Ekim. 12
12
Tolilikis Aron ka Miriam Moses
1Apaki ŋina alomitotor Ŋisirael Aseros, kirworo Miriam ka Aron itoroniarito Moses aŋuna abunio iŋes kiisya aberu ŋina abunit alo Kusi (anerae abu iŋes kiit aberu ŋina arae Akusait). 2Temasi ikes, “Erwor mono Ekapolon aneni a Moses bon a? Nyirworit mono iŋes aneni kosi daŋ a?” Abu Ekapolon kiira ŋakiro ŋun. 3Arae Moses ituŋanan ŋini etiditeuna bon nooi akilo ŋituŋa daadaŋ anakwap. 4Apaki ŋinapei, tolimok Ekapolon Moses, Aron ka Miriam tema, “Potu kiŋa iyes ŋuluuni, potu loeema ŋolokilipet.” Aŋun, apotu ikes ŋiuni potu kiŋa. 5Abu nai Ekapolon bu neni kec eyai nadis, towo alopuke ke eema a ŋolokilipet, tosodi tonyara Aron ka Miriam, ido toloto ŋuluarei ŋul kiŋaren. 6Tema Ekapolon, “Kiirasi ŋakiro kaŋ nu:
Ani eyakasi ŋikadwarak kidiŋ kus,
ayoŋ Ekapolon, atakanikini neni kec,
erworo ayoŋ neni kec anakirujaeta.
7Nyikote ŋakiro nen aneni a eketiyan kaŋ Moses;
icikakinitae iŋes akiyok ŋituŋa kaŋ daadaŋ.
8Erworo ayoŋ neni keŋ iteoi ŋireetin,
ileerete ŋakiro, meere a ŋakitadapeta, ekete iŋes ayoŋ.
“Kaanukiro nai pa ikeritotor iyes akirwor itoroniarito eketiyan kaŋ Moses?” 9Toŋoik Ekapolon ikes nooi, ido tolot.
10Ani eakari adis alokidiama eema ŋolokilipet, abu atapon kikam Miriam, abu akuwan keŋ tokwaŋiar kikwaanikin ka ŋalepan. Ani iŋoliyari Aron neni a Miriam, kiŋolik atemar kikamu atapon Miriam. 11Tema nai Aron neni a Moses, “Okoe ekapolon kaŋ, nyikisican isua aŋuna ka asecit a ŋina etiyae isua aŋuna ka abaŋao. 12Nyimyek Miriam ikwaanikin ka ikoku ŋini idounio eriŋa apaki keŋ, ŋini emunaara akuwan keŋ epeiwae daadaŋ apaki ŋina elomunia iŋes anakook a toto keŋ.” 13Abu nai Moses kikaloik Ekapolon tema, “Okoe Akuj, kitoŋaleu kare ca iŋes.” 14Nai toboŋok Ekapolon Moses tema, “Ani kerae kimwaakinete papa keŋ iŋes loreet, pa mono kidaŋidaŋit iŋes ŋileec keŋ ŋirwa ŋikanikaarei a? Kimyek togoloroe iŋes kiŋa alomar ŋirwa ŋikanikaarei, ani elunyar ŋirwa ŋul kinyakunae iŋes nalomar.” 15Aŋun, aponi togoloroe Miriam kiŋa alomar ŋirwa ŋikanikaarei, ido apotu ŋituŋa nyewotokis a nen akitodol ŋina enyakunere Miriam nalomar. 16Kedaun akinyakun Miriam nalomar, towotokis Ŋisirael alo Aseros, ido toloma naloŋisat ŋina a Paran.
Currently Selected:
Ekim. 12: NIB2008
Highlight
Share
Compare
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.