Ŋitic. 3
3
Kitaŋaleunoe ekile ŋolo aŋwalit
1Apeikoloŋit, toloto Petero ka Yoana Kai ka Akuj ŋisaae ŋikanikaomwon ŋulu ka apaaran ŋulu elipeneneere. 2Ayai lopuke ŋolo anyaritae “Epuke ŋolo Ebusan” ŋolo ka Akai ka Akuj, ekile ŋolo aŋwalit ŋinapei anakidounet. A ŋinakoloŋit, adakanaryo iŋes lopuke ŋol akilipanar ŋainakineta alotuŋa a ŋulu alomanarete Kai ka Akuj. 3Ani iŋolikini iŋes Petero ka Yoana eapikinit alomar Kai ka Akuj, kiŋit iŋes ikes daŋ ainakinet. 4Kitekis Petero ka Yoana iŋes, tolimu Petero tema, “Kiŋolikinae isua!” 5Kitek nai iŋes ikes ebala kori eyai idiobore aryamuni aneni kec. 6Nai tolimok Petero iŋes tema, “Emam ŋisiliŋa ayakar ayoŋ, nai akainakini ayoŋ iyoŋ ibore ŋini ayakar; alokiro a Yesu Kristo a ŋolo a Nasaret, abala ayoŋ iyoŋ, torotok!” 7Kikamu Petero iŋes akan ŋina aloteten, kitonyou, towo. Togogoŋioto atipei ŋakejen ka ŋitobolae keŋ; 8toporu iŋes kidiama towo, ido torotok tolomasi ka ikes Kai ka Akuj, epori ka ipuro Akuj. 9Kiŋolikis ŋituŋa daadaŋ ŋulu aya nen iŋes elosi ka ipuro Akuj. 10Ani eyenunete ikes atemar erae iŋes ekile ŋolo sek elipanar “Alopuke a ŋolo Ebusan” a ŋolo ka Akai ka Akuj, tobul ikes daadaŋ, toumokis a ŋakiro a ŋuna kepotu kitiyakinos neni keŋ.
Erwor a Petero alo Kai ka Akuj
11Ani eriŋa ekile ŋol imiidikina neni a Petero ka Yoana aneni anyaritae Ebarasan a Solomon, toumokis ŋituŋa daadaŋ, tomotunos neni aya ikes. 12Ani iŋolikini Petero ŋun, tolimok ikes tema, “A ŋituŋa a Isirael, nyo ikituumokinitotor iyes ŋun? Nyo ikiteoto iyes isua esibit erae apedor na ŋina kosi, kori esibit erae aŋuna ekeritere isua Akuj iŋes ikitorotokinio isua ekile lo? 13Akuj ŋina atapapaa yok ŋina ka Aburaam, Isaka ka Yakobo, iŋes ainaki eketiyan keŋ Yesu apolou ŋina ka Akuj. Ipotu iyes kipotokis Yesu ŋolopei ŋol neni a ŋikepukak ka toŋero iŋes alokiŋaren Pilato, tari daŋ ketubu Pilato atemar itemokino iŋes tolacakinae. 14Arae iŋes ŋolo ka Akuj ka eyookino, nai ipotu iyes toŋero ka kiŋita Pilato alacakin ekaaran. 15Ido toara ekainakinan akiyar ŋolo abu Akuj kiteyaru alokatwak. Ikirae isua ŋisuudae ŋulu a ŋakiro a ŋun. 16Aŋuna ka anupit ekiro a Yesu, aponi kitaŋaleunoe ekile lo ŋolo iteete ka ŋolo iyenete iyes. Anupit Yesu iŋes ainaki ekile lo aŋaleun kire ikwaŋina iteoto iyes daadaŋ.
17“Ŋikaitotoi kaŋ, ayeni ayoŋ tokona atemar pa iyenete iyes ka ŋikepukak kus ŋuna ipotu iyes kitiyata. 18Tari kikote neni daŋ, alimunit Akuj koloŋ alorwor a ŋikadwarak a daadaŋ atemar etemokino kisicanae Kristo keŋ ka esiyook Akuj ŋun alorot a lo. 19Tokiwa nai, kibelekinos neni ka Akuj, ikotere ikisari iŋes ŋasecisya kus. Kitiyata ŋun, ikotere epote aneni ke Ekapolon ŋarwa ŋuna itogogoŋere ŋitai kus. 20Iyakuuni nai iŋes Yesu, ŋolo erae Kristo, ŋolo aseu iŋes aŋuna kus. 21Itemokino Kristo kiboi anakuj akitodol apaki ŋina ituruworya Akuj ŋiboro daadaŋ ŋikitet, lopite ŋolo koloŋ alimunitor iŋes alorwor a ŋikadwarak keŋ a ŋulu asegak. 22Alimunit Moses ebe, ‘Akuj Ekapolon kus iŋes iyakuuni ekadwaran aŋuna kus, lopite ŋolo ekeyakuunia ayoŋ, elomuni iŋes alotuŋa kus pei. Itemokino iyes kiwuapa ŋakiro daadaŋ ŋuna ikilimokini iŋes iyes. 23Ituŋanan daadaŋ ŋini nyiwuapi ŋakiro ŋuna irworo ekadwaran ŋol, etyakaryo alotuŋa a ŋulu ka Akuj, kinyasunae.’ 24Kire, ŋikadwarak daadaŋ ŋulu erwor ameun aneni a Samuel adwara ŋuna a ŋirwa a lu. 25Erae ŋuna kus ŋakiikineta ŋuna ka Akuj ŋuna ekobunete ŋikadwarak keŋ ka imarakina iyes Nacamunet keŋ ikwaŋina alimokinia iŋes Aburaam ebe, ‘Eterereŋi ayoŋ ŋituŋa ŋulu ka akwap daadaŋ aŋuna a ŋiletok kon.’ 26Aŋun, abu Akuj toseu eketiyan keŋ, kiyaku mono neni kus akiterereŋ iyes; kibelekinos iyes daadaŋ alopitesyo kus a ŋulu aronok.”
Currently Selected:
Ŋitic. 3: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
