Mar. 16

Ayarun a Yesu

(Mat. 28:1-8; Luk. 24:1-12; Yoa. 20:1-10)

1Ani kelunyar akoloŋit ŋina a Sabato, togyelut Maria Magadalena ka Maria toto a Yakobo, ta Salome akimyet ŋina akukunyon, ikotere kiwosyata akuwan a Yesu. 2Ani taparacu Esabit ipiripiriuni akoloŋ, toloto ikes nalyal. 3Kirworos alorot make ebasi, “Ŋae ikiŋarakini iwon akikokoriyor amoru alokek ka alyal?” 4Ani nai ireorete ikes kidiama, toanyuwasi amoru kikokoriyor nawae, torae bo amoru ŋina apol nooi. 5Toloto jik, ani elomarete ikes nalyal, toanyuwasi ekile ŋolo sorokit iboi alowae a ŋolo aloteten, enapit elou ŋolo akwaŋan kya. Tobul ikes nooi.

6Tolimok iŋes ikes tema, “Nyikibul! Ayeni ayoŋ atemar, iwarito iyes Yesu ŋolo a Nasaret, ŋolo ebubukinitoe lomusalaba. Ayaru iŋes, emam a ne. Kiŋolikisi neni eperikinitoe iŋes. 7Nai toloto, tolimokisi ŋikeekasyomak ka Petero atemar, ‘Elosi iŋes Galileya, ikiŋarenikini iyes! Iryamunete iŋes aina, ikwapei ikilimokinitor iŋes iyes.’ ”

8Kelomasi ikes kiŋa, toema analyal, anerae amaranete ka tobulite daŋ. Nyelimokis ikes idiotuŋanan ŋakiro ŋun, anerae abulit ikes nooi.

Totakanu Yesu neni a Maria Magadalena

(Mat. 28:9-10; Yoa. 20:11-18)

[ 9Ani keyaru Yesu taparacu akoloŋit ŋina ke Esabit, totakanu iŋes neni a Maria Magadalena ŋina eritari iŋes ŋipyan ŋikanikaarei aneni keŋ. 10Tolot iŋes, tolimok ŋirukitos keŋ ŋulu egworosi ka kiyaloloŋete daŋ. 11Ani iirarete ikes Maria Magadalena ebala, “Ayaru Yesu, eŋolik ayoŋ”, nyenupa ikes ŋakiro keŋ.

Totakanu Yesu neni a ŋikasyomak a ŋiarei

(Luk. 24:13-35)

12Ekaku, totakanu Yesu egelaana neni a ŋuluarei, apaki ŋina alosyoto ikes alorot. 13Toloto ikes tolimokis ŋuluce, nai nyenupa ikes daŋ.

Totakanu Yesu neni a ŋikasyomak a ŋulutomon ka epei

(Mat. 28:16-20; Luk. 24:36-49; Yoa. 20:19-23; Ŋitic. 1:6-8)

14Ekaku, abu Yesu totakanu neni a ŋikasyomak keŋ a ŋulutomon ka epei apaki ŋina emujata. Kisibura iŋes ikes aŋuna pa anupitotor ka aŋuna ka aniniku a ŋatameta kec, anerae nyenupa ikes ŋakiro a ŋulu kepotu toanyut iŋes eyaruni. 15Tolimok Yesu ikes tema, “Apesi nakwapin daadaŋ, kitatama ŋituŋa daadaŋ Ŋakiro ŋuna Ajokak ŋuna ka Akuj. 16Ituŋanan ŋini enupi kibatisae, eiunio, nai ŋini nyenupi, etubokinio. 17Ŋakujuwuanisya ŋuna einakinio ŋikanupak akitiya ikes nu: iritanarete ikes ŋipyan alokiro kaŋ, epedorete erwor ŋaŋajepa ŋuna kitet; 18ikamunete ikes ŋimuno a ŋakecekan, kemata ikes tari ibore ŋini aaran, nyewani ikes jik; idokokinete ŋakecekan lokadyakak, kitaŋaleut.”

Adokar a Yesu nakuj

(Luk. 24:50-53; Ŋitic. 1:9-11)

19Kedau Ekapolon Yesu erwori neni kec, aponi yae iŋes nakuj, kiboikin nakan ŋina aloteten Akuj. 20Toloto ŋikasyomak alimonokin Ŋakiro ŋuna Ajokak lobukui daadaŋ, kitiyata ikes ka Ekapolon kaapei, kitoodiun daŋ akitatam kec erae ŋina iyookino aŋuna a ŋakujuwuanisya a ŋuna etiyaete ikes.]

Currently Selected:

Mar. 16: NIB2008

Highlight

Copy