Akisy. 17

Emacar ŋolo ka Acamunet

(Awos. 12:43-51, 13:2)

1Ani edolete ŋikaru ka Aburam ŋatomonikanikaomwon ka ŋikanikaomwon, totakanu Ekapolon neni ka Aburam tolimok iŋes tema, “Arae ayoŋ Akuj ŋina Etiron, kiwuap ŋakiro kaŋ torae ituŋanan ŋini iyookino. 2Ewuakini ayoŋ acamunet kaŋ ka iyoŋ, ido ekepituni ayoŋ iyoŋ nooi.” 3Toryedik Aburam, kijuuru todol ereet kwap, tosodi Akuj tema, 4“Aneni kaŋ, erae na acamunet kaŋ ka iyoŋ; iruwor iyoŋ papa a ŋakwapin a ŋuna alalak. 5Nyenyarao nabo ekiro kon Aburam, nai enyarao ekiro kon Aburaam, anerae eketuruwo ayoŋ iyoŋ papa ŋakwapin a ŋuna alalak. 6Eketipituni ayoŋ iyoŋ nooi, ido etolomuni ayoŋ ŋituŋa a ŋakwapin aloletok kon; elomunete ŋirwosi alotuŋa a ŋul. 7Ewuakini ayoŋ acamunet kaŋ ka iyoŋ ka ŋiletok kon ŋulu a ŋanyameta a daadaŋ, eruwor acamunet ŋin ŋina a ŋikaru ka ŋikaru. Arubakini ayoŋ arae Akuj kon ka ŋina a ŋiletok kon. 8Akainakini ayoŋ iyoŋ ka ŋiletok kon akwap na ŋina tokona iraakatar iyes ŋigelaanotin, akwap ŋina a Kanaan daadaŋ, toruwor ŋina kus jik, ido aruwor ayoŋ Akuj a ŋiletok kon.”

9Tolimok Akuj Aburaam tema, “Emaikina iyoŋ torubak iricit acamunet kaŋ ka iyoŋ, iyoŋ kaapei ka ŋiletok kon ananyameta kec a daadaŋ. 10Acamunet kaŋ ka iyoŋ ŋina emaikina iyoŋ kiric, toyai neni kon ka ayoŋ ta ŋiletok kon iŋes na: Itemokino ŋinikoku kus ŋinisapat kileŋerae. 11Kileŋera ikes toruwor ŋol emacar ŋolo ka acamunet kaŋ ka iyes. 12Ananyameta kus a daadaŋ, itemokino kileŋerae ŋidwe ŋulusapa daadaŋ apaki ŋina edolio ŋinikoku ŋirwa ŋikanikauni, itemokino kileŋerae tari ŋidwe a ŋipi ŋulu idounio alorerya kus ka ŋulu igyelunete iyes alotuŋa a ŋulugelae, a ŋulu nyerae ŋidwe a ŋiletok kus. 13Kire jik, ŋisapa daadaŋ ŋulu idounio alorerya kus ka ŋulu igyelunete iyes, itemokino kileŋerae. Ŋun iturubakinete acamunet kaŋ ka iyes eyai neni kus erae ŋina a ŋikaru ka ŋikaru. 14Isapat daadaŋ ŋini nyileŋeritae, eruwor igela alotuŋa keŋ, ido adau akimen acamunet kaŋ ka iyes.”

15Tolimok Akuj Aburaam tema, “Nyinyarae nabo iyoŋ aberu kon Sarai, nai eruwor ekiro keŋ Sara; 16eterereŋi ayoŋ iŋes ka daŋ iryamuni iyoŋ ikoku ŋinisapat aneni keŋ. Kire, eterereŋi ayoŋ iŋes ka eruwor iŋes toto a ŋituŋa a ŋakwapin; elomunete ŋirwosi a ŋakwapin aneni keŋ.” 17Toryedik Aburaam, kijuuru todol ereet kwap, ido tokyeni. Kiŋis bon alotau keŋ tema, “Epedor mono ikoku auruun alokile a ŋolo adol ŋikaru keŋ amiat a? Epedori mono Sara ŋina adol ŋikaru ŋatomonikanikaomwon auruun ikoku a?” 18Tema Aburaam neni ka Akuj, “Aye robo ca kiterereŋ iyoŋ Isimael toruwor ŋolo iboi iyookino alokiŋaren kon.” 19Tema Akuj, “Mam, euruuni aberu kon Sara ikoku ŋinisapat aŋuna kon, ido ilimokini iyoŋ ekiro keŋ Isaka. Ewuak ayoŋ acamunet kaŋ ka iŋes erae ŋina a ŋikaru ka ŋikaru a ŋuna a ŋiletok keŋ. 20Adau ayoŋ akiirar aneni kon ŋuna a Isimael, eterereŋi ayoŋ iŋes ka etipituni etalala ŋituŋa keŋ nooi. Eruwor iŋes papa a ŋirwosi a ŋitomon ka ŋiarei ka etalalauni nooi ŋituŋa keŋ. 21Nai acamunet kaŋ ka iyoŋ, etogogoŋi ayoŋ aneni a Isaka a ŋolo euruuni Sara aŋuna kon apaki napei na ekaru ŋolo moi.” 22Kedau Akuj akirworo ka Aburaam, tolot Akuj, kimyek Aburaam.

23Ya nai Aburaam lokoku keŋ Isimael ka ŋidwe daadaŋ ŋulupi ŋulu auruunio alokal keŋ ka ŋulu agyelunio a ŋisiliŋa keŋ; ya ŋisapa daadaŋ ŋulu eboiyete alokal keŋ, kileŋer ikes akoloŋit ŋinapei ŋin ŋina erworotor iŋes ka Akuj; ikwapei alimokinitor Akuj iŋes. 24Arae ŋikaru ka Aburaam ŋatomonikanikaomwon ka ŋikanikaomwon apaki ŋina eleŋerere iŋes. 25Torae ŋikaru a Isimael a lokoku keŋ ŋitomon ka ŋiuni apaki ŋina eleŋerere. 26Akoloŋit ŋinapei eleŋerere Aburaam, iŋes eleŋerere lokoku keŋ daŋ Isimael; 27kaapei ka ŋisapa daadaŋ ŋulu eboiyete alokal keŋ, ŋulu auruunio a nen ka ŋulu agyelunio alotuŋa a ŋulugelae.

Currently Selected:

Akisy. 17: NIB2008

Highlight

Copy