Luk. 20

Eŋitasi ŋituŋa ŋakiro ŋuna ka apedor a Yesu

(Mat. 21:23-27; Mar. 11:27-33)

1Akoloŋit apei ŋina ayakar Yesu Kai ka Akuj itatami ŋituŋa Ŋakiro ŋuna Ajokak, potu ŋisacaradotin ŋulu apolok ka ŋiketatamak a Ŋikisila ta ŋikatukok neni keŋ, 2kiŋita iŋes temasi, “Tolimokinae cenite iyoŋ isua neni ebunitor apedor ŋina itiyaa iyoŋ ŋakiro nu. Ŋae ikiinakinit iyoŋ apedor na?”

3Toboŋok Yesu ikes tema, “Ekeŋisi ayoŋ daŋ iyes apeikirot. Tolimokinae cenite iyes ayoŋ. 4Ai abunitor apedor ŋina ebatisaa Yoana ŋituŋa, neni ka Akuj kori lotuŋa?”

5Togeut ikes akiŋitanar make ebasi, “Okoe ikitemari mono ai? Ani kikitema iwon, ‘Abunit aneni ka Akuj,’ etemari iŋes, ‘Ani nyo bo pa inupyata iyes ŋakiro a Yoana?’ 6Nabo kikitema iwon, ‘Abunit alotuŋa,’ ikicaki iwon asepic a ŋituŋa a ŋamoru, anerae enupito ikes nooi atemar arae Yoana ekadwaran.” 7Tosodi toboŋokis temasi, “Nyikiyeni isua neni abunitor.”

8Tolimok Yesu ikes tema, “Nyakalimokini ayoŋ daŋ iyes neni ebunitor apedor ŋina etiyaa ayoŋ ŋakiro nu.”

Akitadapet ŋina a ŋiketeok emanikor

(Mat. 21:33-46; Mar. 12:1-12)

9Tolimok Yesu ŋituŋa akitadapet na, “Abu ekile kita emanikor ŋolo a ŋikito a ŋulu ecuyo epiini, ido kicikak ŋituŋa ŋulu etiyaete lomanikor, tolot nai iŋes akiboi lobuku ece. 10Ani edoli ŋirwa ŋulu elemere, kiyakiya iŋes epito keŋ loketiyak akijaun ŋadiraito; nai apotu ŋiketiyak kikamut epito ŋol, kibuŋata, kitoboŋosi iŋes emam idiobore etiŋit. 11Kiyakiya nabo iŋes epito keŋ ece, kibuŋata ŋolo daŋ, tobolyatar, kitoboŋosi a ŋakan. 12Kiyakiya nabo iŋes epito keŋ ŋolo a ŋiuni; kitereŋut ŋiketiyak ke emanikor ŋolo daŋ, kiritasi alomanikor. 13Tosodi elope ŋolo ke emanikor tolimu tema, ‘Ekokini ayoŋ ai? Eyakiyari ayoŋ lokoku kaŋ ŋolo minat, acepaki ekerete ikes iŋes!’ 14Nai ani eanyuwarete ŋiketiyak ŋulu ke emanikor iŋes, kirworikinos make temasi, ‘Lokoku keŋ lo! Potu oara eruma iwon emanikor ŋolo ke epiini!’ 15Yaasi ikes iŋes kiŋa emanikor, toarakis inaa.” Kiŋit Yesu ikes tema, “Anukiro nai itiyakini elope ŋolo ke emanikor loketiyak ŋul? 16Ŋina ebunio iŋes eari ŋiketiyak ŋulu ke emanikor, tosodi inak emanikor loketiyak ŋice.” Ani iirarete ŋituŋa ŋakiro ŋun temasi, “Nyikiryama ca ka ŋun!”

17Kiŋolik Yesu ikes tolimok tema, “Nyo nai apolou a ŋakiro a ŋuna igiritae Nakigireta ikona?

‘Amoru ŋina koloŋ aŋerete ŋikadukok,

iŋes tokona itogogoŋit akai alokoona!’

18Ituŋanan daadaŋ ŋini eramakin namoru ŋin, enyilinyilaar; ani ecakakin amoru ŋin ice kidiama, inyaadiyari iŋes toruwor apuwa.”

Kiŋitae Yesu ŋakiro ŋuna ka akibuk ocur

(Mat. 22:15-22; Mar. 12:13-17)

19Acamito ŋiketatamak a Ŋikisila ka ŋisacaradotin ŋulu apolok akikamun Yesu apaki ŋin, anerae ayenete atemar arae ikes alimunitor Yesu akitadapet ŋin. Nai tokera akikamun iŋes aŋuna a ŋituŋa. 20Kiwara ikes erot ŋolo kikamunet iŋes, ikotere torikosi iŋes lokapolok ŋulu a Ŋiromanin. Kiluŋuluŋa ikes ŋibekae, inakis ŋisiliŋa kiyakiyasi nai alokun Yesu alorwor keŋ. Toloto ŋibekae neni a Yesu esubito ŋituŋa ŋulu ajokak. 21Tolimokis ŋibekae ŋul Yesu temasi, “Eketataman, ikiyeni isua atemar iyookino ŋakiro ŋuna irworo iyoŋ ka ŋuna itatami daŋ. Nyimisit iyoŋ kepol ituŋanan kori kemam, nai itatami iyoŋ ŋuna a kire ŋuna ka Akuj alopite a ŋolo iyookino. 22Tolimokinae isua, ikicamakinito mono Ŋikisila obukosi ocur neni ke ekepukan a Roma kori mam?”

23Ikwaŋina ayenia Yesu atemar alokunito ikes iŋes a ŋakiro a ŋun, tolimok ikes tema, 24“Kitoodikinae cenite esiliŋ.” Tosodi Yesu kiŋit ikes tema, “Ŋolo a ŋae ereet lo ka ŋakigireta nu?” Toboŋokis ikes temasi, “Ŋulu ke ekepukan a Roma.”

25Tolimok Yesu ikes tema, “Inakisi ekepukan a Roma ŋini erae ikeŋ, inakis Akuj ŋini erae ŋini ka Akuj.”

26Toŋopikis ikes ŋakiro ŋuna lokunet iŋes a nen alokiŋaren ŋituŋa. Toumokis ikes nooi a ŋakiro a ŋuna aboŋokini Yesu, kililiŋa cek.

Kiŋitae Yesu ŋakiro ŋuna ka ayarun alokatwak

(Mat. 22:23-33; Mar. 12:18-27)

27Potu neni a Yesu Ŋisadukayon ŋice ŋulu apegasi atemar eyarunete ŋikatwak, kiŋita ikes Yesu temasi, 28“Eketataman, egirit koloŋ Moses aŋuna kosi ebala, Ani ketwana lokaato keŋ ke ekile, toesik aberu keŋ emam ŋidwe, itemokino lokaato keŋ kirum aberu, touru ŋidwe aŋuna alokaato keŋ a ŋolo atwan. 29Aya ŋikaitotoi ŋikanikaarei; kiita ŋolo apolon totwan, nyeryamuna ŋidwe. 30Kirum ŋolo a ŋiarei aberu; 31ka ŋolo a ŋiuni ka ŋuluce daadaŋ kiruma aberu, nai totwaka ikes daadaŋ, nyeryamuna ŋidwe. 32Ekaku abu aberu daŋ totwan. 33Ani akoloŋit ŋina eyaruniata ŋituŋa daadaŋ, eruwor aberu ŋin ŋina a ŋae? Anerae arae iŋes aberu a ŋulukanikaarei a daadaŋ.”

34Toboŋok Yesu ikes tema, “Ŋituŋa ŋulu ka akwap a na iitanarete ka iitanaryo, 35nai ŋulu eryamun iyookino ikotere ŋirwa ŋulu eponito ka ayarun ŋina a ŋikatwak, nyiitanarete kori nyiitanaryo. 36Nyetwakete ikes nabo, anerae ikwaanikin ikes ka ŋimalaikan; eraakasi ikes ŋidwe ŋulu ka Akuj ka ŋulu ka ayarun alokatwak. 37Tokona ŋuna ka ayarun alokatwak itoodiunit Moses daŋ anakigireta a ŋuna ka amoni a ŋina anoki atemar eyarunete ŋikatwak, anerae enyarit iŋes Ekapolon ebe, ‘Akuj ŋina ka Aburaam, Akuj ŋina a Isaka ka ŋina a Yakobo.’ 38Erae iŋes Akuj ŋina a ŋulu eyarete, meere Akuj ŋina a ŋulu etwakito; anerae aneni keŋ eyarete daadaŋ.”

39Kirworikis ŋiketatamak a Ŋikisila ŋice temasi, “Eketataman, irwor iyoŋ ejok!” 40Anerae apotu Ŋisadukayon tokera akiŋit iŋes ŋakiŋiseta ŋace.

Ŋae erae Kristo?

(Mat. 22:41-46; Mar. 12:35-37)

41Kiŋit Yesu ikes tema, “Nyo ebaakatar ŋituŋa erae Kristo lokoku a Daudi? 42Anerae ebala Daudi elope alokitaabo a ŋolo a ŋieosyo ebe,

‘Atema Ekapolon neni ke Ekapolon kaŋ,

kiboikin iyoŋ teten kaŋ,

43akitodol neni ewuakinia ŋikonimoi kwap ŋakejen kon.’

44Ani kenyarit Daudi iŋes ‘Ekapolon;’ ikokini nai iŋes eruwor lokoku keŋ ai?”

Kicik Yesu ŋituŋa acoikinit ŋiketatamak a Ŋikisila

(Mat. 23:1-36; Mar. 12:38-40)

45Ani epupokini asepic ŋina a ŋituŋa Yesu, tolimok iŋes ŋikasyomak keŋ tema, 46“Tocoikinito ŋiketatamak a Ŋikisila; eminasi ikes akirimit enapito ŋikaasoi ŋulu aoyak, nabo ecamito kimalae ikwa ŋikapolok alomaket. Eseete ikes ŋikicoloŋo ŋulu ebusak alosinagogae ka anasuban. 47Edemete ikes ŋapuseru ŋiboro kec ka daŋ ilipete ekaoyan iwogasi neni erae koŋin! Eryamunete ikes atubokino ŋina aronon nooi!”

Currently Selected:

Luk. 20: NIB2008

Highlight

Copy