Akisy. 15

Acamunet ŋina ka Akuj ka Aburam

(Ŋibur. 11:8-10)

1Kelunyar ŋun daadaŋ, bu akirot ke Ekapolon neni ka Aburam anatakanikinet ebala, “Aburam, nyikuryaniar! Arae ayoŋ aupal kon, iyatakin eropit kon nooi.” 2Kiŋit Aburam Ekapolon tema, “Okoe, Ekapolon Akuj, inyoni ikiini iyoŋ ayoŋ, anerae arubak ayoŋ eboi emam ikoku, ido Eleasar ŋolo alo Damasko iŋes eruwor ekeruman ŋiboro kaŋ?” 3Tolimu nabo Aburam tema, “Kiira, emam ikoku ikiinak iyoŋ ayoŋ, aŋun, eruwor epito ŋolo alokal kaŋ irumi ŋiboro kaŋ.” 4Nai kirworik Ekapolon neni ka Aburam tema, “Nyeruwor ituŋanan ŋin ekeruman ŋiboro kon, nai isapat ŋini iuruuni iyoŋ, iŋes irumi ŋiboro kon.” 5Kitolomu Ekapolon Aburam kiŋa tema, “Kirereiyo kidiama, kimar ŋikacer erae kipedori akimar ikes.” Tolimok Ekapolon Aburam tema, “Elalata ŋiletok kon ikwa ŋikacer.” 6Anupit Aburam Ekapolon; aŋuna ka anupit keŋ, abu Ekapolon tocamu iŋes erae ŋolo iyookino.

7Tolimok Ekapolon Aburam tema, “Arae ayoŋ Ekapolon ŋolo abu okoyau iyoŋ alo Ur anakwap a ŋina a Ŋibabiloniyae; aŋuna ka ainakin iyoŋ akwap na toruwor ŋina kon.” 8Kiŋit Aburam Ekapolon tema, “Okoe, Ekapolon Akuj kaŋ, inyoni eketaanyuni ayoŋ atemar eruwor akwap na ŋina kaŋ?” 9Tolimok Ekapolon iŋes tema, “Yau neni kaŋ ataok ŋina a ŋikaru a ŋiuni, akale ŋinameot ŋina a ŋikaru a ŋiuni ka ekale ŋolomesek ŋolo a ŋikaru a ŋiuni, ta akuri ka icuit.” 10Tolemu Aburam ŋul daadaŋ, totubutubu erae ŋanusyo, kiperyonok ibakasi; nai nyetubutub ŋikyeny. 11Ani epote ŋikyeny ŋulu enyamete akiriŋ nakiriŋ, kitwara Aburam.

12Ani ewaiyari akoloŋ, kilurut Aburam ŋajo, tojotoor nooi; a nen, min akiryonut ŋina eryono cuc ŋina ikitubuli neni ayai Aburam. 13Kirworik Ekapolon neni ka Aburam tema, “Toyenu nu kire atemar, erikoryo ŋiletok kon nakwap ŋinagela, neni eruworotor ŋipi ka isicanio nooi ŋikaru ŋamiae ŋaomwon. 14Nai esicani ayoŋ ŋituŋa ŋulu ka akwap a ŋina eruworotor ikes ŋipi. Ani ekaku, elomunete ikes anakwap a ŋin eyakatar ŋiboro ŋulu alalak nooi. 15Ani eruwor iyoŋ, ilosi neni atapapaa kon emam ŋace, ikinukyo iyoŋ idaun toris kikoŋikoŋ; 16ido eboŋunete ŋiletok kon ne edoli anyamet ŋina a ŋaomwon; anerae eriŋa aronis ŋina a Ŋiamori nyedauna.”

17Ani edoiyori akoloŋ, irwoniar akwap, kitoro ŋanusyo a ŋityaŋ ŋuna esibakitae ŋun kidiŋ amot ŋina ka akim ŋina apurui ka atoc ŋina anepi. 18Akoloŋit ŋin, tocamun Akuj ka Aburam tema Akuj, “Ainak ayoŋ akwap na neni a ŋiletok kon, anyoun anaŋolol a ŋina alo Ijipit tari naŋolol ŋina apolon nooi ŋina enyaritae Eupurate, 19akwap a Ŋikeni, a Ŋikenisi, a Ŋikadimoni, 20a Ŋiitaiti, a Ŋiperisi, a Ŋirepaim, 21a Ŋiamori, a Ŋikanaani ka ŋina a Ŋigiragasi ta ŋina a Ŋiyebusi.”

Currently Selected:

Akisy. 15: NIB2008

Highlight

Copy