Ekim. 15
15
Ŋainakineta ŋuna egelegelya
1Kirwor Ekapolon neni a Moses tema, 2“Tolimok Ŋisirael ŋakiro nu, ‘Ani idolete iyes nakwap ŋina moi iboiyoto iyes, ŋina akainakini ayoŋ iyes, 3ido inakis neni ke Ekapolon ainakinet ŋina epeyo ŋina elemunitae alosipan a ŋaatuk, kori alosipan a ŋamesekin, kerae ainakinet ŋin ŋina epeyo, kori amuronot aŋuna ka akisiyookin akikoŋet, kori ainakinet ŋina elemunit ituŋanan ka acamit keŋ, kori aŋuna a ŋasuban a ŋuna etubunitoe; 4ituŋanan daadaŋ ŋini einakini Ekapolon ainakinet ŋina ikoni ŋin, emaikina iŋes inak kaapei ka ainakinet ŋina a ŋikinyom. Emaikina ainakinet ŋina a ŋikinyom erae akilo apei ŋina a ŋakirya a ŋuna ajokak nooi a ŋuna iguritoe a akimyet a ŋina erae elita epei. 5Nabo daŋ emaikina iyes inakis Ekapolon elita epei ŋolo ke epiini, erae ainakinet ŋina emasyo, yaunae kaapei ka ainakinet ŋina epeyo, kori kaapei ka amuronot aŋuna a ŋinimesek. 6Ani erae emesek erae ainakinet, emaikina inakinae kaapei ka ainakinet ŋina a ŋikinyom ŋina erae ŋakirya ŋakiloi ŋaarei, ŋuna iguritoe a akimyet a ŋina erae elita epei ka atutubet, 7kaapei ka elita epei ka atutubet ŋolo a epiini erae ainakinet ŋina emasyo. Ebob eure a ŋainakineta a ŋun aneni ke Ekapolon. 8Ani ilemunete iyes emoŋ erae ainakinet neni ke Ekapolon ŋina epeyo, kori amuronot aŋuna ka akisiyookinio akikoŋet, kori erae ainakinet ŋina ke ekisil, 9emaikina inakinae kaapei ka ainakinet ŋina a ŋikinyom ŋina erae ŋakirya ŋakiloi ŋauni ŋuna iguritoe a akimyet a ŋina erae ŋilitae ŋiarei, 10kaapei ka ŋilitae ŋiarei ŋulu ke epiini ikwapei ainakinet ŋina emasyo. Ebob eure a ŋainakineta a ŋun aneni ke Ekapolon.
11“‘Emaikina kitiyae ŋun aŋuna a ŋolomoŋ, kori aŋuna a ŋolomesek, aŋuna a ikale a ŋinimesek, kori aŋuna a ŋinimeot. 12Kitiyata ŋun aŋuna a ŋinibarasit iyaunete iyes erae ainakinet neni ke Ekapolon. 13Ituŋanan ŋini erae Isiraelit daadaŋ, emaikina kitiya ŋun alopite a ŋolopei a ŋol, ŋina einakinia iŋes neni ke Ekapolon ainakinet ŋina epeyo, ainakinet ŋina ebob eure keŋ aneni ke Ekapolon. 14Ituŋanan ŋinigelaanot ŋini iboiyete kaapei ka iyes, kori ŋini ecamit akiboi kaapei ka iyes jik, ido tocamite ainakin ainakinet ŋina epeyo, ainakinet ŋina ebob eure keŋ aneni ke Ekapolon, epedori akitiya ŋun lopite ŋolo itiyaata iyes. 15Nai aŋuna ka atukot, erae ekisil epei aŋuna kus a daadaŋ Ŋisirael ka ŋigelaanotin ŋulu iboiyete ka iyes, erae ekisil ŋolo a ŋikaru ka ŋikaru ananyameta kus a daadaŋ; iruworosi iyes Ŋisirael ka ŋulugelaanotin ŋipei alokiŋaren Ekapolon. 16Iyakaunotor iyes Ŋisirael kaapei ka ŋigelaanotin ŋulu iboiyoto iyes ekisil epei ka ŋakiro ŋuna etubunitoe ŋapei.’ ”
17Kirwor Ekapolon neni a Moses tema, 18“Tolimok Ŋisirael ŋakiro nu, ‘Kidaut iyes alomar nakwap ŋina tokona akayait ayoŋ iyes, 19ani inyamete iyes akimuj a akwap a ŋin, emaikina iyes iinakis ace erae ainakinet neni ke Ekapolon. 20Anamuret a ŋakirya a ŋuna igeunete iyes amurakin, emaikina iyes inakis Ekapolon abopulo ŋina esyaunan. Iinakinete iyes iŋes lopite ŋolo einakinere ainakinet ŋina a ŋikinyom a ŋulu isyaunio aramun analos. 21Ananyameta kus a daadaŋ, emaikina iinakis Ekapolon ainakinet anakirya a ŋuna igeunete iyes amurakin.
22“‘Nai ani pa kiredakis iyes akimyekin ŋakiciketa ŋun daadaŋ ŋuna alimoki Ekapolon Moses, 23ŋakiro daadaŋ ŋuna ikicik iyes Ekapolon aneni a Moses, ameun anakoloŋit a ŋina alimunio Ekapolon ŋakiro ŋun tari rwanu ananyameta kus a ŋuna eponito, 24ani pa kiredakinitae akitiya ŋun nyeyeni atukot, einakini atukot daadaŋ ibarasit ŋinisorokit erae ainakinet ŋina epeyo, ŋina ebob eure keŋ aneni ke Ekapolon, yaunae kaapei ka ainakinet keŋ ŋina a ŋikinyom ta ainakinet ŋina a ŋimaten, ikwapei etubunitere; emaikina yaunae ekoroe ikwapei ainakinet aŋuna ka asecit. 25Emaikina esacaradoti tomooku atukot a Ŋisirael a daadaŋ, ido isyonio ikes, anerae pa eredakinete ikes akiŋer akiwuap ŋakiciketa a Ekapolon, tosodi adaut ikes ayaun neni ke Ekapolon ainakinet kec ŋina epeyo kaapei ka ainakinet kec aŋuna ka asecit neni ke Ekapolon aŋuna ka adyakaret kec. 26Isyonio atukot a Ŋisirael daadaŋ kaapei ka ŋituŋa ŋulugelaanotin ŋulu iboiyoto ikes, anerae apotu ŋituŋa daadaŋ todyakasi.
27“‘Ituŋanan ŋini eseci pa iredakinit, emaikina inak neni ke Ekapolon akale ŋinameot ŋina erae apolou keŋ ekaru epei erae ainakinet aŋuna ka asecit. 28Emookuni nai esacaradoti ituŋanan ŋin alokiŋaren Ekapolon aŋuna ka adyakaret keŋ a ŋina pa eredakini akitiya, isyonio nai ituŋanan ŋin asecit keŋ. 29Aŋuna a ŋinituŋanan daadaŋ a ŋini eseci pa eyeni, kerae Esiraelit, kori igelaanot erae ekisil epei ŋolo emookunere ituŋanan ŋini edyakarit. 30Nai ituŋanan daadaŋ ŋini iredakini akisec, kerae Esiraelit, kori igelaanot, adau akiyany Ekapolon, aŋun etyakaryo iŋes alotuŋa. 31Aŋuna ajamuwarya iŋes akirot ke Ekapolon ka aŋuna aŋeryo akiwuap akiciket keŋ, emaikina ituŋanan ŋin totyakarae jik alotuŋa, ido kidaŋidaŋ iŋes ekaile aŋuna ka asecit keŋ.’”
Akisicanet aŋuna pa ericakinitere akoloŋit ŋina a Sabato
(Awos. 31:12-17)
32Apaki ŋina ayakatar Ŋisirael naloŋisat, apotu ikes toryamut Esiraelit epei ikeyeni ŋakito akoloŋit ŋina a Sabato. 33Apotu ŋulu aryamunete ekile ŋol ikayeni ŋakito yaut iŋes neni a Moses ka Aron ta natukot daadaŋ ŋina a Ŋisirael. 34Apotu ikes togolokis iŋes kai, anerae pa ayenete ikes ŋuna amaikina kitiyae neni keŋ. 35Abu nai Ekapolon tolimok Moses tema, “Emaikina ekile ŋol toarae, ecakete ŋituŋa daadaŋ iŋes a ŋamoru alokiŋaren alomar.” 36Abu nai atukot a Ŋisirael a daadaŋ yaut ekile ŋol kiŋa alomar, tocaka iŋes a ŋamoru, lopite ŋolo sek ecikitor Ekapolon Moses.
Ŋabilet a ŋilowi
37Tolimok Ekapolon Moses tema, 38“Kirwor neni a Ŋisirael ebe, ‘Emaikina ŋituŋa kiwuakis ŋabilet lokoonae a ŋilowi kec, emaikina ikes kitiyata ŋun ananyameta kec a daadaŋ ka emaikina ikes todonyokis ausi ŋinapus ŋolokoona a ŋabileta a ŋilowi kec. 39Erae abilet ŋin ŋina ani iŋolikinete iyes iŋes totamut ŋakiciketa daadaŋ ŋuna ke Ekapolon ka kiricakis ikes, ido nyiwuapa ekibure a ŋitai kus, kori ekibure a ŋakonyen kus, 40aŋun irubakinete iyes itamunito ka iwuapito ŋakiciketa, ido iruworosi iyes ŋulu asegak aneni ka Akuj kus. 41Arae ayoŋ Ekapolon Akuj kus ŋina akayauni iyes anakwap a Ijipit, ikotere ayoŋ aruwor Akuj kus. Arae ayoŋ Ekapolon Akuj kus.’ ”
Currently Selected:
Ekim. 15: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.