹuƞ wo!”

5Ake Jesus ayupta ċiƞ ṡni, ċa Pilate lila inihaƞ.

Pilate Wana Jesus Tʹiƞ Kta Yasu

(Matthew 27.15-26; Luke 23.13-25; John 18.39—19.16)

6Tohaƞl wokiksuye woeċuƞ ki hel ṡna Pilate tuwe keeyaṡ wiċayuske oyate ki ċiƞpi ehaƞtaƞṡ. 7Hehaƞ wiċaṡa waƞ Barabbas eċiyapi, ċa hel tona wawihaƞgyapi, ċa hena ob kaṡka yaƞke. Huƞḣ tiwiċaktepi. 8Wana wiċota el ahi, na hena ake takuƞl Pilate iyuƞġapi ki eċel eċawiċakiċiyuƞ kta ċa ahi. 9Pilate iwiċayuƞġe, “Ho, le Jew iṫaƞċaƞ ki bluṡkiƞ kta hwo? 10Pilate ehaƞni slolye, le Jesus takuwe ahipi ki, hena wok̇ipajiƞ yuhapi ki uƞ.

11Eyaṡ, waċekiye wiċaṡa itaƞċaƞ ki, wiċotapi ki lila wiċakihowyapi. Eyaṡ iyeṡ ṫo Barabbas eċa yuṡkiƞ kte. 12Ho ċa, ake Pilate wowiċakiyake, “Le wiċaṡa waƞ Jew iṫaċaƞ ki le tokeṡke eċamu kta hwo?”

13“Ċaƞiċipaweġe el otkeyapi kte!” eya ayuptapi.

14“Eyaṡ, taku ṡiċaya eċuƞ hwo?” eya Pilate iwiċayuƞġe.

Eyaṡ heċena hoṫaƞka heyapi, “Ċaƞiċipaweġe el otkeyapi kte!”

15Pilate ċaƞte waṡtewiċaya ċiƞ ċa Barabbas kiyuṡke, na hehaƞl, Jesus kasaksakwiċakiye, na ċaƞiċipaweġa el otkeyapi kta ċa wiċakʹu.

Le Akiċita Ki Jesus Iḣaḣakowapi

(Matthew 27.27-31; John 19.2, 3)

16Akiċita ki Jesus iċupi na ateya iṫaƞċaƞ ki el aipi, uƞma ki iyuha el wiċayuwitayapi. 17Ho, hel ċaƞ waṗeṗe eya iċupi na Jesus nata el okṡaƞ egnakapi na, ogle ṫoṡa waƞ iƞk̇iyapi he ċuƞwiƞyapehe sʹeleċeċa ċa iƞk̇iyapi. 18Ho na, iyuha akiċita kiyuwitapi, na hekiyapi, “Jew iṫaƞċaƞ ki le oihaƞke ṡni ni uƞ kte.” 19Ċaƞ waƞ nata ki akaƞl aṗapi, na aṫaṡoṡapi, na iṫokab ċaƞṡkeṗamagle inajiƞpi. 20Iḣaḣapi ki he igluṡtaƞpi, na ogle ṫoṡa ṫawa ki kicʹuƞkiyapi, na hehaƞl yuha iyayapi, he wana ċaƞiċipaweġe akaƞl otkeyapi kta ċa.

Akiċita Ki Wana Jesus Otkeyapi Kte

(Matthew 27.32-44; Luke 23.26-43; John 19.17-27)

21Jesus eyapi ki iċuƞhaƞ wiċaṡa waƞ Simon eċiyapi ċa mak̇oskaƞl taƞhan hi, ċa he Jesus okiyekiyapi, ċaƞiċipaweġa ki kiċiyuhakiyapi. (Alexander, na Rufus ki lenauƞs Simon ateyapi, lena oṫuƞwahe waƞ Cyrene eċiyapi ċa hetaƞhaƞpi.) 22Golgatha eċiyapi, ċa heċi wana Jesus aipi, he “wiċaṗa ṡeċa paha” etu. 23Hel mniṡa eya ṗejuta ṡiċa iċahiyapi, na kʹupi kte eyaṡ Jesus yatkaƞ ċiƞ ṡni. 24Ho na, wana Jesus ċaƞiċipaweġa ki el okataƞpi, na otkeyapi. Ṫahayapi ki kiyuksaksa iċupi, k̇aƞsu ṡkatapi na tuwa ohiye ki he mniḣuha ki haƞke ċiƞ ki he iċu kte. 25Ho, he mazaṡkaƞṡkaƞ napċiyuƞka, hihaƞna ehaƞl ċaƞiċipaweġa ki el otkeyapi. 26Jesus taku ṡiċaya eċuƞ ki hena leċuƞsʹe owapi, “Le Jew oyate el Iṫaƞċaƞ.” 27Nakuƞ, wamanu-wiċaṡa num Jesus iṫaƞnuk otkewiċayapi, uƞma iṡlayataƞhaƞ, na uƞma ki iƞṡ iċatkayataƞhaƞ ki le aik̇oyagyapi. #15.27: Some manuscripts add verse 28: Heċel, wowapi el wowapi ki hena wowiċak̇e, na le heċel k̇api, “Wamanu wiċaṡa eya tʹapi kte ki he iyeċel iƞṡ-eyaƞ Jesus tʹiƞ kte.” (see Lk 22.37).

29Oyate ki isakib iyayapi na ṗomnamnapi, na taku ṡiċe ki iyuha ekiyapi, “Nahan le tipi wak̇aƞ waƞ lujuju, na aƞpetu yamni ṡnihaƞni ake pawoslal iyeyayiƞ kte kehe seċe kʹuƞ. 30Wana kul gluċu wo, na niicʹiya yo,” ekiyapi.

31Waċekiye-wiċaṡa-iṫaƞċaƞ Jesus iḣaḣapi he iyeċel iƞṡeyaƞ Wooṗe ogna wauƞspewiċakiye heċuƞpi, na okiċiyakapi, na heyapi, “Ota niwiċaye, eyaṡ niicʹiya okihi ṡni! 32Wanikiye ki he wauƞyaƞkapi uƞċiƞpelo, Israel el wiċaṡa-yatapi ki he. Ċaƞiċipaweġe ki etaƞ gliċu wo, heċel he wiċauƞlapi ktelo.”

Nakuƞ, wamanu-wiċaṡa num otkapi hena k̇o iwiċaḣaḣapi.

Le Jesus Wana Ktepi

(Matthew 27.45-56; Luke 23.44-49; John 19.28-30)

33Wiċokaƞhiyaye ki walehaƞya mak̇a ki ataya oiyokpaze, na he owaṗe yamni waheċelya heċeċa. 34Mazaṡkaṡkaƞ yamni ki walehaƞya, Jesus hoṫaƞka hoṫaƞiƞ, na heye, “Ate! Ate! Takuwe amayaluṡtaƞ hwo?”

35Oyate huƞḣ hel najiƞpi ċa taku eye ki he naḣʹuƞpi, leyapi, “Anagoptaƞpo, Elijah kiċo welo.” 36Ho ċa, waƞji iyaye, na ċaƞ waƞ mniḣuha aiyakaṡke, na mniṡa ṡiċa el oputkaƞ, na Jesus i el epaṫaƞ, na hekiye, “Hiƞyaƞkapo, iṫo Elijah u, na hetaƞ yuḣpeka.”

37Jesus hoṫaƞka taku eyiƞ na ehaƞl tʹe.

38Tipi-Wak̇aƞ el tima mniḣuha waƞ ċokaƞyaƞ naḣleċe. 39Akiċita iṫaƞċaƞ waƞ ċaƞiċipaweġe ki iyoḣlate waƞyaƞka najiƞ yuƞk̇aƞ he heye, “Aweċak̇eya wiċaṡa ki le Wak̇aƞṫaƞka Ċiƞhiƞtku welo.”

40Hel kaiyuzeya wiƞyaƞ eya waƞyaƞg najiƞpi. Najiƞpi ki hel waƞji Mary Magdalene heċiyapi ċa oṗa, he ċiƞċa ki Joseph, e na Salome, e na hakakta waƞ James eċiyapi, ċa hena Mary ki ċiƞċa. 41Galilee el Jesus uƞ ċa hehaƞ wiƞyaƞ ki lehaƞ ihakab uƞpi, lila okiyapi. Nakuƞ wiƞyaƞ eya Jerusalem taƞhaƞ ob Jesus hi, ċa hena nakuƞ el uƞpi.

Le Jesus Ṫaċaƞ Ki Eyupaƞpi

(Matthew 27.57-61; Luke 23.50-56; John 19.38-42)

42-43Ḣtayetu ktehaƞl Arimathea eċiyataƞ Joseph eċiyapi ki he hi. He omniċiye el wiċaṡa waƞkatuya glawapi. Iƞṡ-eyaƞ he maḣpiya wokikiċuƞze ki ape uƞ he. (Aƞpetu Wak̇aƞ kta, ċa igluwiƞyeyapi.) Ho ċa, Joseph ki le wak̇okiṗe ṡni yiƞ na Pilate iyuƞġe, Jesus ṫaċaƞ ki he iċu okihi heċi iyuƞġe. 44Yuƞk̇aƞ, Pilate Jesus tʹe ki heuƞ lila inihaƞ. Akiċita iṫaƞċaƞ ki kiċo, na Jesus wana tʹa heċi iyuƞġe. Leċala, naiƞṡ ehaƞni. 45Akiċita ki Pilate okiyake ki heuƞ Joseph Jesus ṫaċaƞ ki he iċu kta woiyuwiƞkiye kʹu. 46Joseph iyayiƞ na mniḣuha ska waƞ ṫaƞka oṗeṫuƞ, na heuƞ Jesus opemni, na waƞċak oḣloka waƞ iye kaġa, ċa hel tima euƞpe, na iƞyaƞ waƞ lila ṫaƞka, ċa tiyopa el kuṡeya pagmiyaƞ egnake. Oḣloka ki he ataya iƞyaƞ suta ki heċa. 47Mary Magdalene, e na Joses huƞku waƞ Mary eċiyapi, ċa hena tuktel Jesus euƞpapi slolyapi. Hena waƞyaƞk najiƞhaƞpi ki uƞ.

Currently Selected:

Mark 15: LKTNT20

Highlight

Copy