Ŋitic. 6
6
Ŋikeŋaranakinak ŋulukanikaarei
1Alorwa a ŋulu eyatakinor ekimar ŋolo a ŋikasyomak a Yesu, kiŋuruŋurakinos Ŋiyudayan ŋulu erworosi Ŋagirik neni a Ŋiyudayan a ŋulu erworosi Ŋaburaniyae. Abasi ŋulu erworosi Ŋagirik ebe nyemitakinitae ŋapuseru kec a ŋinakoloŋit apaki ŋina ekorere akimuj. 2Tonyaraut Ŋikiyakia ŋulutomon ka ŋiarei ŋikasyomak daadaŋ temasi, “Nyitemokino isua oesikisi akitatam ŋakiro ŋuna ka Akuj, ido olomakisi akikor akimuj. 3Aŋun ŋikaitotoi, toseutu alokidiŋ kus ŋikilyok ŋikanikaarei ŋulu ajokak, ŋulu ileleba Etau ŋolo Asegan ka aosou, ŋulu itemokino oinakisi etic lo. 4Nai ericakisi isua akilip ka etic ŋolo ka akitatam ŋakiro ŋuna ka Akuj.”
5Tocamu asepic daadaŋ akirot na. Toseut ikes Stepano, ekile ŋolo ayai anupit nooi, ŋolo eleleba Etau ŋolo Asegan. Toseut nabo Pilipo, Prokoro, Nikanor, Timon, Parmena ka Nikolao ŋolo anakwap a ŋina ka Antiokio, ŋolo aris kibelekin toruwor ŋolo alodin a Ŋiyudayan. 6Yaasi ŋituŋa ikes neni a Ŋikiyakia, kilipakis Ŋikiyakia ikes ka kidokokis ŋakan nakyes akiterereŋ ikes.
7Kielakin nai akirot ka Akuj nen, kiyatakin nooi ekimar a ŋikasyomak alo Yerusalem. Apotu daŋ ŋisacaradotin ŋulu alalak kiwuapa Ŋakiro ŋuna Ajokak, tonupa Yesu.
Akikamuno a Stepano
8Kitiya Stepano, ŋolo ainakinit Akuj ajokis ka apedor, ŋaumonokineta ka ŋakujuwuanisya alotuŋa. 9Nai kitepega ŋituŋa ŋice iŋes. Arae ikes ŋituŋa ŋulu ke esinagoga a ŋolo enyaritae, “Ŋituŋa ŋulu Elacakina”. Arukito ikes ka ŋulu alo Kurene, Alekisandaria, Cilicia ka Asia. 10Nai inak Etau ŋolo Asegan Stepano aosou ŋina pa apedoryata ikes akitepeg, kilouniata iŋes. 11Kicocoa nai ikes anakimunono ŋikilyok ŋice alimun atemar, “Ikiira isua Stepano irworo ŋakiro ŋuna a ŋiyany neni a Moses ka neni ka Akuj!” 12Kisiguryakis ikes ŋituŋa, ŋikatukok ka ŋiketatamak a Ŋikisila, toporokis iŋes yaasi neni ka Atukot. 13Yaut ŋisuudae ŋulu esudete ŋakiro ŋulu abasi, “Nyieŋununui ekile lo erwor ŋuna aronok Kai ka Akuj na ŋina asegan ka Lokisila ŋulu ka Akuj; 14anerae ikiira isua iŋes ebala ebe inyasuni Yesu lo ŋolo a Nasaret Akai ka Akuj ka kijulak ŋitalyo ŋulu abu Moses ikiinak iwon!” 15Kitekis ŋituŋa daadaŋ ŋulu ka Atukot Stepano, kiŋolikis ereet keŋ ecai ikwa ŋolo ke emalaika.
Currently Selected:
Ŋitic. 6: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
