Mar. 13

Kirwor Yesu epite ŋolo inyasunere Akai ka Akuj

(Mat. 24:1-2; Luk. 21:5-6)

1Ani elomuni Yesu alo Kai ka Akuj, tema epei alokasyomak keŋ, “Eketataman, kiŋolik! Okoe kibusyata ŋamoru nu ka ŋaduketa!”

2Tema Yesu iŋes, “Ite iyoŋ ŋaduketa ŋuna apolok nu a? Emam amoru apei daŋ ŋina idoŋi kidiama ŋinace nyeukoro.”

Ŋican ŋulu eponito alokiŋaren

(Mat. 24:3-14; Luk. 21:7-19)

3Ŋolopite eboiyo Yesu alomoru a ŋikito a ŋulu enyaritae Olipa, a ŋolo eteosi ka Akai ka Akuj, kiŋita Petero, Yakobo, Yoana ka Anderia iŋes aneni kec bon temasi, 4“Tolimokinae isua apaki ŋina etakanuniata ŋakiro ŋun, nyo itoodiuni atemar adol akoloŋit ŋina a ŋakiro a ŋun?”

5Tolimok Yesu ikes tema, “Tocoikinito nyikimodik idiotuŋanan iyes. 6Anerae epote ŋikalalak irworosi alokiro kaŋ ebasi, ‘Arae ayoŋ Kristo!’ Emodikinete ka itooliyorete ŋikalalak. 7Ani iirarete iyes ŋijiyesyo ka ŋiemuto ŋulu a ŋijiyesyo, nyikibul, anerae itemokino ŋul totakanut, nai nyitoodiunito ikes asalunet. 8Ejikinosi ŋituŋa ŋulu ka akwap kaapei ka ŋulu ka akwap a ŋinace, ejikin apukan ka apukan, emaranikini akwap anakiboisyo a ŋuna egelegelya ka eyakaun ŋironia. Erae ŋin akisyakinet a ŋican, ikwaŋina egeunia aberu aryeba edoli akidoun.

9“Tocoito iyes, anerae epote ikes arikor iyes loikiikoe ka ikibuŋaete alosinagogae. Ikitowuoyo iyes alokiŋaren ŋikepukak ka ŋikapolok ŋice daŋ aŋuna kaŋ. Apaki ŋin, iŋes iruworotor iyes ŋisuudae kaŋ. 10Nai itemokino mono kitatamae Ŋakiro ŋuna Ajokak nakwapin daadaŋ. 11Ani ikirikorete ikes iyes loikiiko, nyiberakinosi akiyaloloŋ ikotere ŋuna ilosete iyes alimokin ikes. Nai kirworo ŋuna ikiinakinio iyes akirwor apaki ŋina ikiinere iyes akirworikin, anerae meere iyes irworosi, nai Etau ŋolo Asegan. 12Ebuni lokaato akipotor lokaato keŋ toarae, papa daŋ ipotori ikeekoku; isyakinete ŋidwe akisubura ŋikecekauruunak ka ipotorete ikes toarae. 13Ikiŋerete iyes ŋituŋa daadaŋ aŋuna ke ekaakiro; nai ŋini etitinyikini tari nasalunet, eiunio.”

Akinyasuno a Yerusalem

(Mat. 24:15-28; Luk. 21:20-24)

14“Iŋolikinete iyes asiilyo etakanuni neni nyitemokino etakanunia. (Itemokino ŋini esyomi toyenu apolou a ŋakiro a ŋun!) Apaki ŋin, itemokino ŋulu eyakasi Yudeya, toema lomoru. 15Ituŋanan ŋini eyai kidiama akai, nyedoku kwap, kori nyeloma alemun idiobore alokai keŋ. 16Ituŋanan ŋini eyai lomanikor, itemokino nyeboŋu lore alemun elou keŋ. 17Erokyarosi ŋakiro aneni a ŋaberu a ŋuna epotiyete kori itanakete alorwa a ŋul. 18Kilipa nyetakanut ŋun ŋirwa ŋulu ka alilimu. 19Anerae alorwa a ŋul, eyakaunosi ŋakisicaneta ŋuna nyetakanuna ŋinapei koloŋ kesubia Akuj ŋiboro daadaŋ anakwap tari tokona; kori nyepote nabo jik ŋican ŋulu ikote ŋul. 20Kerae nyituuruwuanit Akuj ŋirwa ŋul, kemam ituŋanan epuun. Nai aŋuna aminar Akuj ŋulu aseunit iŋes, abu kituuruwuan ŋirwa ŋul.

21“Ani kikilimok iyes ituŋanan tema, ‘Kiŋolikisi, Kristo iŋes lo,’ kori ‘Kiŋolikisi, iŋes ye’, nyinupa ŋakiro keŋ. 22Anerae epote ŋikamodyanakinak ka ŋikadwarak ŋulu amodiyanak ebasi ebe ikirae ikes atakristo. Epote ikes akitiya ŋakitoodyanakineta ŋuna ailiilok ŋuna isuparete ŋituŋa ŋulu seuna erae kepedorete. 23Tocoikinito! Adau ayoŋ alimokin iyes ŋakiro daadaŋ eriŋa ŋirwa ŋul nyedoluno.”

Abunore a Lokoku a Ituŋanan

(Mat. 24:29-31; Luk. 21:25-28)

24“Nai alorwa a ŋul, kelunyar ŋican, isiryonio akoloŋ ka nyecauni elap. 25Ecakunosi ŋikacer anakuj, emaranikinete ŋisubuna daadaŋ ŋulu eya kidiama. 26Apaki ŋin, iŋolikinete ŋituŋa Lokoku a Ituŋanan ebunit alodowuon ka apedor a ŋina apolon ka akica keŋ. 27Ebuni iŋes akiyakiyar ŋimalaikan acunakin ŋituŋa daadaŋ ŋulu seuna alowaetin ka akwap a daadaŋ, ameun anakisyakinet tari nasalunet.”

Akitatamet ŋina ke ebobore

(Mat. 24:32-35; Luk. 21:29-33)

28“Toyenutu akitatamet ŋina ke ebobore. Ŋolopite ipuriteunioto ka elibuniata ŋakwii ŋuna a ŋaten keŋ, iyenunete iyes atemar aapuu akamu. 29Ikwaŋinapei, iyes daŋ ŋina iŋolikiniata ŋakiro ŋun etakanunete, toyenutu atemar aapuu Lokoku a Ituŋanan, adolu lokekia kus. 30Akalimokini ayoŋ iyes kire atemar, nyelunyar anyamet na eriŋa nyetakanuna ŋakiro ŋun daadaŋ. 31Edaunosi nakuj ka akwap, nai nyedaunosi ŋakaakiro jik.”

Emam ituŋanan ŋini eyeni apaki ŋina esalunia akwap

(Mat. 24:36-44)

32“Nai, ŋuna ka Akoloŋit a ŋin, kori ke esaa a ŋol, emam ituŋanan eyeni, nyeyenete tari ŋimalaikan ŋulu ka Akuj, kori Lokoku daŋ, nai mati Papa bon. 33Tocoito, tokienyete, anerae nyiyenete apaki ŋina edolunio esaa ŋol. 34Ikoni apaki ŋin ituŋanan ŋini anyouni alore keŋ, tolot iwace, kimyek ekeere, inak ŋiketiyak keŋ apedor, ŋoloketiyan ekeetic. Kicikak eketen ekidor akikieny apaki daadaŋ. 35Tokienyete nai, anerae nyiyenete iyes apaki ŋina eboŋunio elope ŋolo ke ere; kerae eboŋ, kori kidiŋ akuwar, kori ebai, kori taparacu. 36Ikotere ani kebu iŋes atipei, nyikiryamu iyes ijotoete. 37Ŋuna akalimok ayoŋ iyes, alimok ŋituŋa daadaŋ. Tokienyete!”

Currently Selected:

Mar. 13: NIB2008

Highlight

Copy