Akisy. 29

Kiryamun Yakob ka Rakel

1Torotok Yakob a nen, tolot kiŋaren, todol nakwap a ŋituŋa a ŋulu eboiyete alowae a ŋolo alo Kide. 2Ani eŋoleŋolekini, kiŋolik akare anariet, auryanete alodiyete akare ŋin ŋisipanin a ŋamesekin ŋiuni; anerae kiruyo ŋisipanin a ŋamesekin nen. Agolokinitoe amoru ŋina apolon nooi nakituk a akare, 3ido kedaut ŋisipanin daadaŋ acunun, alosete ŋikeyokok akikokoriyor amoru anakituk a akare, ido kiruwakis ŋamesekin, kedaut akiruu, kikokorikis amoru nakituk a akare.

4Kiŋit Yakob ŋikeyokok tema, “Ŋikaitotoi, ai iponitotor iyes?” Toboŋokis ikes temasi, “Eponitae isua alo Aran.” 5Kiŋit Yakob ikes tema, “Iyenete iyes Laban lokoku a Naor a?” Toboŋokis ikes temasi, “Eyenio.” 6Kiŋit nabo Yakob ikes tema, “Eŋale iŋes a?” Toboŋokis ikes temasi, “Ee, Rakel na nakoku keŋ, eramunit ŋamesekin.” 7Tema Yakob neni a ŋikeyokok, “Kiŋolikisi iyes, eriŋa apaaran; nyerae na apaki ŋina kitowoet ŋibaren kaapei. Kiruwakisi ŋamesekin toramasi adak.” 8Nai toboŋokis ikes temasi, “Nyikipedori isua akitiya ŋun, mati kecunun ŋisipanin a ŋamesekin daadaŋ kaapei, kikokoriyoroe nai amoru anakituk a akare, kiruwakinae nai ŋamesekin.”

9Ani eriŋa Yakob irworosi ka ŋikeyokok, todolu Rakel emyat ŋamesekin a papa keŋ, anerae arae iŋes eyoki ikes. 10Ani iŋolikini Yakob Rakel nakoku a Laban a mamae keŋ ka ŋamesekin a Laban, tolot kijuka amoru anakituk a akare, tosodi kiruwak ŋamesekin a mamae keŋ. 11Ekaku, tonu Yakob Rakel, ido kikalou iworoe nooi. 12Tolimok Yakob Rakel tema “Arae ayoŋ eyenet a papa kon, lokoku a Rebeka.” Toem Rakel tolimok papa keŋ ŋakiro a Yakob.

13Ani iirari Laban ŋakiro a lokoku anakaato keŋ, toem akisiryam iŋes, totunakin ka tonu iŋes, ido yau kai keŋ. Tolimok nai Yakob Laban ŋakiro daadaŋ, 14tema Laban neni a Yakob, “Kire, irae iyoŋ akuwan kaŋ ka ŋaokot kaŋ!” Kiboiyoto Yakob ka Laban elap epei.

Kiit Yakob ata nakoku a Laban

15Tolimok Laban Yakob tema, “Ikwapei iraakar iyoŋ eyenet kaŋ, emaikina mono iyoŋ ikitiyanak ayoŋ ikoŋin a? Tolimokinae ayoŋ, nyo eruwor eropit kon?” 16Ayakar apaki ŋin Laban ŋidwe ŋulupesur ŋiarei, anyaritae ŋina apolon Lea, ŋina cici Rakel. 17Ebusak nooi ŋakonyen a Lea, ido arae Rakel ŋina adiryana akuwan ka ebus nooi. 18Tominak Yakob Rakel; tosodi tema neni a Laban, “Etiyae ayoŋ neni kon ŋikaru ŋikanikaarei aŋuna anakoku kon Rakel.” 19Tolimok Laban iŋes tema, “Ejok nooi ayoŋ ainakin Rakel neni kon, akilo ayoŋ ainakin iŋes neni a ekile a ece, eboiyoto ka ayoŋ.” 20Aŋun, abu Yakob kitiya neni Laban ŋikaru ŋikanikaarei aŋuna a Rakel, nai aneni a Yakob, asibito ŋikaru ŋul ŋirwa ŋidikudyo, anerae amina Yakob Rakel.

21Ekaku, tolimok Yakob Laban tema, “Inakinae ayoŋ aberu kaŋ oruko ka ayoŋ, anerae erikakin ŋikaru.” 22Aŋun, abu Laban tocunak ŋituŋa a akibois a ŋin, kitemok ŋasuban. 23Nai ani edoli eboŋ, yau Laban nakoku keŋ Lea neni a Yakob, ido apotu Yakob kiryamakinos ka Lea. 24(Inak Laban nakoku keŋ Lea aketiyan keŋ ŋina anyaritae Silpa, ikotere eruwor aketiyan a Lea.) 25Ani taparacu, kiŋolik Yakob erae Lea erukitotor iŋes. Kiŋit Yakob Laban tema, “Anukiro nu ŋuna itiya iyoŋ neni kaŋ? Pa mono arae aŋuna a Rakel etiyaa ayoŋ neni kon a? Nyo bo ikimodikinia iyoŋ ayoŋ?” 26Tema Laban, “Nyitiyasi ŋakiro nu anakwap kosi, nyipotonoryo apese ŋina cici alokal nakiitaro eriŋa ŋina apolon. 27Todautu mono esabit epei ka ŋin, ido ikiinakin ŋinace daŋ, kitiya neni kaŋ ŋikaru ŋice ŋikanikaarei.” 28Abu Yakob kitiya ŋun, todaut ka Lea esabit; inak nai Laban Yakob Rakel toruwor aberu keŋ. 29(Inak Laban nakoku keŋ Rakel aketiyan keŋ ŋina anyaritae Bila, ikotere eruwor aketiyan a Rakel.) 30Aŋun, apotu Yakob kiryamakinos ka Rakel daŋ, ido abu iŋes tominak Rakel nooi akilo Lea. Abu Yakob kitiya neni a Laban ŋikaru ŋice ŋikanikaarei.

31Ani eanyuni Ekapolon atemar pa amina Yakob Lea, abu kituruwo Lea ŋina idoe, nai Rakel toruwor ŋina pa edoe. 32Abu Lea topoti, ido kidou ikoku ŋinisapat, tolimok ekiro keŋ Ruben, anerae abu iŋes tema, “Aŋuna aanyuwarya Ekapolon ŋican kaŋ, kire jik akaminakini tokona ayoŋ ekile kaŋ.” 33Topoti nabo Lea, kidou ikoku ŋinisapat, ido tema, “Aŋuna eirarya Akuj atemar nyakaminae ayoŋ, akainaki ayoŋ edya lo daŋ”; tolimok iŋes ekiro a edya Simeon. 34Topoti nabo Lea, kidou ikoku ŋinisapat, tema, “Apaki na tokona epedorya lokile kaŋ aminakin ayoŋ, anerae edou ayoŋ ŋisapa ŋiuni aŋuna keŋ.” Aŋun, aponi tolimokinae ekiro a ŋol Lepi. 35Topoti nabo Lea, kidou ikoku ŋinisapat, tema, “Epuri ayoŋ Akuj apaki na”; aŋun, abu tolimok ekiro a edya a ŋol Yuda. Ekaku a Yuda, tojoŋo Lea akidounun.

Currently Selected:

Akisy. 29: NIB2008

Highlight

Copy