Luk. 8

Ŋaberu ŋuna ewuapito Yesu

1Kedaun ŋakiro ŋun, kirimo Yesu lotaunio ka lorerya, akitatam Ŋakiro ŋuna Ajokak ŋuna ka Apukan ka Akuj. Torukito ka ŋulutomon ka ŋiarei; 2ka ŋaberu daŋ ŋace ŋuna abu Yesu kitaŋaleu ikamunito ŋipyan ikes ka alodekesyo. Araakasi ikes Maria (ŋina arae ekiro keŋ Magadalena) ŋina etaŋaleunio ikamunito ŋipyan ŋikanikaarei; 3Joanna, aberu a Kusa a ŋolo eyokit ŋiboro ŋulu ke Erode, ka Susanna ka ŋace ŋuna alalak ŋuna eŋaranakinete ikes a ŋiboro kec.

Akitadapet ŋina a ŋikinyom

(Mat. 13:1-9; Mar. 4:1-9)

4Potu ŋituŋa neni a Yesu alowaetin a daadaŋ, alotaunio a ŋulu alalak toruwor asepic; tolimok Yesu ikes akitadapet na tema,

5“Ayai ekile ŋolo abu tolot akitakin ŋikinyom keŋ. Ani eekini iŋes, todoto ŋice lorot, ido kipudaasi ŋituŋa ka kidepasi ŋikyeny. 6Apotu ŋice todoto loŋaro; ani erupunete, apotu tookiyosi, anerae amam pa apalal ŋalup. 7Apotu ŋikinyom ŋice todoto kidiŋ lokukwa, tosodo toruput kaapei ka ŋikukwa, torida ŋikukwa ikes. 8Nabo apotu ŋice todoto nalup ŋuna ajokak, toruput topolout, tokoniu ŋolokinyomit amiat.” Kedau Yesu erwor ŋun, tolimok ikes ikeunit tema, “Iŋes ŋini eya ŋaki ŋuna kiiraret, kiira!”

Apolou ŋina a ŋakitadapeta

(Mat. 13:10-17; Mar. 4:10-12)

9Kiŋita ŋikasyomak Yesu apolou ŋina ka akitadapet a ŋin. 10Toboŋok Yesu ikes tema, “Ikiinakinitae iyes ayenun ŋuna imunono ŋuna ka Apukan ka Akuj, nai ŋituŋa ŋuluce elimokinio a ŋakitadapeta. Tosodi ani kiŋolikis daŋ, nyeanyuwasi; ani kepuput daŋ, nyiirasi.”

Apolou ŋina ka akitadapet a ŋina ke eketan

(Mat. 13:18-23; Mar. 4:13-20)

11“Apolou ŋina ka akitadapet iŋes na: ekinyomit iŋes akirot ŋina ka Akuj. 12Ŋikinyom ŋulu adoete lorot erae ŋituŋa ŋulu iirarete, nai bu Satan tolema akirot alotai kec, ikotere nyenupa ikes toiunos. 13Ŋikinyom ŋulu adoete loŋaro erae ŋituŋa ŋulu iirarete akirot kijaut ka alelyan, nai emamukatar ikes ŋataagor, enupete ca iwadio, nai ani edoli ŋirwa ŋulu itemere, tosodo topalikis. 14Ŋikinyom ŋulu adoete lokukwa, erae ŋituŋa ŋulu iirarete akirot; nai amitakinit ŋuna ka akwap ka ekibure ŋolo a ŋiboro daadaŋ elomunete tooma toridakis akirot ŋina ka Akuj nyera. 15Ŋikinyom ŋulu adoete nalup ŋuna ajokak erae ŋituŋa ŋulu iirarete akirot, kiricakis, tonupa a ŋitai a ŋulu ajokak ka totitinyikis akitodol ŋina erayata.

Etaa alokwap ekitaada

(Mar. 4:21-25)

16“Emam ituŋanan inokakini etaa, tosodi tobuburik atuba kori kiwuak kwap ekitaada. Nai iwuakini iŋes neni ikeuna, ikotere kiteoto ŋituŋa daadaŋ elomarete kai. 17Anerae emam ibore ŋini imunonitae ŋini nyisileereunio, kori ibore daadaŋ ŋini iwuaitae ŋini nyitatakununio yaunae nakica.

18“Tocoito robo ikwaŋina iiraryata; anerae ituŋanan daadaŋ ŋini eyakar ibore einakinio ŋini elal, nai ŋini daadaŋ emam ibore eyai, edemaryo tari ŋinidio cici ŋini etami iŋes atemar ayakar.”

Toto a Yesu ka ŋikaitotoi a Yesu

(Mat. 12:46-50; Mar. 3:31-35)

19Potu toto a Yesu ka ŋikaitotoi a Yesu, nai nyepedosi akidol diyete Yesu aŋuna ka asepic a ŋina apolon. 20Tolimokinae Yesu temarae, “Ewuasi toto kon ka ŋikonikaitotoi alokiŋa, ecamito aanyun iyoŋ.”

21Toboŋok iŋes tema, “Toto kaŋ ka ŋikaitotoi kaŋ ikes ŋulu iirarete ŋakiro ŋuna ka Akuj, kiwuapa.”

Kitidipok Yesu ekuwuam ŋolo apolon

(Mat. 8:23-27; Mar. 4:35-41)

22Apeikoloŋit, todokasi Yesu ka ŋikeekasyomak nataker tolimok iŋes ikes tema, “Apena, odokasi ekekwaye anam.” Kisyakis ikes amiar ataker. 23Ani eriŋa ikes eya nanam, kinapakin Yesu tojotoor. Tokut atipei ekuwuam ŋoloti apolon ananam, kiburiburi ataker akilelebun. Toryamut ikes ŋican ŋulu apolok. 24Kiyotosi ŋikasyomak neni a Yesu, kitekienyut iŋes temasi, “Eketataman, Eketataman! Edikino ikitwaki.” Tonyou Yesu, kikilyak ekuwuam ka ŋakipi ŋuna emorokokoete, todipakinos ikes, kililiŋ akwap cek. 25Kiŋit Yesu ŋikeekasyomak tema, “Ai eyai anupit kus?”

Tobul ikes, toumokis kiŋitas make temasi, “Ŋae ekile lo ŋolo elimokini tari ekuwuam ka ŋakipi kiirasi iŋes lo?”

Kitaŋaleu Yesu ekile ŋolo ekamunito ŋipyan

(Mat. 8:28-34; Mar. 5:1-20)

26Todolut nai ikes nakwap ŋina a Ŋigadara ŋina eteosi ka Galileya. 27Ani edokuni Yesu anataker, kiryama ka ekile ŋolo abunit alotaun, ŋolo ekamunito ŋipyan. Eboit iŋes ekaoyan eleri, nabo kiboiye analyalin toŋerite ere. 28Ani iŋolikini iŋes Yesu, kiworou toramakin kiŋaren keŋ, tocelu tema, “Anukiro eya iyoŋ ka ayoŋ, Yesu Lokoku ka Akuj, a ŋina alokidiama nooi? Akadyekit ayoŋ iyoŋ atemar, nyikisican kare ca!” 29Alimuni iŋes ikoŋina, anerae eŋenyakini Yesu ŋipyan alomun aneni keŋ. Etokoponorete iŋes ŋipyan ŋirwa ŋulu alalak, tari keeni iŋes a ŋiriko ŋakejen ka ŋakan, aŋedanari kipiiri nariet aŋuna ka agogoŋu a ŋipyan a ŋul.

30Kiŋit Yesu iŋes tema, “Ŋae ekonikiro?”

Toboŋok ekile tema, “Erae ekiro kaŋ ‘Ajore’,” anerae alomarito ŋipyan ŋulu alalak tooma keŋ. 31Kimaimaa ŋipyan ŋul Yesu nyecakak ikes nauwuat ŋina aoyan.

32Ayai nen esipan ŋolo apolon ŋolo a ŋipegei ŋolo adaka nagum ke emoru. Kilipa ŋipyan Yesu aesikin ikes tolomasi lopegei. Tocamak iŋes ikes. 33Tosodo tolomut ŋipyan ŋul alokile, tolomasi lopegei; tosuro esipan daadaŋ anakope, tosuror tooma nanam, kitamat totwaka. 34Ani iŋolikinete ŋikeyokok ŋulu a ŋipegei ŋakiro ŋuna etiyakinosi, kipiiryoto alimor lotuŋa ŋulu aya lotaun ka lorerya. 35Toloto ŋituŋa aanyun ŋakiro ŋuna apotu kitiyakin. Potu neni a Yesu, toryamut ekile ŋolo etolomunere ŋipyan iboi a nakejen a Yesu, enapit ŋilowi, kejokyar akeekuwan; tokuryaketa ikes. 36Tolimokis ŋulu aris keyenut epite ŋolo etaŋaleunere ekile ŋolo ekamunito ŋipyan. 37Apotu nai ŋituŋa ŋulu ka akwap a Gadara kiŋitakis Yesu alosit iwace, anerae abu tobul ikes nooi. Todoka nai Yesu nataker, toboŋo. 38Tosodi ekile ŋolo sek eritaryo ŋipyan aneni keŋ, kimaima Yesu arukor ka iŋes.

Nai kitoboŋo Yesu iŋes lore keŋ tema, 39“Toboŋo lore kon, kiserak lotuŋa ŋakiro ŋuna etiya Akuj neni kon.”

Tolot nai iŋes tolimok ŋituŋa daadaŋ alotaun ŋuna abu Yesu kitiyak neni keŋ.

Nakoku a Yairo ka aberu ŋina atapi elou a Yesu

(Mat. 9:18-26; Mar. 5:21-43)

40Ani eboŋuni Yesu alokekwaye anam, kisiryam asepic a ŋituŋa iŋes, anerae edarito ŋituŋa iŋes. 41Bu ekile ŋolo anyaritae Yairo, ŋolo apolokinit esinagoga. Toramakin kiŋaren Yesu, kimaima iŋes abunore kai keŋ, 42anerae adyaka nakoku keŋ ŋina donupei, toapiye atwanare. Arae ŋikaru keŋ ŋitomon ka ŋiarei.

Nai ani eriŋa Yesu elosi toridak nooi asepic a ŋituŋa iŋes. 43Ayai nen aberu ŋina aleleete ŋaokot ŋikaru ŋitomon ka ŋiarei. Kisunyak iŋes ŋikeeboro daadaŋ lomurok, nai amam tari ipeituŋanan daŋ ŋini apedori akitaŋaleun iŋes. 44Toŋicun iŋes alokaku, totap abilet ŋina ke elou a Yesu; totubos ŋaokot atipei. 45Kiŋit Yesu tema, “Ŋae ŋini akatap ayoŋ?”

Topega ŋituŋa daadaŋ ŋun, ido tema Petero, “Eketataman, ikilukakinito iyoŋ ŋituŋa kidiŋ ka ikijukito daŋ.” 46Nai tema Yesu, “Akatapit sek ayoŋ ituŋanan, anerae abu ayoŋ oyenu atemar alot agogoŋu aneni kaŋ.” 47Ani eanyuni aberu ŋin atemar pa apedorit iŋes akimunon ŋakiro ŋun, bu emarani, toryedik alokiŋaren Yesu. Kitatamik iŋes alokiŋaren ŋituŋa daadaŋ ŋakiro ŋuna atapya iŋes elou a Yesu ka epite ŋolo aŋaleunio iŋes atipei. 48Tolimok Yesu iŋes tema, “Nakoku, ikitaŋaleu iyoŋ anupit kon. Tolot a ekisil.” 49Ani eriŋa Yesu irworo ŋun, bu ituŋanan ice alore a Yairo, tolimok Yairo tema, “Eridak nakoku kon, tojoŋo akicanit eketataman.” 50Kiira Yesu ŋakiro ŋun, tolimok Yairo tema, “Nyikibul, nai tonup iyoŋ, eyari iŋes.” 51Ani edoli iŋes lore, nyecamak iŋes ŋituŋa alomar ka iŋes tooma kai, mati Petero, Yoana, Yakobo, Papa ka toto a ikoku. 52Kigworos daadaŋ kiworoete aŋuna a ikoku. Tolimok Yesu ikes tema, “Tojoŋoto akigworo, nyetwanit iŋes--ejotoe!” 53Tokyenatar daadaŋ iŋes, anerae ayenete atemar atwanit apese kire. 54Nai kikam Yesu akan ka apese, tonyara iŋes tema, “Nakoku, tokienyu!” 55Toyaru apese, tonyou atipei, tolimok nai Yesu ŋikekauruunak ainakin iŋes adiokimuj. 56Toumokis ŋikauruunak ka apese nooi, todaun ŋuna elimunete, nai kicik Yesu ikes tema, “Nyilimokis tari ipeituŋanan daŋ ŋuna etiyakinosi.”

Currently Selected:

Luk. 8: NIB2008

Highlight

Copy