Mar. 10
10
Kitatam Yesu ŋuna ka akilak aberu
(Mat. 19:1-12; Luk. 16:18)
1Abu Yesu torotok aina, tolot nakwap ŋina a Yudeya, todoka ekekwaye aŋolol Yorodan, totukokinos ŋasepico neni keŋ. Kitatam iŋes ikes ikwa araakar epite keŋ.
2Potu Ŋiparisayon ŋice ecamito akitem Yesu, kiŋita iŋes temasi, “Ecamakinito mono Ŋikisila yok ekile akilak akeeberu a?”
3Toboŋok iŋes tema, “Alital koloŋ ikicikakinit iyes Moses?” 4Temasi ikes, “Abu koloŋ Moses itocamak isua tema ebe epedori ekile akigir abaruwa ŋina ke elakit, tosodi nai totyakas ka aberu keŋ.”
5Nai tema Yesu ikes, “Ikigirakinit Moses iyes ŋakiciketa ŋun aŋuna ka aniniku a ŋakusitameta. 6Nai anakisyakinet akisub akwap, abu Akuj tosub ikes, ekile ka aberu. 7Aŋun, eesikini ekile papa keŋ ka toto keŋ, kimorikinos ka akeeberu. 8Toruworos ikes apeikuwan. Aŋun, nyeriŋa ikes erae ŋiarei, nai aruworosi apeikuwan. 9Aŋun, ŋulu emorik Akuj, nyitemokino idiotuŋanan etyaki.”
10Ani elomarete Yesu ka ŋikasyomak kai, kiŋita ŋikasyomak iŋes akirot ŋinapei ŋin. 11Tolimok Yesu ikes tema, “Ŋolokile daadaŋ elaki aberu keŋ, tosodi kiit aberu ace, alom iŋes ka asec alokiŋaren aberu keŋ; 12ka ani keŋer aberu ekile keŋ tocamu ekile ece, alom iŋes ka asec alokiŋaren ekile keŋ.”
Kiterereŋ Yesu ŋidwe ŋulu cicik
(Mat. 19:13-15; Luk. 18:15-17)
13Torikut ŋituŋa ŋice ŋidwe ŋulu cicik neni a Yesu ecamito iŋes kidokok ŋakeekan neni kec; nai kiŋenyakis ŋikasyomak ŋituŋa. 14Ani iŋolikini Yesu ŋikasyomak keŋ itiyaete ŋun, toŋo nooi tolimok ikes tema, “Kimyekisi ŋidwe potu neni kaŋ! Nyiretakis ikes, anerae erae Apukan ka Akuj ŋina a ŋulu ikote lu. 15Akalimokini ayoŋ iyes kire atemar, ŋinituŋanan nyijauni Apukan ka Akuj ikwa ikoku ŋini cici, nyelomari jik Napukan ŋin.” 16Totun iŋes ŋidwe, kidokok ŋakeekan neni kec, kiterereŋ.
Ekile ŋolo abarit
(Mat. 19:16-30; Luk. 18:18-30)
17Ani erotokini Yesu iwace, tomotun epeikile neni keŋ, toryedik alokiŋaren keŋ, kiŋit iŋes tema, “Eketataman ŋolo ajokan, nyo itemokino ayoŋ etiya oryamunia akiyar ŋina nyedaun?”
18Kiŋit Yesu iŋes tema, “Kaanukiro ikinyaritor iyoŋ ayoŋ ŋolo ajokan? Emam ituŋanan ŋini ajokan, mati Akuj bon. 19Iyeni iyoŋ Ŋakiciketa: ‘Nyiar, nyilom, nyikoko, nyisudi ŋakiro, nyitunae ka tokerite papa kon ka toto kon.’”
20Tema ekile ŋol, “Eketataman, ŋinapei koloŋ alokiditeu kaŋ, ericit ayoŋ Ŋakiciketa ŋun daadaŋ.”
21Kitek Yesu iŋes, tominak iŋes tema, “Ipeibore bon ikibucit iyoŋ; ape togyela ibore daadaŋ ŋini iyakar iyoŋ, tokorak ŋikulyak, iryamuni iyoŋ ebari kon anakuj.” 22Ani iirari ekile ŋol ŋakiro ŋun, torotok esiliyorit, anerae abarit iŋes nooi.
23Toŋoleŋolek Yesu, tolimok ŋikasyomak keŋ tema, “Kitotyon ŋikabarak alomar Napukan ka Akuj!”
24Toumokis ŋikasyomak keŋ aŋuna a ŋakiro a ŋun. Nai tema nabo Yesu neni kec, “Ŋidwe, kitotyon nooi ŋikabarak alomar Napukan ka Akuj. 25Epatana ekaal alomar anapedot a ŋina ke esindan, akilo ekabaran alomar Napukan ka Akuj.”
26Tobul ikes nooi, kiŋita iŋes temasi, “Ŋae bo nai eiun?”
27Kitek Yesu ikes tema, “Nyepedorosi ŋiboro ŋul alotuŋa, nai aneni ka Akuj epedorosi ŋiboro daadaŋ.”
28Kirwor Petero neni a Yesu tema, “Ikiesik isua ŋiboro daadaŋ ikiwuapak iyoŋ.”
29Tolimok Yesu ikes tema, “Akalimokini ayoŋ iyes kire atemar, emam ipei daŋ ŋini aesiki ere keŋ, ŋikaitotoi, ŋakaitotoi, toto keŋ, papa keŋ, ŋidwe kori ŋamanat aŋuna kaŋ ka aŋuna a Ŋakiro a ŋuna Ajokak, 30ŋini nyeryamuni ŋarwa amiat anakwap a na, ŋakais, ŋikaitotoi, ŋakaitotoi, atatoto, ŋidwe ka ŋamanat, nai ka ŋican daŋ. Eryamuni daŋ iŋes rwanu akiyar ŋina nyedaun. 31Nai, ŋikalalak ŋulu iŋarenete tokona, isidiyoryo; nabo ŋulu isidiyoro tokona, isiŋarenio.”
Kirwor Yesu nabo ŋuna ka atwanare keŋ
(Mat. 20:17-19; Luk. 18:31-34)
32Ani itipeete Yesu ka ŋikeekasyomak kidiama Yerusalem, kiŋarenikinite iŋes ikes. Toumokinito ikes ka tobulite daŋ ŋulu ewuapito iŋes. Tonyaraiya nai Yesu ŋulutomon ka ŋiarei nawae, tolimok ikes ŋuna epote akitiyakin neni keŋ tema, 33“Kiirasi! Ikidokari iwon tokona Yerusalem, neni ipotokinere Lokoku a Ituŋanan losacaradotin ŋulu apolok ka loketatamak a Ŋikisila. Etubokinete ikes iŋes atwanare ka ipotokinete daŋ neni a ŋituŋa a ŋulu nyerae Ŋiyudayan. 34Epote ikes akisol iŋes, kimwaanakis, kibuŋata ka toara daŋ; nai kelunyar ŋirwa ŋiuni, eyaruni iŋes.”
Akiŋiset a Yakobo ka Yoana
(Mat. 20:20-28)
35Potu Yakobo ka Yoana, ŋidwe a Sebedeo neni a Yesu temasi, “Eketataman, ikicamit isua iyoŋ ikitiyak isua ŋuna daadaŋ ikiŋisi iyoŋ.”
36Kiŋit Yesu ikes tema, “Nyo icamito iyes ayoŋ eketiyak iyes?”
37Toboŋokis ikes temasi, “Kimyekinae isua eboikinos ipei teten kon ka ipei kedyany kon apaki ŋina iboikinor iyoŋ napolou kon.”
38Tolimok Yesu ikes tema, “Nyiyenete iyes ŋuna ilipasi. Ipedorete iyes akimat ekopo ŋolo a ŋican lo ŋolo alosi ayoŋ akimat a? Kori ipedorete iyes akibatisao ikwaŋina ekebatisatere ayoŋ a?”
39Toboŋokis ikes temasi, “Ikipedori.” Tolimok Yesu ikes tema, “Ekopo ŋolo a ŋican lo ŋolo amasi ayoŋ, imasete iyes daŋ; ebatisimu ŋolo ekebatisatere ayoŋ, ikibatisaere iyes daŋ. 40Nai akiboikin teten kori kedyany kaŋ, meere ayoŋ aseuni, anerae erae ŋiwaetin ŋul ŋulu a ŋulu eseunit Akuj.”
41Ani iirarete ŋikasyomak a Yesu ŋulutomon ŋakiro ŋun, toŋoikis ikes Yoana ka Yakobo. 42Tonyarau Yesu ikes tolimok tema, “Iyenete iyes atemar ŋikepukak a ŋakwapin ipukato ŋakwapin ka adedeŋu, ka ŋulu epolokinito ikes daŋ, ipukato ka apedor. 43Nai nyitemokino ŋun totakanut aneni kus; ani ŋini ecamit apolou alokidiŋ kus, itemokino toruwor eketiyan kus. 44Nabo ŋini ecamit akiŋarenikin ŋuluce alokidiŋ kus, itemokino iŋes toruwor epito a ŋuluce a daadaŋ. 45Anerae pa abunit Lokoku a Ituŋanan akitiyanakino, nai abunit akitiyanakin ka akijal akeekiyar, toiunere ŋituŋa ŋulu alalak.”
Kitaŋaleu Yesu Batimayo
(Mat. 20:29-34; Luk. 18:35-43)
46Todolut Yesu ka ŋikeekasyomak Yeriko; ani erotokinete ikes a nen erukito ka asepic ŋina alalan, bu lokoku a Timayo ŋolo anyaritae Batimayo, ŋolo amudukana, kiboikin nawae erot ilipanar. 47Ani iirari iŋes atemar erae Yesu ŋolo a Nasaret itorunit nen, kisyak akiwor ebala, “Yesu Lokoku a Daudi, kisyoni ayoŋ!”
48Kiyayakis iŋes ŋituŋa ŋulu alalak temasi, “Kililiŋ!” Nai torebor iŋes nooi tema, “Lokoku a Daudi, kisyoni ayoŋ!”
49Towo Yesu tema, “Tonyarautu iŋes bu.” Tonyaraut nai ikes emuduk, temasi neni keŋ, “Toen etau, tonyou, ikinyaritae iyoŋ.”
50Kimasa iŋes elou keŋ, tokuraun, tolot neni a Yesu.
51Kiŋit Yesu iŋes tema, “Icamit iyoŋ ekekoki ayoŋ iyoŋ ai?”
Toboŋok emuduk tema, “Eketataman, kitekienyunae.” 52Tolimok Yesu iŋes tema, “Ape, ikitaŋaleu iyoŋ akoninupit.” Tokienyu iŋes atipei, kiwuapak Yesu alorot a ŋolo ewuapit Yesu.
Currently Selected:
Mar. 10: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
