Yoa. 10
10
Akitadapet ŋina ke ekeyokon
1Tolimu Yesu tema, “Akalimokini ayoŋ iyes kire atemar, ituŋanan ŋini nyelomari nanok ŋina a ŋamesekin alopuke, nai todoka tooma alowae ke ece, erae ituŋanan ŋin ekokolan ka ekademanaran. 2Nai ituŋanan ŋini elomari alopuke a ŋolo ka anok, erae iŋes kire ekeyokon ŋolo a ŋamesekin. 3Ebuni eketen ŋolo ke epuke aŋaar iŋes, iirarete ŋamesekin etoil keŋ, enyarae iŋes ŋamesekin keŋ a ŋirorwa kec, tomia ikes kiŋa. 4Ani keyau iŋes ŋamesekin keŋ daadaŋ kiŋa, iŋarenikini iŋes ikes, ido kiwuapakis ŋamesekin iŋes, anerae eyenete ikes etoil keŋ. 5Nyiwuapakinete ikes ituŋanan ŋini egelaana, nai esurorosi nariet, anerae nyeyenete ikes ŋitoilon a ŋituŋa a ŋulu gelayek.”
6Abu Yesu tolimok ikes akitadapet ŋin, nai nyeyenut ikes ŋuna erworo iŋes.
Yesu iŋes ekeyokon ŋolo ajokan
7Aŋun, tolimok Yesu ikes nabo tema, “Akalimokini ayoŋ iyes kire atemar, Arae Ayoŋ epuke ŋolo a ŋamesekin. 8Ŋituŋa daadaŋ ŋulu apote eriŋa ayoŋ, arae ikes ŋikokolak ka ŋikademanarak; nai nyiirara ŋamesekin ŋakiro kec. 9Arae Ayoŋ epuke; ituŋanan ŋini elomuni kitoru neni kaŋ, eiun iŋes; elomuni iŋes tooma ka elomari kiŋa, toryamu akimuj. 10Elomuni ekokolan akoko bon, akiar ka akinyasun ŋamesekin; nai abunit ayoŋ ainakin ikes akiyar, akiyar ŋina ka akileile.
11“Arae Ayoŋ ekeyokon ŋolo ajokan. Ejali ekeyokon ŋolo ajokan akeekiyar aŋuna a ŋamesekin keŋ. 12Ituŋanan ŋini etacio, nyerae iŋes ekeyokon; ka nyerae ŋamesekin ŋuna keŋ; ani kiŋolik iŋes epeot ebunit, eesikini ŋamesekin, toem; toporok nai epeot ŋamesekin, kielielaa. 13Eemi iŋes, anerae erae iŋes etacat ka nyemitakinit ŋamesekin. 14Arae Ayoŋ ekeyokon ŋolo ajokan. Ayeni ayoŋ ŋamesekin kaŋ ka akayenete ikes ayoŋ, 15ikwapei akayenia ayoŋ Papa kaŋ ka ayeni ayoŋ daŋ iŋes. Ajali ayoŋ akiyar kaŋ aŋuna a ŋamesekin. 16Eyakasi ŋamesekin kaŋ ŋace ŋuna emam alosipan a lo; itemokino ayoŋ ocun ikes daŋ ka iirarete ikes etoil kaŋ; toruworos nai ikes epeisipan ŋolo ke epeikeyokon.
17“Akamina ayoŋ Papa kaŋ, anerae ajalit akiyar kaŋ oyeni atemar aryamuni nabo. 18Emam ituŋanan ŋini akademari ayoŋ akiyar kaŋ, nai ajalit ayoŋ iŋes anacamit kaŋ a elope. Ayakar ayoŋ apedor ŋina jalet iŋes ka ayakar ayoŋ apedor ŋina ryamunet iŋes nabo. Erae ŋun ŋuna ekecikak Papa kaŋ ayoŋ akitiya.”
19Totyakatyakas Ŋiyudayan nabo aŋuna a ŋakiro a ŋun. 20Temasi ŋulu alalak, “Eyai ekipye neni keŋ! Kiruma ŋikerep iŋes! Nyo epupere ŋakiro keŋ?”
21Nai temasi ŋice, “Kire, nyepedori ituŋanan ŋini eyai ekipye neni keŋ, erwor ikona. Epedori ekipye akitekienyun emudukanot a?”
Toŋero Ŋiyudayan Yesu
22Ani edoli ŋirwa ŋulu a ŋasuban a ŋuna eitunitere Akoloŋit ŋina eterereŋere Akai ka Akuj alo Yerusalem, torae akwap alilim. 23Kitor Yesu Kai ka Akuj, lobarasan a Solomon. 24Tocunakinos Ŋiyudayan kirikaut Yesu temasi, “Ikitaŋayaŋayat mono iyoŋ isua tari ori? Ani kirae iyoŋ Kristo, tolimokinae ilereete.”
25Toboŋok Yesu ikes tema, “Abu ayoŋ okolimok iyes, nai nyinupito. Ŋiticisyo ŋulu etiyae ayoŋ alokiro a Papa kaŋ, ikes eketeyenunito ayoŋ. 26Nai nyinupito iyes, anerae meere iyes ŋamesekin kaŋ. 27Epupete ŋamesekin kaŋ ekaatoil, ayeni ayoŋ ikes ka ekewuapito ayoŋ. 28Ainakini ayoŋ ikes akiyar ŋina nyedaun, nyebukorosi ikes jik, emam daŋ ŋini ekopori ikes anakan kaŋ. 29Papa kaŋ, ŋolo akainakini ayoŋ, epol iŋes akilo daadaŋ, emam idiotuŋanan ŋini epedori akopor ikes anakan a Papa. 30Ikirae ayoŋ ka Papa ŋipei.”
31Kideput nabo Ŋiyudayan ŋamoru akimasya Yesu. 32Tolimok Yesu ikes tema, “Eketoodik ayoŋ iyes ŋiticisyo ŋulu alalak ŋulu ajokak, ŋulu eponito aneni a Papa. Ali aloticisyo a ŋul icamitotor iyes akimasya ayoŋ a ŋamoru?”
33Toboŋokis Ŋiyudayan iŋes temasi, “Meere aŋuna ke ediotic a ŋolo ajokan ikimasere isua iyoŋ, nai aŋuna iyanyia iyoŋ Akuj! Irae iyoŋ ituŋanan, nyo nai ibaakar iyoŋ ikwaanasi ka Akuj!”
34Toboŋok Yesu ikes tema, “Igiritae Lokisila kus ebe ebala Akuj, ‘Irae iyes ŋakujo.’ 35(Ikiyeni atemar iyookino Ŋakigireta kire;) ido abu Akuj tonyara ŋituŋa ŋulu alimokinio ŋakiro keŋ, ŋakujo. 36Ani nai kikote nen, ikokinete iyes ai ibasi, ‘Iyanyi iyoŋ Akuj!’ anerae abu ayoŋ olimu atemar, ‘Arae Ayoŋ Lokoku ka Akuj,’ ikwapei araakar ayoŋ abu Akuj okotyaku ekeyakuu nakwap. 37Ani pa ketiyae ayoŋ ŋiticisyo ŋulu a Papa kaŋ, nyikinupa ayoŋ. 38Nai ani ketiyae ayoŋ ikes, tonupa ikes erae tari pa kikinupito ayoŋ; ikotere toyenuniata ayenunet apei jik atemar, eyai Papa tooma kaŋ ka ayai ayoŋ tooma Papa.”
39Kikatakis nabo ikes akikamun iŋes, nai abu tobucar aneni kec.
40Tolot nabo Yesu ekekwaye aŋolol Yorodan, neni sek ebatisaa Yoana ŋituŋa; kiboi aina. 41Potu ŋituŋa ŋulu alalak neni keŋ temasi, “Nyitiya Yoana adiokujuwuanut, nai ŋuna daadaŋ abu iŋes kirwor aŋuna ke ekile a lo, erae ŋuna a kire.” 42Tonupa ŋituŋa ŋulu alalak iŋes aina.
Currently Selected:
Yoa. 10: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
